Ribhu Gita - Siva Rahasya Purana Amsha 6

ಋಭುಗೀತಾ ೭ ॥ ಸ್ವಾತ್ಮ-ನಿರೂಪಣಮ್ ॥

ಋಭುಃ -

ಅತ್ಯದ್ಭುತಂ ಪ್ರವಕ್ಷ್ಯಾಮಿ ಸರ್ವಲೋಕೇಷು ದುರ್ಲಭಮ್ ।
ವೇದಶಾಸ್ತ್ರಮಹಾಸಾರಂ ದುರ್ಲಭಂ ದುರ್ಲಭಂ ಸದಾ ॥ ೧॥
ಅಖಣ್ಡೈಕರಸೋ ಮನ್ತ್ರಮಖಣ್ಡೈಕರಸಂ ಫಲಮ್ ।
ಅಖಣ್ಡೈಕರಸೋ ಜೀವ ಅಖಣ್ಡೈಕರಸಾ ಕ್ರಿಯಾ ॥ ೨॥
ಅಖಣ್ಡೈಕರಸಾ ಭೂಮಿರಖಣ್ಡೈಕರಸಂ ಜಲಮ್ ।
ಅಖಣ್ಡೈಕರಸೋ ಗನ್ಧ ಅಖಣ್ಡೈಕರಸಂ ವಿಯತ್ ॥ ೩॥
ಅಖಣ್ಡೈಕರಸಂ ಶಾಸ್ತ್ರಂ ಅಖಣ್ಡೈಕರಸಂ ಶ್ರುತಿಃ ।
ಅಖಣ್ಡೈಕರಸಂ ಬ್ರಹ್ಮ ಅಖಣ್ಡೈಕರಸಂ ವ್ರತಮ್ ॥ ೪॥
ಅಖಣ್ಡೈಕರಸೋ ವಿಷ್ಣುರಖಣ್ಡೈಕರಸಃ ಶಿವಃ ।
ಅಖಣ್ಡೈಕರಸೋ ಬ್ರಹ್ಮಾ ಅಖಣ್ಡೈಕರಸಾಃ ಸುರಾಃ ॥ ೫॥
ಅಖಣ್ಡೈಕರಸಂ ಸರ್ವಮಖಣ್ಡೈಕರಸಃ ಸ್ವಯಮ್ ।
ಅಖಣ್ಡೈಕರಸಶ್ಚಾತ್ಮಾ ಅಖಣ್ಡೈಕರಸೋ ಗುರುಃ ॥ ೬॥
ಅಖಣ್ಡೈಕರಸಂ ವಾಚ್ಯಮಖಣ್ಡೈಕರಸಂ ಮಹಃ ।
ಅಖಣ್ಡೈಕರಸಂ ದೇಹ ಅಖಣ್ಡೈಕರಸಂ ಮನಃ ॥ ೭॥
ಅಖಣ್ಡೈಕರಸಂ ಚಿತ್ತಂ ಅಖಣ್ಡೈಕರಸಂ ಸುಖಮ್ ।
ಅಖಣ್ಡೈಕರಸಾ ವಿದ್ಯಾ ಅಖಣ್ಡೈಕರಸೋಽವ್ಯಯಃ ॥ ೮॥
ಅಖಣ್ಡೈಕರಸಂ ನಿತ್ಯಮಖಣ್ಡೈಕರಸಃ ಪರಃ ।
ಅಖಣ್ಡೈಕರಸಾತ್ ಕಿಞ್ಚಿದಖಣ್ಡೈಕರಸಾದಹಮ್ ॥ ೯॥
ಅಖಣ್ಡೈಕರಸಂ ವಾಸ್ತಿ ಅಖಣ್ಡೈಕರಸಂ ನ ಹಿ ।
ಅಖಣ್ಡೈಕರಸಾದನ್ಯತ್ ಅಖಣ್ಡೈಕರಸಾತ್ ಪರಃ ॥ ೧೦॥
ಅಖಣ್ಡೈಕರಸಾತ್ ಸ್ಥೂಲಂ ಅಖಣ್ಡೈಕರಸಂ ಜನಃ ।
ಅಖಣ್ಡೈಕರಸಂ ಸೂಕ್ಷ್ಮಮಖಣ್ಡೈಕರಸಂ ದ್ವಯಮ್ ॥ ೧೧॥
ಅಖಣ್ಡೈಕರಸಂ ನಾಸ್ತಿ ಅಖಣ್ಡೈಕರಸಂ ಬಲಮ್ ।
ಅಖಣ್ಡೈಕರಸಾದ್ವಿಷ್ಣುರಖಣ್ಡೈಕರಸಾದಣುಃ ॥ ೧೨॥
ಅಖಣ್ಡೈಕರಸಂ ನಾಸ್ತಿ ಅಖಣ್ಡೈಕರಸಾದ್ಭವಾನ್ ।
ಅಖಣ್ಡೈಕರಸೋ ಹ್ಯೇವ ಅಖಣ್ಡೈಕರಸಾದಿತಮ್ ॥ ೧೩॥
ಅಖಣ್ಡಿತರಸಾದ್ ಜ್ಞಾನಂ ಅಖಣ್ಡಿತರಸಾದ್ ಸ್ಥಿತಮ್ ।
ಅಖಣ್ಡೈಕರಸಾ ಲೀಲಾ ಅಖಣ್ಡೈಕರಸಃ ಪಿತಾ ॥ ೧೪॥var was ಲೀನಾ
ಅಖಣ್ಡೈಕರಸಾ ಭಕ್ತಾ ಅಖಣ್ಡೈಕರಸಃ ಪತಿಃ ।
ಅಖಣ್ಡೈಕರಸಾ ಮಾತಾ ಅಖಣ್ಡೈಕರಸೋ ವಿರಾಟ್ ॥ ೧೫॥
ಅಖಣ್ಡೈಕರಸಂ ಗಾತ್ರಂ ಅಖಣ್ಡೈಕರಸಂ ಶಿರಃ ।
ಅಖಣ್ಡೈಕರಸಂ ಘ್ರಾಣಂ ಅಖಣ್ಡೈಕರಸಂ ಬಹಿಃ ॥ ೧೬॥
ಅಖಣ್ಡೈಕರಸಂ ಪೂರ್ಣಮಖಣ್ಡೈಕರಸಾಮೃತಮ್ ।
ಅಖಣ್ಡೈಕರಸಂ ಶ್ರೋತ್ರಮಖಣ್ಡೈಕರಸಂ ಗೃಹಮ್ ॥ ೧೭॥
ಅಖಣ್ಡೈಕರಸಂ ಗೋಪ್ಯಮಖಣ್ಡೈಕರಸಃ ಶಿವಃ ।
ಅಖಣ್ಡೈಕರಸಂ ನಾಮ ಅಖಣ್ಡೈಕರಸೋ ರವಿಃ ॥ ೧೮॥
ಅಖಣ್ಡೈಕರಸಃ ಸೋಮಃ ಅಖಣ್ಡೈಕರಸೋ ಗುರುಃ ।
ಅಖಣ್ಡೈಕರಸಃ ಸಾಕ್ಷೀ ಅಖಣ್ಡೈಕರಸಃ ಸುಹೃತ್ ॥ ೧೯॥
ಅಖಣ್ಡೈಕರಸೋ ಬನ್ಧುರಖಣ್ಡೈಕರಸೋಽಸ್ಮ್ಯಹಮ್ ।
ಅಖಣ್ಡೈಕರಸೋ ರಾಜಾ ಅಖಣ್ಡೈಕರಸಂ ಪುರಮ್ ॥ ೨೦॥
ಅಖಣ್ಡೈಕರಸೈಶ್ವರ್ಯಂ ಅಖಣ್ಡೈಕರಸಂ ಪ್ರಭುಃ ।
ಅಖಣ್ಡೈಕರಸೋ ಮನ್ತ್ರ ಅಖಣ್ಡೈಕರಸೋ ಜಪಃ ॥ ೨೧॥
ಅಖಣ್ಡೈಕರಸಂ ಧ್ಯಾನಮಖಣ್ಡೈಕರಸಂ ಪದಮ್ ।
ಅಖಣ್ಡೈಕರಸಂ ಗ್ರಾಹ್ಯಮಖಣ್ಡೈಕರಸಂ ಮಹಾನ್ ॥ ೨೨॥
ಅಖಣ್ಡೈಕರಸಂ ಜ್ಯೋತಿರಖಣ್ಡೈಕರಸಂ ಪರಮ್ ।
ಅಖಣ್ಡೈಕರಸಂ ಭೋಜ್ಯಮಖಣ್ಡೈಕರಸಂ ಹವಿಃ ॥ ೨೩॥
ಅಖಣ್ಡೈಕರಸೋ ಹೋಮಃ ಅಖಣ್ಡೈಕರಸೋ ಜಯಃ ।
ಅಖಣ್ಡೈಕರಸಃ ಸ್ವರ್ಗಃ ಅಖಣ್ಡೈಕರಸಃ ಸ್ವಯಮ್ ॥ ೨೪॥
ಅಖಣ್ಡೈಕರಸಾಕಾರಾದನ್ಯನ್ನಾಸ್ತಿ ನಹಿ ಕ್ವಚಿತ್ ।
ಶೃಣು ಭೂಯೋ ಮಹಾಶ್ಚರ್ಯಂ ನಿತ್ಯಾನುಭವಸಂಪದಮ್ ॥ ೨೫॥
ದುರ್ಲಭಂ ದುರ್ಲಭಂ ಲೋಕೇ ಸರ್ವಲೋಕೇಷು ದುರ್ಲಭಮ್ ।
ಅಹಮಸ್ಮಿ ಪರಂ ಚಾಸ್ಮಿ ಪ್ರಭಾಸ್ಮಿ ಪ್ರಭವೋಽಸ್ಮ್ಯಹಮ್ ॥ ೨೬॥
ಸರ್ವರೂಪಗುರುಶ್ಚಾಸ್ಮಿ ಸರ್ವರೂಪೋಽಸ್ಮಿ ಸೋಽಸ್ಮ್ಯಹಮ್ ।
ಅಹಮೇವಾಸ್ಮಿ ಶುದ್ಧೋಽಸ್ಮಿ ಋದ್ಧೋಽಸ್ಮಿ ಪರಮೋಽಸ್ಮ್ಯಹಮ್ ॥ ೨೭॥
ಅಹಮಸ್ಮಿ ಸದಾ ಜ್ಞೋಽಸ್ಮಿ ಸತ್ಯೋಽಸ್ಮಿ ವಿಮಲೋಽಸ್ಮ್ಯಹಮ್ ।
ವಿಜ್ಞಾನೋಽಸ್ಮಿ ವಿಶೇಷೋಽಸ್ಮಿ ಸಾಮ್ಯೋಽಸ್ಮಿ ಸಕಲೋಽಸ್ಮ್ಯಹಮ್ ॥ ೨೮॥
ಶುದ್ಧೋಽಸ್ಮಿ ಶೋಕಹೀನೋಽಸ್ಮಿ ಚೈತನ್ಯೋಽಸ್ಮಿ ಸಮೋಽಸ್ಮ್ಯಹಮ್ ।
ಮಾನಾವಮಾನಹೀನೋಽಸ್ಮಿ ನಿರ್ಗುಣೋಽಸ್ಮಿ ಶಿವೋಽಸ್ಮ್ಯಹಮ್ ॥ ೨೯॥
ದ್ವೈತಾದ್ವೈತವಿಹೀನೋಽಸ್ಮಿ ದ್ವನ್ದ್ವಹೀನೋಽಸ್ಮಿ ಸೋಽಸ್ಮ್ಯಹಮ್ ।
ಭಾವಾಭಾವವಿಹೀನೋಽಸ್ಮಿ ಭಾಷಾಹೀನೋಽಸ್ಮಿ ಸೋಽಸ್ಮ್ಯಹಮ್ ॥ ೩೦॥
ಶೂನ್ಯಾಶೂನ್ಯಪ್ರಭಾವೋಽಸ್ಮಿ ಶೋಭನೋಽಸ್ಮಿ ಮನೋಽಸ್ಮ್ಯಹಮ್ ।
ತುಲ್ಯಾತುಲ್ಯವಿಹೀನೋಽಸ್ಮಿ ತುಚ್ಛಭಾವೋಽಸ್ಮಿ ನಾಸ್ಮ್ಯಹಮ್ ॥ ೩೧॥
ಸದಾ ಸರ್ವವಿಹೀನೋಽಸ್ಮಿ ಸಾತ್ವಿಕೋಽಸ್ಮಿ ಸದಾಸ್ಮ್ಯಹಮ್ ।
ಏಕಸಂಖ್ಯಾವಿಹೀನೋಽಸ್ಮಿ ದ್ವಿಸಂಖ್ಯಾ ನಾಸ್ತಿ ನಾಸ್ಮ್ಯಹಮ್ ॥ ೩೨॥
ಸದಸದ್ಭೇದಹೀನೋಽಸ್ಮಿ ಸಂಕಲ್ಪರಹಿತೋಽಸ್ಮ್ಯಹಮ್ ।
ನಾನಾತ್ಮಭೇದಹೀನೋಽಸ್ಮಿ ಯತ್ ಕಿಞ್ಚಿನ್ನಾಸ್ತಿ ಸೋಽಸ್ಮ್ಯಹಮ್ ॥ ೩೩॥
ನಾಹಮಸ್ಮಿ ನ ಚಾನ್ಯೋಽಸ್ಮಿ ದೇಹಾದಿರಹಿತೋಽಸ್ಮ್ಯಹಮ್ ।
ಆಶ್ರಯಾಶ್ರಯಹೀನೋಽಸ್ಮಿ ಆಧಾರರಹಿತೋಽಸ್ಮ್ಯಹಮ್ ॥ ೩೪॥
ಬನ್ಧಮೋಕ್ಷಾದಿಹೀನೋಽಸ್ಮಿ ಶುದ್ಧಬ್ರಹ್ಮಾದಿ ಸೋಽಸ್ಮ್ಯಹಮ್ ।
ಚಿತ್ತಾದಿಸರ್ವಹೀನೋಽಸ್ಮಿ ಪರಮೋಽಸ್ಮಿ ಪರೋಽಸ್ಮ್ಯಹಮ್ ॥ ೩೫॥
ಸದಾ ವಿಚಾರರೂಪೋಽಸ್ಮಿ ನಿರ್ವಿಚಾರೋಽಸ್ಮಿ ಸೋಽಸ್ಮ್ಯಹಮ್ ।
ಆಕಾರಾದಿಸ್ವರೂಪೋಽಸ್ಮಿ ಉಕಾರೋಽಸ್ಮಿ ಮುದೋಽಸ್ಮ್ಯಹಮ್ ॥ ೩೬॥
ಧ್ಯಾನಾಧ್ಯಾನವಿಹೀನೋಽಸ್ಮಿ ಧ್ಯೇಯಹೀನೋಽಸ್ಮಿ ಸೋಽಸ್ಮ್ಯಹಮ್ ।
ಪೂರ್ಣಾತ್ ಪೂರ್ಣೋಽಸ್ಮಿ ಪೂರ್ಣೋಽಸ್ಮಿ ಸರ್ವಪೂರ್ಣೋಽಸ್ಮಿ ಸೋಽಸ್ಮ್ಯಹಮ್ ॥ ೩೭॥
ಸರ್ವಾತೀತಸ್ವರೂಪೋಽಸ್ಮಿ ಪರಂ ಬ್ರಹ್ಮಾಸ್ಮಿ ಸೋಽಸ್ಮ್ಯಹಮ್ ।
ಲಕ್ಷ್ಯಲಕ್ಷಣಹೀನೋಽಸ್ಮಿ ಲಯಹೀನೋಽಸ್ಮಿ ಸೋಽಸ್ಮ್ಯಹಮ್ ॥ ೩೮॥
ಮಾತೃಮಾನವಿಹೀನೋಽಸ್ಮಿ ಮೇಯಹೀನೋಽಸ್ಮಿ ಸೋಽಸ್ಮ್ಯಹಮ್ ।
ಅಗತ್ ಸರ್ವಂ ಚ ದ್ರಷ್ಟಾಸ್ಮಿ ನೇತ್ರಾದಿರಹಿತೋಽಸ್ಮ್ಯಹಮ್ ॥ ೩೯॥
ಪ್ರವೃದ್ಧೋಽಸ್ಮಿ ಪ್ರಬುದ್ಧೋಽಸ್ಮಿ ಪ್ರಸನ್ನೋಽಸ್ಮಿ ಪರೋಽಸ್ಮ್ಯಹಮ್ ।
ಸರ್ವೇನ್ದ್ರಿಯವಿಹೀನೋಽಸ್ಮಿ ಸರ್ವಕರ್ಮಹಿತೋಽಸ್ಮ್ಯಹಮ್ ॥ ೪೦॥
ಸರ್ವವೇದಾನ್ತತೃಪ್ತೋಽಸ್ಮಿ ಸರ್ವದಾ ಸುಲಭೋಽಸ್ಮ್ಯಹಮ್ ।
ಮುದಾ ಮುದಿತಶೂನ್ಯೋಽಸ್ಮಿ ಸರ್ವಮೌನಫಲೋಽಸ್ಮ್ಯಹಮ್ ॥ ೪೧॥
ನಿತ್ಯಚಿನ್ಮಾತ್ರರೂಪೋಽಸ್ಮಿ ಸದಸಚ್ಚಿನ್ಮಯೋಽಸ್ಮ್ಯಹಮ್ ।
ಯತ್ ಕಿಞ್ಚಿದಪಿ ಹೀನೋಽಸ್ಮಿ ಸ್ವಲ್ಪಮಪ್ಯತಿ ನಾಹಿತಮ್ ॥ ೪೨॥
ಹೃದಯಗ್ರನ್ಥಿಹೀನೋಽಸ್ಮಿ ಹೃದಯಾದ್ವ್ಯಾಪಕೋಽಸ್ಮ್ಯಹಮ್ ।
ಷಡ್ವಿಕಾರವಿಹೀನೋಽಸ್ಮಿ ಷಟ್ಕೋಶರಹಿತೋಽಸ್ಮ್ಯಹಮ್ ॥ ೪೩॥
ಅರಿಷಡ್ವರ್ಗಮುಕ್ತೋಽಸ್ಮಿ ಅನ್ತರಾದನ್ತರೋಽಸ್ಮ್ಯಹಮ್ ।
ದೇಶಕಾಲವಿಹೀನೋಽಸ್ಮಿ ದಿಗಮ್ಬರಮುಖೋಽಸ್ಮ್ಯಹಮ್ ॥ ೪೪॥
ನಾಸ್ತಿ ಹಾಸ್ತಿ ವಿಮುಕ್ತೋಽಸ್ಮಿ ನಕಾರರಹಿತೋಽಸ್ಮ್ಯಹಮ್ ।
ಸರ್ವಚಿನ್ಮಾತ್ರರೂಪೋಽಸ್ಮಿ ಸಚ್ಚಿದಾನನ್ದಮಸ್ಮ್ಯಹಮ್ ॥ ೪೫॥
ಅಖಣ್ಡಾಕಾರರೂಪೋಽಸ್ಮಿ ಅಖಣ್ಡಾಕಾರಮಸ್ಮ್ಯಹಮ್ ।
ಪ್ರಪಞ್ಚಚಿತ್ತರೂಪೋಽಸ್ಮಿ ಪ್ರಪಞ್ಚರಹಿತೋಽಸ್ಮ್ಯಹಮ್ ॥ ೪೬॥
ಸರ್ವಪ್ರಕಾರರೂಪೋಽಸ್ಮಿ ಸದ್ಭಾವಾವರ್ಜಿತೋಽಸ್ಮ್ಯಹಮ್ ।
ಕಾಲತ್ರಯವಿಹೀನೋಽಸ್ಮಿ ಕಾಮಾದಿರಹಿತೋಽಸ್ಮ್ಯಹಮ್ ॥ ೪೭॥
ಕಾಯಕಾಯಿವಿಮುಕ್ತೋಽಸ್ಮಿ ನಿರ್ಗುಣಪ್ರಭವೋಽಸ್ಮ್ಯಹಮ್ ।
ಮುಕ್ತಿಹೀನೋಽಸ್ಮಿ ಮುಕ್ತೋಽಸ್ಮಿ ಮೋಕ್ಷಹೀನೋಽಸ್ಮ್ಯಹಂ ಸದಾ ॥ ೪೮॥
ಸತ್ಯಾಸತ್ಯವಿಹೀನೋಽಸ್ಮಿ ಸದಾ ಸನ್ಮಾತ್ರಮಸ್ಮ್ಯಹಮ್ ।
ಗನ್ತವ್ಯದೇಶಹೀನೋಽಸ್ಮಿ ಗಮನಾರಹಿತೋಽಸ್ಮ್ಯಹಮ್ ॥ ೪೯॥
ಸರ್ವದಾ ಸ್ಮರರೂಪೋಽಸ್ಮಿ ಶಾನ್ತೋಽಸ್ಮಿ ಸುಹಿತೋಽಸ್ಮ್ಯಹಮ್ ।
ಏವಂ ಸ್ವಾನುಭವಂ ಪ್ರೋಕ್ತಂ ಏತತ್ ಪ್ರಕರಣಂ ಮಹತ್ ॥ ೫೦॥
ಯಃ ಶೃಣೋತಿ ಸಕೃದ್ವಾಪಿ ಬ್ರಹ್ಮೈವ ಭವತಿ ಸ್ವಯಮ್ ।
ಪಿಣ್ಡಾಣ್ಡಸಂಭವಜಗದ್ಗತಖಣ್ಡನೋದ್ಯ-
ದ್ವೇತಣ್ಡಶುಣ್ಡನಿಭಪೀವರಬಾಹುದಣ್ಡ ।
ಬ್ರಹ್ಮೋರುಮುಣ್ಡಕಲಿತಾಣ್ಡಜವಾಹಬಾಣ
ಕೋದಣ್ಡಭೂಧರಧರಂ ಭಜತಾಮಖಣ್ಡಮ್ ॥ ೫೧॥
ವಿಶ್ವಾತ್ಮನ್ಯದ್ವಿತೀಯೇ ಭಗವತಿ ಗಿರಿಜಾನಾಯಕೇ ಕಾಶರೂಪೇ
ನೀರೂಪೇ ವಿಶ್ವರೂಪೇ ಗತದುರಿತಧಿಯಃ ಪ್ರಾಪ್ನುವನ್ತ್ಯಾತ್ಮಭಾವಮ್ ।
ಅನ್ಯೇ ಭೇದಧಿಯಃ ಶ್ರುತಿಪ್ರಕಥಿತೈರ್ವರ್ಣಾಶ್ರಮೋತ್ಥಶ್ರಮೈಃ
ತಾನ್ತಾಃ ಶಾನ್ತಿವಿವರ್ಜಿತಾ ವಿಷಯಿಣೋ ದುಃಖಂ ಭಜನ್ತ್ಯನ್ವಹಮ್ ॥ ೫೨॥

॥ ಇತಿ ಶ್ರೀಶಿವರಹಸ್ಯೇ ಶಙ್ಕರಾಖ್ಯೇ ಷಷ್ಠಾಂಶೇ ಋಭುನಿದಾಘಸಂವಾದೇ ಸ್ವಾತ್ಮನಿರೂಪಣಂ ನಾಮ ಸಪ್ತಮೋಽಧ್ಯಾಯಃ ॥

Special Thanks

The Sanskrit works, published by Sri Ramanasramam, have been approved to be posted on sanskritdocuments.org by permission of Sri V.S. Ramanan, President, Sri Ramanasramam.

Credits

Encoded by Anil Sharma anilandvijaya at gmail.com
Proofread by Sunder Hattangadi and Anil Sharma

https://sanskritdocuments.org

Send corrections to sanskrit at cheerful.com