ಋಭುಗೀತಾ ೨೫ ॥ ಬ್ರಹ್ಮಣಃ ಸರ್ವ-ರೂಪತ್ವ ನಿರೂಪಣ ಪ್ರಕರಣಮ್ ॥

ಋಭುಃ -

• ವಕ್ಷ್ಯೇ ಪ್ರಸಿದ್ಧಮಾತ್ಮಾನಂ ಸರ್ವಲೋಕಪ್ರಕಾಶಕಮ್ ।
• ಸರ್ವಾಕಾರಂ ಸದಾ ಸಿದ್ಧಂ ಸರ್ವತ್ರ ನಿಬಿಡಂ ಮಹತ್ ॥ ೧॥
• ತದ್ಬ್ರಹ್ಮಾಹಂ ನ ಸನ್ದೇಹ ಇತಿ ನಿಶ್ಚಿತ್ಯ ತಿಷ್ಠ ಭೋಃ ।
• ಚಿದೇವಾಹಂ ಚಿದೇವಾಹಂ ಚಿತ್ರಂ ಚೇದಹಮೇವ ಹಿ ॥ ೨॥
• ವಾಚಾವಧಿಶ್ಚ ದೇವೋಽಹಂ ಚಿದೇವ ಮನಸಃ ಪರಃ ।
• ಚಿದೇವಾಹಂ ಪರಂ ಬ್ರಹ್ಮ ಚಿದೇವ ಸಕಲಂ ಪದಮ್ ॥ ೩॥
• ಸ್ಥೂಲದೇಹಂ ಚಿದೇವೇದಂ ಸೂಕ್ಷ್ಮದೇಹಂ ಚಿದೇವ ಹಿ ।
• ಚಿದೇವ ಕರಣಂ ಸೋಽಹಂ ಕಾಯಮೇವ ಚಿದೇವ ಹಿ ॥ ೪॥
• ಅಖಣ್ಡಾಕಾರವೃತ್ತಿಶ್ಚ ಉತ್ತಮಾಧಮಮಧ್ಯಮಾಃ ।
• ದೇಹಹೀನಶ್ಚಿದೇವಾಹಂ ಸೂಕ್ಷ್ಮದೇಹಶ್ಚಿದೇವ ಹಿ ॥ ೫॥
• ಚಿದೇವ ಕಾರಣಂ ಸೋಽಹಂ ಬುದ್ಧಿಹೀನಶ್ಚಿದೇವ ಹಿ ।
• ಭಾವಹೀನಶ್ಚಿದೇವಾಹಂ ದೋಷಹೀನಶ್ಚಿದೇವ ಹಿ ॥ ೬॥
• ಅಸ್ತಿತ್ವಂ ಬ್ರಹ್ಮ ನಾಸ್ತ್ಯೇವ ನಾಸ್ತಿ ಬ್ರಹ್ಮೇತಿ ನಾಸ್ತಿ ಹಿ ।
• ಅಸ್ತಿ ನಾಸ್ತೀತಿ ನಾಸ್ತ್ಯೇವ ಅಹಮೇವ ಚಿದೇವ ಹಿ ॥ ೭॥
• ಸರ್ವಂ ನಾಸ್ತ್ಯೇವ ನಾಸ್ತ್ಯೇವ ಸಾಕಾರಂ ನಾಸ್ತಿ ನಾಸ್ತಿ ಹಿ ।
• ಯತ್ಕಿಞ್ಚಿದಪಿ ನಾಸ್ತ್ಯೇವ ಅಹಮೇವ ಚಿದೇವ ಹಿ ॥ ೮॥
• ಅನ್ವಯವ್ಯತಿರೇಕಂ ಚ ಆದಿಮಧ್ಯಾನ್ತದೂಷಣಮ್ ।
• ಸರ್ವಂ ಚಿನ್ಮಾತ್ರರೂಪತ್ವಾದಹಮೇವ ಚಿದೇವ ಹಿ ॥ ೯॥
• ಸರ್ವಾಪರಂ ಚ ಸದಸತ್ ಕಾರ್ಯಕಾರಣಕರ್ತೃಕಮ್ ।
• ಸರ್ವಂ ನಾಸ್ತ್ಯೇವ ನಾಸ್ತ್ಯೇವ ಅಹಮೇವ ಹಿ ಕೇವಲಮ್ ॥ ೧೦॥
• ಅಶುದ್ಧಂ ಶುದ್ಧಮದ್ವೈತಂ ದ್ವೈತಮೇಕಮನೇಕಕಮ್ ।
• ಸರ್ವಂ ನಾಸ್ತ್ಯೇವ ನಾಸ್ತ್ಯೇವ ಅಹಮೇವ ಹಿ ಕೇವಲಮ್ ॥ ೧೧॥
• ಅಸತ್ಯಸತ್ಯಮದ್ವನ್ದ್ವಂ ದ್ವನ್ದ್ವಂ ಚ ಪರತಃ ಪರಮ್ ।
• ಸರ್ವಂ ನಾಸ್ತ್ಯೇವ ನಾಸ್ತ್ಯೇವ ಅಹಮೇವ ಹಿ ಕೇವಲಮ್ ॥ ೧೨॥
• ಭೂತಂ ಭವಿಷ್ಯಂ ವರ್ತಂ ಚ ಮೋಹಾಮೋಹೌ ಸಮಾಸಮೌ ।
• ಸರ್ವಂ ನಾಸ್ತ್ಯೇವ ನಾಸ್ತ್ಯೇವ ಅಹಮೇವ ಹಿ ಕೇವಲಮ್ ॥ ೧೩॥
• ಕ್ಷಣಂ ಲವಂ ತ್ರುಟಿರ್ಬ್ರಹ್ಮ ತ್ವಂಪದಂ ತತ್ಪದಂ ತಥಾ ।
• ಸರ್ವಂ ನಾಸ್ತ್ಯೇವ ನಾಸ್ತ್ಯೇವ ಅಹಮೇವ ಹಿ ಕೇವಲಮ್ ॥ ೧೪॥
• ತ್ವಂಪದಂ ತತ್ಪದಂ ವಾಪಿ ಐಕ್ಯಂ ಚ ಹ್ಯಹಮೇವ ಹಿ ।
• ಸರ್ವಂ ನಾಸ್ತ್ಯೇವ ನಾಸ್ತ್ಯೇವ ಅಹಮೇವ ಹಿ ಕೇವಲಮ್ ॥ ೧೫॥
• ಆನನ್ದಂ ಪರಮಾನನ್ದಂ ಸರ್ವಾನನ್ದಂ ನಿಜಂ ಮಹತ್ ।
• ಸರ್ವಂ ನಾಸ್ತ್ಯೇವ ನಾಸ್ತ್ಯೇವ ಅಹಮೇವ ಹಿ ಕೇವಲಮ್ ॥ ೧೬॥
• ಅಹಂ ಬ್ರಹ್ಮ ಇದಂ ಬ್ರಹ್ಮ ಕಂ ಬ್ರಹ್ಮ ಹ್ಯಕ್ಷರಂ ಪರಮ್ ।
• ಸರ್ವಂ ನಾಸ್ತ್ಯೇವ ನಾಸ್ತ್ಯೇವ ಅಹಮೇವ ಹಿ ಕೇವಲಮ್ ॥ ೧೭॥
• ವಿಷ್ಣುರೇವ ಪರಂ ಬ್ರಹ್ಮ ಶಿವೋ ಬ್ರಹ್ಮಾಹಮೇವ ಹಿ ।
• ಸರ್ವಂ ನಾಸ್ತ್ಯೇವ ನಾಸ್ತ್ಯೇವ ಅಹಮೇವ ಹಿ ಕೇವಲಮ್ ॥ ೧೮॥
• ಶ್ರೋತ್ರಂ ಬ್ರಹ್ಮ ಪರಂ ಬ್ರಹ್ಮ ಶಬ್ದಂ ಬ್ರಹ್ಮ ಪದಂ ಶುಭಮ್ ।
• ಸರ್ವಂ ನಾಸ್ತ್ಯೇವ ನಾಸ್ತ್ಯೇವ ಅಹಮೇವ ಹಿ ಕೇವಲಮ್ ॥ ೧೯॥
• ಸ್ಪರ್ಶೋ ಬ್ರಹ್ಮ ಪದಂ ತ್ವಕ್ಚ ತ್ವಕ್ಚ ಬ್ರಹ್ಮ ಪರಸ್ಪರಮ್ ।
• ಸರ್ವಂ ನಾಸ್ತ್ಯೇವ ನಾಸ್ತ್ಯೇವ ಅಹಮೇವ ಹಿ ಕೇವಲಮ್ ॥ ೨೦॥
• ಪರಂ ರೂಪಂ ಚಕ್ಷುಭಿಃ ಏವ ತತ್ರೈವ ಯೋಜ್ಯತಾಮ್ ।
• ಸರ್ವಂ ನಾಸ್ತ್ಯೇವ ನಾಸ್ತ್ಯೇವ ಅಹಮೇವ ಹಿ ಕೇವಲಮ್ ॥ ೨೧॥
• ಬ್ರಹ್ಮೈವ ಸರ್ವಂ ಸತತಂ ಸಚ್ಚಿದಾನನ್ದಮಾತ್ರಕಮ್ ।
• ಸರ್ವಂ ನಾಸ್ತ್ಯೇವ ನಾಸ್ತ್ಯೇವ ಅಹಮೇವ ಹಿ ಕೇವಲಮ್ ॥ ೨೨॥
• ಚಿನ್ಮಯಾನನ್ದಮಾತ್ರೋಽಹಂ ಇದಂ ವಿಶ್ವಮಿದಂ ಸದಾ ।
• ಸರ್ವಂ ನಾಸ್ತ್ಯೇವ ನಾಸ್ತ್ಯೇವ ಅಹಮೇವ ಹಿ ಕೇವಲಮ್ ॥ ೨೩॥
• ಬ್ರಹ್ಮೈವ ಸರ್ವಂ ಯತ್ಕಿಞ್ಚಿತ್ ತದ್ಬ್ರಹ್ಮಾಹಂ ನ ಸಂಶಯಃ ।
• ಸರ್ವಂ ನಾಸ್ತ್ಯೇವ ನಾಸ್ತ್ಯೇವ ಅಹಮೇವ ಹಿ ಕೇವಲಮ್ ॥ ೨೪॥
• ವಾಚಾ ಯತ್ ಪ್ರೋಚ್ಯತೇ ನಾಮ ಮನಸಾ ಮನುತೇ ತು ಯತ್ ।
• ಸರ್ವಂ ನಾಸ್ತ್ಯೇವ ನಾಸ್ತ್ಯೇವ ಅಹಮೇವ ಹಿ ಕೇವಲಮ್ ॥ ೨೫॥
• ಕಾರಣೇ ಕಲ್ಪಿತೇ ಯದ್ಯತ್ ತೂಷ್ಣೀಂ ವಾ ಸ್ಥೀಯತೇ ಸದಾ ।
• ಶರೀರೇಣ ತು ಯದ್ ಭುಙ್ಕ್ತೇ ಇನ್ದ್ರಿಯೈರ್ಯತ್ತು ಭಾವ್ಯತೇ ।
• ಸರ್ವಂ ನಾಸ್ತ್ಯೇವ ನಾಸ್ತ್ಯೇವ ಅಹಮೇವ ಹಿ ಕೇವಲಮ್ ॥ ೨೬॥
• ವೇದೇ ಯತ್ ಕರ್ಮ ವೇದೋಕ್ತಂ ಶಾಸ್ತ್ರಂ ಶಾಸ್ತ್ರೋಕ್ತನಿರ್ಣಯಮ್ ।
• ಗುರೂಪದೇಶಸಿದ್ಧಾನ್ತಂ ಶುದ್ಧಾಶುದ್ಧವಿಭಾಸಕಮ್ ॥ ೨೭॥
• ಕಾಮಾದಿಕಲನಂ ಬ್ರಹ್ಮ ದೇವಾದಿ ಕಲನಂ ಪೃಥಕ್ ।
• ಜೀವಯುಕ್ತೇತಿ ಕಲನಂ ವಿದೇಹೋ ಮುಕ್ತಿಕಲ್ಪನಮ್ ॥ ೨೮॥
• ಬ್ರಹ್ಮ ಇತ್ಯಪಿ ಸಙ್ಕಲ್ಪಂ ಬ್ರಹ್ಮವಿದ್ವರಕಲ್ಪನಮ್ ।
• ವರೀಯಾನಿತಿ ಸಙ್ಕಲ್ಪಂ ವರಿಷ್ಠ ಇತಿ ಕಲ್ಪನಮ್ ॥ ೨೯॥
• ಬ್ರಹ್ಮಾಹಮಿತಿ ಸಙ್ಕಲ್ಪಂ ಚಿದಹಂ ಚೇತಿ ಕಲ್ಪನಮ್ ।
• ಮಹಾವಿದ್ಯೇತಿ ಸಙ್ಕಲ್ಪಂ ಮಹಾಮಾಯೇತಿ ಕಲ್ಪನಮ್ ॥ ೩೦॥
• ಮಹಾಶೂನ್ಯೇತಿ ಸಙ್ಕಲ್ಪಂ ಮಹಾಚಿನ್ತೇತಿ ಕಲ್ಪನಮ್ ।
• ಮಹಾಲೋಕೇತಿ ಸಙ್ಕಲ್ಪಂ ಮಹಾಸತ್ಯೇತಿ ಕಲ್ಪನಮ್ ॥ ೩೧॥
• ಮಹಾರೂಪೇತಿ ಸಙ್ಕಲ್ಪಂ ಮಹಾರೂಪಂ ಚ ಕಲ್ಪನಮ್ ।
• ಸರ್ವಸಙ್ಕಲ್ಪಕಂ ಚಿತ್ತಂ ಸರ್ವಸಙ್ಕಲ್ಪಕಂ ಮನಃ ॥ ೩೨॥
• ಸರ್ವಂ ನಾಸ್ತ್ಯೇವ ನಾಸ್ತ್ಯೇವ ಸರ್ವಂ ಬ್ರಹ್ಮೈವ ಕೇವಲಮ್ ।
• ಸರ್ವಂ ದ್ವೈತಂ ಮನೋರೂಪಂ ಸರ್ವಂ ದುಃಖಂ ಮನೋಮಯಮ್ ॥ ೩೩॥
• ಚಿದೇವಾಹಂ ನ ಸನ್ದೇಹಃ ಚಿದೇವೇದಂ ಜಗತ್ತ್ರಯಮ್ ।
• ಯತ್ಕಿಞ್ಚಿದ್ಭಾಷಣಂ ವಾಪಿ ಯತ್ಕಿಞ್ಚಿನ್ಮನಸೋ ಜಪಮ್ ।
• ಯತ್ಕಿಞ್ಚಿನ್ಮಾನಸಂ ಕರ್ಮ ಸರ್ವಂ ಬ್ರಹ್ಮೈವ ಕೇವಲಮ್ ॥ ೩೪॥
• ಸರ್ವಂ ನಾಸ್ತೀತಿ ಸನ್ಮನ್ತ್ರಂ ಜೀವಬ್ರಹ್ಮಸ್ವರೂಪಕಮ್ ।
• ಬ್ರಹ್ಮೈವ ಸರ್ವಮಿತ್ಯೇವಂ ಮನ್ತ್ರಞ್ಚೈವೋತ್ತಮೋತ್ತಮಮ್ ॥ ೩೫॥
• ಅನುಕ್ತಮನ್ತ್ರಂ ಸನ್ಮನ್ತ್ರಂ ವೃತ್ತಿಶೂನ್ಯಂ ಪರಂ ಮಹತ್ ।
• ಸರ್ವಂ ಬ್ರಹ್ಮೇತಿ ಸಙ್ಕಲ್ಪಂ ತದೇವ ಪರಮಂ ಪದಮ್ ॥ ೩೬॥
• ಸರ್ವಂ ಬ್ರಹ್ಮೇತಿ ಸಙ್ಕಲ್ಪಂ ಮಹಾದೇವೇತಿ ಕೀರ್ತನಮ್ ।
• ಸರ್ವಂ ಬ್ರಹ್ಮೇತಿ ಸಙ್ಕಲ್ಪಂ ಶಿವಪೂಜಾಸಮಂ ಮಹತ್ ॥ ೩೭॥
• ಸರ್ವಂ ಬ್ರಹ್ಮೇತ್ಯನುಭವಃ ಸರ್ವಾಕಾರೋ ನ ಸಂಶಯಃ ।
• ಸರ್ವಂ ಬ್ರಹ್ಮೇತಿ ಸಙ್ಕಲ್ಪಂ ಸರ್ವತ್ಯಾಗಮಿತೀರಿತಮ್ ॥ ೩೮॥
• ಸರ್ವಂ ಬ್ರಹ್ಮೇತಿ ಸಙ್ಕಲ್ಪಂ ಭಾವಾಭಾವವಿನಾಶನಮ್ ।
• ಸರ್ವಂ ಬ್ರಹ್ಮೇತಿ ಸಙ್ಕಲ್ಪಂ ಮಹಾದೇವೇತಿ ನಿಶ್ಚಯಃ ॥ ೩೯॥
• ಸರ್ವಂ ಬ್ರಹ್ಮೇತಿ ಸಙ್ಕಲ್ಪಂ ಕಾಲಸತ್ತಾವಿನಿರ್ಮುಕ್ತಃ ।
• ಸರ್ವಂ ಬ್ರಹ್ಮೇತಿ ಸಙ್ಕಲ್ಪಃ ದೇಹಸತ್ತಾ ವಿಮುಕ್ತಿಕಃ ॥ ೪೦॥
• ಸರ್ವಂ ಬ್ರಹ್ಮೇತಿ ಸಙ್ಕಲ್ಪಃ ಸಚ್ಚಿದಾನನ್ದರೂಪಕಃ ।
• ಸರ್ವೋಽಹಂ ಬ್ರಹ್ಮಮಾತ್ರೈವ ಸರ್ವಂ ಬ್ರಹ್ಮೈವ ಕೇವಲಮ್ ॥ ೪೧॥
• ಇದಮಿತ್ಯೇವ ಯತ್ಕಿಞ್ಚಿತ್ ತದ್ಬ್ರಹ್ಮೈವ ನ ಸಂಶಯಃ ।
• ಭ್ರಾನ್ತಿಶ್ಚ ನರಕಂ ದುಃಖಂ ಸ್ವರ್ಗಭ್ರಾನ್ತಿರಿತೀರಿತಾ ॥ ೪೨॥
• ಬ್ರಹ್ಮಾ ವಿಷ್ಣುರಿತಿ ಭ್ರಾನ್ತಿರ್ಭ್ರಾನ್ತಿಶ್ಚ ಶಿವರೂಪಕಮ್ ।
• ವಿರಾಟ್ ಸ್ವರಾಟ್ ತಥಾ ಸಮ್ರಾಟ್ ಸೂತ್ರಾತ್ಮಾ ಭ್ರಾನ್ತಿರೇವ ಚ ॥ ೪೩॥
• ದೇವಾಶ್ಚ ದೇವಕಾರ್ಯಾಣಿ ಸೂರ್ಯಾಚನ್ದ್ರಮಸೋರ್ಗತಿಃ ।
• ಮುನಯೋ ಮನವಃ ಸಿದ್ಧಾ ಭ್ರಾನ್ತಿರೇವ ನ ಸಂಶಯಃ ॥ ೪೪॥
• ಸರ್ವದೇವಾಸುರಾ ಭ್ರಾನ್ತಿಸ್ತೇಷಾಂ ಯುದ್ಧಾದಿ ಜನ್ಮ ಚ ।
• ವಿಷ್ಣೋರ್ಜನ್ಮಾವತಾರಾಣಿ ಚರಿತಂ ಶಾನ್ತಿರೇವ ಹಿ ॥ ೪೫॥
• ಬ್ರಹ್ಮಣಃ ಸೃಷ್ಟಿಕೃತ್ಯಾನಿ ರುದ್ರಸ್ಯ ಚರಿತಾನಿ ಚ ।
• ಸರ್ವಭ್ರಾನ್ತಿಸಮಾಯುಕ್ತಂ ಭ್ರಾನ್ತ್ಯಾ ಲೋಕಾಶ್ಚತುರ್ದಶ ॥ ೪೬॥
• ವರ್ಣಾಶ್ರಮವಿಭಾಗಶ್ಚ ಭ್ರಾನ್ತಿರೇವ ನ ಸಂಶಯಃ ।
• ಬ್ರಹ್ಮವಿಷ್ಣ್ವೀಶರುದ್ರಾಣಾಮುಪಾಸಾ ಭ್ರಾನ್ತಿರೇವ ಚ ॥ ೪೭॥
• ತತ್ರಾಪಿ ಯನ್ತ್ರಮನ್ತ್ರಾಭ್ಯಾಂ ಭ್ರಾನ್ತಿರೇವ ನ ಸಂಶಯಃ ।
• ವಾಚಾಮಗೋಚರಂ ಬ್ರಹ್ಮ ಸರ್ವಂ ಬ್ರಹ್ಮಮಯಂ ಚ ಹಿ ॥ ೪೮॥
• ಸರ್ವಂ ನಾಸ್ತ್ಯೇವ ನಾಸ್ತ್ಯೇವ ಅಹಮೇವ ಚಿದೇವ ಹಿ ।
• ಏವಂ ವದ ತ್ವಂ ತಿಷ್ಠ ತ್ವಂ ಸದ್ಯೋ ಮುಕ್ತೋ ಭವಿಷ್ಯಸಿ ॥ ೪೯॥
• ಏತಾವದುಕ್ತಂ ಯತ್ಕಿಞ್ಚಿತ್ ತನ್ನಾಸ್ತ್ಯೇವ ನ ಸಂಶಯಃ ।
• ಏವಂ ಯದಾನ್ತರಂ ಕ್ಷಿಪ್ರಂ ಬ್ರಹ್ಮೈವ ದೃಢನಿಶ್ಚಯಮ್ ॥ ೫೦॥
• ದೃಢನಿಶ್ಚಯಮೇವಾತ್ರ ಪ್ರಥಮಂ ಕಾರಣಂ ಭವೇತ್ ।
• ನಿಶ್ಚಯಃ ಖಲ್ವಯಂ ಪಶ್ಚಾತ್ ಸ್ವಯಮೇವ ಭವಿಷ್ಯತಿ ॥ ೫೧॥
• ಆರ್ತಂ ಯಚ್ಛಿವಪಾದತೋಽನ್ಯದಿತರಂ ತಜ್ಜಾದಿಶಬ್ದಾತ್ಮಕಂ
• ಚೇತೋವೃತ್ತಿಪರಂ ಪರಾಪ್ರಮುದಿತಂ ಷಡ್ಭಾವಸಿದ್ಧಂ ಜಗತ್ ।
• ಭೂತಾಕ್ಷಾದಿಮನೋವಚೋಭಿರನಘೇ ಸಾನ್ದ್ರೇ ಮಹೇಶೇ ಘನೇ
• ಸಿನ್ಧೌ ಸೈನ್ಧವಖಣ್ಡವಜ್ಜಗದಿದಂ ಲೀಯೇತ ವೃತ್ತ್ಯುಜ್ಝಿತಮ್ ॥ ೫೨॥

• ॥ ಇತಿ ಶ್ರೀಶಿವರಹಸ್ಯೇ ಶಙ್ಕರಾಖ್ಯೇ ಷಷ್ಠಾಂಶೇ ಋಭುನಿದಾಘಸಂವಾದೇ ಬ್ರಹ್ಮಣಸ್ಸರ್ವರೂಪತ್ವನಿರೂಪಣಪ್ರಕರಣಂ ನಾಮ ಪಞ್ಚವಿಂಶೋಽಧ್ಯಾಯಃ ॥

Special Thanks

The Sanskrit works, published by Sri Ramanasramam, have been approved to be posted on sanskritdocuments.org by permission of Sri V.S. Ramanan, President, Sri Ramanasramam.

Credits

Encoded by Anil Sharma anilandvijaya at gmail.com
Proofread by Sunder Hattangadi and Anil Sharma

https://sanskritdocuments.org

Send corrections to sanskrit at cheerful.com