ಋಭುಗೀತಾ ೪೭ ॥ ಋಭು-ಕೃತ ಸಂಗ್ರಹೋಪದೇಶ ವರ್ಣನಮ್ ॥
ಋಭುಃ -
- ನಿದಾಘ ಶೃಣು ವಕ್ಷ್ಯಾಮಿ ದೃಢೀಕರಣಮಸ್ತು ತೇ ।
- ಶಿವಪ್ರಸಾದಪರ್ಯನ್ತಮೇವಂ ಭಾವಯ ನಿತ್ಯಶಃ ॥ ೧॥
- ಅಹಮೇವ ಪರಂ ಬ್ರಹ್ಮ ಅಹಮೇವ ಸದಾಶಿವಃ ।
- ಅಹಮೇವ ಹಿ ಚಿನ್ಮಾತ್ರಮಹಮೇವ ಹಿ ನಿರ್ಗುಣಃ ॥ ೨॥
- ಅಹಮೇವ ಹಿ ಚೈತನ್ಯಮಹಮೇವ ಹಿ ನಿಷ್ಕಲಃ ।
- ಅಹಮೇವ ಹಿ ಶೂನ್ಯಾತ್ಮಾ ಅಹಮೇವ ಹಿ ಶಾಶ್ವತಃ ॥ ೩॥
- ಅಹಮೇವ ಹಿ ಸರ್ವಾತ್ಮಾ ಅಹಮೇವ ಹಿ ಚಿನ್ಮಯಃ ।
- ಅಹಮೇವ ಪರಂ ಬ್ರಹ್ಮ ಅಹಮೇವ ಮಹೇಶ್ವರಃ ॥ ೪॥
- ಅಹಮೇವ ಜಗತ್ಸಾಕ್ಷೀ ಅಹಮೇವ ಹಿ ಸದ್ಗುರುಃ ।
- ಅಹಮೇವ ಹಿ ಮುಕ್ತಾತ್ಮಾ ಅಹಮೇವ ಹಿ ನಿರ್ಮಲಃ ॥ ೫॥
- ಅಹಮೇವಾಹಮೇವೋಕ್ತಃ ಅಹಮೇವ ಹಿ ಶಙ್ಕರಃ ।
- ಅಹಮೇವ ಹಿ ಮಹಾವಿಷ್ಣುರಹಮೇವ ಚತುರ್ಮುಖಃ ॥ ೬॥
- ಅಹಮೇವ ಹಿ ಶುದ್ಧಾತ್ಮಾ ಹ್ಯಹಮೇವ ಹ್ಯಹಂ ಸದಾ ।
- ಅಹಮೇವ ಹಿ ನಿತ್ಯಾತ್ಮಾ ಅಹಮೇವ ಹಿ ಮತ್ಪರಃ ॥ ೭॥
- ಅಹಮೇವ ಮನೋರೂಪಂ ಅಹಮೇವ ಹಿ ಶೀತಲಃ ।
- ಅಹಮೇವಾನ್ತರ್ಯಾಮೀ ಚ ಅಹಮೇವ ಪರೇಶ್ವರಃ ॥ ೮॥
- ಏವಮುಕ್ತಪ್ರಕಾರೇಣ ಭಾವಯಿತ್ವಾ ಸದಾ ಸ್ವಯಮ್ ।
- ದ್ರವ್ಯೋಽಸ್ತಿ ಚೇನ್ನ ಕುರ್ಯಾತ್ತು ವಂಚಕೇನ ಗುರುಂ ಪರಮ್ ॥ ೯॥
- ಕುಮ್ಭೀಪಾಕೇ ಸುಘೋರೇ ತು ತಿಷ್ಠತ್ಯೇವ ಹಿ ಕಲ್ಪಕಾನ್ ।
- ಶ್ರುತ್ವಾ ನಿದಾಘಶ್ಚೋಥಾಯ ಪುತ್ರದಾರಾನ್ ಪ್ರದತ್ತವಾನ್ ॥ ೧೦॥
- ಸ್ವಶರೀರಂ ಚ ಪುತ್ರತ್ವೇ ದತ್ವಾ ಸಾದರಪೂರ್ವಕಮ್ ।
- ಧನಧಾನ್ಯಂ ಚ ವಸ್ತ್ರಾದೀನ್ ದತ್ವಾಽತಿಷ್ಠತ್ ಸಮೀಪತಃ ॥ ೧೧॥
- ಗುರೋಸ್ತು ದಕ್ಷಿಣಾಂ ದತ್ವಾ ನಿದಾಘಸ್ತುಷ್ಟವಾನೃಭುಮ್ ।
- ಸನ್ತುಷ್ಟೋಽಸ್ಮಿ ಮಹಾಭಾಗ ತವ ಶುಶ್ರೂಷಯಾ ಸದಾ ॥ ೧೨॥
- ಬ್ರಹ್ಮವಿಜ್ಞಾನಮಾಪ್ತೋಽಸಿ ಸುಕೃತಾರ್ಥೋ ನ ಸಂಶಯಃ ।
- ಬ್ರಹ್ಮರೂಪಮಿದಂ ಚೇತಿ ನಿಶ್ಚಯಂ ಕುರು ಸರ್ವದಾ ॥ ೧೩॥
- ನಿಶ್ಚಯಾದಪರೋ ಮೋಕ್ಷೋ ನಾಸ್ತಿ ನಾಸ್ತೀತಿ ನಿಶ್ಚಿನು ।
- ನಿಶ್ಚಯಂ ಕಾರಣಂ ಮೋಕ್ಷೋ ನಾನ್ಯತ್ ಕಾರಣಮಸ್ತಿ ವೈ ॥ ೧೪॥
- ಸಕಲಭುವನಸಾರಂ ಸರ್ವವೇದಾನ್ತಸಾರಂ
- ಸಮರಸಗುರುಸಾರಂ ಸರ್ವವೇದಾರ್ಥಸಾರಮ್ ।
- ಸಕಲಭುವನಸಾರಂ ಸಚ್ಚಿದಾನನ್ದಸಾರಂ
- ಸಮರಸಜಯಸಾರಂ ಸರ್ವದಾ ಮೋಕ್ಷಸಾರಮ್ ॥ ೧೫॥
- ಸಕಲಜನನಮೋಕ್ಷಂ ಸರ್ವದಾ ತುರ್ಯಮೋಕ್ಷಂ
- ಸಕಲಸುಲಭಮೋಕ್ಷಂ ಸರ್ವಸಾಮ್ರಾಜ್ಯಮೋಕ್ಷಮ್ ।
- ವಿಷಯರಹಿತಮೋಕ್ಷಂ ವಿತ್ತಸಂಶೋಷಮೋಕ್ಷಂ
- ಶ್ರವಣಮನನಮಾತ್ರಾದೇತದತ್ಯನ್ತಮೋಕ್ಷಮ್ ॥ ೧೬॥
- ತಚ್ಛುಶ್ರೂಷಾ ಚ ಭವತಃ ತಚ್ಛ್ರುತ್ವಾ ಚ ಪ್ರಪೇದಿರೇ ।
- ಏವಂ ಸರ್ವವಚಃ ಶ್ರುತ್ವಾ ನಿದಾಘಋಷಿದರ್ಶಿತಮ್ ।
- ಶುಕಾದಯೋ ಮಹಾನ್ತಸ್ತೇ ಪರಂ ಬ್ರಹ್ಮಮವಾಪ್ನುವನ್ ॥ ೧೭॥
- ಶ್ರುತ್ವಾ ಶಿವಜ್ಞಾನಮಿದಂ ಋಭುಸ್ತದಾ
- ನಿದಾಘಮಾಹೇತ್ಥಂ ಮುನೀನ್ದ್ರಮಧ್ಯೇ ।
- ಮುದಾ ಹಿ ತೇಽಪಿ ಶ್ರುತಿಶಬ್ದಸಾರಂ
- ಶ್ರುತ್ವಾ ಪ್ರಣಮ್ಯಾಹುರತೀವ ಹರ್ಷಾತ್ ॥ ೧೮॥
ಮುನಯಃ -
- ಪಿತಾ ಮಾತಾ ಭ್ರಾತಾ ಗುರುರಸಿ ವಯಸ್ಯೋಽಥ ಹಿತಕೃತ್
- ಅವಿದ್ಯಾಬ್ಧೇಃ ಪಾರಂ ಗಮಯಸಿ ಭವಾನೇವ ಶರಣಮ್ ।
- ಬಲೇನಾಸ್ಮಾನ್ ನೀತ್ವಾ ಮಮ ವಚನಬಲೇನೈವ ಸುಗಮಂ
- ಪಥಂ ಪ್ರಾಪ್ತ್ಯೈವಾರ್ಥೈಃ ಶಿವವಚನತೋಽಸ್ಮಾನ್ ಸುಖಯಸಿ ॥ ೧೯॥
- ॥ ಇತಿ ಶ್ರೀಶಿವರಹಸ್ಯೇ ಶಙ್ಕರಾಖ್ಯೇ ಷಷ್ಠಾಂಶೇ ಋಭುನಿದಾಘಸಂವಾದೇ ಋಭುಕೃತಸಂಗ್ರಹೋಪದೇಶವರ್ಣನಂ ನಾಮ ಸಪ್ತಚತ್ವಾರಿಂಶೋಽಧ್ಯಾಯಃ ॥
Special Thanks
The Sanskrit works, published by Sri Ramanasramam, have been approved to be posted on sanskritdocuments.org by permission of Sri V.S. Ramanan, President, Sri Ramanasramam.
Credits
Encoded by Anil Sharma anilandvijaya at gmail.com
Proofread by Sunder Hattangadi and Anil Sharma
https://sanskritdocuments.org
Send corrections to sanskrit at cheerful.com