ಋಭುಗೀತಾ ೪೦ ॥ ಚಿತ್ತ-ವೃತ್ತಿ-ನಿರೋಧ ಪ್ರಕರಣಮ್ ॥

ಋಭುಃ -

• ಸರ್ವಸಾರಾತ್ ಸಾರತರಂ ತತಃ ಸಾರತರಾನ್ತರಮ್ ।
• ಇದಮನ್ತಿಮತ್ಯನ್ತಂ ಶೃಣು ಪ್ರಕರಣಂ ಮುದಾ ॥ ೧॥
• ಬ್ರಹ್ಮೈವ ಸರ್ವಮೇವೇದಂ ಬ್ರಹ್ಮೈವಾನ್ಯನ್ನ ಕಿಞ್ಚನ ।
• ನಿಶ್ಚಯಂ ದೃಢಮಾಶ್ರಿತ್ಯ ಸರ್ವತ್ರ ಸುಖಮಾಸ್ವ ಹ ॥ ೨॥
• ಬ್ರಹ್ಮೈವ ಸರ್ವಭುವನಂ ಭುವನಂ ನಾಮ ಸನ್ತ್ಯಜ ।
• ಅಹಂ ಬ್ರಹ್ಮೇತಿ ನಿಶ್ಚಿತ್ಯ ಅಹಂ ಭಾವಂ ಪರಿತ್ಯಜ ॥ ೩॥
• ಸರ್ವಮೇವಂ ಲಯಂ ಯಾತಿ ಸ್ವಯಮೇವ ಪತತ್ರಿವತ್ ।
• ಸ್ವಯಮೇವ ಲಯಂ ಯಾತಿ ಸುಪ್ತಹಸ್ತಸ್ಥಪದ್ಮವತ್ ॥ ೪॥
• ನ ತ್ವಂ ನಾಹಂ ನ ಪ್ರಪಞ್ಚಃ ಸರ್ವಂ ಬ್ರಹ್ಮೈವ ಕೇವಲಮ್ ।
• ನ ಭೂತಂ ನ ಚ ಕಾರ್ಯಂ ಚ ಸರ್ವಂ ಬ್ರಹ್ಮೈವ ಕೇವಲಮ್ ॥ ೫॥
• ನ ದೈವಂ ನ ಚ ಕಾರ್ಯಾಣಿ ನ ದೇಹಂ ನೇನ್ದ್ರಿಯಾಣಿ ಚ ।
• ನ ಜಾಗ್ರನ್ನ ಚ ವಾ ಸ್ವಪ್ನೋ ನ ಸುಷುಪ್ತಿರ್ನ ತುರ್ಯಕಮ್ ॥ ೬॥
• ಇದಂ ಪ್ರಪಞ್ಚಂ ನಾಸ್ತ್ಯೇವ ಸರ್ವಂ ಬ್ರಹ್ಮೇತಿ ನಿಶ್ಚಿನು ।
• ಸರ್ವಂ ಮಿಥ್ಯಾ ಸದಾ ಮಿಥ್ಯಾ ಸರ್ವಂ ಬ್ರಹ್ಮೇತಿ ನಿಶ್ಚಿನು ॥ ೭॥
• ಸದಾ ಬ್ರಹ್ಮ ವಿಚಾರಂ ಚ ಸರ್ವಂ ಬ್ರಹ್ಮೇತಿ ನಿಶ್ಚಿನು ।
• ತಥಾ ದ್ವೈತಪ್ರತೀತಿಶ್ಚ ಸರ್ವಂ ಬ್ರಹ್ಮೇತಿ ನಿಶ್ಚಿನು ॥ ೮॥
• ಸದಾಹಂ ಭಾವರೂಪಂ ಚ ಸರ್ವಂ ಬ್ರಹ್ಮೇತಿ ನಿಶ್ಚಿನು ।
• ನಿತ್ಯಾನಿತ್ಯವಿವೇಕಂ ಚ ಸರ್ವಂ ಬ್ರಹ್ಮೇತಿ ನಿಶ್ಚಿನು ॥ ೯॥
• ಭಾವಾಭಾವಪ್ರತೀತಿಂ ಚ ಸರ್ವಂ ಬ್ರಹ್ಮೇತಿ ನಿಶ್ಚಿನು ।
• ಗುಣದೋಷವಿಭಾಗಂ ಚ ಸರ್ವಂ ಬ್ರಹ್ಮೇತಿ ನಿಶ್ಚಿನು ॥ ೧೦॥
• ಕಾಲಾಕಾಲವಿಭಾಗಂ ಚ ಸರ್ವಂ ಬ್ರಹ್ಮೇತಿ ನಿಶ್ಚಿನು ।
• ಅಹಂ ಜೀವೇತ್ಯನುಭವಂ ಸರ್ವಂ ಬ್ರಹ್ಮೇತಿ ನಿಶ್ಚಿನು ॥ ೧೧॥
• ಅಹಂ ಮುಕ್ತೋಽಸ್ಮ್ಯನುಭವಂ ಸರ್ವಂ ಬ್ರಹ್ಮೇತಿ ನಿಶ್ಚಿನು ।
• ಸರ್ವಂ ಬ್ರಹ್ಮೇತಿ ಕಲನಂ ಸರ್ವಂ ಬ್ರಹ್ಮೇತಿ ನಿಶ್ಚಿನು ॥ ೧೨॥
• ಸರ್ವಂ ನಾಸ್ತೀತಿ ವಾರ್ತಾ ಚ ಸರ್ವಂ ಬ್ರಹ್ಮೇತಿ ನಿಶ್ಚಿನು ।
• ದೇವತಾನ್ತರಸತ್ತಾಕಂ ಸರ್ವಂ ಬ್ರಹ್ಮೇತಿ ನಿಶ್ಚಿನು ॥ ೧೩॥
• ದೇವತಾನ್ತರಪೂಜಾ ಚ ಸರ್ವಂ ಬ್ರಹ್ಮೇತಿ ನಿಶ್ಚಿನು ।
• ದೇಹೋಽಹಮಿತಿ ಸಙ್ಕಲ್ಪಂ ಸರ್ವಂ ಬ್ರಹ್ಮೇತಿ ನಿಶ್ಚಿನು ॥ ೧೪॥
• ಬ್ರಹ್ಮಾಹಮಿತಿ ಸಙ್ಕಲ್ಪಂ ಸರ್ವಂ ಬ್ರಹ್ಮೇತಿ ನಿಶ್ಚಿನು ।
• ಗುರುಶಿಷ್ಯಾದಿ ಸಙ್ಕಲ್ಪಂ ಸರ್ವಂ ಬ್ರಹ್ಮೇತಿ ನಿಶ್ಚಿನು ॥ ೧೫॥
• ತುಲ್ಯಾತುಲ್ಯಾದಿ ಸಙ್ಕಲ್ಪಂ ಸರ್ವಂ ಬ್ರಹ್ಮೇತಿ ನಿಶ್ಚಿನು ।
• ವೇದಶಾಸ್ತ್ರಾದಿ ಸಙ್ಕಲ್ಪಂ ಸರ್ವಂ ಬ್ರಹ್ಮೇತಿ ನಿಶ್ಚಿನು ॥ ೧೬॥
• ಚಿತ್ತಸತ್ತಾದಿ ಸಙ್ಕಲ್ಪಂ ಸರ್ವಂ ಬ್ರಹ್ಮೇತಿ ನಿಶ್ಚಿನು ।
• ಬುದ್ಧಿನಿಶ್ಚಯಸಙ್ಕಲ್ಪಂ ಸರ್ವಂ ಬ್ರಹ್ಮೇತಿ ನಿಶ್ಚಿನು ॥ ೧೭॥
• ಮನೋವಿಕಲ್ಪಸಙ್ಕಲ್ಪಂ ಸರ್ವಂ ಬ್ರಹ್ಮೇತಿ ನಿಶ್ಚಿನು ।
• ಅಹಂಕಾರಾದಿ ಸಙ್ಕಲ್ಪಂ ಸರ್ವಂ ಬ್ರಹ್ಮೇತಿ ನಿಶ್ಚಿನು ॥ ೧೮॥
• ಪಞ್ಚಭೂತಾದಿಸಙ್ಕಲ್ಪಂ ಸರ್ವಂ ಬ್ರಹ್ಮೇತಿ ನಿಶ್ಚಿನು ।
• ಶಬ್ದಾದಿಸತ್ತಾಸಙ್ಕಲ್ಪಂ ಸರ್ವಂ ಬ್ರಹ್ಮೇತಿ ನಿಶ್ಚಿನು ॥ ೧೯॥
• ದೃಗ್ವಾರ್ತಾದಿಕಸಙ್ಕಲ್ಪಂ ಸರ್ವಂ ಬ್ರಹ್ಮೇತಿ ನಿಶ್ಚಿನು ।
• ಕರ್ಮೇನ್ದ್ರಿಯಾದಿಸಙ್ಕಲ್ಪಂ ಸರ್ವಂ ಬ್ರಹ್ಮೇತಿ ನಿಶ್ಚಿನು ॥ ೨೦॥
• ವಚನಾದಾನಸಙ್ಕಲ್ಪಂ ಸರ್ವಂ ಬ್ರಹ್ಮೇತಿ ನಿಶ್ಚಿನು ।
• ಮುನೀನ್ದ್ರೋಪೇನ್ದ್ರಸಙ್ಕಲ್ಪಂ ಸರ್ವಂ ಬ್ರಹ್ಮೇತಿ ನಿಶ್ಚಿನು ॥ ೨೧॥
• ಮನೋಬುದ್ಧ್ಯಾದಿಸಙ್ಕಲ್ಪಂ ಸರ್ವಂ ಬ್ರಹ್ಮೇತಿ ನಿಶ್ಚಿನು ।
• ಸಙ್ಕಲ್ಪಾಧ್ಯಾಸ ಇತ್ಯಾದಿ ಸರ್ವಂ ಬ್ರಹ್ಮೇತಿ ನಿಶ್ಚಿನು ॥ ೨೨॥
• ರುದ್ರಕ್ಷೇತ್ರಾದಿ ಸಙ್ಕಲ್ಪಂ ಸರ್ವಂ ಬ್ರಹ್ಮೇತಿ ನಿಶ್ಚಿನು ।
• ಪ್ರಾಣಾದಿದಶಸಙ್ಕಲ್ಪಂ ಸರ್ವಂ ಬ್ರಹ್ಮೇತಿ ನಿಶ್ಚಿನು ॥ ೨೩॥
• ಮಾಯಾ ವಿದ್ಯಾ ದೇಹಜೀವಾಃ ಸರ್ವಂ ಬ್ರಹ್ಮೇತಿ ನಿಶ್ಚಿನು ।
• ಸ್ಥೂಲವ್ಯಷ್ಟಾದಿಸಙ್ಕಲ್ಪಂ ಸರ್ವಂ ಬ್ರಹ್ಮೇತಿ ನಿಶ್ಚಿನು ॥ ೨೪॥
• ಸೂಕ್ಷ್ಮವ್ಯಷ್ಟಿಸಮಷ್ಟ್ಯಾದಿ ಸರ್ವಂ ಬ್ರಹ್ಮೇತಿ ನಿಶ್ಚಿನು ।
• ವ್ಯಷ್ಟ್ಯಜ್ಞಾನಾದಿ ಸಙ್ಕಲ್ಪಂ ಸರ್ವಂ ಬ್ರಹ್ಮೇತಿ ನಿಶ್ಚಿನು ॥ ೨೫॥
• ವಿಶ್ವವೈಶ್ವಾನರತ್ವಂ ಚ ಸರ್ವಂ ಬ್ರಹ್ಮೇತಿ ನಿಶ್ಚಿನು ।
• ತೈಜಸಪ್ರಾಜ್ಞಭೇದಂ ಚ ಸರ್ವಂ ಬ್ರಹ್ಮೇತಿ ನಿಶ್ಚಿನು ॥ ೨೬॥
• ವಾಚ್ಯಾರ್ಥಂ ಚಾಪಿ ಲಕ್ಷ್ಯಾರ್ಥಂ ಸರ್ವಂ ಬ್ರಹ್ಮೇತಿ ನಿಶ್ಚಿನು ।
• ಜಹಲ್ಲಕ್ಷಣಯಾನೈಕ್ಯಂ ಅಜಹಲ್ಲಕ್ಷಣಾ ಧ್ರುವಮ್ ॥ ೨೭॥
• ಭಾಗತ್ಯಾಗೇನ ನಿತ್ಯೈಕ್ಯಂ ಸರ್ವಂ ಬ್ರಹ್ಮ ಉಪಾಧಿಕಮ್ ।
• ಲಕ್ಷ್ಯಂ ಚ ನಿರುಪಾಧ್ಯೈಕ್ಯಂ ಸರ್ವಂ ಬ್ರಹ್ಮೇತಿ ನಿಶ್ಚಿನು ॥ ೨೮॥
• ಏವಮಾಹುರ್ಮಹಾತ್ಮಾನಃ ಸರ್ವಂ ಬ್ರಹ್ಮೇತಿ ಕೇವಲಮ್ ।
• ಸರ್ವಮನ್ತಃ ಪರಿತ್ಯಜ್ಯ ಅಹಂ ಬ್ರಹ್ಮೇತಿ ಭಾವಯ ॥ ೨೯॥
• ಅಸಙ್ಕಲಿತಕಾಪಿಲೈರ್ಮಧುಹರಾಕ್ಷಿಪೂಜ್ಯಾಮ್ಬುಜ-
• ಪ್ರಭಾಙ್ಘ್ರಿಜನಿಮೋತ್ತಮೋ ಪರಿಷಿಚೇದ್ಯದಿನ್ದುಪ್ರಭಮ್ ।
• ತಂ ಡಿಣ್ಡೀರನಿಭೋತ್ತಮೋತ್ತಮ ಮಹಾಖಣ್ಡಾಜ್ಯದಧ್ನಾ ಪರಂ
• ಕ್ಷೀರಾದ್ಯೈರಭಿಷಿಚ್ಯ ಮುಕ್ತಿಪರಮಾನನ್ದಂ ಲಭೇ ಶಾಮ್ಭವಮ್ ॥ ೩೦॥

• ॥ ಇತಿ ಶ್ರೀಶಿವರಹಸ್ಯೇ ಶಙ್ಕರಾಖ್ಯೇ ಷಷ್ಠಾಂಶೇ ಋಭುನಿದಾಘಸಂವಾದೇ ಚಿತ್ತವೃತ್ತಿನಿರೋಧಪ್ರಕರಣಂ ನಾಮ ಚತ್ವಾರಿಂಶೋಽಧ್ಯಾಯಃ ॥

Special Thanks

The Sanskrit works, published by Sri Ramanasramam, have been approved to be posted on sanskritdocuments.org by permission of Sri V.S. Ramanan, President, Sri Ramanasramam.

Credits

Encoded by Anil Sharma anilandvijaya at gmail.com
Proofread by Sunder Hattangadi and Anil Sharma

https://sanskritdocuments.org

Send corrections to sanskrit at cheerful.com