Ribhu Gita - Siva Rahasya Purana Amsha 6

ಋಭುಗೀತಾ ೪೩ ॥ ನಿದಾಧಾನುಭವ ವರ್ಣನ ಪ್ರಕರಣಮ್ ॥

ನಿದಾಘಃ -

ನ ಪಶ್ಯಾಮಿ ಶರೀರಂ ವಾ ಲಿಙ್ಗಂ ಕರಣಮೇವ ವಾ ।
ನ ಪಶ್ಯಾಮಿ ಮನೋ ವಾಪಿ ನ ಪಶ್ಯಾಮಿ ಜಡಂ ತತಃ ॥ ೧॥
ನ ಪಶ್ಯಾಮಿ ಚಿದಾಕಾಶಂ ನ ಪಶ್ಯಾಮಿ ಜಗತ್ ಕ್ವಚಿತ್ ।
ನ ಪಶ್ಯಾಮಿ ಹರಿಂ ವಾಪಿ ನ ಪಶ್ಯಾಮಿ ಶಿವಂ ಚ ವಾ ॥ ೨॥
ಆನನ್ದಸ್ಯಾನ್ತರೇ ಲಗ್ನಂ ತನ್ಮಯತ್ವಾನ್ನ ಚೋತ್ಥಿತಃ ।
ನ ಪಶ್ಯಾಮಿ ಸದಾ ಭೇದಂ ನ ಜಡಂ ನ ಜಗತ್ ಕ್ವಚಿತ್ ॥ ೩॥
ನ ದ್ವೈತಂ ನ ಸುಖಂ ದುಃಖಂ ನ ಗುರುರ್ನ ಪರಾಪರಮ್ ।
ನ ಗುಣಂ ವಾ ನ ತುರ್ಯಂ ವಾ ನ ಬುದ್ಧಿರ್ನ ಚ ಸಂಶಯಃ ॥ ೪॥
ನ ಚ ಕಾಲಂ ನ ಚ ಭಯಂ ನ ಚ ಶೋಕಂ ಶುಭಾಶುಭಮ್ ।
ನ ಪಶ್ಯಾಮಿ ಸನ್ದೀನಂ ನ ಬನ್ಧಂ ನ ಚ ಸಂಭವಮ್ ॥ ೫॥
ನ ದೇಹೇನ್ದ್ರಿಯಸದ್ಭಾವೋ ನ ಚ ಸದ್ವಸ್ತು ಸನ್ಮನಃ ।
ನ ಪಶ್ಯಾಮಿ ಸದಾ ಸ್ಥೂಲಂ ನ ಕೃಶಂ ನ ಚ ಕುಬ್ಜಕಮ್ ॥ ೬॥
ನ ಭೂಮಿರ್ನ ಜಲಂ ನಾಗ್ನಿರ್ನ ಮೋಹೋ ನ ಚ ಮನ್ತ್ರಕಮ್ ।
ನ ಗುರುರ್ನ ಚ ವಾಕ್ಯಂ ವಾ ನ ದೃಢಂ ನ ಚ ಸರ್ವಕಮ್ ॥ ೭॥
ನ ಜಗಚ್ಛ್ರವಣಂ ಚೈವ ನಿದಿಧ್ಯಾಸಂ ನ ಚಾಪರಃ ।
ಆನನ್ದಸಾಗರೇ ಮಗ್ನಸ್ತನ್ಮಯತ್ವಾನ್ನ ಚೋತ್ಥಿತಃ ॥ ೮॥
ಆನನ್ದೋಽಹಮಶೇಷೋಽಹಮಜೋಽಹಮಮೃತೋಸ್ಮ್ಯಹಮ್ ।
ನಿತ್ಯೋಽಹಮಿತಿ ನಿಶ್ಚಿತ್ಯ ಸದಾ ಪೂರ್ಣೋಽಸ್ಮಿ ನಿತ್ಯಧೀಃ ॥ ೯॥
ಪೂರ್ಣೋಽಹಂ ಪೂರ್ಣಚಿತ್ತೋಽಹಂ ಪುಣ್ಯೋಽಹಂ ಜ್ಞಾನವಾನಹಮ್ ।
ಶುದ್ಧೋಽಹಂ ಸರ್ವಮುಕ್ತೋಽಹಂ ಸರ್ವಾಕಾರೋಽಹಮವ್ಯಯಃ ॥ ೧೦॥
ಚಿನ್ಮಾತ್ರೋಽಹಂ ಸ್ವಯಂ ಸೋಽಹಂ ತತ್ತ್ವರೂಪೋಽಹಮೀಶ್ವರಃ ।
ಪರಾಪರೋಽಹಂ ತುರ್ಯೋಽಹಂ ಪ್ರಸನ್ನೋಽಹಂ ರಸೋಽಸ್ಮ್ಯಹಮ್ ॥ ೧೧॥
ಬ್ರಹ್ಮಾಽಹಂ ಸರ್ವಲಕ್ಷ್ಯೋಽಹಂ ಸದಾ ಪೂರ್ಣೋಽಹಮಕ್ಷರಃ ।
ಮಮಾನುಭವರೂಪಂ ಯತ್ ಸರ್ವಮುಕ್ತಂ ಚ ಸದ್ಗುರೋ ॥ ೧೨॥
ನಮಸ್ಕರೋಮಿ ತೇ ನಾಹಂ ಸರ್ವಂ ಚ ಗುರುದಕ್ಷಿಣಾ ।
ಮದ್ದೇಹಂ ತ್ವತ್ಪದೇ ದತ್ತಂ ತ್ವಯಾ ಭಸ್ಮೀಕೃತಂ ಕ್ಷಣಾತ್ ॥ ೧೩॥
ಮಮಾತ್ಮಾ ಚ ಮಯಾ ದತ್ತಃ ಸ್ವಯಮಾತ್ಮನಿ ಪೂರಿತಃ ।
ತ್ವಮೇವಾಹಮಹಂ ಚ ತ್ವಮಹಮೇವ ತ್ವಮೇವ ಹಿ ॥ ೧೪॥
ಐಕ್ಯಾರ್ಣವನಿಮಗ್ನೋಽಸ್ಮಿ ಐಕ್ಯಜ್ಞಾನಂ ತ್ವಮೇವ ಹಿ ।
ಏಕಂ ಚೈತನ್ಯಮೇವಾಹಂ ತ್ವಯಾ ಗನ್ತುಂ ನ ಶಕ್ಯತೇ ॥ ೧೫॥
ಗನ್ತವ್ಯದೇಶೋ ನಾಸ್ತ್ಯೇವ ಏಕಾಕಾರಂ ನ ಚಾನ್ಯತಃ ।
ತ್ವಯಾ ಗನ್ತವ್ಯದೇಶೋ ನ ಮಯಾ ಗನ್ತವ್ಯಮಸ್ತಿ ನ ॥ ೧೬॥
ಏಕಂ ಕಾರಣಮೇಕಂ ಚ ಏಕಮೇವ ದ್ವಯಂ ನ ಹಿ ।
ತ್ವಯಾ ವಕ್ತವ್ಯಕಂ ನಾಸ್ತಿ ಮಯಾ ಶ್ರೋತವ್ಯಮಪ್ಯಲಮ್ ॥ ೧೭॥
ತ್ವಮೇವ ಸದ್ಗುರುರ್ನಾಸಿ ಅಹಂ ನಾಸ್ಮಿ ಸಶಿಷ್ಯಕಃ ।
ಬ್ರಹ್ಮಮಾತ್ರಮಿದಂ ಸರ್ವಮಸ್ಮಿನ್ಮಾನೋಽಸ್ಮಿ ತನ್ಮಯಃ ॥ ೧೮॥
ಭೇದಾಭೇದಂ ನ ಪಶ್ಯಾಮಿ ಕಾರ್ಯಾಕಾರ್ಯಂ ನ ಕಿಞ್ಚನ ।
ಮಮೈವ ಚೇನ್ನಮಸ್ಕಾರೋ ನಿಷ್ಪ್ರಯೋಜನ ಏವ ಹಿ ॥ ೧೯॥
ತವೈವ ಚೇನ್ನಮಸ್ಕಾರೋ ಭಿನ್ನತ್ವಾನ್ನ ಫಲಂ ಭವೇತ್ ।
ತವ ಚೇನ್ಮಮ ಚೇದ್ಭೇದಃ ಫಲಾಭಾವೋ ನ ಸಂಶಯಃ ॥ ೨೦॥
ನಮಸ್ಕೃತೋಽಹಂ ಯುಷ್ಮಾಕಂ ಭವಾನಜ್ಞೀತಿ ವಕ್ಷ್ಯತಿ ।
ಮಮೈವಾಪಕರಿಷ್ಯಾಮಿ ಪರಿಚ್ಛಿನ್ನೋ ಭವಾಮ್ಯಹಮ್ ॥ ೨೧॥
ಮಮೈವ ಚೇನ್ನಮಸ್ಕಾರಃ ಫಲಂ ನಾಸ್ತಿ ಸ್ವತಃ ಸ್ಥಿತೇ ।
ಕಸ್ಯಾಪಿ ಚ ನಮಸ್ಕಾರಃ ಕದಾಚಿದಪಿ ನಾಸ್ತಿ ಹಿ ॥ ೨೨॥
ಸದಾ ಚೈತನ್ಯಮಾತ್ರತ್ವಾತ್ ನಾಹಂ ನ ತ್ವಂ ನ ಹಿ ದ್ವಯಮ್ ।
ನ ಬನ್ಧಂ ನ ಪರೋ ನಾನ್ಯೇ ನಾಹಂ ನೇದಂ ನ ಕಿಞ್ಚನ ॥ ೨೩॥
ನ ದ್ವಯಂ ನೈಕಮದ್ವೈತಂ ನಿಶ್ಚಿತಂ ನ ಮನೋ ನ ತತ್ ।
ನ ಬೀಜಂ ನ ಸುಖಂ ದುಃಖಂ ನಾಶಂ ನಿಷ್ಠಾ ನ ಸತ್ಸದಾ ॥ ೨೪॥
ನಾಸ್ತಿ ನಾಸ್ತಿ ನ ಸನ್ದೇಹಃ ಕೇವಲಾತ್ ಪರಮಾತ್ಮನಿ ।
ನ ಜೀವೋ ನೇಶ್ವರೋ ನೈಕೋ ನ ಚನ್ದ್ರೋ ನಾಗ್ನಿಲಕ್ಷಣಃ ॥ ೨೫॥
ನ ವಾರ್ತಾ ನೇನ್ದ್ರಿಯೋ ನಾಹಂ ನ ಮಹತ್ತ್ವಂ ಗುಣಾನ್ತರಮ್ ।
ನ ಕಾಲೋ ನ ಜಗನ್ನಾನ್ಯೋ ನ ವಾ ಕಾರಣಮದ್ವಯಮ್ ॥ ೨೬॥
ನೋನ್ನತೋಽತ್ಯನ್ತಹೀನೋಽಹಂ ನ ಮುಕ್ತಸ್ತ್ವತ್ಪ್ರಸಾದತಃ ।
ಸರ್ವಂ ನಾಸ್ತ್ಯೇವ ನಾಸ್ತ್ಯೇವ ಸರ್ವಂ ಬ್ರಹ್ಮೈವ ಕೇವಲಮ್ ॥ ೨೭॥
ಅಹಂ ಬ್ರಹ್ಮ ಇದಂ ಬ್ರಹ್ಮ ಆತ್ಮ ಬ್ರಹ್ಮಾಹಮೇವ ಹಿ ।
ಸರ್ವಂ ಬ್ರಹ್ಮ ನ ಸನ್ದೇಹಸ್ತ್ವತ್ಪ್ರಸಾದಾನ್ಮಹೇಶ್ವರಃ ॥ ೨೮॥
ತ್ವಮೇವ ಸದ್ಗುರುರ್ಬ್ರಹ್ಮ ನ ಹಿ ಸದ್ಗುರುರನ್ಯತಃ ।
ಆತ್ಮೈವ ಸದ್ಗುರುರ್ಬ್ರಹ್ಮ ಶಿಷ್ಯೋ ಹ್ಯಾತ್ಮೈವ ಸದ್ಗುರುಃ ॥ ೨೯॥
ಗುರುಃ ಪ್ರಕಲ್ಪತೇ ಶಿಷ್ಯೋ ಗುರುಹೀನೋ ನ ಶಿಷ್ಯಕಃ ।
ಶಿಷ್ಯೇ ಸತಿ ಗುರುಃ ಕಲ್ಪ್ಯಃ ಶಿಷ್ಯಾಭಾವೇ ಗುರುರ್ನ ಹಿ ॥ ೩೦॥
ಗುರುಶಿಷ್ಯವಿಹೀನಾತ್ಮಾ ಸರ್ವತ್ರ ಸ್ವಯಮೇವ ಹಿ ।
ಚಿನ್ಮಾತ್ರಾತ್ಮನಿ ಕಲ್ಪ್ಯೋಽಹಂ ಚಿನ್ಮಾತ್ರಾತ್ಮಾ ನ ಚಾಪರಃ ॥ ೩೧॥
ಚಿನ್ಮಾತ್ರಾತ್ಮಾಹಮೇವೈಕೋ ನಾನ್ಯತ್ ಕಿಞ್ಚಿನ್ನ ವಿದ್ಯತೇ ।
ಸರ್ವಸ್ಥಿತೋಽಹಂ ಸತತಂ ನಾನ್ಯಂ ಪಶ್ಯಾಮಿ ಸದ್ಗುರೋಃ ॥ ೩೨॥
ನಾನ್ಯತ್ ಪಶ್ಯಾಮಿ ಚಿತ್ತೇನ ನಾನ್ಯತ್ ಪಶ್ಯಾಮಿ ಕಿಞ್ಚನ ।
ಸರ್ವಾಭಾವಾನ್ನ ಪಶ್ಯಾಮಿ ಸರ್ವಂ ಚೇದ್ ದೃಶ್ಯತಾಂ ಪೃಥಕ್ ॥ ೩೩॥
ಏವಂ ಬ್ರಹ್ಮ ಪ್ರಪಶ್ಯಾಮಿ ನಾನ್ಯದಸ್ತೀತಿ ಸರ್ವದಾ ।
ಅಹೋ ಭೇದಂ ಪ್ರಕುಪಿತಂ ಅಹೋ ಮಾಯಾ ನ ವಿದ್ಯತೇ ॥ ೩೪॥
ಅಹೋ ಸದ್ಗುರುಮಾಹಾತ್ಮ್ಯಮಹೋ ಬ್ರಹ್ಮಸುಖಂ ಮಹತ್ ।
ಅಹೋ ವಿಜ್ಞಾನಮಾಹಾತ್ಮ್ಯಮಹೋ ಸಜ್ಜನವೈಭವಃ ॥ ೩೫॥
ಅಹೋ ಮೋಹವಿನಾಶಶ್ಚ ಅಹೋ ಪಶ್ಯಾಮಿ ಸತ್ಸುಖಮ್ ।
ಅಹೋ ಚಿತ್ತಂ ನ ಪಶ್ಯಾಮಿ ಅಹೋ ಸರ್ವಂ ನ ಕಿಞ್ಚನ ॥ ೩೬॥
ಅಹಮೇವ ಹಿ ನಾನ್ಯತ್ರ ಅಹಮಾನನ್ದ ಏವ ಹಿ ।
ಮಮಾನ್ತಃಕರಣೇ ಯದ್ಯನ್ನಿಶ್ಚಿತಂ ಭವದೀರಿತಮ್ ॥ ೩೭॥
ಸರ್ವಂ ಬ್ರಹ್ಮ ಪರಂ ಬ್ರಹ್ಮ ನ ಕಿಞ್ಚಿದನ್ಯದೈವತಮ್ ।
ಏವಂ ಪಶ್ಯಾಮಿ ಸತತಂ ನಾನ್ಯತ್ ಪಶ್ಯಾಮಿ ಸದ್ಗುರೋ ॥ ೩೮॥
ಏವಂ ನಿಶ್ಚಿತ್ಯ ತಿಷ್ಠಾಮಿ ಸ್ವಸ್ವರೂಪೇ ಮಮಾತ್ಮನಿ ॥ ೩೯॥
ಅಗಾಧವೇದವಾಕ್ಯತೋ ನ ಚಾಧಿಭೇಷಜಂ ಭವೇ-
ದುಮಾಧವಾಙ್ಘ್ರಿಪಙ್ಕಜಸ್ಮೃತಿಃ ಪ್ರಬೋಧಮೋಕ್ಷದಾ ।
ಪ್ರಬುದ್ಧಭೇದವಾಸನಾನಿರುದ್ಧಹೃತ್ತಮೋಭಿದೇ
ಮಹಾರುಜಾಘವೈದ್ಯಮೀಶ್ವರಂ ಹೃದಮ್ಬುಜೇ ಭಜೇ ॥ ೪೦॥
ದ್ಯತತ್ಪ್ರದಗ್ಧಕಾಮದೇಹ ದುಗ್ಧಸನ್ನಿಭಂ ಪ್ರಮುಗ್ಧಸಾಮಿ ।
ಸೋಮಧಾರಿಣಂ ಶ್ರುತೀಡ್ಯಗದ್ಯಸಂಸ್ತುತಂ ತ್ವಭೇದ್ಯಮೇಕಶಙ್ಕರಮ್ ॥ ೪೧॥
ವರಃ ಕಙ್ಕಃ ಕಾಕೋ ಭವದುಭಯಜಾತೇಷು ನಿಯತಂ
ಮಹಾಶಙ್ಕಾತಙ್ಕೈರ್ವಿಧಿವಿಹಿತಶಾನ್ತೇನ ಮನಸಾ ।
ಯದಿ ಸ್ವೈರಂ ಧ್ಯಾಯನ್ನಗಪತಿಸುತಾನಾಯಕಪದಂ
ಸ ಏವಾಯಂ ಧುರ್ಯೋ ಭವತಿ ಮುನಿಜಾತೇಷು ನಿಯತಮ್ ॥ ೪೨॥
ಕಃ ಕಾಲಾನ್ತಕಪಾದಪದ್ಮಭಜನಾದನ್ಯದ್ಧೃದಾ ಕಷ್ಟದಾಂ
ಧರ್ಮಾಭಾಸಪರಂಪರಾಂ ಪ್ರಥಯತೇ ಮೂರ್ಖೋ ಖರೀಂ ತೌರಗೀಮ್ ।
ಕರ್ತುಂ ಯತ್ನಶತೈರಶಕ್ಯಕರಣೈರ್ವಿನ್ದೇತ ದುಃಖಾದಿಕಂvar was ದುಃಖಾಧಿಕಮ್
ತದ್ವತ್ ಸಾಂಬಪದಾಂಬುಜಾರ್ಚನರತಿಂ ತ್ಯಕ್ತ್ವಾ ವೃಥಾ ದುಃಖಭಾಕ್ ॥ ೪೩॥

॥ ಇತಿ ಶ್ರೀಶಿವರಹಸ್ಯೇ ಶಙ್ಕರಾಖ್ಯೇ ಷಷ್ಠಾಂಶೇ ಋಭುನಿದಾಘಸಂವಾದೇ ನಿದಾಘಾನುಭವವರ್ಣನಪ್ರಕರಣಂ ನಾಮ ತ್ರಿಚತ್ವಾರಿಂಶೋಽಧ್ಯಾಯಃ ॥

Special Thanks

The Sanskrit works, published by Sri Ramanasramam, have been approved to be posted on sanskritdocuments.org by permission of Sri V.S. Ramanan, President, Sri Ramanasramam.

Credits

Encoded by Anil Sharma anilandvijaya at gmail.com
Proofread by Sunder Hattangadi and Anil Sharma

https://sanskritdocuments.org

Send corrections to sanskrit at cheerful.com