Ribhu Gita - Siva Rahasya Purana Amsha 6

ಋಭುಗೀತಾ ೩೬ ॥ ಬ್ರಹ್ಮ-ಭಾವನೋಪದೇಶ ಪ್ರಕರಣಮ್ ॥

ಋಭುಃ -

ಶೃಣು ವಕ್ಷ್ಯಾಮಿ ವಿಪ್ರೇನ್ದ್ರ ಸರ್ವಂ ಬ್ರಹ್ಮೈವ ನಿರ್ಣಯಮ್ ।
ಯಸ್ಯ ಶ್ರವಣಮಾತ್ರೇಣ ಸದ್ಯೋ ಮುಕ್ತಿಮವಾಪ್ನುಯಾತ್ ॥ ೧॥
ಇದಮೇವ ಸದಾ ನಾಸ್ತಿ ಹ್ಯಹಮೇವ ಹಿ ಕೇವಲಮ್ ।
ಆತ್ಮೈವ ಸರ್ವದಾ ನಾಸ್ತಿ ಆತ್ಮೈವ ಸುಖಲಕ್ಷಣಮ್ ॥ ೨॥
ಆತ್ಮೈವ ಪರಮಂ ತತ್ತ್ವಮಾತ್ಮೈವ ಜಗತಾಂ ಗಣಃ ।
ಆತ್ಮೈವ ಗಗನಾಕಾರಮಾತ್ಮೈವ ಚ ನಿರನ್ತರಮ್ ॥ ೩॥
ಆತ್ಮೈವ ಸತ್ಯಂ ಬ್ರಹ್ಮೈವ ಆತ್ಮೈವ ಗುರುಲಕ್ಷಣಮ್ ।
ಆತ್ಮೈವ ಚಿನ್ಮಯಂ ನಿತ್ಯಮಾತ್ಮೈವಾಕ್ಷರಮವ್ಯಯಮ್ ॥ ೪॥
ಆತ್ಮೈವ ಸಿದ್ಧರೂಪಂ ವಾ ಆತ್ಮೈವಾತ್ಮಾ ನ ಸಂಶಯಃ ।
ಆತ್ಮೈವಜಗದಾಕಾರಂ ಆತ್ಮೈವಾತ್ಮಾ ಸ್ವಯಂ ಸ್ವಯಮ್ ॥ ೫॥
ಆತ್ಮೈವ ಶಾನ್ತಿಕಲನಮಾತ್ಮೈವ ಮನಸಾ ವಿಯತ್ ।
ಆತ್ಮೈವ ಸರ್ವಂ ಯತ್ ಕಿಞ್ಚಿದಾತ್ಮೈವ ಪರಮಂ ಪದಮ್ ॥ ೬॥
ಆತ್ಮೈವ ಭುವನಾಕಾರಮಾತ್ಮೈವ ಪ್ರಿಯಮವ್ಯಯಮ್ ।
ಆತ್ಮೈವಾನ್ಯನ್ನ ಚ ಕ್ವಾಪಿ ಆತ್ಮೈವಾನ್ಯಂ ಮನೋಮಯಮ್ ॥ ೭॥
ಆತ್ಮೈವ ಸರ್ವವಿಜ್ಞಾನಮಾತ್ಮೈವ ಪರಮಂ ಧನಮ್ ।
ಆತ್ಮೈವ ಭೂತರೂಪಂ ವಾ ಆತ್ಮೈವ ಭ್ರಮಣಂ ಮಹತ್ ॥ ೮॥
ಆತ್ಮೈವ ನಿತ್ಯಶುದ್ಧಂ ವಾ ಆತ್ಮೈವ ಗುರುರಾತ್ಮನಃ ।
ಆತ್ಮೈವ ಹ್ಯಾತ್ಮನಃ ಶಿಷ್ಯ ಆತ್ಮೈವ ಲಯಮಾತ್ಮನಿ ॥ ೯॥
ಆತ್ಮೈವ ಹ್ಯಾತ್ಮನೋ ಧ್ಯಾನಮಾತ್ಮೈವ ಗತಿರಾತ್ಮನಃ ।
ಆತ್ಮೈವ ಹ್ಯಾತ್ಮನೋ ಹೋಮ ಆತ್ಮೈವ ಹ್ಯಾತ್ಮನೋ ಜಪಃ ॥ ೧೦॥
ಆತ್ಮೈವ ತೃಪ್ತಿರಾತ್ಮೈವ ಆತ್ಮನೋಽನ್ಯನ್ನ ಕಿಞ್ಚನ ।
ಆತ್ಮೈವ ಹ್ಯಾತ್ಮನೋ ಮೂಲಮಾತ್ಮೈವ ಹ್ಯಾತ್ಮನೋ ವ್ರತಮ್ ॥ ೧೧॥
ಆತ್ಮಜ್ಞಾನಂ ವ್ರತಂ ನಿತ್ಯಮಾತ್ಮಜ್ಞಾನಂ ಪರಂ ಸುಖಮ್ ।
ಆತ್ಮಜ್ಞಾನಂ ಪರಾನನ್ದಮಾತ್ಮಜ್ಞಾನಂ ಪರಾಯಣಮ್ ॥ ೧೨॥
ಆತ್ಮಜ್ಞಾನಂ ಪರಂ ಬ್ರಹ್ಮ ಆತ್ಮಜ್ಞಾನಂ ಮಹಾವ್ರತಮ್ ।
ಆತ್ಮಜ್ಞಾನಂ ಸ್ವಯಂ ವೇದ್ಯಮಾತ್ಮಜ್ಞಾನಂ ಮಹಾಧನಮ್ ॥ ೧೩॥
ಆತ್ಮಜ್ಞಾನಂ ಪರಂ ಬ್ರಹ್ಮ ಆತ್ಮಜ್ಞಾನಂ ಮಹತ್ ಸುಖಮ್ ।
ಆತ್ಮಜ್ಞಾನಂ ಮಹಾನಾತ್ಮಾ ಆತ್ಮಜ್ಞಾನಂ ಜನಾಸ್ಪದಮ್ ॥ ೧೪॥
ಆತ್ಮಜ್ಞಾನಂ ಮಹಾತೀರ್ಥಮಾತ್ಮಜ್ಞಾನಂ ಜಯಪ್ರದಮ್ ।
ಆತ್ಮಜ್ಞಾನಂ ಪರಂ ಬ್ರಹ್ಮ ಆತ್ಮಜ್ಞಾನಂ ಚರಾಚರಮ್ ॥ ೧೫॥
ಆತ್ಮಜ್ಞಾನಂ ಪರಂ ಶಾಸ್ತ್ರಮಾತ್ಮಜ್ಞಾನಮನೂಪಮಮ್ ।
ಆತ್ಮಜ್ಞಾನಂ ಪರೋ ಯೋಗ ಆತ್ಮಜ್ಞಾನಂ ಪರಾ ಗತಿಃ ॥ ೧೬॥
ಆತ್ಮಜ್ಞಾನಂ ಪರಂ ಬ್ರಹ್ಮ ಇತ್ಯೇವಂ ದೃಢನಿಶ್ಚಯಃ ।
ಆತ್ಮಜ್ಞಾನಂ ಮನೋನಾಶಃ ಆತ್ಮಜ್ಞಾನಂ ಪರೋ ಗುರುಃ ॥ ೧೭॥
ಆತ್ಮಜ್ಞಾನಂ ಚಿತ್ತನಾಶಃ ಆತ್ಮಜ್ಞಾನಂ ವಿಮುಕ್ತಿದಮ್ ।
ಆತ್ಮಜ್ಞಾನಂ ಭಯನಾಶಮಾತ್ಮಜ್ಞಾನಂ ಸುಖಾವಹಮ್ ॥ ೧೮॥
ಆತ್ಮಜ್ಞಾನಂ ಮಹಾತೇಜ ಆತ್ಮಜ್ಞಾನಂ ಮಹಾಶುಭಮ್ ।
ಆತ್ಮಜ್ಞಾನಂ ಸತಾಂ ರೂಪಮಾತ್ಮಜ್ಞಾನಂ ಸತಾಂ ಪ್ರಿಯಮ್ ॥ ೧೯॥
ಆತ್ಮಜ್ಞಾನಂ ಸತಾಂ ಮೋಕ್ಷಮಾತ್ಮಜ್ಞಾನಂ ವಿವೇಕಜಮ್ ।
ಆತ್ಮಜ್ಞಾನಂ ಪರೋ ಧರ್ಮ ಆತ್ಮಜ್ಞಾನಂ ಸದಾ ಜಪಃ ॥ ೨೦॥
ಆತ್ಮಜ್ಞಾನಸ್ಯ ಸದೃಶಮಾತ್ಮವಿಜ್ಞಾನಮೇವ ಹಿ ।
ಆತ್ಮಜ್ಞಾನೇನ ಸದೃಶಂ ನ ಭೂತಂ ನ ಭವಿಷ್ಯತಿ ॥ ೨೧॥
ಆತ್ಮಜ್ಞಾನಂ ಪರೋ ಮನ್ತ್ರ ಆತ್ಮಜ್ಞಾನಂ ಪರಂ ತಪಃ ।
ಆತ್ಮಜ್ಞಾನಂ ಹರಿಃ ಸಾಕ್ಷಾದಾತ್ಮಜ್ಞಾನಂ ಶಿವಃ ಪರಃ ॥ ೨೨॥
ಆತ್ಮಜ್ಞಾನಂ ಪರೋ ಧಾತಾ ಆತ್ಮಜ್ಞಾನಂ ಸ್ವಸಂಮತಮ್ ।
ಆತ್ಮಜ್ಞಾನಂ ಸ್ವಯಂ ಪುಣ್ಯಮಾತ್ಮಜ್ಞಾನಂ ವಿಶೋಧನಮ್ ॥ ೨೩॥
ಆತ್ಮಜ್ಞಾನಂ ಮಹಾತೀರ್ಥಮಾತ್ಮಜ್ಞಾನಂ ಶಮಾದಿಕಮ್ ।
ಆತ್ಮಜ್ಞಾನಂ ಪ್ರಿಯಂ ಮನ್ತ್ರಮಾತ್ಮಜ್ಞಾನಂ ಸ್ವಪಾವನಮ್ ॥ ೨೪॥
ಆತ್ಮಜ್ಞಾನಂ ಚ ಕಿನ್ನಾಮ ಅಹಂ ಬ್ರಹ್ಮೇತಿ ನಿಶ್ಚಯಃ ।
ಅಹಂ ಬ್ರಹ್ಮೇತಿ ವಿಶ್ವಾಸಮಾತ್ಮಜ್ಞಾನಂ ಮಹೋದಯಮ್ ॥ ೨೫॥
ಅಹಂ ಬ್ರಹ್ಮಾಸ್ಮಿ ನಿತ್ಯೋಽಸ್ಮಿ ಸಿದ್ಧೋಽಸ್ಮೀತಿ ವಿಭಾವನಮ್ ।
ಆನನ್ದೋಽಹಂ ಪರಾನನ್ದಂ ಶುದ್ಧೋಽಹಂ ನಿತ್ಯಮವ್ಯಯಃ ॥ ೨೬॥
ಚಿದಾಕಾಶಸ್ವರೂಪೋಽಸ್ಮಿ ಸಚ್ಚಿದಾನನ್ದಶಾಶ್ವತಮ್ ।
ನಿರ್ವಿಕಾರೋಽಸ್ಮಿ ಶಾನ್ತೋಽಹಂ ಸರ್ವತೋಽಹಂ ನಿರನ್ತರಃ ॥ ೨೭॥
ಸರ್ವದಾ ಸುಖರೂಪೋಽಸ್ಮಿ ಸರ್ವದೋಷವಿವರ್ಜಿತಃ ।
ಸರ್ವಸಙ್ಕಲ್ಪಹೀನೋಽಸ್ಮಿ ಸರ್ವದಾ ಸ್ವಯಮಸ್ಮ್ಯಹಮ್ ॥ ೨೮॥
ಸರ್ವಂ ಬ್ರಹ್ಮೇತ್ಯನುಭವಂ ವಿನಾ ಶಬ್ದಂ ಪಠ ಸ್ವಯಮ್ ।
ಕೋಟ್ಯಶ್ವಮೇಧೇ ಯತ್ ಪುಣ್ಯಂ ಕ್ಷಣಾತ್ ತತ್ಪುಣ್ಯಮಾಪ್ನುಯಾತ್ ॥ ೨೯॥
ಅಹಂ ಬ್ರಹ್ಮೇತಿ ನಿಶ್ಚಿತ್ಯ ಮೇರುದಾನಫಲಂ ಲಭೇತ್ ।
ಬ್ರಹ್ಮೈವಾಹಮಿತಿ ಸ್ಥಿತ್ವಾ ಸರ್ವಭೂದಾನಮಪ್ಯಣು ॥ ೩೦॥
ಬ್ರಹ್ಮೈವಾಹಮಿತಿ ಸ್ಥಿತ್ವಾ ಕೋಟಿಶೋ ದಾನಮಪ್ಯಣು ।
ಬ್ರಹ್ಮೈವಾಹಮಿತಿ ಸ್ಥಿತ್ವಾ ಸರ್ವಾನನ್ದಂ ತೃಣಾಯತೇ ॥ ೩೧॥
ಬ್ರಹ್ಮೈವ ಸರ್ವಮಿತ್ಯೇವ ಭಾವಿತಸ್ಯ ಫಲಂ ಸ್ವಯಮ್ ।
ಬ್ರಹ್ಮೈವಾಹಮಿತಿ ಸ್ಥಿತ್ವಾ ಸಮಾನಂ ಬ್ರಹ್ಮ ಏವ ಹಿ ॥ ೩೨॥
ತಸ್ಮಾತ್ ಸ್ವಪ್ನೇಽಪಿ ನಿತ್ಯಂ ಚ ಸರ್ವಂ ಸನ್ತ್ಯಜ್ಯ ಯತ್ನತಃ ।
ಅಹಂ ಬ್ರಹ್ಮ ನ ಸನ್ದೇಹಃ ಅಹಮೇವ ಗತಿರ್ಮಮ ॥ ೩೩॥
ಅಹಮೇವ ಸದಾ ನಾನ್ಯದಹಮೇವ ಸದಾ ಗುರುಃ ।
ಅಹಮೇವ ಪರೋ ಹ್ಯಾತ್ಮಾ ಅಹಮೇವ ನ ಚಾಪರಃ ॥ ೩೪॥
ಅಹಮೇವ ಗುರುಃ ಶಿಷ್ಯಃ ಅಹಮೇವೇತಿ ನಿಶ್ಚಿನು ।
ಇದಮಿತ್ಯೇವ ನಿರ್ದೇಶಃ ಪರಿಚ್ಛಿನ್ನೋ ಜಗನ್ನ ಹಿ ॥ ೩೫॥
ನ ಭೂಮಿರ್ನ ಜಲಂ ನಾಗ್ನಿರ್ನ ವಾಯುರ್ನ ಚ ಖಂ ತಥಾ ।
ಸರ್ವಂ ಚೈತನ್ಯಮಾತ್ರತ್ವಾತ್ ನಾನ್ಯತ್ ಕಿಞ್ಚನ ವಿದ್ಯತೇ ॥ ೩೬॥
ಇತ್ಯೇವಂ ಭಾವನಪರೋ ದೇಹಮುಕ್ತಃ ಸುಖೀಭವ ।
ಅಹಮಾತ್ಮಾ ಇದಂ ನಾಸ್ತಿ ಸರ್ವಂ ಚೈತನ್ಯಮಾತ್ರತಃ ॥ ೩೭॥
ಅಹಮೇವ ಹಿ ಪೂರ್ಣಾತ್ಮಾ ಆನನ್ದಾಬ್ಧಿರನಾಮಯಃ ।
ಇದಮೇವ ಸದಾ ನಾಸ್ತಿ ಜಡತ್ವಾದಸದೇವ ಹಿ ।
ಇದಂ ಬ್ರಹ್ಮ ಸದಾ ಬ್ರಹ್ಮ ಇದಂ ನೇತಿ ಸುಖೀ ಭವ ॥ ೩೮॥
ತುರಙ್ಗಶೃಙ್ಗಸನ್ನಿಭಾ ಶ್ರುತಿಪರೋಚನಾ ...
ವಿಶೇಷಕಾಮವಾಸನಾ ವಿನಿಶ್ಚಿತಾತ್ಮವೃತ್ತಿತಃ ।
ನರಾಃ ಸುರಾ ಮುನೀಶ್ವರಾ ಅಸಙ್ಗಸಙ್ಗಮಪ್ಯುಮಾ-
ಪತಿಂ ... ನ ತೇ ಭಜನ್ತಿ ಕೇಚನ ... ॥ ೩೯॥

॥ ಇತಿ ಶ್ರೀಶಿವರಹಸ್ಯೇ ಶಙ್ಕರಾಖ್ಯೇ ಷಷ್ಠಾಂಶೇ ಋಭುನಿದಾಘಸಂವಾದೇ ಬ್ರಹ್ಮಭಾವನೋಪದೇಶಪ್ರಕರಣಂ ನಾಮ ಷಟ್{}ತ್ರಿಂಶೋಽಧ್ಯಾಯಃ ॥

Special Thanks

The Sanskrit works, published by Sri Ramanasramam, have been approved to be posted on sanskritdocuments.org by permission of Sri V.S. Ramanan, President, Sri Ramanasramam.

Credits

Encoded by Anil Sharma anilandvijaya at gmail.com
Proofread by Sunder Hattangadi and Anil Sharma

https://sanskritdocuments.org

Send corrections to sanskrit at cheerful.com