Ribhu Gita - Siva Rahasya Purana Amsha 6

ಋಭುಗೀತಾ ೨೨ ॥ ನಾಮ-ರೂಪ ನಿಷೇಧ ಪ್ರಕರಣಮ್ ॥

ಋಭುಃ -

ವಕ್ಷ್ಯೇ ಬ್ರಹ್ಮಮಯಂ ಸರ್ವಂ ನಾಸ್ತಿ ಸರ್ವಂ ಜಗನ್ಮೃಷಾ ।
ಅಹಂ ಬ್ರಹ್ಮ ನ ಮೇ ಚಿನ್ತಾ ಅಹಂ ಬ್ರಹ್ಮ ನ ಮೇ ಜಡಮ್ ॥ ೧॥
ಅಹಂ ಬ್ರಹ್ಮ ನ ಮೇ ದೋಷಃ ಅಹಂ ಬ್ರಹ್ಮ ನ ಮೇ ಫಲಮ್ ।
ಅಹಂ ಬ್ರಹ್ಮ ನ ಮೇ ವಾರ್ತಾ ಅಹಂ ಬ್ರಹ್ಮ ನ ಮೇ ದ್ವಯಮ್ ॥ ೨॥
ಅಹಂ ಬ್ರಹ್ಮ ನ ಮೇ ನಿತ್ಯಮಹಂ ಬ್ರಹ್ಮ ನ ಮೇ ಗತಿಃ ।
ಅಹಂ ಬ್ರಹ್ಮ ನ ಮೇ ಮಾತಾ ಅಹಂ ಬ್ರಹ್ಮ ನ ಮೇ ಪಿತಾ ॥ ೩॥
ಅಹಂ ಬ್ರಹ್ಮ ನ ಮೇ ಸೋಽಯಮಹಂ ವೈಶ್ವಾನರೋ ನ ಹಿ ।
ಅಹಂ ಬ್ರಹ್ಮ ಚಿದಾಕಾಶಮಹಂ ಬ್ರಹ್ಮ ನ ಸಂಶಯಃ ॥ ೪॥
ಸರ್ವಾನ್ತರೋಽಹಂ ಪೂರ್ಣಾತ್ಮಾ ಸರ್ವಾನ್ತರಮನೋಽನ್ತರಃ ।
ಅಹಮೇವ ಶರೀರಾನ್ತರಹಮೇವ ಸ್ಥಿರಃ ಸದಾ ॥ ೫॥
ಏವಂ ವಿಜ್ಞಾನವಾನ್ ಮುಕ್ತ ಏವಂ ಜ್ಞಾನಂ ಸುದುರ್ಲಭಮ್ ।
ಅನೇಕಶತಸಾಹಸ್ತ್ರೇಷ್ವೇಕ ಏವ ವಿವೇಕವಾನ್ ॥ ೬॥
ತಸ್ಯ ದರ್ಶನಮಾತ್ರೇಣ ಪಿತರಸ್ತೃಪ್ತಿಮಾಗತಾಃ ।
ಜ್ಞಾನಿನೋ ದರ್ಶನಂ ಪುಣ್ಯಂ ಸರ್ವತೀರ್ಥಾವಗಾಹನಮ್ ॥ ೭॥
ಜ್ಞಾನಿನಃ ಚಾರ್ಚನೇನೈವ ಜೀವನ್ಮುಕ್ತೋ ಭವೇನ್ನರಃ ।
ಜ್ಞಾನಿನೋ ಭೋಜನೇ ದಾನೇ ಸದ್ಯೋ ಮುಕ್ತೋ ಭವೇನ್ನರಃ ॥ ೮॥
ಅಹಂ ಬ್ರಹ್ಮ ನ ಸನ್ದೇಹಃ ಅಹಮೇವ ಗುರುಃ ಪರಃ ।
ಅಹಂ ಶಾನ್ತೋಽಸ್ಮಿ ಶುದ್ಧೋಽಸ್ಮಿ ಅಹಮೇವ ಗುಣಾನ್ತರಃ ॥ ೯॥
ಗುಣಾತೀತೋ ಜನಾತೀತಃ ಪರಾತೀತೋ ಮನಃ ಪರಃ ।
ಪರತಃ ಪರತೋಽತೀತೋ ಬುದ್ಧ್ಯಾತೀತೋ ರಸಾತ್ ಪರಃ ॥ ೧೦॥
ಭಾವಾತೀತೋ ಮನಾತೀತೋ ವೇದಾತೀತೋ ವಿದಃ ಪರಃ ।
ಶರೀರಾದೇಶ್ಚ ಪರತೋ ಜಾಗ್ರತ್ಸ್ವಪ್ನಸುಷುಪ್ತಿತಃ ॥ ೧೧॥
ಅವ್ಯಕ್ತಾತ್ ಪರತೋಽತೀತ ಇತ್ಯೇವಂ ಜ್ಞಾನನಿಶ್ಚಯಃ ।
ಕ್ವಚಿದೇತತ್ಪರಿತ್ಯಜ್ಯ ಸರ್ವಂ ಸಂತ್ಯಜ್ಯ ಮೂಕವತ್ ॥ ೧೨॥
ತೂಷ್ಣೀಂ ಬ್ರಹ್ಮ ಪರಂ ಬ್ರಹ್ಮ ಶಾಶ್ವತಬ್ರಹ್ಮವಾನ್ ಸ್ವಯಮ್ ।
ಜ್ಞಾನಿನೋ ಮಹಿಮಾ ಕಿಞ್ಚಿದಣುಮಾತ್ರಮಪಿ ಸ್ಫುಟಮ್ ॥ ೧೩॥
ಹರಿಣಾಪಿ ಹರೇಣಾಪಿ ಬ್ರಹ್ಮಣಾಪಿ ಸುರೈರಪಿ ।
ನ ಶಕ್ಯತೇ ವರ್ಣಯಿತುಂ ಕಲ್ಪಕೋಟಿಶತೈರಪಿ ॥ ೧೪॥
ಅಹಂ ಬ್ರಹ್ಮೇತಿ ವಿಜ್ಞಾನಂ ತ್ರಿಷು ಲೋಕೇಷು ದುರ್ಲಭಮ್ ।
ವಿವೇಕಿನಂ ಮಹಾತ್ಮಾನಂ ಬ್ರಹ್ಮಮಾತ್ರೇಣಾವಸ್ಥಿತಮ್ ॥ ೧೫॥
ದ್ರಷ್ಟುಂ ಚ ಭಾಷಿತುಂ ವಾಪಿ ದುರ್ಲಭಂ ಪಾದಸೇವನಮ್ ।
ಕದಾಚಿತ್ ಪಾದತೀರ್ಥೇನ ಸ್ನಾತಶ್ಚೇತ್ ಬ್ರಹ್ಮ ಏವ ಸಃ ॥ ೧೬॥
ಸರ್ವಂ ಮಿಥ್ಯಾ ನ ಸನ್ದೇಹಃ ಸರ್ವಂ ಬ್ರಹ್ಮೈವ ಕೇವಲಮ್ ।
ಏತತ್ ಪ್ರಕರಣಂ ಪ್ರೋಕ್ತಂ ಸರ್ವಸಿದ್ಧಾನ್ತಸಂಗ್ರಹಃ ॥ ೧೭॥
ದುರ್ಲಭಂ ಯಃ ಪಠೇದ್ಭಕ್ತ್ಯಾ ಬ್ರಹ್ಮ ಸಂಪದ್ಯತೇ ನರಃ ।
ವಕ್ಷ್ಯೇ ಬ್ರಹ್ಮಮಯಂ ಸರ್ವಂ ನಾನ್ಯತ್ ಸರ್ವಂ ಜಗನ್ಮೃಷಾ ॥ ೧೮॥
ಬ್ರಹ್ಮೈವ ಜಗದಾಕಾರಂ ಬ್ರಹ್ಮೈವ ಪರಮಂ ಪದಮ್ ।
ಅಹಮೇವ ಪರಂ ಬ್ರಹ್ಮ ಅಹಮಿತ್ಯಪಿ ವರ್ಜಿತಃ ॥ ೧೯॥
ಸರ್ವವರ್ಜಿತಚಿನ್ಮಾತ್ರಂ ಸರ್ವವರ್ಜಿತಚೇತನಃ ।
ಸರ್ವವರ್ಜಿತಶಾನ್ತಾತ್ಮಾ ಸರ್ವಮಙ್ಗಲವಿಗ್ರಹಃ ॥ ೨೦॥
ಅಹಂ ಬ್ರಹ್ಮ ಪರಂ ಬ್ರಹ್ಮ ಅಸನ್ನೇದಂ ನ ಮೇ ನ ಮೇ ।
ನ ಮೇ ಭೂತಂ ಭವಿಷ್ಯಚ್ಚ ನ ಮೇ ವರ್ಣಂ ನ ಸಂಶಯಃ ॥ ೨೧॥
ಬ್ರಹ್ಮೈವಾಹಂ ನ ಮೇ ತುಚ್ಛಂ ಅಹಂ ಬ್ರಹ್ಮ ಪರಂ ತಪಃ ।
ಬ್ರಹ್ಮರೂಪಮಿದಂ ಸರ್ವಂ ಬ್ರಹ್ಮರೂಪಮನಾಮಯಮ್ ॥ ೨೨॥
ಬ್ರಹ್ಮೈವ ಭಾತಿ ಭೇದೇನ ಬ್ರಹ್ಮೈವ ನ ಪರಃ ಪರಃ ।
ಆತ್ಮೈವ ದ್ವೈತವದ್ಭಾತಿ ಆತ್ಮೈವ ಪರಮಂ ಪದಮ್ ॥ ೨೩॥
ಬ್ರಹ್ಮೈವಂ ಭೇದರಹಿತಂ ಭೇದಮೇವ ಮಹದ್ಭಯಮ್ ।
ಆತ್ಮೈವಾಹಂ ನಿರ್ಮಲೋಽಹಮಾತ್ಮೈವ ಭುವನತ್ರಯಮ್ ॥ ೨೪॥
ಆತ್ಮೈವ ನಾನ್ಯತ್ ಸರ್ವತ್ರ ಸರ್ವಂ ಬ್ರಹ್ಮೈವ ನಾನ್ಯಕಃ ।
ಅಹಮೇವ ಸದಾ ಭಾಮಿ ಬ್ರಹ್ಮೈವಾಸ್ಮಿ ಪರೋಽಸ್ಮ್ಯಹಮ್ ॥ ೨೫॥
ನಿರ್ಮಲೋಽಸ್ಮಿ ಪರಂ ಬ್ರಹ್ಮ ಕಾರ್ಯಾಕಾರ್ಯವಿವರ್ಜಿತಃ ।
ಸದಾ ಶುದ್ಧೈಕರೂಪೋಽಸ್ಮಿ ಸದಾ ಚೈತನ್ಯಮಾತ್ರಕಃ ॥ ೨೬॥
ನಿಶ್ಚಯೋಽಸ್ಮಿ ಪರಂ ಬ್ರಹ್ಮ ಸತ್ಯೋಽಸ್ಮಿ ಸಕಲೋಽಸ್ಮ್ಯಹಮ್ ।
ಅಕ್ಷರೋಽಸ್ಮಿ ಪರಂ ಬ್ರಹ್ಮ ಶಿವೋಽಸ್ಮಿ ಶಿಖರೋಽಸ್ಮ್ಯಹಮ್ ॥ ೨೭॥
ಸಮರೂಪೋಽಸ್ಮಿ ಶಾನ್ತೋಽಸ್ಮಿ ತತ್ಪರೋಽಸ್ಮಿ ಚಿದವ್ಯಯಃ ।
ಸದಾ ಬ್ರಹ್ಮ ಹಿ ನಿತ್ಯೋಽಸ್ಮಿ ಸದಾ ಚಿನ್ಮಾತ್ರಲಕ್ಷಣಃ ॥ ೨೮॥
ಸದಾಽಖಣ್ಡೈಕರೂಪೋಽಸ್ಮಿ ಸದಾಮಾನವಿವರ್ಜಿತಃ ।
ಸದಾ ಶುದ್ಧೈಕರೂಪೋಽಸ್ಮಿ ಸದಾ ಚೈತನ್ಯಮಾತ್ರಕಃ ॥ ೨೯॥
ಸದಾ ಸನ್ಮಾನರೂಪೋಽಸ್ಮಿ ಸದಾ ಸತ್ತಾಪ್ರಕಾಶಕಃ ।
ಸದಾ ಸಿದ್ಧಾನ್ತರೂಪೋಽಸ್ಮಿ ಸದಾ ಪಾವನಮಙ್ಗಲಃ ॥ ೩೦॥
ಏವಂ ನಿಶ್ಚಿತವಾನ್ ಮುಕ್ತಃ ಏವಂ ನಿತ್ಯಪರೋ ವರಃ ।
ಏವಂ ಭಾವನಯಾ ಯುಕ್ತಃ ಪರಂ ಬ್ರಹ್ಮೈವ ಸರ್ವದಾ ॥ ೩೧॥
ಏವಂ ಬ್ರಹ್ಮಾತ್ಮವಾನ್ ಜ್ಞಾನೀ ಬ್ರಹ್ಮಾಹಮಿತಿ ನಿಶ್ಚಯಃ ।
ಸ ಏವ ಪುರುಷೋ ಲೋಕೇ ಬ್ರಹ್ಮಾಹಮಿತಿ ನಿಶ್ಚಿತಃ ॥ ೩೨॥
ಸ ಏವ ಪುರುಷೋ ಜ್ಞಾನೀ ಜೀವನ್ಮುಕ್ತಃ ಸ ಆತ್ಮವಾನ್ ।
ಬ್ರಹ್ಮೈವಾಹಂ ಮಹಾನಾತ್ಮಾ ಸಚ್ಚಿದಾನನ್ದವಿಗ್ರಹಃ ॥ ೩೩॥
ನಾಹಂ ಜೀವೋ ನ ಮೇ ಭೇದೋ ನಾಹಂ ಚಿನ್ತಾ ನ ಮೇ ಮನಃ ।
ನಾಹಂ ಮಾಂಸಂ ನ ಮೇಽಸ್ಥೀನಿ ನಾಹಂಕಾರಕಲೇವರಃ ॥ ೩೪॥
ನ ಪ್ರಮಾತಾ ನ ಮೇಯಂ ವಾ ನಾಹಂ ಸರ್ವಂ ಪರೋಽಸ್ಮ್ಯಹಮ್ ।
ಸರ್ವವಿಜ್ಞಾನರೂಪೋಽಸ್ಮಿ ನಾಹಂ ಸರ್ವಂ ಕದಾಚನ ॥ ೩೫॥
ನಾಹಂ ಮೃತೋ ಜನ್ಮನಾನ್ಯೋ ನ ಚಿನ್ಮಾತ್ರೋಽಸ್ಮಿ ನಾಸ್ಮ್ಯಹಮ್ ।
ನ ವಾಚ್ಯೋಽಹಂ ನ ಮುಕ್ತೋಽಹಂ ನ ಬುದ್ಧೋಽಹಂ ಕದಾಚನ ॥ ೩೬॥
ನ ಶೂನ್ಯೋಽಹಂ ನ ಮೂಢೋಽಹಂ ನ ಸರ್ವೋಽಹಂ ಪರೋಽಸ್ಮ್ಯಹಮ್ ।
ಸರ್ವದಾ ಬ್ರಹ್ಮಮಾತ್ರೋಽಹಂ ನ ರಸೋಽಹಂ ಸದಾಶಿವಃ ॥ ೩೭॥
ನ ಘ್ರಾಣೋಽಹಂ ನ ಗನ್ಧೋಽಹಂ ನ ಚಿಹ್ನೋಽಯಂ ನ ಮೇ ಪ್ರಿಯಃ ।
ನಾಹಂ ಜೀವೋ ರಸೋ ನಾಹಂ ವರುಣೋ ನ ಚ ಗೋಲಕಃ ॥ ೩೮॥
ಬ್ರಹ್ಮೈವಾಹಂ ನ ಸನ್ದೇಹೋ ನಾಮರೂಪಂ ನ ಕಿಞ್ಚನ ।
ನ ಶ್ರೋತ್ರೋಽಹಂ ನ ಶಬ್ದೋಽಹಂ ನ ದಿಶೋಽಹಂ ನ ಸಾಕ್ಷಿಕಃ ॥ ೩೯॥
ನಾಹಂ ನ ತ್ವಂ ನ ಚ ಸ್ವರ್ಗೋ ನಾಹಂ ವಾಯುರ್ನ ಸಾಕ್ಷಿಕಃ ।
ಪಾಯುರ್ನಾಹಂ ವಿಸರ್ಗೋ ನ ನ ಮೃತ್ಯುರ್ನ ಚ ಸಾಕ್ಷಿಕಃ ॥ ೪೦॥
ಗುಹ್ಯಂ ನಾಹಂ ನ ಚಾನನ್ದೋ ನ ಪ್ರಜಾಪತಿದೇವತಾ ।
ಸರ್ವಂ ಬ್ರಹ್ಮ ನ ಸನ್ದೇಹಃ ಸರ್ವಂ ಬ್ರಹ್ಮೈವ ಕೇವಲಮ್ ॥ ೪೧॥
ನಾಹಂ ಮನೋ ನ ಸಙ್ಕಲ್ಪೋ ನ ಚನ್ದ್ರೋ ನ ಚ ಸಾಕ್ಷಿಕಃ ।
ನಾಹಂ ಬುದ್ಧೀನ್ದ್ರಿಯೋ ಬ್ರಹ್ಮಾ ನಾಹಂ ನಿಶ್ಚಯರೂಪವಾನ್ ॥ ೪೨॥
ನಾಹಂಕಾರಮಹಂ ರುದ್ರೋ ನಾಭಿಮಾನೋ ನ ಸಾಕ್ಷಿಕಃ ।
ಚಿತ್ತಂ ನಾಹಂ ವಾಸುದೇವೋ ಧಾರಣಾ ನಾಯಮೀಶ್ವರಃ ॥ ೪೩॥
ನಾಹಂ ವಿಶ್ವೋ ನ ಜಾಗ್ರದ್ವಾ ಸ್ಥೂಲದೇಹೋ ನ ಮೇ ಕ್ವಚಿತ್ ।
ನ ಪ್ರಾತಿಭಾಸಿಕೋ ಜೀವೋ ನ ಚಾಹಂ ವ್ಯಾವಹಾರಿಕಃ ॥ ೪೪॥
ನ ಪಾರಮಾರ್ಥಿಕೋ ದೇವೋ ನಾಹಮನ್ನಮಯೋ ಜಡಃ ।
ನ ಪ್ರಾಣಮಯಕೋಶೋಽಹಂ ನ ಮನೋಮಯಕೋಶವಾನ್ ॥ ೪೫॥
ನ ವಿಜ್ಞಾನಮಯಃ ಕೋಶೋ ನಾನನ್ದಮಯಕೋಶವಾನ್ ।
ಬ್ರಹ್ಮೈವಾಹಂ ನ ಸನ್ದೇಹೋ ನಾಮರೂಪೇ ನ ಕಿಞ್ಚನ ॥ ೪೬॥
ಏತಾವದುಕ್ತ್ವಾ ಸಕಲಂ ನಾಮರೂಪದ್ವಯಾತ್ಮಕಮ್ ।
ಸರ್ವಂ ಕ್ಷಣೇನ ವಿಸ್ಮೃತ್ಯ ಕಾಷ್ಠಲೋಷ್ಟಾದಿವತ್ ತ್ಯಜೇತ್ ॥ ೪೭॥
ಏತತ್ಸರ್ವಮಸನ್ನಿತ್ಯಂ ಸದಾ ವನ್ಧ್ಯಾಕುಮಾರವತ್ ।
ಶಶಶೃಙ್ಗವದೇವೇದಂ ನರಶೃಙ್ಗವದೇವ ತತ್ ॥ ೪೮॥
ಆಕಾಶಪುಷ್ಪಸದೃಶಂ ಯಥಾ ಮರುಮರೀಚಿಕಾ ।
ಗನ್ಧರ್ವನಗರಂ ಯದ್ವದಿನ್ದ್ರಜಾಲವದೇವ ಹಿ ॥ ೪೯॥
ಅಸತ್ಯಮೇವ ಸತತಂ ಪಞ್ಚರೂಪಕಮಿಷ್ಯತೇ ।
ಶಿಷ್ಯೋಪದೇಶಕಾಲೋ ಹಿ ದ್ವೈತಂ ನ ಪರಮಾರ್ಥತಃ ॥ ೫೦॥
ಮಾತಾ ಮೃತೇ ರೋದನಾಯ ದ್ರವ್ಯಂ ದತ್ವಾಽಽಹ್ವಯೇಜ್ಜನಾನ್ ।
ತೇಷಾಂ ರೋದನಮಾತ್ರಂ ಯತ್ ಕೇವಲಂ ದ್ರವ್ಯಪಞ್ಚಕಮ್ ॥ ೫೧॥
ತದದ್ವೈತಂ ಮಯಾ ಪ್ರೋಕ್ತಂ ಸರ್ವಂ ವಿಸ್ಮೃತ್ಯ ಕುಡ್ಯವತ್ ।
ಅಹಂ ಬ್ರಹ್ಮೇತಿ ನಿಶ್ಚಿತ್ಯ ಅಹಮೇವೇತಿ ಭಾವಯ ॥ ೫೨॥
ಅಹಮೇವ ಸುಖಂ ಚೇತಿ ಅಹಮೇವ ನ ಚಾಪರಃ ।
ಅಹಂ ಚಿನ್ಮಾತ್ರಮೇವೇತಿ ಬ್ರಹ್ಮೈವೇತಿ ವಿನಿಶ್ಚಿನು ॥ ೫೩॥
ಅಹಂ ನಿರ್ಮಲಶುದ್ಧೇತಿ ಅಹಂ ಜೀವವಿಲಕ್ಷಣಃ ।
ಅಹಂ ಬ್ರಹ್ಮೈವ ಸರ್ವಾತ್ಮಾ ಅಹಮಿತ್ಯವಭಾಸಕಃ ॥ ೫೪॥
ಅಹಮೇವ ಹಿ ಚಿನ್ಮಾತ್ರಮಹಮೇವ ಹಿ ನಿರ್ಗುಣಃ ।
ಸರ್ವಾನ್ತರ್ಯಾಮ್ಯಹಂ ಬ್ರಹ್ಮ ಚಿನ್ಮಾತ್ರೋಽಹಂ ಸದಾಶಿವಃ ॥ ೫೫॥
ನಿತ್ಯಮಙ್ಗಲರೂಪಾತ್ಮಾ ನಿತ್ಯಮೋಕ್ಷಮಯಃ ಪುಮಾನ್ ।
ಏವಂ ನಿಶ್ಚಿತ್ಯ ಸತತಂ ಸ್ವಾತ್ಮಾನಂ ಸ್ವಯಮಾಸ್ಥಿತಃ ॥ ೫೬॥
ಬ್ರಹ್ಮೈವಾಹಂ ನ ಸನ್ದೇಹೋ ನಾಮರೂಪೇ ನ ಕಿಞ್ಚನ ।
ಏತದ್ರೂಪಪ್ರಕರಣಂ ಸರ್ವವೇದೇಷು ದುರ್ಲಭಮ್ ।
ಯಃ ಶೃಣೋತಿ ಸಕೃದ್ವಾಪಿ ಬ್ರಹ್ಮೈವ ಭವತಿ ಸ್ವಯಮ್ ॥ ೫೭॥
ತಂ ವೇದಾದಿವಚೋಭಿರೀಡಿತಮಹಾಯಾಗೈಶ್ಚ ಭೋಗೈರ್ವ್ರತೈ-
ರ್ದಾನೈಶ್ಚಾನಶನೈರ್ಯಮಾದಿನಿಯಮೈಸ್ತಂ ವಿದ್ವಿಷನ್ತೇ ದ್ವಿಜಾಃ ।
ತಸ್ಯಾನಙ್ಗರಿಪೋರತೀವ ಸುಮಹಾಹೃದ್ಯಂ ಹಿ ಲಿಙ್ಗಾರ್ಚನಂ
ತೇನೈವಾಶು ವಿನಾಶ್ಯ ಮೋಹಮಖಿಲಂ ಜ್ಞಾನಂ ದದಾತೀಶ್ವರಃ ॥ ೫೮॥

॥ ಇತಿ ಶ್ರೀಶಿವರಹಸ್ಯೇ ಶಙ್ಕರಾಖ್ಯೇ ಷಷ್ಠಾಂಶೇ ಋಭುನಿದಾಘಸಂವಾದೇ ನಾಮರೂಪನಿಷೇಧಪ್ರಕರಣಂ ನಾಮ ದ್ವಾವಿಂಶೋಽಧ್ಯಾಯಃ ॥

Special Thanks

The Sanskrit works, published by Sri Ramanasramam, have been approved to be posted on sanskritdocuments.org by permission of Sri V.S. Ramanan, President, Sri Ramanasramam.

Credits

Encoded by Anil Sharma anilandvijaya at gmail.com
Proofread by Sunder Hattangadi and Anil Sharma

https://sanskritdocuments.org

Send corrections to sanskrit at cheerful.com