ಋಭುಗೀತಾ ೫ ॥ ಶಿವೇನ ಕುಮಾರೋಪದೇಶ ವರ್ಣನಮ್ ॥

ನಿದಾಘಃ -

• ಏವಂ ಸ್ಥಿತೇ ಋಭೋ ಕೋ ವೈ ಬ್ರಹ್ಮಭಾವಾಯ ಕಲ್ಪತೇ ।
• ತನ್ಮೇ ವದ ವಿಶೇಷೇಣ ಜ್ಞಾನಂ ಶಙ್ಕರವಾಕ್ಯಜಮ್ ॥ ೧॥

ಋಭುಃ -

• ತ್ವಮೇವ ಬ್ರಹ್ಮ ಏವಾಸಿ ತ್ವಮೇವ ಪರಮೋ ಗುರುಃ ।
• ತ್ವಮೇವಾಕಾಶರೂಪೋಽಸಿ ತ್ವಂ ಬ್ರಹ್ಮಾಸಿ ನ ಸಂಶಯಃ ॥ ೨॥
• ತ್ವಮೇವ ಸರ್ವಭಾವೋಽಸಿ ತ್ವಮೇವಾರ್ಥಸ್ತ್ವಮವ್ಯಯಃ ।
• ತ್ವಂ ಸರ್ವಹೀನಸ್ತ್ವಂ ಸಾಕ್ಷೀ ಸಾಕ್ಷಿಹೀನೋಽಸಿ ಸರ್ವದಾ ॥ ೩॥
• ಕಾಲಸ್ತ್ವಂ ಸರ್ವಹೀನಸ್ತ್ವಂ ಸಾಕ್ಷಿಹೀನೋಽಸಿ ಸರ್ವದಾ ।
• ಕಾಲಹೀನೋಽಸಿ ಕಾಲೋಽಸಿ ಸದಾ ಬ್ರಹ್ಮಾಸಿ ಚಿದ್ಘನಃ ।
• ಸರ್ವತತ್ತ್ವಸ್ವರೂಪೋಽಸಿ ತ್ವಂ ಬ್ರಹ್ಮಾಸಿ ನ ಸಂಶಯಃ ॥ ೪॥
• ಸತ್ಯೋಽಸಿ ಸಿದ್ಧೋಽಸಿ ಸನಾತನೋಽಸಿ
• ಮುಕ್ತೋಽಸಿ ಮೋಕ್ಷೋಽಸಿ ಸದಾಽಮೃತೋಽಸಿ ।
• ದೇವೋಽಸಿ ಶಾನ್ತೋಽಸಿ ನಿರಾಮಯೋಽಸಿ
• ಬ್ರಹ್ಮಾಸಿ ಪೂರ್ಣೋಽಸಿ ಪರಾವರೋಽಸಿ ॥ ೫॥
• ಸಮೋಽಸಿ ಸಚ್ಚಾಸಿ ಸನಾತನೋಽಸಿ
• ಸತ್ಯಾದಿವಾಕ್ಯೈಃ ಪ್ರತಿಪಾದಿತೋಽಸಿ ।
• ಸರ್ವಾಙ್ಗಹೀನೋಽಸಿ ಸದಾಸ್ಥಿತೋಽಸಿ
• ಬ್ರಹ್ಮಾಸಿ ಪೂರ್ಣೋಽಸಿ ಪರಾವರೋಽಸಿ ॥ ೬॥var was ಪರಾಪರೋಽಸಿ
• ಸರ್ವಪ್ರಪಞ್ಚಭ್ರಮವರ್ಜಿತೋಽಸಿ ಸರ್ವೇಷು ಭೂತೇಷು ಸದೋದಿತೋಽಸಿ ।
• ಸರ್ವತ್ರ ಸಂಕಲ್ಪವಿವರ್ಜಿತೋಽಸಿ ಬ್ರಹ್ಮಾಸಿ ಪೂರ್ಣೋಽಸಿ ಪರಾವರೋಽಸಿ ॥ ೭॥
• ಸರ್ವತ್ರ ಸನ್ತೋಷಸುಖಾಸನೋಽಸಿ ಸರ್ವತ್ರ ವಿದ್ವೇಷವಿವರ್ಜಿತೋಽಸಿ ।
• ಸರ್ವತ್ರ ಕಾರ್ಯಾದಿವಿವರ್ಜಿತೋಽಸಿ ಬ್ರಹ್ಮಾಸಿ ಪೂರ್ಣೋಽಸಿ ಪರಾವರೋಽಸಿ ॥ ೮॥
• ಚಿದಾಕಾರಸ್ವರೂಪೋಽಸಿ ಚಿನ್ಮಾತ್ರೋಽಸಿ ನಿರಙ್ಕುಶಃ ।
• ಆತ್ಮನ್ಯೇವಾವಸ್ಥಿತೋಽಸಿ ತ್ವಂ ಬ್ರಹ್ಮಾಸಿ ನ ಸಂಶಯಃ ॥ ೯॥
• ಆನನ್ದೋಽಸಿ ಪರೋಽಸಿ ತ್ವಂ ಸರ್ವಶೂನ್ಯೋಽಸಿ ನಿರ್ಗುಣಃ ।
• ಏಕ ಏವಾದ್ವಿತೀಯೋಽಸಿ ತ್ವಂ ಬ್ರಹ್ಮಾಸಿ ನ ಸಂಶಯಃ ॥ ೧೦॥
• ಚಿದ್ಘನಾನನ್ದರೂಪೋಽಸಿ ಚಿದಾನನ್ದೋಽಸಿ ಸರ್ವದಾ ।
• ಪರಿಪೂರ್ಣಸ್ವರೂಪೋಽಸಿ ತ್ವಂ ಬ್ರಹ್ಮಾಸಿ ನ ಸಂಶಯಃ ॥ ೧೧॥
• ತದಸಿ ತ್ವಮಸಿ ಜ್ಞೋಽಸಿ ಸೋಽಸಿ ಜಾನಾಸಿ ವೀಕ್ಷ್ಯಸಿ ।
• ಚಿದಸಿ ಬ್ರಹ್ಮಭೂತೋಽಸಿ ತ್ವಂ ಬ್ರಹ್ಮಾಸಿ ನ ಸಂಶಯಃ ॥ ೧೨॥
• ಅಮೃತೋಽಸಿ ವಿಭುಶ್ಚಾಸಿ ದೇವೋಽಸಿ ತ್ವಂ ಮಹಾನಸಿ ।
• ಚಞ್ಚಲೋಷ್ಠಕಲಙ್ಕೋಽಸಿ ತ್ವಂ ಬ್ರಹ್ಮಾಸಿ ನ ಸಂಶಯಃ ॥ ೧೩॥
• ಸರ್ವೋಽಸಿ ಸರ್ವಹೀನೋಽಸಿ ಶಾನ್ತೋಽಸಿ ಪರಮೋ ಹ್ಯಸಿ ।
• ಕಾರಣಂ ತ್ವಂ ಪ್ರಶಾನ್ತೋಽಸಿ ತ್ವಂ ಬ್ರಹ್ಮಾಸಿ ನ ಸಂಶಯಃ ॥ ೧೪॥
• ಸತ್ತಾಮಾತ್ರಸ್ವರೂಪೋಽಸಿ ಸತ್ತಾಸಾಮಾನ್ಯಕೋ ಹ್ಯಸಿ ।
• ನಿತ್ಯಶುದ್ಧಸ್ವರೂಪೋಽಸಿ ತ್ವಂ ಬ್ರಹ್ಮಾಸಿ ನ ಸಂಶಯಃ ॥ ೧೫॥
• ಈಷಣ್ಮಾತ್ರವಿಹೀನೋಽಸಿ ಅಣುಮಾತ್ರವಿವರ್ಜಿತಃ ।
• ಅಸ್ತಿತ್ವವರ್ಜಿತೋಽಸಿ ತ್ವಂ ನಾಸ್ತಿತ್ವಾದಿವಿವರ್ಜಿತಃ ॥ ೧೬॥
• ಯೋಽಸಿ ಸೋಽಸಿ ಮಹಾನ್ತೋಽಸಿ ತ್ವಂ ಬ್ರಹ್ಮಾಸಿ ನ ಸಂಶಯಃ ॥ ೧೭॥
• ಲಕ್ಷ್ಯಲಕ್ಷಣಹೀನೋಽಸಿ ಚಿನ್ಮಾತ್ರೋಽಸಿ ನಿರಾಮಯಃ ।
• ಅಖಣ್ಡೈಕರಸೋ ನಿತ್ಯಂ ತ್ವಂ ಬ್ರಹ್ಮಾಸಿ ನ ಸಂಶಯಃ ॥ ೧೮॥
• ಸರ್ವಾಧಾರಸ್ವರೂಪೋಽಸಿ ಸರ್ವತೇಜಃ ಸ್ವರೂಪಕಃ ।
• ಸರ್ವಾರ್ಥಭೇದಹೀನೋಽಸಿ ತ್ವಂ ಬ್ರಹ್ಮಾಸಿ ನ ಸಂಶಯಃ ॥ ೧೯॥
• ಬ್ರಹ್ಮೈವ ಭೇದಶೂನ್ಯೋಽಸಿ ವಿಪ್ಲುತ್ಯಾದಿವಿವರ್ಜಿತಃ ।
• ಶಿವೋಽಸಿ ಭೇದಹೀನೋಽಸಿ ತ್ವಂ ಬ್ರಹ್ಮಾಸಿ ನ ಸಂಶಯಃ ॥ ೨೦॥
• ಪ್ರಜ್ಞಾನವಾಕ್ಯಹೀನೋಽಸಿ ಸ್ವಸ್ವರೂಪಂ ಪ್ರಪಶ್ಯಸಿ ।
• ಸ್ವಸ್ವರೂಪಸ್ಥಿತೋಽಸಿ ತ್ವಂ ತ್ವಂ ಬ್ರಹ್ಮಾಸಿ ನ ಸಂಶಯಃ ॥ ೨೧॥
• ಸ್ವಸ್ವರೂಪಾವಶೇಷೋಽಸಿ ಸ್ವಸ್ವರೂಪೋ ಮತೋ ಹ್ಯಸಿ ।
• ಸ್ವಾನನ್ದಸಿನ್ಧುಮಗ್ನೋಽಸಿ ತ್ವಂ ಬ್ರಹ್ಮಾಸಿ ನ ಸಂಶಯಃ ॥ ೨೨॥
• ಸ್ವಾತ್ಮರಾಜ್ಯೇ ತ್ವಮೇವಾಸಿ ಸ್ವಯಮಾತ್ಮಾನಮೋ ಹ್ಯಸಿ ।
• ಸ್ವಯಂ ಪೂರ್ಣಸ್ವರೂಪೋಽಸಿ ತ್ವಂ ಬ್ರಹ್ಮಾಸಿ ನ ಸಂಶಯಃ ॥ ೨೩॥
• ಸ್ವಸ್ಮಿನ್ ಸುಖೇ ಸ್ವಯಂ ಚಾಸಿ ಸ್ವಸ್ಮಾತ್ ಕಿಞ್ಚಿನ್ನ ಪಶ್ಯಸಿ ।
• ಸ್ವಾತ್ಮನ್ಯಾಕಾಶವದ್ಭಾಸಿ ತ್ವಂ ಬ್ರಹ್ಮಾಸಿ ನ ಸಂಶಯಃ ॥ ೨೪॥
• ಸ್ವಸ್ವರೂಪಾನ್ನ ಚಲಸಿ ಸ್ವಸ್ವರೂಪಾನ್ನ ಪಶ್ಯಸಿ ।
• ಸ್ವಸ್ವರೂಪಾಮೃತೋಽಸಿ ತ್ವಂ ತ್ವಂ ಬ್ರಹ್ಮಾಸಿ ನ ಸಂಶಯಃ ॥ ೨೫॥
• ಸ್ವಸ್ವರೂಪೇಣ ಭಾಸಿ ತ್ವಂ ಸ್ವಸ್ವರೂಪೇಣ ಜೃಂಭಸಿ ।
• ಸ್ವಸ್ವರೂಪಾದನನ್ಯೋಽಸಿ ತ್ವಂ ಬ್ರಹ್ಮಾಸಿ ನ ಸಂಶಯಃ ॥ ೨೬॥
• ಸ್ವಯಂ ಸ್ವಯಂ ಸದಾಽಸಿ ತ್ವಂ ಸ್ವಯಂ ಸರ್ವತ್ರ ಪಶ್ಯಸಿ ।
• ಸ್ವಸ್ಮಿನ್ ಸ್ವಯಂ ಸ್ವಯಂ ಭುಙ್ಕ್ಷೇ ತ್ವಂ ಬ್ರಹ್ಮಾಸಿ ನ ಸಂಶಯಃ ॥ ೨೭॥

ಸೂತಃ -

• ತದಾ ನಿಧಾಘವಚಸಾ ತುಷ್ಟೋ ಋಭುರುವಾಚ ತಮ್ ।
• ಶಿವಪ್ರೇಮರಸೇ ಪಾತ್ರಂ ತಂ ವೀಕ್ಷ್ಯಾಬ್ಜಜನನ್ದನಃ ॥ ೨೮॥

ಋಭುಃ -

• ಕೈಲಾಸೇ ಶಙ್ಕರಃ ಪುತ್ರಂ ಕದಾಚಿದುಪದಿಷ್ಟವಾನ್ ।
• ತದೇವ ತೇ ಪ್ರವಕ್ಷ್ಯಾಮಿ ಸಾವಧಾನಮನಾಃ ಶೃಣು ॥ ೨೯॥
• ಅಯಂ ಪ್ರಪಞ್ಚೋ ನಾಸ್ತ್ಯೇವ ನೋತ್ಪನ್ನೋ ನ ಸ್ವತಃ ಕ್ವಚಿತ್ ।
• ಚಿತ್ರಪ್ರಪಞ್ಚ ಇತ್ಯಾಹುರ್ನಾಸ್ತಿ ನಾಸ್ತ್ಯೇವ ಸರ್ವದಾ ॥ ೩೦॥
• ನ ಪ್ರಪಞ್ಚೋ ನ ಚಿತ್ತಾದಿ ನಾಹಂಕಾರೋ ನ ಜೀವಕಃ ।
• ಕೇವಲಂ ಬ್ರಹ್ಮಮಾತ್ರತ್ವಾತ್ ನಾಸ್ತಿ ನಾಸ್ತ್ಯೇವ ಸರ್ವದಾ ॥ ೩೧॥
• ಮಾಯಕಾರ್ಯಾದಿಕಂ ನಾಸ್ತಿ ಮಾಯಾಕಾರ್ಯಭಯಂ ನಹಿ ।
• ಕೇವಲಂ ಬ್ರಹ್ಮಮಾತ್ರತ್ವಾತ್ ನಾಸ್ತಿ ನಾಸ್ತ್ಯೇವ ಸರ್ವದಾ ॥ ೩೨॥
• ಕರ್ತಾ ನಾಸ್ತಿ ಕ್ರಿಯಾ ನಾಸ್ತಿ ಕರಣಂ ನಾಸ್ತಿ ಪುತ್ರಕ ।
• ಕೇವಲಂ ಬ್ರಹ್ಮಮಾತ್ರತ್ವಾತ್ ನಾಸ್ತಿ ನಾಸ್ತ್ಯೇವ ಸರ್ವದಾ ॥ ೩೩॥
• ಏಕಂ ನಾಸ್ತಿ ದ್ವಯಂ ನಾಸ್ತಿ ಮನ್ತ್ರತನ್ತ್ರಾದಿಕಂ ಚ ನ ।
• ಕೇವಲಂ ಬ್ರಹ್ಮಮಾತ್ರತ್ವಾತ್ ನಾಸ್ತಿ ನಾಸ್ತ್ಯೇವ ಸರ್ವದಾ ॥ ೩೪॥
• ಶ್ರವಣಂ ಮನನಂ ನಾಸ್ತಿ ನಿದಿಧ್ಯಾಸನವಿಭ್ರಮಃ ।
• ಕೇವಲಂ ಬ್ರಹ್ಮಮಾತ್ರತ್ವಾತ್ ನಾಸ್ತಿ ನಾಸ್ತ್ಯೇವ ಸರ್ವದಾ ॥ ೩೫॥
• ಸಮಾಧಿದ್ವಿವಿಧಂ ನಾಸ್ತಿ ಮಾತೃಮಾನಾದಿ ನಾಸ್ತಿ ಹಿ ।
• ಕೇವಲಂ ಬ್ರಹ್ಮಮಾತ್ರತ್ವಾತ್ ನಾಸ್ತಿ ನಾಸ್ತ್ಯೇವ ಸರ್ವದಾ ॥ ೩೬॥
• ಅಜ್ಞಾನಂ ಚಾಪಿ ನಾಸ್ತ್ಯೇವ ಅವಿವೇಕಕಥಾ ನ ಚ ।
• ಕೇವಲಂ ಬ್ರಹ್ಮಮಾತ್ರತ್ವಾತ್ ನಾಸ್ತಿ ನಾಸ್ತ್ಯೇವ ಸರ್ವದಾ ॥ ೩೭॥
• ಅನುಬನ್ಧಚತುಷ್ಕಂ ಚ ಸಂಬನ್ಧತ್ರಯಮೇವ ನ ।
• ಕೇವಲಂ ಬ್ರಹ್ಮಮಾತ್ರತ್ವಾತ್ ನಾಸ್ತಿ ನಾಸ್ತ್ಯೇವ ಸರ್ವದಾ ॥ ೩೮॥
• ಭೂತಂ ಭವಿಷ್ಯನ್ನ ಕ್ವಾಪಿ ವರ್ತಮಾನಂ ನ ವೈ ಕ್ವಚಿತ್ ।
• ಕೇವಲಂ ಬ್ರಹ್ಮಮಾತ್ರತ್ವಾತ್ ನಾಸ್ತಿ ನಾಸ್ತ್ಯೇವ ಸರ್ವದಾ ॥ ೩೯॥
• ಗಙ್ಗಾ ಗಯಾ ತಥಾ ಸೇತುವ್ರತಂ ವಾ ನಾನ್ಯದಸ್ತಿ ಹಿ ।
• ಕೇವಲಂ ಬ್ರಹ್ಮಮಾತ್ರತ್ವಾತ್ ನಾಸ್ತಿ ನಾಸ್ತ್ಯೇವ ಸರ್ವದಾ ॥ ೪೦॥
• ನ ಭೂಮಿರ್ನ ಜಲಂ ವಹ್ನಿರ್ನ ವಾಯುರ್ನ ಚ ಖಂ ಕ್ವಚಿತ್ ।
• ಕೇವಲಂ ಬ್ರಹ್ಮಮಾತ್ರತ್ವಾತ್ ನಾಸ್ತಿ ನಾಸ್ತ್ಯೇವ ಸರ್ವದಾ ॥ ೪೧॥
• ನೈವ ದೇವಾ ನ ದಿಕ್ಪಾಲಾ ನ ಪಿತಾ ನ ಗುರುಃ ಕ್ವಚಿತ್ ।
• ಕೇವಲಂ ಬ್ರಹ್ಮಮಾತ್ರತ್ವಾತ್ ನಾಸ್ತಿ ನಾಸ್ತ್ಯೇವ ಸರ್ವದಾ ॥ ೪೨॥
• ನ ದೂರಂ ನಾನ್ತಿಕಂ ನಾನ್ತಂ ನ ಮಧ್ಯಂ ನ ಕ್ವಚಿತ್ ಸ್ಥಿತಿಃ ।
• ನಾದ್ವೈತದ್ವೈತಸತ್ಯತ್ವಮಸತ್ಯಂ ವಾ ಇದಂ ನ ಚ ॥ ೪೩॥
• ನ ಮೋಕ್ಷೋಽಸ್ತಿ ನ ಬನ್ಧೋಽಸ್ತಿ ನ ವಾರ್ತಾವಸರೋಽಸ್ತಿ ಹಿ ।
• ಕ್ವಚಿದ್ವಾ ಕಿಞ್ಚಿದೇವಂ ವಾ ಸದಸದ್ವಾ ಸುಖಾನಿ ಚ ॥ ೪೪॥
• ದ್ವನ್ದ್ವಂ ವಾ ತೀರ್ಥಧರ್ಮಾದಿ ಆತ್ಮಾನಾತ್ಮೇತಿ ನ ಕ್ವಚಿತ್ ।
• ನ ವೃದ್ಧಿರ್ನೋದಯೋ ಮೃನ್ಯುರ್ನ ಗಮಾಗಮವಿಭ್ರಮಃ ॥ ೪೫॥
• ಇಹ ನಾಸ್ತಿ ಪರಂ ನಾಸ್ತಿ ನ ಗುರುರ್ನ ಚ ಶಿಷ್ಯಕಃ ।
• ಸದಸನ್ನಾಸ್ತಿ ಭೂರ್ನಾಸ್ತಿ ಕಾರ್ಯಂ ನಾಸ್ತಿ ಕೃತಂ ಚ ನ ॥ ೪೬॥
• ಜಾತಿರ್ನಾಸ್ತಿ ಗತಿರ್ನಾಸ್ತಿ ವರ್ಣೋ ನಾಸ್ತಿ ನ ಲೌಕಿಕಮ್ ।
• ಶಮಾದಿಷಟ್ಕಂ ನಾಸ್ತ್ಯೇವ ನಿಯಮೋ ವಾ ಯಮೋಽಪಿ ವಾ ॥ ೪೭॥
• ಸರ್ವಂ ಮಿಥ್ಯೇತಿ ನಾಸ್ತ್ಯೇವ ಬ್ರಹ್ಮ ಇತ್ಯೇವ ನಾಸ್ತಿ ಹಿ ।
• ಚಿದಿತ್ಯೇವ ಹಿ ನಾಸ್ತ್ಯೇವ ಚಿದಹಂ ಭಾಷಣಂ ನ ಹಿ ॥ ೪೮॥
• ಅಹಮಿತ್ಯೇವ ನಾಸ್ತ್ಯೇವ ನಿತ್ಯೋಽಸ್ಮೀತಿ ಚ ನ ಕ್ವಚಿತ್ ।
• ಕೇವಲಂ ಬ್ರಹ್ಮಮಾತ್ರತ್ವಾತ್ ನಾಸ್ತಿ ನಾಸ್ತ್ಯೇವ ಸರ್ವಥಾ ॥ ೪೯॥
• ವಾಚಾ ಯದುಚ್ಯತೇ ಕಿಞ್ಚಿನ್ಮನಸಾ ಮನುತೇ ಚ ಯತ್ ।
• ಬುದ್ಧ್ಯಾ ನಿಶ್ಚೀಯತೇ ಯಚ್ಚ ಚಿತ್ತೇನ ಜ್ಞಾಯತೇ ಹಿ ಯತ್ ॥ ೫೦॥
• ಯೋಗೇನ ಯುಜ್ಯತೇ ಯಚ್ಚ ಇನ್ದ್ರಿಯಾದ್ಯೈಶ್ಚ ಯತ್ ಕೃತಮ್ ।
• ಜಾಗ್ರತ್ಸ್ವಪ್ನಸುಷುಪ್ತಿಂ ಚ ಸ್ವಪ್ನಂ ವಾ ನ ತುರೀಯಕಮ್ ॥ ೫೧॥
• ಸರ್ವಂ ನಾಸ್ತೀತಿ ವಿಜ್ಞೇಯಂ ಯದುಪಾಧಿವಿನಿಶ್ಚಿತಮ್ ।
• ಸ್ನಾನಾಚ್ಛುದ್ಧಿರ್ನ ಹಿ ಕ್ವಾಪಿ ಧ್ಯಾನಾತ್ ಶುದ್ಧಿರ್ನ ಹಿ ಕ್ವಚಿತ್ ॥ ೫೨॥
• ಗುಣತ್ರಯಂ ನಾಸ್ತಿ ಕಿಞ್ಚಿದ್ಗುಣತ್ರಯಮಥಾಪಿ ವಾ ।
• ಏಕದ್ವಿತ್ವಪದಂ ನಾಸ್ತಿ ನ ಬಹುಭ್ರಮವಿಭ್ರಮಃ ॥ ೫೩॥
• ಭ್ರಾನ್ತ್ಯಭ್ರಾನ್ತಿ ಚ ನಾಸ್ತ್ಯೇವ ಕಿಞ್ಚಿನ್ನಾಸ್ತೀತಿ ನಿಶ್ಚಿನು ।
• ಕೇವಲಂ ಬ್ರಹ್ಮಮಾತ್ರತ್ವಾತ್ ನ ಕಿಞ್ಚಿದವಶಿಷ್ಯತೇ ॥ ೫೪॥
• ಇದಂ ಶೃಣೋತಿ ಯಃ ಸಮ್ಯಕ್ ಸ ಬ್ರಹ್ಮ ಭವತಿ ಸ್ವಯಮ್ ॥ ೫೫॥

ಈಶ್ವರಃ -

• ವಾರಾಶ್ಯಮ್ಬುನಿ ಬುದ್ಬುದಾ ಇವ ಘನಾನನ್ದಾಮ್ಬುಧಾವಪ್ಯುಮಾ-
• ಕಾನ್ತೇಽನನ್ತಜಗದ್ಗತಂ ಸುರನರಂ ಜಾತಂ ಚ ತಿರ್ಯಙ್ ಮುಹುಃ ।
• ಭೂತಂ ಚಾಪಿ ಭವಿಷ್ಯತಿ ಪ್ರತಿಭವಂ ಮಾಯಾಮಯಂ ಚೋರ್ಮಿಜಂ
• ಸಮ್ಯಙ್ ಮಾಮನುಪಶ್ಯತಾಮನುಭವೈರ್ನಾಸ್ತ್ಯೇವ ತೇಷಾಂ ಭವಃ ॥ ೫೬॥
• ಹರಂ ವಿಜ್ಞಾತಾರಂ ನಿಖಿಲತನುಕಾರ್ಯೇಷು ಕರಣಂ
• ನ ಜಾನನ್ತೇ ಮೋಹಾದ್ಯಮಿತಕರಣಾ ಅಪ್ಯತಿತರಾಮ್ ।
• ಉಮಾನಾಥಾಕಾರಂ ಹೃದಯದಹರಾನ್ತರ್ಗತಸರಾ
• ಪಯೋಜಾತೇ ಭಾಸ್ವದ್ಭವಭುಜಗನಾಶಾಣ್ಡಜವರಮ್ ॥ ೫೭॥

• ॥ಇತಿ ಶ್ರೀಶಿವರಹಸ್ಯೇ ಶಙ್ಕರಾಖ್ಯೇ ಷಷ್ಠಾಂಶೇ ಋಭುನಿದಾಘಸಂವಾದೇ ಶಿವೇನ ಕುಮಾರೋಪದೇಶವರ್ಣನಂ ನಾಮ ಪಞ್ಚಮೋಽಧ್ಯಾಯಃ ॥

Special Thanks

The Sanskrit works, published by Sri Ramanasramam, have been approved to be posted on sanskritdocuments.org by permission of Sri V.S. Ramanan, President, Sri Ramanasramam.

Credits

Encoded by Anil Sharma anilandvijaya at gmail.com
Proofread by Sunder Hattangadi and Anil Sharma

Complete text of the Ribhugita with options to [Change script] (right top) is available here in Gita collection https://sanskritdocuments.org/doc_giitaa/RGall.html