Ribhu Gita - Siva Rahasya Purana Amsha 6

ಋಭುಗೀತಾ ೧೩ ॥ ಸರ್ವಮ್-ಆತ್ಮ-ಪ್ರಕರಣಮ್ ॥

ಋಭುಃ -

ಶೃಣುಷ್ವ ದುರ್ಲಭಂ ಲೋಕೇ ಸಾರಾತ್ ಸಾರತರಂ ಪರಮ್ ।
ಆತ್ಮರೂಪಮಿದಂ ಸರ್ವಮಾತ್ಮನೋಽನ್ಯನ್ನ ಕಿಞ್ಚನ ॥ ೧॥
ಸರ್ವಮಾತ್ಮಾಸ್ತಿ ಪರಮಾ ಪರಮಾತ್ಮಾ ಪರಾತ್ಮಕಃ ।
ನಿತ್ಯಾನನ್ದಸ್ವರೂಪಾತ್ಮಾ ಹ್ಯಾತ್ಮನೋಽನ್ಯನ್ನ ಕಿಞ್ಚನ ॥ ೨॥
ಪೂರ್ಣರೂಪೋ ಮಹಾನಾತ್ಮಾ ಪೂತಾತ್ಮಾ ಶಾಶ್ವತಾತ್ಮಕಃ ।
ನಿರ್ವಿಕಾರಸ್ವರೂಪಾತ್ಮಾ ನಿರ್ಮಲಾತ್ಮಾ ನಿರಾತ್ಮಕಃ ॥ ೩॥
ಶಾನ್ತಾಶಾನ್ತಸ್ವರೂಪಾತ್ಮಾ ಹ್ಯಾತ್ಮನೋಽನ್ಯನ್ನ ಕಿಞ್ಚನ ।
ಜೀವಾತ್ಮಾ ಪರಮಾತ್ಮಾ ಹಿ ಚಿತ್ತಾಚಿತ್ತಾತ್ಮಚಿನ್ಮಯಃ ।
ಏಕಾತ್ಮಾ ಏಕರೂಪಾತ್ಮಾ ನೈಕಾತ್ಮಾತ್ಮವಿವರ್ಜಿತಃ ॥ ೪॥
ಮುಕ್ತಾಮುಕ್ತಸ್ವರೂಪಾತ್ಮಾ ಮುಕ್ತಾಮುಕ್ತವಿವರ್ಜಿತಃ ।
ಮೋಕ್ಷರೂಪಸ್ವರೂಪಾತ್ಮಾ ಹ್ಯಾತ್ಮನೋಽನ್ಯನ್ನ ಕಿಞ್ಚನ ॥ ೫॥
ದ್ವೈತಾದ್ವೈತಸ್ವರೂಪಾತ್ಮಾ ದ್ವೈತಾದ್ವೈತವಿವರ್ಜಿತಃ ।
ಸರ್ವವರ್ಜಿತಸರ್ವಾತ್ಮಾ ಹ್ಯಾತ್ಮನೋಽನ್ಯನ್ನ ಕಿಞ್ಚನ ॥ ೬॥
ಮುದಾಮುದಸ್ವರೂಪಾತ್ಮಾ ಮೋಕ್ಷಾತ್ಮಾ ದೇವತಾತ್ಮಕಃ ।
ಸಙ್ಕಲ್ಪಹೀನಸಾರಾತ್ಮಾ ಹ್ಯಾತ್ಮನೋಽನ್ಯನ್ನ ಕಿಞ್ಚನ ॥ ೭॥
ನಿಷ್ಕಲಾತ್ಮಾ ನಿರ್ಮಲಾತ್ಮಾ ಬುದ್ಧ್ಯಾತ್ಮಾ ಪುರುಷಾತ್ಮಕಃ ।
ಆನನ್ದಾತ್ಮಾ ಹ್ಯಜಾತ್ಮಾ ಚ ಹ್ಯಾತ್ಮನೋಽನ್ಯನ್ನ ಕಿಞ್ಚನ ॥ ೮॥
ಅಗಣ್ಯಾತ್ಮಾ ಗಣಾತ್ಮಾ ಚ ಅಮೃತಾತ್ಮಾಮೃತಾನ್ತರಃ ।
ಭೂತಭವ್ಯಭವಿಷ್ಯಾತ್ಮಾ ಹ್ಯಾತ್ಮನೋಽನ್ಯನ್ನ ಕಿಞ್ಚನ ॥ ೯॥
ಅಖಿಲಾತ್ಮಾಽನುಮನ್ಯಾತ್ಮಾ ಮಾನಾತ್ಮಾ ಭಾವಭಾವನಃ ।
ತುರ್ಯರೂಪಪ್ರಸನ್ನಾತ್ಮಾ ಆತ್ಮನೋಽನ್ಯನ್ನ ಕಿಞ್ಚನ ॥ ೧೦॥
ನಿತ್ಯಂ ಪ್ರತ್ಯಕ್ಷರೂಪಾತ್ಮಾ ನಿತ್ಯಪ್ರತ್ಯಕ್ಷನಿರ್ಣಯಃ ।
ಅನ್ಯಹೀನಸ್ವಭಾವಾತ್ಮಾ ಆತ್ಮನೋಽನ್ಯನ್ನ ಕಿಞ್ಚನ ॥ ೧೧॥
ಅಸದ್ಧೀನಸ್ವಭಾವಾತ್ಮಾ ಅನ್ಯಹೀನಃ ಸ್ವಯಂ ಪ್ರಭುಃ ।
ವಿದ್ಯಾವಿದ್ಯಾನ್ಯಶುದ್ಧಾತ್ಮಾ ಮಾನಾಮಾನವಿಹೀನಕಃ ॥ ೧೨॥
ನಿತ್ಯಾನಿತ್ಯವಿಹೀನಾತ್ಮಾ ಇಹಾಮುತ್ರಫಲಾನ್ತರಃ ।
ಶಮಾದಿಷಟ್ಕಶೂನ್ಯಾತ್ಮಾ ಹ್ಯಾತ್ಮನೋಽನ್ಯನ್ನ ಕಿಞ್ಚನ ॥ ೧೩॥
ಮುಮುಕ್ಷುತ್ವಂ ಚ ಹೀನಾತ್ಮಾ ಶಬ್ದಾತ್ಮಾ ದಮನಾತ್ಮಕಃ ।
ನಿತ್ಯೋಪರತರೂಪಾತ್ಮಾ ಹ್ಯಾತ್ಮನೋಽನ್ಯನ್ನ ಕಿಞ್ಚನ ॥ ೧೪॥
ಸರ್ವಕಾಲತಿತಿಕ್ಷಾತ್ಮಾ ಸಮಾಧಾನಾತ್ಮನಿ ಸ್ಥಿತಃ ।
ಶುದ್ಧಾತ್ಮಾ ಸ್ವಾತ್ಮನಿ ಸ್ವಾತ್ಮಾ ಹ್ಯಾತ್ಮನೋಽನ್ಯನ್ನ ಕಿಞ್ಚನ ॥ ೧೫॥
ಅನ್ನಕೋಶವಿಹೀನಾತ್ಮಾ ಪ್ರಾಣಕೋಶವಿವರ್ಜಿತಃ ।
ಮನಃಕೋಶವಿಹೀನಾತ್ಮಾ ಹ್ಯಾತ್ಮನೋಽನ್ಯನ್ನ ಕಿಞ್ಚನ ॥ ೧೬॥
ವಿಜ್ಞಾನಕೋಶಹೀನಾತ್ಮಾ ಆನನ್ದಾದಿವಿವರ್ಜಿತಃ ।
ಪಞ್ಚಕೋಶವಿಹೀನಾತ್ಮಾ ಹ್ಯಾತ್ಮನೋಽನ್ಯನ್ನ ಕಿಞ್ಚನ ॥ ೧೭॥
ನಿರ್ವಿಕಲ್ಪಸ್ವರೂಪಾತ್ಮಾ ಸವಿಕಲ್ಪವಿವರ್ಜಿತಃ ।
ಶಬ್ದಾನುವಿದ್ಧಹೀನಾತ್ಮಾ ಹ್ಯಾತ್ಮನೋಽನ್ಯನ್ನ ಕಿಞ್ಚನ ॥ ೧೮॥var was ಶಬ್ದಾನುವಿಧ್ಯಹೀನಾತ್ಮಾ
ಸ್ಥೂಲದೇಹವಿಹೀನಾತ್ಮಾ ಸೂಕ್ಷ್ಮದೇಹವಿವರ್ಜಿತಃ ।
ಕಾರಣಾದಿವಿಹೀನಾತ್ಮಾ ಹ್ಯಾತ್ಮನೋಽನ್ಯನ್ನ ಕಿಞ್ಚನ ॥ ೧೯॥
ದೃಶ್ಯಾನುವಿದ್ಧಶೂನ್ಯಾತ್ಮಾ ಹ್ಯಾದಿಮಧ್ಯಾನ್ತವರ್ಜಿತಃ ।
ಶಾನ್ತಾ ಸಮಾಧಿಶೂನ್ಯಾತ್ಮಾ ಹ್ಯಾತ್ಮನೋಽನ್ಯನ್ನ ಕಿಞ್ಚನ ॥ ೨೦॥
ಪ್ರಜ್ಞಾನವಾಕ್ಯಹೀನಾತ್ಮಾ ಅಹಂ ಬ್ರಹ್ಮಾಸ್ಮಿವರ್ಜಿತಃ ।
ತತ್ತ್ವಮಸ್ಯಾದಿವಾಕ್ಯಾತ್ಮಾ ಹ್ಯಾತ್ಮನೋಽನ್ಯನ್ನ ಕಿಞ್ಚನ ॥ ೨೧॥
ಅಯಮಾತ್ಮೇತ್ಯಭಾವಾತ್ಮಾ ಸರ್ವಾತ್ಮಾ ವಾಕ್ಯವರ್ಜಿತಃ ।
ಓಂಕಾರಾತ್ಮಾ ಗುಣಾತ್ಮಾ ಚ ಹ್ಯಾತ್ಮನೋಽನ್ಯನ್ನ ಕಿಞ್ಚನ ॥ ೨೨॥
ಜಾಗ್ರದ್ಧೀನಸ್ವರೂಪಾತ್ಮಾ ಸ್ವಪ್ನಾವಸ್ಥಾವಿವರ್ಜಿತಃ ।
ಆನನ್ದರೂಪಪೂರ್ಣಾತ್ಮಾ ಹ್ಯಾತ್ಮನೋಽನ್ಯನ್ನ ಕಿಞ್ಚನ ॥ ೨೩॥
ಭೂತಾತ್ಮಾ ಚ ಭವಿಷ್ಯಾತ್ಮಾ ಹ್ಯಕ್ಷರಾತ್ಮಾ ಚಿದಾತ್ಮಕಃ ।
ಅನಾದಿಮಧ್ಯರೂಪಾತ್ಮಾ ಹ್ಯಾತ್ಮನೋಽನ್ಯನ್ನ ಕಿಞ್ಚನ ॥ ೨೪॥
ಸರ್ವಸಙ್ಕಲ್ಪಹೀನಾತ್ಮಾ ಸ್ವಚ್ಛಚಿನ್ಮಾತ್ರಮಕ್ಷಯಃ ।
ಜ್ಞಾತೃಜ್ಞೇಯಾದಿಹೀನಾತ್ಮಾ ಹ್ಯಾತ್ಮನೋಽನ್ಯನ್ನ ಕಿಞ್ಚನ ॥ ೨೫॥
ಏಕಾತ್ಮಾ ಏಕಹೀನಾತ್ಮಾ ದ್ವೈತಾದ್ವೈತವಿವರ್ಜಿತಃ ।
ಸ್ವಯಮಾತ್ಮಾ ಸ್ವಭಾವಾತ್ಮಾ ಹ್ಯಾತ್ಮನೋಽನ್ಯನ್ನ ಕಿಞ್ಚನ ॥ ೨೬॥
ತುರ್ಯಾತ್ಮಾ ನಿತ್ಯಮಾತ್ಮಾ ಚ ಯತ್ಕಿಞ್ಚಿದಿದಮಾತ್ಮಕಃ ।
ಭಾನಾತ್ಮಾ ಮಾನಹೀನಾತ್ಮಾ ಹ್ಯಾತ್ಮನೋಽನ್ಯನ್ನ ಕಿಞ್ಚನ ॥ ೨೭॥var was ಮಾನಾತ್ಮಾ
ವಾಚಾವಧಿರನೇಕಾತ್ಮಾ ವಾಚ್ಯಾನನ್ದಾತ್ಮನನ್ದಕಃ ।
ಸರ್ವಹೀನಾತ್ಮಸರ್ವಾತ್ಮಾ ಹ್ಯಾತ್ಮನೋಽನ್ಯನ್ನ ಕಿಞ್ಚನ ॥ ೨೮॥
ಆತ್ಮಾನಮೇವ ವೀಕ್ಷಸ್ವ ಆತ್ಮಾನಂ ಭಾವಯ ಸ್ವಕಮ್ ।
ಸ್ವಸ್ವಾತ್ಮಾನಂ ಸ್ವಯಂ ಭುಂಕ್ಷ್ವ ಹ್ಯಾತ್ಮನೋಽನ್ಯನ್ನ ಕಿಞ್ಚನ ॥ ೨೯॥
ಸ್ವಾತ್ಮಾನಮೇವ ಸನ್ತುಷ್ಯ ಆತ್ಮಾನಂ ಸ್ವಯಮೇವ ಹಿ ।
ಸ್ವಸ್ವಾತ್ಮಾನಂ ಸ್ವಯಂ ಪಶ್ಯೇತ್ ಸ್ವಮಾತ್ಮಾನಂ ಸ್ವಯಂ ಶ್ರುತಮ್ ॥ ೩೦॥
ಸ್ವಮಾತ್ಮನಿ ಸ್ವಯಂ ತೃಪ್ತಃ ಸ್ವಮಾತ್ಮಾನಂ ಸ್ವಯಂಭರಃ ।
ಸ್ವಮಾತ್ಮಾನಂ ಸ್ವಯಂ ಭಸ್ಮ ಹ್ಯಾತ್ಮನೋಽನ್ಯನ್ನ ಕಿಞ್ಚನ ॥ ೩೧॥
ಸ್ವಮಾತ್ಮಾನಂ ಸ್ವಯಂ ಮೋದಂ ಸ್ವಮಾತ್ಮಾನಂ ಸ್ವಯಂ ಪ್ರಿಯಮ್ ।
ಸ್ವಮಾತ್ಮಾನಮೇವ ಮನ್ತವ್ಯಂ ಹ್ಯಾತ್ಮನೋಽನ್ಯನ್ನ ಕಿಞ್ಚನ ॥ ೩೨॥
ಆತ್ಮಾನಮೇವ ಶ್ರೋತವ್ಯಂ ಆತ್ಮಾನಂ ಶ್ರವಣಂ ಭವ ।
ಆತ್ಮಾನಂ ಕಾಮಯೇನ್ನಿತ್ಯಮ್ ಆತ್ಮಾನಂ ನಿತ್ಯಮರ್ಚಯ ॥ ೩೩॥
ಆತ್ಮಾನಂ ಶ್ಲಾಘಯೇನ್ನಿತ್ಯಮಾತ್ಮಾನಂ ಪರಿಪಾಲಯ ।
ಆತ್ಮಾನಂ ಕಾಮಯೇನ್ನಿತ್ಯಮ್ ಆತ್ಮನೋಽನ್ಯನ್ನ ಕಿಞ್ಚನ ॥ ೩೪॥
ಆತ್ಮೈವೇಯಮಿಯಂ ಭೂಮಿಃ ಆತ್ಮೈವೇದಮಿದಂ ಜಲಮ್ ।
ಆತ್ಮೈವೇದಮಿದಂ ಜ್ಯೋತಿರಾತ್ಮನೋಽನ್ಯನ್ನ ಕಿಞ್ಚನ ॥ ೩೫॥
ಆತ್ಮೈವಾಯಮಯಂ ವಾಯುರಾತ್ಮೈವೇದಮಿದಮ್ ವಿಯತ್ ।
ಆತ್ಮೈವಾಯಮಹಙ್ಕಾರಃ ಆತ್ಮನೋಽನ್ಯನ್ನ ಕಿಞ್ಚನ ॥ ೩೬॥
ಆತ್ಮೈವೇದಮಿದಂ ಚಿತ್ತಂ ಆತ್ಮೈವೇದಮಿದಂ ಮನಃ ।
ಆತ್ಮೈವೇಯಮಿಯಂ ಬುದ್ಧಿರಾತ್ಮನೋಽನ್ಯನ್ನ ಕಿಞ್ಚನ ॥ ೩೭॥
ಆತ್ಮೈವಾಯಮಯಂ ದೇಹಃ ಆತ್ಮೈವಾಯಮಯಂ ಗುಣಃ ।
ಆತ್ಮೈವೇದಮಿದಂ ತತ್ತ್ವಮ್ ಆತ್ಮನೋಽನ್ಯನ್ನ ಕಿಞ್ಚನ ॥ ೩೮॥
ಆತ್ಮೈವಾಯಮಯಂ ಮನ್ತ್ರಃ ಆತ್ಮೈವಾಯಮಯಂ ಜಪಃ ।
ಆತ್ಮೈವಾಯಮಯಂ ಲೋಕಃ ಆತ್ಮನೋಽನ್ಯನ್ನ ಕಿಞ್ಚನ ॥ ೩೯॥
ಆತ್ಮೈವಾಯಮಯಂ ಶಬ್ದಃ ಆತ್ಮೈವಾಯಮಯಂ ರಸಃ ।
ಆತ್ಮೈವಾಯಮಯಂ ಸ್ಪರ್ಶಃ ಆತ್ಮನೋಽನ್ಯನ್ನ ಕಿಞ್ಚನ ॥ ೪೦॥
ಆತ್ಮೈವಾಯಮಯಂ ಗನ್ಧಃ ಆತ್ಮೈವಾಯಮಯಂ ಶಮಃ ।
ಆತ್ಮೈವೇದಮಿದಂ ದುಃಖಂ ಆತ್ಮೈವೇದಮಿದಂ ಸುಖಮ್ ॥ ೪೧॥
ಆತ್ಮೀಯಮೇವೇದಂ ಜಗತ್ ಆತ್ಮೀಯಃ ಸ್ವಪ್ನ ಏವ ಹಿ ।
ಸುಷುಪ್ತಂ ಚಾಪ್ಯಥಾತ್ಮೀಯಂ ಆತ್ಮನೋಽನ್ಯನ್ನ ಕಿಞ್ಚನ ॥ ೪೨॥
ಆತ್ಮೈವ ಕಾರ್ಯಮಾತ್ಮೈವ ಪ್ರಾಯೋ ಹ್ಯಾತ್ಮೈವಮದ್ವಯಮ್ ।
ಆತ್ಮೀಯಮೇವಮದ್ವೈತಂ ಆತ್ಮನೋಽನ್ಯನ್ನ ಕಿಞ್ಚನ ॥ ೪೩॥
ಆತ್ಮೀಯಮೇವಾಯಂ ಕೋಽಪಿ ಆತ್ಮೈವೇದಮಿದಂ ಕ್ವಚಿತ್ ।
ಆತ್ಮೈವಾಯಮಯಂ ಲೋಕಃ ಆತ್ಮನೋಽನ್ಯನ್ನ ಕಿಞ್ಚನ ॥ ೪೪॥
ಆತ್ಮೈವೇದಮಿದಂ ದೃಶ್ಯಂ ಆತ್ಮೈವಾಯಮಯಂ ಜನಃ ।
ಆತ್ಮೈವೇದಮಿದಂ ಸರ್ವಂ ಆತ್ಮನೋಽನ್ಯನ್ನ ಕಿಞ್ಚನ ॥ ೪೫॥
ಆತ್ಮೈವಾಯಮಯಂ ಶಂಭುಃ ಆತ್ಮೈವೇದಮಿದಂ ಜಗತ್ ।
ಆತ್ಮೈವಾಯಮಯಂ ಬ್ರಹ್ಮಾ ಆತ್ಮನೋಽನ್ಯನ್ನ ಕಿಞ್ಚನ ॥ ೪೬॥
ಆತ್ಮೈವಾಯಮಯಂ ಸೂರ್ಯ ಆತ್ಮೈವೇದಮಿದಂ ಜಡಮ್ ।
ಆತ್ಮೈವೇದಮಿದಂ ಧ್ಯಾನಮ್ ಆತ್ಮೈವೇದಮಿದಮ್ ಫಲಮ್ ॥ ೪೭॥
ಆತ್ಮೈವಾಯಮಯಂ ಯೋಗಃ ಸರ್ವಮಾತ್ಮಮಯಂ ಜಗತ್ ।
ಸರ್ವಮಾತ್ಮಮಯಂ ಭೂತಂ ಆತ್ಮನೋಽನ್ಯನ್ನ ಕಿಞ್ಚನ ॥ ೪೮॥
ಸರ್ವಮಾತ್ಮಮಯಂ ಭಾವಿ ಸರ್ವಮಾತ್ಮಮಯಂ ಗುರುಃ ।
ಸರ್ವಮಾತ್ಮಮಯಂ ಶಿಷ್ಯ ಆತ್ಮನೋಽನ್ಯನ್ನ ಕಿಞ್ಚನ ॥ ೪೯॥
ಸರ್ವಮಾತ್ಮಮಯಂ ದೇವಃ ಸರ್ವಮಾತ್ಮಮಯಂ ಫಲಮ್ ।
ಸರ್ವಮಾತ್ಮಮಯಂ ಲಕ್ಷ್ಯಂ ಆತ್ಮನೋಽನ್ಯನ್ನ ಕಿಞ್ಚನ ॥ ೫೦॥
ಸರ್ವಮಾತ್ಮಮಯಂ ತೀರ್ಥಂ ಸರ್ವಮಾತ್ಮಮಯಂ ಸ್ವಯಮ್ ।
ಸರ್ವಮಾತ್ಮಮಯಂ ಮೋಕ್ಷಂ ಆತ್ಮನೋಽನ್ಯನ್ನ ಕಿಞ್ಚನ ॥ ೫೧॥
ಸರ್ವಮಾತ್ಮಮಯಂ ಕಾಮಂ ಸರ್ವಮಾತ್ಮಮಯಂ ಕ್ರಿಯಾ ।
ಸರ್ವಮಾತ್ಮಮಯಂ ಕ್ರೋಧಃ ಆತ್ಮನೋಽನ್ಯನ್ನ ಕಿಞ್ಚನ ॥ ೫೨॥
ಸರ್ವಮಾತ್ಮಮಯಂ ವಿದ್ಯಾ ಸರ್ವಮಾತ್ಮಮಯಂ ದಿಶಃ ।
ಸರ್ವಮಾತ್ಮಮಯಂ ಲೋಭಃ ಆತ್ಮನೋಽನ್ಯನ್ನ ಕಿಞ್ಚನ ॥ ೫೩॥
ಸರ್ವಮಾತ್ಮಮಯಂ ಮೋಹಃ ಸರ್ವಮಾತ್ಮಮಯಂ ಭಯಮ್ ।
ಸರ್ವಮಾತ್ಮಮಯಂ ಚಿನ್ತಾ ಆತ್ಮನೋಽನ್ಯನ್ನ ಕಿಞ್ಚನ ॥ ೫೪॥
ಸರ್ವಮಾತ್ಮಮಯಂ ಧೈರ್ಯಂ ಸರ್ವಮಾತ್ಮಮಯಂ ಧ್ರುವಮ್ ।
ಸರ್ವಮಾತ್ಮಮಯಂ ಸತ್ಯಂ ಆತ್ಮನೋಽನ್ಯನ್ನ ಕಿಞ್ಚನ ॥ ೫೫॥
ಸರ್ವಮಾತ್ಮಮಯಂ ಬೋಧಂ ಸರ್ವಮಾತ್ಮಮಯಂ ದೃಢಮ್ ।
ಸರ್ವಮಾತ್ಮಮಯಂ ಮೇಯಂ ಆತ್ಮನೋಽನ್ಯನ್ನ ಕಿಞ್ಚನ ॥ ೫೬॥
ಸರ್ವಮಾತ್ಮಮಯಂ ಗುಹ್ಯಂ ಸರ್ವಮಾತ್ಮಮಯಂ ಶುಭಮ್ ।
ಸರ್ವಮಾತ್ಮಮಯಂ ಶುದ್ಧಂ ಆತ್ಮನೋಽನ್ಯನ್ನ ಕಿಞ್ಚನ ॥ ೫೭॥
ಸರ್ವಮಾತ್ಮಮಯಂ ಸರ್ವಂ ಸತ್ಯಮಾತ್ಮಾ ಸದಾತ್ಮಕಃ ।
ಪೂರ್ಣಮಾತ್ಮಾ ಕ್ಷಯಂ ಚಾತ್ಮಾ ಪರಮಾತ್ಮಾ ಪರಾತ್ಪರಃ ॥ ೫೮॥
ಇತೋಽಪ್ಯಾತ್ಮಾ ತತೋಽಪ್ಯಾತ್ಮಾ ಹ್ಯಾತ್ಮೈವಾತ್ಮಾ ತತಸ್ತತಃ ।
ಸರ್ವಮಾತ್ಮಮಯಂ ಸತ್ಯಂ ಆತ್ಮನೋಽನ್ಯನ್ನ ಕಿಞ್ಚನ ॥ ೫೯॥
ಸರ್ವಮಾತ್ಮಸ್ವರೂಪಂ ಹಿ ದೃಶ್ಯಾದೃಶ್ಯಂ ಚರಾಚರಮ್ ।
ಸರ್ವಮಾತ್ಮಮಯಂ ಶ್ರುತ್ವಾ ಮುಕ್ತಿಮಾಪ್ನೋತಿ ಮಾನವಃ ॥ ೬೦॥
ಸ್ವತನ್ತ್ರಶಕ್ತಿರ್ಭಗವಾನುಮಾಧವೋ
ವಿಚಿತ್ರಕಾಯಾತ್ಮಕಜಾಗ್ರತಸ್ಯ ।
ಸುಕಾರಣಂ ಕಾರ್ಯಪರಂಪರಾಭಿಃ
ಸ ಏವ ಮಾಯಾವಿತತೋಽವ್ಯಯಾತ್ಮಾ ॥ ೬೧॥

॥ ಇತಿ ಶ್ರೀಶಿವರಹಸ್ಯೇ ಶಙ್ಕರಾಖ್ಯೇ ಷಷ್ಠಾಂಶೇ ಋಭುನಿದಾಘಸಂವಾದೇ ಸರ್ವಮಾತ್ಮಪ್ರಕರಣಂ ನಾಮ ತ್ರಯೋದಶೋಽಧ್ಯಾಯಃ ॥

Special Thanks

The Sanskrit works, published by Sri Ramanasramam, have been approved to be posted on sanskritdocuments.org by permission of Sri V.S. Ramanan, President, Sri Ramanasramam.

Credits

Encoded by Anil Sharma anilandvijaya at gmail.com
Proofread by Sunder Hattangadi and Anil Sharma

https://sanskritdocuments.org

Send corrections to sanskrit at cheerful.com