ಋಭುಗೀತಾ ೨೮ ॥ ಆತ್ಮ-ವೈಲಕ್ಷಣ್ಯ ಪ್ರಕರಣಮ್ ॥
ಋಭುಃ -
- ಬ್ರಹ್ಮೈವಾಹಂ ಚಿದೇವಾಹಂ ನಿರ್ಮಲೋಽಹಂ ನಿರನ್ತರಃ ।
- ಶುದ್ಧಸ್ವರೂಪ ಏವಾಹಂ ನಿತ್ಯರೂಪಃ ಪರೋಽಸ್ಮ್ಯಹಮ್ ॥ ೧॥
- ನಿತ್ಯನಿರ್ಮಲರೂಪೋಽಹಂ ನಿತ್ಯಚೈತನ್ಯವಿಗ್ರಹಃ ।
- ಆದ್ಯನ್ತರೂಪಹೀನೋಽಹಮಾದ್ಯನ್ತದ್ವೈತಹೀನಕಃ ॥ ೨॥
- ಅಜಸ್ರಸುಖರೂಪೋಽಹಂ ಅಜಸ್ರಾನನ್ದರೂಪವಾನ್ ।
- ಅಹಮೇವಾದಿನಿರ್ಮುಕ್ತಃ ಅಹಂ ಕಾರಣವರ್ಜಿತಃ ॥ ೩॥
- ಅಹಮೇವ ಪರಂ ಬ್ರಹ್ಮ ಅಹಮೇವಾಹಮೇವ ಹಿ ।
- ಇತ್ಯೇವಂ ಭಾವಯನ್ನಿತ್ಯಂ ಸುಖಮಾತ್ಮನಿ ನಿರ್ಮಲಃ ॥ ೪॥
- ಸುಖಂ ತಿಷ್ಠ ಸುಖಂ ತಿಷ್ಠ ಸುಚಿರಂ ಸುಖಮಾವಹ ।
- ಸರ್ವವೇದಮನನ್ಯಸ್ತ್ವಂ ಸರ್ವದಾ ನಾಸ್ತಿ ಕಲ್ಪನಮ್ ॥ ೫॥
- ಸರ್ವದಾ ನಾಸ್ತಿ ಚಿತ್ತಾಖ್ಯಂ ಸರ್ವದಾ ನಾಸ್ತಿ ಸಂಸೃತಿಃ ।
- ಸರ್ವದಾ ನಾಸ್ತಿ ನಾಸ್ತ್ಯೇವ ಸರ್ವದಾ ಜಗದೇವ ನ ॥ ೬॥
- ಜಗತ್ಪ್ರಸಙ್ಗೋ ನಾಸ್ತ್ಯೇವ ದೇಹವಾರ್ತಾ ಕುತಸ್ತತಃ ।
- ಬ್ರಹ್ಮೈವ ಸರ್ವಚಿನ್ಮಾತ್ರಮಹಮೇವ ಹಿ ಕೇವಲಮ್ ॥ ೭॥
- ಚಿತ್ತಮಿತ್ಯಪಿ ನಾಸ್ತ್ಯೇವ ಚಿತ್ತಮಸ್ತಿ ಹಿ ನಾಸ್ತಿ ಹಿ ।
- ಅಸ್ತಿತ್ವಭಾವನಾ ನಿಷ್ಠಾ ಜಗದಸ್ತಿತ್ವವಾಙ್ಮೃಷಾ ॥ ೮॥
- ಅಸ್ತಿತ್ವವಕ್ತಾ ವಾರ್ತಾ ಹಿ ಜಗದಸ್ತೀತಿ ಭಾವನಾ ।
- ಸ್ವಾತ್ಮನೋಽನ್ಯಜ್ಜಗದ್ರಕ್ಷಾ ದೇಹೋಽಹಮಿತಿ ನಿಶ್ಚಿತಃ ॥ ೯॥
- ಮಹಾಚಣ್ಡಾಲ ಏವಾಸೌ ಮಹಾವಿಪ್ರೋಽಪಿ ನಿಶ್ಚಯಃ ।
- ತಸ್ಮಾದಿತಿ ಜಗನ್ನೇತಿ ಚಿತ್ತಂ ವಾ ಬುದ್ಧಿರೇವ ಚ ॥ ೧೦॥
- ನಾಸ್ತಿ ನಾಸ್ತೀತಿ ಸಹಸಾ ನಿಶ್ಚಯಂ ಕುರು ನಿರ್ಮಲಃ ।
- ದೃಶ್ಯಂ ನಾಸ್ತ್ಯೇವ ನಾಸ್ತ್ಯೇವ ನಾಸ್ತಿ ನಾಸ್ತೀತಿ ಭಾವಯ ॥ ೧೧॥
- ಅಹಮೇವ ಪರಂ ಬ್ರಹ್ಮ ಅಹಮೇವ ಹಿ ನಿಷ್ಕಲಃ ।
- ಅಹಮೇವ ನ ಸನ್ದೇಹಃ ಅಹಮೇವ ಸುಖಾತ್ ಸುಖಮ್ ॥ ೧೨॥
- ಅಹಮೇವ ಹಿ ದಿವ್ಯಾತ್ಮಾ ಅಹಮೇವ ಹಿ ಕೇವಲಃ ।
- ವಾಚಾಮಗೋಚರೋಽಹಂ ವೈ ಅಹಮೇವ ನ ಚಾಪರಃ ॥ ೧೩॥
- ಅಹಮೇವ ಹಿ ಸರ್ವಾತ್ಮಾ ಅಹಮೇವ ಸದಾ ಪ್ರಿಯಃ ।
- ಅಹಮೇವ ಹಿ ಭಾವಾತ್ಮಾ ಅಹಂ ವೃತ್ತಿವಿವರ್ಜಿತಃ ॥ ೧೪॥
- ಅಹಮೇವಾಪರಿಚ್ಛಿನ್ನ ಅಹಮೇವ ನಿರನ್ತರಃ ।
- ಅಹಮೇವ ಹಿ ನಿಶ್ಚಿನ್ತ ಅಹಮೇವ ಹಿ ಸದ್ಗುರುಃ ॥ ೧೫॥
- ಅಹಮೇವ ಸದಾ ಸಾಕ್ಷೀ ಅಹಮೇವಾಹಮೇವ ಹಿ ।
- ನಾಹಂ ಗುಪ್ತೋ ನ ವಾಽಗುಪ್ತೋ ನ ಪ್ರಕಾಶಾತ್ಮಕಃ ಸದಾ ॥ ೧೬॥
- ನಾಹಂ ಜಡೋ ನ ಚಿನ್ಮಾತ್ರಃ ಕ್ವಚಿತ್ ಕಿಞ್ಚಿತ್ ತದಸ್ತಿ ಹಿ ।
- ನಾಹಂ ಪ್ರಾಣೋ ಜಡತ್ವಂ ತದತ್ಯನ್ತಂ ಸರ್ವದಾ ಭ್ರಮಃ ॥ ೧೭॥
- ಅಹಮತ್ಯನ್ತಮಾನನ್ದ ಅಹಮತ್ಯನ್ತನಿರ್ಮಲಃ ।
- ಅಹಮತ್ಯನ್ತವೇದಾತ್ಮಾ ಅಹಮತ್ಯನ್ತಶಾಙ್ಕರಃ ॥ ೧೮॥
- ಅಹಮಿತ್ಯಪಿ ಮೇ ಕಿಞ್ಚಿದಹಮಿತ್ಯಪಿ ನ ಸ್ಮೃತಿಃ ।
- ಸರ್ವಹೀನೋಽಹಮೇವಾಗ್ರೇ ಸರ್ವಹೀನಃ ಸುಖಾಚ್ಛುಭಾತ್ ॥ ೧೯॥
- ಪರಾತ್ ಪರತರಂ ಬ್ರಹ್ಮ ಪರಾತ್ ಪರತರಃ ಪುಮಾನ್ ।
- ಪರಾತ್ ಪರತರೋಽಹಂ ವೈ ಸರ್ವಸ್ಯಾತ್ ಪರತಃ ಪರಃ ॥ ೨೦॥
- ಸರ್ವದೇಹವಿಹೀನೋಽಹಂ ಸರ್ವಕರ್ಮವಿವರ್ಜಿತಃ ।
- ಸರ್ವಮನ್ತ್ರಃ ಪ್ರಶಾನ್ತಾತ್ಮಾ ಸರ್ವಾನ್ತಃಕರಣಾತ್ ಪರಃ ॥ ೨೧॥
- ಸರ್ವಸ್ತೋತ್ರವಿಹೀನೋಽಹಂ ಸರ್ವದೇವಪ್ರಕಾಶಕಃ ।
- ಸರ್ವಸ್ನಾನವಿಹೀನಾತ್ಮಾ ಏಕಮಗ್ನೋಽಹಮದ್ವಯಃ ॥ ೨೨॥
- ಆತ್ಮತೀರ್ಥೇ ಹ್ಯಾತ್ಮಜಲೇ ಆತ್ಮಾನನ್ದಮನೋಹರೇ ।
- ಆತ್ಮೈವಾಹಮಿತಿ ಜ್ಞಾತ್ವಾ ಆತ್ಮಾರಾಮೋವಸಾಮ್ಯಹಮ್ ॥ ೨೩॥
- ಆತ್ಮೈವ ಭೋಜನಂ ಹ್ಯಾತ್ಮಾ ತೃಪ್ತಿರಾತ್ಮಸುಖಾತ್ಮಕಃ ।
- ಆತ್ಮೈವ ಹ್ಯಾತ್ಮನೋ ಹ್ಯಾತ್ಮಾ ಆತ್ಮೈವ ಪರಮೋ ಹ್ಯಹಮ್ ॥ ೨೪॥
- ಅಹಮಾತ್ಮಾಽಹಮಾತ್ಮಾಹಮಹಮಾತ್ಮಾ ನ ಲೌಕಿಕಃ ।
- ಸರ್ವಾತ್ಮಾಹಂ ಸದಾತ್ಮಾಹಂ ನಿತ್ಯಾತ್ಮಾಹಂ ಗುಣಾನ್ತರಃ ॥ ೨೫॥
- ಏವಂ ನಿತ್ಯಂ ಭಾವಯಿತ್ವಾ ಸದಾ ಭಾವಯ ಸಿದ್ಧಯೇ ।
- ಸಿದ್ಧಂ ತಿಷ್ಠತಿ ಚಿನ್ಮಾತ್ರೋ ನಿಶ್ಚಯಂ ಮಾತ್ರಮೇವ ಸಾ ।
- ನಿಶ್ಚಯಂ ಚ ಲಯಂ ಯಾತಿ ಸ್ವಯಮೇವ ಸುಖೀ ಭವ ॥ ೨೬॥
- ಶಾಖಾದಿಭಿಶ್ಚ ಶ್ರುತಯೋ ಹ್ಯನನ್ತಾ-
- ಸ್ತ್ವಾಮೇಕಮೇವ ಭಗವನ್ ಬಹುಧಾ ವದನ್ತಿ ।
- ವಿಷ್ಣ್ವಿನ್ದ್ರಧಾತೃರವಿಸೂನ್ವನಲಾನಿಲಾದಿ
- ಭೂತಾತ್ಮನಾಥ ಗಣನಾಥಲಲಾಮ ಶಮ್ಭೋ ॥ ೨೭॥
- ॥ ಇತಿ ಶ್ರೀಶಿವರಹಸ್ಯೇ ಶಙ್ಕರಾಖ್ಯೇ ಷಷ್ಠಾಂಶೇ ಋಭುನಿದಾಘಸಂವಾದೇ ಆತ್ಮವೈಲಕ್ಷಣ್ಯಪ್ರಕರಣಂ ನಾಮ ಅಷ್ಟಾವಿಂಶೋಽಧ್ಯಾಯಃ ॥
Special Thanks
The Sanskrit works, published by Sri Ramanasramam, have been approved to be posted on sanskritdocuments.org by permission of Sri V.S. Ramanan, President, Sri Ramanasramam.
Credits
Encoded by Anil Sharma anilandvijaya at gmail.com
Proofread by Sunder Hattangadi and Anil Sharma
https://sanskritdocuments.org
Send corrections to sanskrit at cheerful.com