Ribhu Gita - Siva Rahasya Purana Amsha 6

ಋಭುಗೀತಾ ೩೧ ॥ ಮಹಾವಾಕ್ಯಾರ್ಥ ನಿರೂಪಣ ಪ್ರಕರಣಮ್ ॥

ಋಭುಃ -

ವಕ್ಷ್ಯೇ ರಹಸ್ಯಮತ್ಯನ್ತಂ ಸಾಕ್ಷಾದ್ಬ್ರಹ್ಮಪ್ರಕಾಶಕಮ್ ।
ಸರ್ವೋಪನಿಷದಾಮರ್ಥಂ ಸರ್ವಲೋಕೇಷು ದುರ್ಲಭಮ್ ॥ ೧॥
ಪ್ರಜ್ಞಾನಂ ಬ್ರಹ್ಮ ನಿಶ್ಚಿತ್ಯ ಪದದ್ವಯಸಮನ್ವಿತಮ್ ।
ಮಹಾವಾಕ್ಯಂ ಚತುರ್ವಾಕ್ಯಂ ಋಗ್ಯಜುಃಸಾಮಸಂಭವಮ್ ॥ ೨॥
ಮಮ ಪ್ರಜ್ಞೈವ ಬ್ರಹ್ಮಾಹಂ ಜ್ಞಾನಮಾತ್ರಮಿದಂ ಜಗತ್ ।
ಜ್ಞಾನಮೇವ ಜಗತ್ ಸರ್ವಂ ಜ್ಞಾನಾದನ್ಯನ್ನ ವಿದ್ಯತೇ ॥ ೩॥
ಜ್ಞಾನಸ್ಯಾನನ್ತರಂ ಸರ್ವಂ ದೃಶ್ಯತೇ ಜ್ಞಾನರೂಪತಃ ।
ಜ್ಞಾನಸ್ಯ ಬ್ರಹ್ಮಣಶ್ಚಾಪಿ ಮಮೇವ ಪೃಥಙ್ ನ ಹಿ ॥ ೪॥
ಜೀವಃ ಪ್ರಜ್ಞಾನಶಬ್ದಸ್ಯ ಬ್ರಹ್ಮಶಬ್ದಸ್ಯ ಚೇಶ್ವರಃ ।
ಐಕ್ಯಮಸ್ಮೀತ್ಯಖಣ್ಡಾರ್ಥಮಖಣ್ಡೈಕರಸಂ ತತಮ್ ॥ ೫॥
ಅಖಣ್ಡಾಕಾರವೃತ್ತಿಸ್ತು ಜೀವನ್ಮುಕ್ತಿರಿತೀರಿತಮ್ ।
ಅಖಣ್ಡೈಕರಸಂ ವಸ್ತು ವಿದೇಹೋ ಮುಕ್ತಿರುಚ್ಯತೇ ॥ ೬॥
ಬ್ರಹ್ಮೈವಾಹಂ ನ ಸಂಸಾರೀ ಸಚ್ಚಿದಾನನ್ದಮಸ್ಮ್ಯಹಮ್ ।
ನಿರ್ಗುಣೋಽಹಂ ನಿರಂಶೋಽಹಂ ಪರಮಾನನ್ದವಾನಹಮ್ ॥ ೭॥
ನಿತ್ಯೋಽಹಂ ನಿರ್ವಿಕಲ್ಪೋಽಹಂ ಚಿದಹಂ ಚಿದಹಂ ಸದಾ ।
ಅಖಣ್ಡಾಕಾರವೃತ್ತ್ಯಾಖ್ಯಂ ಚಿತ್ತಂ ಬ್ರಹ್ಮಾತ್ಮನಾ ಸ್ಥಿತಮ್ ॥ ೮॥
ಲವಣಂ ತೋಯಮಾತ್ರೇಣ ಯಥೈಕತ್ವಮಖಣ್ಡಿತಮ್ ।
ಅಖಣ್ಡೈಕರಸಂ ವಕ್ಷ್ಯೇ ವಿದೇಹೋ ಮುಕ್ತಿಲಕ್ಷಣಮ್ ॥ ೯॥
ಪ್ರಜ್ಞಾಪದಂ ಪರಿತ್ಯಜ್ಯ ಬ್ರಹ್ಮೈವ ಪದಮೇವ ಹಿ ।
ಅಹಮಸ್ಮಿ ಮಹಾನಸ್ಮಿ ಸಿದ್ಧೋಽಸ್ಮೀತಿ ಪರಿತ್ಯಜನ್ ॥ ೧೦॥
ಸ್ಮರಣಂ ಚ ಪರಿತ್ಯಜ್ಯ ಭಾವನಂ ಚಿತ್ತಕರ್ತೃಕಮ್ ।
ಸರ್ವಮನ್ತಃ ಪರಿತ್ಯಜ್ಯ ಸರ್ವಶೂನ್ಯಂ ಪರಿಸ್ಥಿತಿಃ ॥ ೧೧॥
ತೂಷ್ಣೀಂ ಸ್ಥಿತಿಂ ಚ ಸನ್ತ್ಯಜ್ಯ ತತೋ ಮೌನವಿಕಲ್ಪನಮ್ ।
ಯತ್ತಚ್ಚಿತ್ತಂ ವಿಕಲ್ಪಾಂಶಂ ಮನಸಾ ಕಲ್ಪಿತಂ ಜಗತ್ ॥ ೧೨॥
ದೇಹೋಽಹಮಿತ್ಯಹಙ್ಕಾರಂ ದ್ವೈತವೃತ್ತಿರಿತೀರಿತಮ್ ।
ಸರ್ವಂ ಸಾಕ್ಷಿರಹಂ ಬ್ರಹ್ಮ ಇತ್ಯೇವಂ ದೃಢನಿಶ್ಚಯಮ್ ॥ ೧೩॥
ಸರ್ವದಾಽಸಂಶಯಂ ಬ್ರಹ್ಮ ಸಾಕ್ಷಿವೃತ್ತಿರಿತೀರಿತಮ್ ।
ದ್ವೈತವೃತ್ತಿಃ ಸಾಕ್ಷವೃತ್ತಿರಖಣ್ಡಾಕಾರವೃತ್ತಿಕಮ್ ॥ ೧೪॥
ಅಖಣ್ಡೈಕರಸಂ ಚೇತಿ ಲೋಕೇ ವೃತ್ತಿತ್ರಯಂ ಭವೇತ್ ।
ಪ್ರಥಮೇ ನಿಶ್ಚಿತೇ ದ್ವೈತೇ ದ್ವಿತೀಯೇ ಸಾಕ್ಷಿಸಂಶಯಃ ॥ ೧೫॥
ತೃತೀಯೇ ಪದಭಾಗೇ ಹಿ ದೃಢನಿಶ್ಚಯಮೀರಿತಮ್ ।
ಏತತ್ತ್ರಯಾರ್ಥಂ ಸಂಶೋಧ್ಯ ತಂ ಪರಿತ್ಯಜ್ಯ ನಿಶ್ಚಿನು ॥ ೧೬॥
ಅಖಣ್ಡೈಕರಸಾಕಾರೋ ನಿತ್ಯಂ ತನ್ಮಯತಾಂ ವ್ರಜ ।
ಅಭ್ಯಾಸವಾಕ್ಯಮೇತತ್ತು ಸದಾಽಭ್ಯಾಸಸ್ಯ ಕಾರಣಮ್ ॥ ೧೭॥
ಮನನಸ್ಯ ಪರಂ ವಾಕ್ಯಂ ಯೋಽಯಂ ಚನ್ದನವೃಕ್ಷವತ್ ।
ಯುಕ್ತಿಭಿಶ್ಚಿನ್ತನಂ ವೃತ್ತಂ ಪದತ್ರಯಮುದಾಹೃತಮ್ ॥ ೧೮॥
ಅಹಂ ಪದಸ್ಯ ಜೀವೋಽರ್ಥ ಈಶೋ ಬ್ರಹ್ಮಪದಸ್ಯ ಹಿ ।
ಅಸ್ಮೀತಿ ಪದಭಾಗಸ್ಯ ಅಖಣ್ಡಾಕಾರವೃತ್ತಿಕಮ್ ॥ ೧೯॥
ಪದತ್ರಯಂ ಪರಿತ್ಯಜ್ಯ ವಿಚಾರ್ಯ ಮನಸಾ ಸಹ ।
ಅಖಣ್ಡೈಕರಸಂ ಪ್ರಾಪ್ಯ ವಿದೇಹೋ ಮುಕ್ತಿಲಕ್ಷಣಮ್ ॥ ೨೦॥
ಅಹಂ ಬ್ರಹ್ಮಾಸ್ಮಿ ಚಿನ್ಮಾತ್ರಂ ಸಚ್ಚಿದಾನನ್ದವಿಗ್ರಹಃ ।
ಅಹಂ ಬ್ರಹ್ಮಾಸ್ಮಿ ವಾಕ್ಯಸ್ಯ ಶ್ರವಣಾನನ್ತರಂ ಸದಾ ॥ ೨೧॥
ಅಹಂ ಬ್ರಹ್ಮಾಸ್ಮಿ ನಿತ್ಯೋಽಸ್ಮಿ ಶಾನ್ತೋಽಸ್ಮಿ ಪರಮೋಽಸ್ಮ್ಯಹಮ್ ।
ನಿರ್ಗುಣೋಽಹಂ ನಿರೀಹೋಽಹಂ ನಿರಂಶೋಽಸ್ಮಿ ಸದಾ ಸ್ಮೃತಃ ॥ ೨೨॥var was ನಿರ್ಯಶೋಽಸ್ಮಿ
ಆತ್ಮೈವಾಸ್ಮಿ ನ ಸನ್ದೇಹಃ ಅಖಣ್ಡೈಕರಸೋಽಸ್ಮ್ಯಹಮ್ ।
ಏವಂ ನಿರನ್ತರಂ ತಜ್ಜ್ಞೋ ಭಾವಯೇತ್ ಪರಮಾತ್ಮನಿ ॥ ೨೩॥
ಯಥಾ ಚಾನುಭವಂ ವಾಕ್ಯಂ ತಸ್ಮಾದನುಭವೇತ್ ಸದಾ ।
ಆರಂಭಾಚ್ಚ ದ್ವಿತೀಯಾತ್ತು ಸ್ಮೃತಮಭ್ಯಾಸವಾಕ್ಯತಃ ॥ ೨೪॥
ತೃತೀಯಾನ್ತತ್ತ್ವಮಸ್ಯೇತಿ ವಾಕ್ಯಸಾಮಾನ್ಯನಿರ್ಣಯಮ್ ।
ತತ್ಪದಂ ತ್ವಂಪದಂ ತ್ವಸ್ಯ ಪದತ್ರಯಮುದಾಹೃತಮ್ ॥ ೨೫॥
ತತ್ಪದಸ್ಯೇಶ್ವರೋ ಹ್ಯರ್ಥೋ ಜೀವೋಽರ್ಥಸ್ತ್ವಂಪದಸ್ಯ ಹಿ ।
ಐಕ್ಯಸ್ಯಾಪಿ ಪದಸ್ಯಾರ್ಥಮಖಣ್ಡೈಕರಸಂ ಪದಮ್ ॥ ೨೬॥
ದ್ವೈತವೃತ್ತಿಃ ಸಾಕ್ಷವೃತ್ತಿರಖಣ್ಡಾಕಾರವೃತ್ತಿಕಃ ।
ಅಖಣ್ಡಂ ಸಚ್ಚಿದಾನನ್ದಂ ತತ್ತ್ವಮೇವಾಸಿ ನಿಶ್ಚಯಃ ॥ ೨೭॥
ತ್ವಂ ಬ್ರಹ್ಮಾಸಿ ನ ಸನ್ದೇಹಸ್ತ್ವಮೇವಾಸಿ ಚಿದವ್ಯಯಃ ।
ತ್ವಮೇವ ಸಚ್ಚಿದಾನನ್ದಸ್ತ್ವಮೇವಾಖಣ್ಡನಿಶ್ಚಯಃ ॥ ೨೮॥
ಇತ್ಯೇವಮುಕ್ತೋ ಗುರುಣಾ ಸ ಏವ ಪರಮೋ ಗುರುಃ ।
ಅಹಂ ಬ್ರಹ್ಮೇತಿ ನಿಶ್ಚಿತ್ಯ ಸಚ್ಛಿಷ್ಯಃ ಪರಮಾತ್ಮವಾನ್ ॥ ೨೯॥
ನಾನ್ಯೋ ಗುರುರ್ನಾನ್ಯಶಿಷ್ಯಸ್ತ್ವಂ ಬ್ರಹ್ಮಾಸಿ ಗುರುಃ ಪರಃ ।
ಸರ್ವಮನ್ತ್ರೋಪದೇಷ್ಟಾರೋ ಗುರವಃ ಸ ಗುರುಃ ಪರಃ ॥ ೩೦॥
ತ್ವಂ ಬ್ರಹ್ಮಾಸೀತಿ ವಕ್ತಾರಂ ಗುರುರೇವೇತಿ ನಿಶ್ಚಿನು ।
ತಥಾ ತತ್ತ್ವಮಸಿ ಬ್ರಹ್ಮ ತ್ವಮೇವಾಸಿ ಚ ಸದ್ಗುರುಃ ॥ ೩೧॥
ಸದ್ಗುರೋರ್ವಚನೇ ಯಸ್ತು ನಿಶ್ಚಯಂ ತತ್ತ್ವನಿಶ್ಚಯಮ್ ।
ಕರೋತಿ ಸತತಂ ಮುಕ್ತೇರ್ನಾತ್ರ ಕಾರ್ಯಾ ವಿಚಾರಣಾ ॥ ೩೨॥
ಮಹಾವಾಕ್ಯಂ ಗುರೋರ್ವಾಕ್ಯಂ ತತ್ತ್ವಮಸ್ಯಾದಿವಾಕ್ಯಕಮ್ ।
ಶೃಣೋತು ಶ್ರವಣಂ ಚಿತ್ತಂ ನಾನ್ಯತ್ ಶ್ರವಣಮುಚ್ಯತೇ ॥ ೩೩॥
ಸರ್ವವೇದಾನ್ತವಾಕ್ಯಾನಾಮದ್ವೈತೇ ಬ್ರಹ್ಮಣಿ ಸ್ಥಿತಿಃ ।
ಇತ್ಯೇವಂ ಚ ಗುರೋರ್ವಕ್ತ್ರಾತ್ ಶ್ರುತಂ ಬ್ರಹ್ಮೇತಿ ತಚ್ಛ್ರವಃ ॥ ೩೪॥
ಗುರೋರ್ನಾನ್ಯೋ ಮನ್ತ್ರವಾದೀ ಏಕ ಏವ ಹಿ ಸದ್ಗುರುಃ ।
ತ್ವಂ ಬ್ರಹ್ಮಾಸೀತಿ ಯೇನೋಕ್ತಂ ಏಷ ಏವ ಹಿ ಸದ್ಗುರುಃ ॥ ೩೫॥
ವೇದಾನ್ತಶ್ರವಣಂ ಚೈತನ್ನಾನ್ಯಚ್ಛ್ರವಣಮೀರಿತಮ್ ।
ಯುಕ್ತಿಭಿಶ್ಚಿನ್ತನಂ ಚೈವ ಮನನಂ ಪರಿಕಥ್ಯತೇ ॥ ೩೬॥
ಏವಂ ಚನ್ದನವೃಕ್ಷೋಽಪಿ ಶ್ರುತೋಽಪಿ ಪರಿಶೋಧ್ಯತೇ ।
ತ್ವಂ ಬ್ರಹ್ಮಾಸೀತಿ ಚೋಕ್ತೋಽಪಿ ಸಂಶಯಂ ಪರಿಪಶ್ಯತಿ ॥ ೩೭॥
ಸಂಶೋಧ್ಯ ನಿಶ್ಚಿನೋತ್ಯೇವಮಾತ್ಮಾನಂ ಪರಿಶೋಧ್ಯತೇ ।
ಯುಕ್ತಿರ್ನಾಮ ವದಾಮ್ಯತ್ರ ದೇಹೋನಾಹಂ ವಿನಾಶತಃ ॥ ೩೮॥
ಸ್ಥೂಲದೇಹಂ ಸೂಕ್ಷ್ಮದೇಹಂ ಸ್ಥೂಲಸೂಕ್ಷ್ಮಂ ಚ ಕಾರಣಮ್ ।
ತ್ರಯಂ ಚಥುರ್ಥೇ ನಾಸ್ತೀತಿ ಸರ್ವಂ ಚಿನ್ಮಾತ್ರಮೇವ ಹಿ ॥ ೩೯॥
ಏತತ್ಸರ್ವಂ ಜಡತ್ವಾಚ್ಚ ದೃಶ್ಯತ್ವಾದ್ಘಟವನ್ನಹಿ ।
ಅಹಂ ಚೈತನ್ಯಮೇವಾತ್ರ ದೃಗ್ರೂಪತ್ವಾಲ್ಲಯಂ ನ ಹಿ ॥ ೪೦॥
ಸತ್ಯಂ ಜ್ಞಾನಮನನ್ತಂ ಯದಾತ್ಮನಃ ಸಹಜಾ ಗುಣಾಃ ।
ಅನ್ತತಂ ಜಡದುಃಖಾದಿ ಜಗತಃ ಪ್ರಥಿತೋ ಗುಣಃ ॥ ೪೧॥
ತಸ್ಮಾದಹಂ ಬ್ರಹ್ಮ ಏವ ಇದಂ ಸರ್ವಮಸತ್ಯಕಮ್ ।
ಏವಂ ಚ ಮನನಂ ನಿತ್ಯಂ ಕರೋತಿ ಬ್ರಹ್ಮವಿತ್ತಮಃ ॥ ೪೨॥
ವಕ್ಷ್ಯೇ ನಿದಿಧ್ಯಾಸನಂ ಚ ಉಭಯತ್ಯಾಗಲಕ್ಷಣಮ್ ।
ತ್ವಂ ಬ್ರಹ್ಮಾಸೀತಿ ಶ್ರವಣಂ ಮನನಂ ಚಾಹಮೇವ ಹಿ ॥ ೪೩॥
ಏತತ್ತ್ಯಾಗಂ ನಿದಿಧ್ಯಾಸಂ ಸಜಾತೀಯತ್ವಭಾವನಮ್ ।
ವಿಜಾತೀಯಪರಿತ್ಯಾಗಂ ಸ್ವಗತತ್ವವಿಭಾವನಮ್ ॥ ೪೪॥
ಸರ್ವತ್ಯಾಗಂ ಪರಿತ್ಯಜ್ಯ ತುರೀಯತ್ವಂ ಚ ವರ್ಜನಮ್ ।
ಬ್ರಹ್ಮಚಿನ್ಮಾತ್ರಸಾರತ್ವಂ ಸಾಕ್ಷಾತ್ಕಾರಂ ಪ್ರಚಕ್ಷತೇ ॥ ೪೫॥
ಉಪದೇಶೇ ಮಹಾವಾಕ್ಯಮಸ್ತಿತ್ವಮಿತಿ ನಿರ್ಣಯಃ ।
ತಥೈವಾನುಭವಂ ವಾಕ್ಯಮಹಂ ಬ್ರಹ್ಮಾಸ್ಮಿ ನಿರ್ಣಯಃ ॥ ೪೬॥
ಪ್ರಜ್ಞಾನಂ ಬ್ರಹ್ಮವಾಕ್ಯೋತ್ಥಮಭ್ಯಾಸಾರ್ಥಮಿತೀರಿತಮ್ ।
ಅಯಮಾತ್ಮೇತಿ ವಾಕ್ಯೋತ್ಥದರ್ಶನಂ ವಾಕ್ಯಮೀರಿತಮ್ ॥ ೪೭॥
ಅಯಮೇಕಪದಂ ಚೈಕ ಆತ್ಮೇತಿ ಬ್ರಹ್ಮ ಚ ತ್ರಯಮ್ ।
ಅಯಂಪದಸ್ಯ ಜೀವೋಽರ್ಥ ಆತ್ಮನೋ ಈಶ್ವರಃ ಪರಃ ॥ ೪೮॥
ತಥಾ ಬ್ರಹ್ಮಪದಸ್ಯಾರ್ಥ ಅಖಣ್ಡಾಕಾರವೃತ್ತಿಕಮ್ ।
ಅಖಣ್ಡೈಕರಸಂ ಸರ್ವಂ ಪದತ್ರಯಲಯಂ ಗತಮ್ ॥ ೪೯॥
ಅಖಣ್ಡೈಕರಸೋ ಹ್ಯಾತ್ಮಾ ನಿತ್ಯಶುದ್ಧವಿಮುಕ್ತಕಃ ।
ತದೇವ ಸರ್ವಮುದ್ಭೂತಂ ಭವಿಷ್ಯತಿ ನ ಸಂಶಯಃ ॥ ೫೦॥
ಅಖಣ್ಡೈಕರಸೋ ದೇವ ಅಯಮೇಕಮುದೀರಿತಮ್ ।
ಆತ್ಮೇತಿ ಪದಮೇಕಸ್ಯ ಬ್ರಹ್ಮೇತಿ ಪದಮೇಕಕಮ್ ॥ ೫೧॥
ಅಯಂ ಪದಸ್ಯ ಜೀವೋಽರ್ಥ ಆತ್ಮೇತೀಶ್ವರ ಈರಿತಃ ।
ಅಸ್ಯಾರ್ಥೋಽಸ್ಮೀತ್ಯಖಣ್ಡಾರ್ಥಮಖಣ್ಡೈಕರಸಂ ಪದಮ್ ॥ ೫೨॥
ದ್ವೈತವೃತ್ತಿಃ ಸಾಕ್ಷಿವೃತ್ತಿರಖಣ್ಡಾಕಾರವೃತ್ತಿಕಮ್ ।
ಅಖಣ್ಡೈಕರಸಂ ಪಶ್ಚಾತ್ ಸೋಽಹಮಸ್ಮೀತಿ ಭಾವಯ ॥ ೫೩॥
ಇತ್ಯೇವಂ ಚ ಚತುರ್ವಾಕ್ಯತಾತ್ಪರ್ಯಾರ್ಥಂ ಸಮೀರಿತಮ್ ।
ಉಪಾಧಿಸಹಿತಂ ವಾಕ್ಯಂ ಕೇವಲಂ ಲಕ್ಷ್ಯಮೀರಿತಮ್ ॥ ೫೪॥
ಕಿಞ್ಚಿಜ್ಜ್ಞತ್ವಾದಿ ಜೀವಸ್ಯ ಸರ್ವ ಜ್ಞತ್ವಾದಿ ಚೇಶ್ವರಃ ।
ಜೀವೋಽಪರೋ ಸಚೈತನ್ಯಮೀಶ್ವರೋಽಹಂ ಪರೋಕ್ಷಕಃ ॥ ೫೫॥
ಸರ್ವಶೂನ್ಯಮಿತಿ ತ್ಯಾಜ್ಯಂ ಬ್ರಹ್ಮಾಸ್ಮೀತಿ ವಿನಿಶ್ಚಯಃ ।
ಅಹಂ ಬ್ರಹ್ಮ ನ ಸನ್ದೇಹಃ ಸಚ್ಚಿದಾನನ್ದವಿಗ್ರಹಃ ॥ ೫೬॥
ಅಹಮೈಕ್ಯಂ ಪರಂ ಗತ್ವಾ ಸ್ವಸ್ವಭಾವೋ ಭವೋತ್ತಮ ।
ಏತತ್ಸರ್ವಂ ಮಹಾಮಿಥ್ಯಾ ನಾಸ್ತಿ ನಾಸ್ತಿ ನ ಸಂಶಯಃ ॥ ೫೭॥
ಸರ್ವಂ ನಾಸ್ತಿ ನ ಸನ್ದೇಹಃ ಸರ್ವಂ ಬ್ರಹ್ಮ ನ ಸಂಶಯಃ ।
ಏಕಾಕಾರಮಖಣ್ಡಾರ್ಥಂ ತದೇವಾಹಂ ನ ಸಂಶಯಃ ।
ಬ್ರಹ್ಮೇದಂ ವಿತತಾಕಾರಂ ತದ್ಬ್ರಹ್ಮಾಹಂ ನ ಸಂಶಯಃ ॥ ೫೮॥

ಸೂತಃ -

ಭವೋದ್ಭವಮುಖೋದ್ಭವಂ ಭವಹರಾದ್ಯಹೃದ್ಯಂ ಭುವಿ
ಪ್ರಕೃಷ್ಟರಸಭಾವತಃ ಪ್ರಥಿತಬೋಧಬುದ್ಧಂ ಭವ ।
ಭಜನ್ತಿ ಭಸಿತಾಙ್ಗಕಾ ಭರಿತಮೋದಭಾರಾದರಾ
ಭುಜಙ್ಗವರಭೂಷಣಂ ಭುವನಮಧ್ಯವೃನ್ದಾವನಮ್ ॥ ೫೯॥

॥ ಇತಿ ಶ್ರೀಶಿವರಹಸ್ಯೇ ಶಙ್ಕರಾಖ್ಯೇ ಷಷ್ಠಾಂಶೇ ಋಭುನಿದಾಘಸಂವಾದೇ ಮಹಾವಾಕ್ಯಾರ್ಥನಿರೂಪಣಪ್ರಕರಣಂ ನಾಮ ಏಕತ್ರಿಂಶೋಽಧ್ಯಾಯಃ ॥

Special Thanks

The Sanskrit works, published by Sri Ramanasramam, have been approved to be posted on sanskritdocuments.org by permission of Sri V.S. Ramanan, President, Sri Ramanasramam.

Credits

Encoded by Anil Sharma anilandvijaya at gmail.com
Proofread by Sunder Hattangadi and Anil Sharma

https://sanskritdocuments.org

Send corrections to sanskrit at cheerful.com