ಋಭುಗೀತಾ ೪೪ ॥ ನಿದಾಧಾನುಭವ ವರ್ಣನ ಪ್ರಕರಣಮ್ ॥
ನಿದಾಘಃ -
- ಶೃಣುಶ್ವ ಸದ್ಗುರೋ ಬ್ರಹ್ಮನ್ ತ್ವತ್ಪ್ರಸಾದಾನ್ವಿನಿಶ್ಚಿತಮ್ ।
- ಅಹಮೇವ ಹಿ ತದ್ಬ್ರಹ್ಮ ಅಹಮೇವ ಹಿ ಕೇವಲಮ್ ॥ ೧॥
- ಅಹಮೇವ ಹಿ ನಿತ್ಯಾತ್ಮಾ ಅಹಮೇವ ಸದಾಽಜರಃ ।
- ಅಹಮೇವ ಹಿ ಶಾನ್ತಾತ್ಮಾ ಅಹಮೇವ ಹಿ ನಿಷ್ಕಲಃ ॥ ೨॥
- ಅಹಮೇವ ಹಿ ನಿಶ್ಚಿನ್ತಃ ಅಹಮೇವ ಸುಖಾತ್ಮಕಃ ।
- ಅಹಮೇವ ಗುರುಸ್ತ್ವಂ ಹಿ ಅಹಂ ಶಿಷ್ಯೋಽಸ್ಮಿ ಕೇವಲಮ್ ॥ ೩॥
- ಅಹಮಾನನ್ದ ಏವಾತ್ಮಾ ಅಹಮೇವ ನಿರಞ್ಜನಃ ।
- ಅಹಂ ತುರ್ಯಾತಿಗೋ ಹ್ಯಾತ್ಮಾ ಅಹಮೇವ ಗುಣೋಜ್ಝಿತಃ ॥ ೪॥
- ಅಹಂ ವಿದೇಹ ಏವಾತ್ಮಾ ಅಹಮೇವ ಹಿ ಶಙ್ಕರಃ ।
- ಅಹಂ ವೈ ಪರಿಪೂರ್ಣಾತ್ಮಾ ಅಹಮೇವೇಶ್ವರಃ ಪರಃ ॥ ೫॥
- ಅಹಮೇವ ಹಿ ಲಕ್ಷ್ಯಾತ್ಮಾ ಅಹಮೇವ ಮನೋಮಯಃ ।
- ಅಹಮೇವ ಹಿ ಸರ್ವಾತ್ಮಾ ಅಹಮೇವ ಸದಾಶಿವಃ ॥ ೬॥
- ಅಹಂ ವಿಷ್ಣುರಹಂ ಬ್ರಹ್ಮಾ ಅಹಮಿನ್ದ್ರಸ್ತ್ವಹಂ ಸುರಾಃ ।
- ಅಹಂ ವೈ ಯಕ್ಷರಕ್ಷಾಂಸಿ ಪಿಶಾಚಾ ಗುಹ್ಯಕಾಸ್ತಥಾ ॥ ೭॥
- ಅಹಂ ಸಮುದ್ರಾಃ ಸರಿತ ಅಹಮೇವ ಹಿ ಪರ್ವತಾಃ ।
- ಅಹಂ ವನಾನಿ ಭುವನಂ ಅಹಮೇವೇದಮೇವ ಹಿ ॥ ೮॥
- ನಿತ್ಯತೃಪ್ತೋ ಹ್ಯಹಂ ಶುದ್ಧಬುದ್ಧೋಽಹಂ ಪ್ರಕೃತೇಃ ಪರಃ ।
- ಅಹಮೇವ ಹಿ ಸರ್ವತ್ರ ಅಹಮೇವ ಹಿ ಸರ್ವಗಃ ॥ ೯॥
- ಅಹಮೇವ ಮಹಾನಾತ್ಮಾ ಸರ್ವಮಙ್ಗಲವಿಗ್ರಹಃ ।
- ಅಹಮೇವ ಹಿ ಮುಕ್ತೋಽಸ್ಮಿ ಶುದ್ಧೋಽಸ್ಮಿ ಪರಮಃ ಶಿವಃ ॥ ೧೦॥
- ಅಹಂ ಭೂಮಿರಹಂ ವಾಯುರಹಂ ತೇಜೋ ಹ್ಯಹಂ ನಭಃ ।
- ಅಹಂ ಜಲಮಹಂ ಸೂರ್ಯಶ್ಚನ್ದ್ರಮಾ ಭಗಣಾ ಹ್ಯಹಮ್ ॥ ೧೧॥
- ಅಹಂ ಲೋಕಾ ಅಲೋಕಾಶ್ಚ ಅಹಂ ಲೋಕ್ಯಾ ಅಹಂ ಸದಾ ।
- ಅಹಮಾತ್ಮಾ ಪಾರದೃಶ್ಯ ಅಹಂ ಪ್ರಜ್ಞಾನವಿಗ್ರಹಃ ॥ ೧೨॥
- ಅಹಂ ಶೂನ್ಯೋ ಅಶೂನ್ಯೋಽಹಂ ಸರ್ವಾನನ್ದಮಯೋಽಸ್ಮ್ಯಹಮ್ ।
- ಶುಭಾಶುಭಫಲಾತೀತೋ ಹ್ಯಹಮೇವ ಹಿ ಕೇವಲಮ್ ॥ ೧೩॥
- ಅಹಮೇವ ಋತಂ ಸತ್ಯಮಹಂ ಸಚ್ಚಿತ್ಸುಖಾತ್ಮಕಃ ।
- ಅಹಮಾನನ್ದ ಏವಾತ್ಮಾ ಬಹುಧಾ ಚೈಕಧಾ ಸ್ಥಿತಃ ॥ ೧೪॥
- ಅಹಂ ಭೂತಭವಿಷ್ಯಂ ಚ ವರ್ತಮಾನಮಹಂ ಸದಾ ।
- ಅಹಮೇಕೋ ದ್ವಿಧಾಹಂ ಚ ಬಹುಧಾ ಚಾಹಮೇವ ಹಿ ॥ ೧೫॥
- ಅಹಮೇವ ಪರಂ ಬ್ರಹ್ಮ ಅಹಮೇವ ಪ್ರಜಾಪತಿಃ ।
- ಸ್ವರಾಟ್ ಸಮ್ರಾಡ್ ಜಗದ್ಯೋನಿರಹಮೇವ ಹಿ ಸರ್ವದಾ ॥ ೧೬॥
- ಅಹಂ ವಿಶ್ವಸ್ತೈಜಸಶ್ಚ ಪ್ರಾಜ್ಞೋಽಹಂ ತುರ್ಯ ಏವ ಹಿ ।
- ಅಹಂ ಪ್ರಾಣೋ ಮನಶ್ಚಾಹಮಹಮಿದ್ರಿಯವರ್ಗಕಃ ॥ ೧೭॥
- ಅಹಂ ವಿಶ್ವಂ ಹಿ ಭುವನಂ ಗಗನಾತ್ಮಾಹಮೇವ ಹಿ ।
- ಅನುಪಾಧಿ ಉಪಾಧ್ಯಂ ಯತ್ತತ್ಸರ್ವಮಹಮೇವ ಹಿ ॥ ೧೮॥
- ಉಪಾಧಿರಹಿತಶ್ಚಾಹಂ ನಿತ್ಯಾನನ್ದೋಽಹಮೇವ ಹಿ ।
- ಏವಂ ನಿಶ್ಚಯವಾನನ್ತಃ ಸರ್ವದಾ ಸುಖಮಶ್ನುತೇ ।
- ಏವಂ ಯಃ ಶೃಣುಯಾನ್ನಿತ್ಯಂ ಸರ್ವಪಾಪೈಃ ಪ್ರಮುಚ್ಯತೇ ॥ ೧೯॥
- ನಿತ್ಯೋಽಹಂ ನಿರ್ವಿಕಲ್ಪೋ ಜನವನಭುವನೇ ಪಾವನೋಽಹಂ ಮನೀಷೀ
- ವಿಶ್ವೋ ವಿಶ್ವಾತಿಗೋಽಹಂ ಪ್ರಕೃತಿವಿನಿಕೃತೋ ಏಕಧಾ ಸಂಸ್ಥಿತೋಽಹಮ್ ।
- ನಾನಾಕಾರವಿನಾಶಜನ್ಮರಹಿತಸ್ವಜ್ಞಾನಕಾರ್ಯೋಜ್ಝಿತೈಃ
- ಭೂಮಾನನ್ದಘನೋಽಸ್ಮ್ಯಹಂ ಪರಶಿವಃ ಸತ್ಯಸ್ವರೂಪೋಽಸ್ಮ್ಯಹಮ್ ॥ ೨೦॥
- ॥ ಇತಿ ಶ್ರೀಶಿವರಹಸ್ಯೇ ಶಙ್ಕರಾಖ್ಯೇ ಷಷ್ಠಾಂಶೇ ಋಭುನಿದಾಘಸಂವಾದೇ ನಿದಾಘಾನುಭವವರ್ಣನಂ ನಾಮ ಚತುಶ್ಚತ್ವಾರಿಂಶೋಽಧ್ಯಾಯಃ ॥
Special Thanks
The Sanskrit works, published by Sri Ramanasramam, have been approved to be posted on sanskritdocuments.org by permission of Sri V.S. Ramanan, President, Sri Ramanasramam.
Credits
Encoded by Anil Sharma anilandvijaya at gmail.com
Proofread by Sunder Hattangadi and Anil Sharma
https://sanskritdocuments.org
Send corrections to sanskrit at cheerful.com