ಋಭುಗೀತಾ ೧೨ ॥ ವಿದೇಹಮುಕ್ತಿ ಪ್ರಕರಣ ವರ್ಣನಮ್ ॥

ಋಭುಃ -

• ದೇಹಮುಕ್ತಿಪ್ರಕರಣಂ ನಿದಾಘ ಶೃಣು ದುರ್ಲಭಮ್ ।
• ತ್ಯಕ್ತಾತ್ಯಕ್ತಂ ನ ಸ್ಮರತಿ ವಿದೇಹಾನ್ಮುಕ್ತ ಏವ ಸಃ ॥ ೧॥
• ಬ್ರಹ್ಮರೂಪಃ ಪ್ರಶಾನ್ತಾತ್ಮಾ ನಾನ್ಯರೂಪಃ ಸದಾ ಸುಖೀ ।
• ಸ್ವಸ್ಥರೂಪೋ ಮಹಾಮೌನೀ ವಿದೇಹಾನ್ಮುಕ್ತ ಏವ ಸಃ ॥ ೨॥
• ಸರ್ವಾತ್ಮಾ ಸರ್ವಭೂತಾತ್ಮಾ ಶಾನ್ತಾತ್ಮಾ ಮುಕ್ತಿವರ್ಜಿತಃ ।
• ಏಕಾತ್ಮವರ್ಜಿತಃ ಸಾಕ್ಷೀ ವಿದೇಹಾನ್ಮುಕ್ತ ಏವ ಸಃ ॥ ೩॥
• ಲಕ್ಷ್ಯಾತ್ಮಾ ಲಾಲಿತಾತ್ಮಾಹಂ ಲೀಲಾತ್ಮಾ ಸ್ವಾತ್ಮಮಾತ್ರಕಃ ।
• ತೂಷ್ಣೀಮಾತ್ಮಾ ಸ್ವಭಾವಾತ್ಮಾ ವಿದೇಹಾನ್ಮುಕ್ತ ಏವ ಸಃ ॥ ೪॥
• ಶುಭ್ರಾತ್ಮಾ ಸ್ವಯಮಾತ್ಮಾಹಂ ಸರ್ವಾತ್ಮಾ ಸ್ವಾತ್ಮಮಾತ್ರಕಃ ।
• ಅಜಾತ್ಮಾ ಚಾಮೃತಾತ್ಮಾ ಹಿ ವಿದೇಹಾನ್ಮುಕ್ತ ಏವ ಸಃ ॥ ೫॥
• ಆನನ್ದಾತ್ಮಾ ಪ್ರಿಯಃ ಸ್ವಾತ್ಮಾ ಮೋಕ್ಷಾತ್ಮಾ ಕೋಽಪಿ ನಿರ್ಣಯಃ ।
• ಇತ್ಯೇವಮಿತಿ ನಿಧ್ಯಾಯೀ ವಿದೇಹಾನ್ಮುಕ್ತ ಏವ ಸಃ ॥ ೬॥
• ಬ್ರಹ್ಮೈವಾಹಂ ಚಿದೇವಾಹಂ ಏಕಂ ವಾಪಿ ನ ಚಿನ್ತ್ಯತೇ ।
• ಚಿನ್ಮಾತ್ರೇಣೈವ ಯಸ್ತಿಷ್ಠೇದ್ವಿದೇಹಾನ್ಮುಕ್ತ ಏವ ಸಃ ॥ ೭॥
• ನಿಶ್ಚಯಂ ಚ ಪರಿತ್ಯಜ್ಯ ಅಹಂ ಬ್ರಹ್ಮೇತಿ ನಿಶ್ಚಯಃ ।
• ಆನನ್ದಭೂರಿದೇಹಸ್ತು ವಿದೇಹಾನ್ಮುಕ್ತ ಏವ ಸಃ ॥ ೮॥
• ಸರ್ವಮಸ್ತೀತಿ ನಾಸ್ತೀತಿ ನಿಶ್ಚಯಂ ತ್ಯಜ್ಯ ತಿಷ್ಠತಿ ।
• ಅಹಂ ಬ್ರಹ್ಮಾಸ್ಮಿ ನಾನ್ಯೋಽಸ್ಮಿ ವಿದೇಹಾನ್ಮುಕ್ತ ಏವ ಸಃ ॥ ೯॥
• ಕಿಞ್ಚಿತ್ ಕ್ವಚಿತ್ ಕದಾಚಿಚ್ಚ ಆತ್ಮಾನಂ ನ ಸ್ಮರತ್ಯಸೌ ।
• ಸ್ವಸ್ವಭಾವೇನ ಯಸ್ತಿಷ್ಠೇತ್ ವಿದೇಹಾನ್ಮುಕ್ತ ಏವ ಸಃ ॥ ೧೦॥
• ಅಹಮಾತ್ಮಾ ಪರೋ ಹ್ಯಾತ್ಮಾ ಚಿದಾತ್ಮಾಹಂ ನ ಚಿನ್ತ್ಯತೇ ।
• ಸ್ಥಾಸ್ಯಾಮೀತ್ಯಪಿ ಯೋ ಯುಕ್ತೋ ವಿದೇಹಾನ್ಮುಕ್ತ ಏವ ಸಃ ॥ ೧೧॥
• ತೂಷ್ಣೀಮೇವ ಸ್ಥಿತಸ್ತೂಷ್ಣೀಂ ಸರ್ವಂ ತೂಷ್ಣೀಂ ನ ಕಿಞ್ಚನ ।
• ಅಹಮರ್ಥಪರಿತ್ಯಕ್ತೋ ವಿದೇಹಾನ್ಮುಕ್ತ ಏವ ಸಃ ॥ ೧೨॥
• ಪರಮಾತ್ಮಾ ಗುಣಾತೀತಃ ಸರ್ವಾತ್ಮಾಪಿ ನ ಸಂಮತಃ ।
• ಸರ್ವಭಾವಾನ್ಮಹಾತ್ಮಾ ಯೋ ವಿದೇಹಾನ್ಮುಕ್ತ ಏವ ಸಃ ॥ ೧೩॥
• ಕಾಲಭೇದಂ ದೇಶಭೇದಂ ವಸ್ತುಭೇದಂ ಸ್ವಭೇದಕಮ್ ।
• ಕಿಞ್ಚಿದ್ಭೇದಂ ನ ಯಸ್ಯಾಸ್ತಿ ವಿದೇಹಾನ್ಮುಕ್ತ ಏವ ಸಃ ॥ ೧೪॥
• ಅಹಂ ತ್ವಂ ತದಿದಂ ಸೋಽಯಂ ಕಿಞ್ಚಿದ್ವಾಪಿ ನ ವಿದ್ಯತೇ ।
• ಅತ್ಯನ್ತಸುಖಮಾತ್ರೋಽಹಂ ವಿದೇಹಾನ್ಮುಕ್ತ ಏವ ಸಃ ॥ ೧೫॥
• ನಿರ್ಗುಣಾತ್ಮಾ ನಿರಾತ್ಮಾ ಹಿ ನಿತ್ಯಾತ್ಮಾ ನಿತ್ಯನಿರ್ಣಯಃ ।
• ಶೂನ್ಯಾತ್ಮಾ ಸೂಕ್ಷ್ಮರೂಪೋ ಯೋ ವಿದೇಹಾನ್ಮುಕ್ತ ಏವ ಸಃ ॥ ೧೬॥
• ವಿಶ್ವಾತ್ಮಾ ವಿಶ್ವಹೀನಾತ್ಮಾ ಕಾಲಾತ್ಮಾ ಕಾಲಹೇತುಕಃ ।
• ದೇವಾತ್ಮಾ ದೇವಹೀನೋ ಯೋ ವಿದೇಹಾನ್ಮುಕ್ತ ಏವ ಸಃ ॥ ೧೭॥
• ಮಾತ್ರಾತ್ಮಾ ಮೇಯಹೀನಾತ್ಮಾ ಮೂಢಾತ್ಮಾಽನಾತ್ಮವರ್ಜಿತಃ ।
• ಕೇವಲಾತ್ಮಾ ಪರಾತ್ಮಾ ಚ ವಿದೇಹಾನ್ಮುಕ್ತ ಏವ ಸಃ ॥ ೧೮॥
• ಸರ್ವತ್ರ ಜಡಹೀನಾತ್ಮಾ ಸರ್ವೇಷಾಮನ್ತರಾತ್ಮಕಃ ।
• ಸರ್ವೇಷಾಮಿತಿ ಯಸ್ತೂಕ್ತೋ ವಿದೇಹಾನ್ಮುಕ್ತ ಏವ ಸಃ ॥ ೧೯॥
• ಸರ್ವಸಙ್ಕಲ್ಪಹೀನೇತಿ ಸಚ್ಚಿದಾನನ್ದಮಾತ್ರಕಃ ।
• ಸ್ಥಾಸ್ಯಾಮೀತಿ ನ ಯಸ್ಯಾನ್ತೋ ವಿದೇಹಾನ್ಮುಕ್ತ ಏವ ಸಃ ॥ ೨೦॥
• ಸರ್ವಂ ನಾಸ್ತಿ ತದಸ್ತೀತಿ ಚಿನ್ಮಾತ್ರೋಽಸ್ತೀತಿ ಸರ್ವದಾ ।
• ಪ್ರಬುದ್ಧೋ ನಾಸ್ತಿ ಯಸ್ಯಾನ್ತೋ ವಿದೇಹಾನ್ಮುಕ್ತ ಏವ ಸಃ ॥ ೨೧॥
• ಕೇವಲಂ ಪರಮಾತ್ಮಾ ಯಃ ಕೇವಲಂ ಜ್ಞಾನವಿಗ್ರಹಃ ।
• ಸತ್ತಾಮಾತ್ರಸ್ವರೂಪೋ ಯೋ ವಿದೇಹಾನ್ಮುಕ್ತ ಏವ ಸಃ ॥ ೨೨॥
• ಜೀವೇಶ್ವರೇತಿ ಚೈತ್ಯೇತಿ ವೇದಶಾಸ್ತ್ರೇ ತ್ವಹಂ ತ್ವಿತಿ ।
• ಬ್ರಹ್ಮೈವೇತಿ ನ ಯಸ್ಯಾನ್ತೋ ವಿದೇಹಾನ್ಮುಕ್ತ ಏವ ಸಃ ॥ ೨೩॥
• ಬ್ರಹ್ಮೈವ ಸರ್ವಮೇವಾಹಂ ನಾನ್ಯತ್ ಕಿಞ್ಚಿಜ್ಜಗದ್ಭವೇತ್ ।
• ಇತ್ಯೇವಂ ನಿಶ್ಚಯೋ ಭಾವಃ ವಿದೇಹಾನ್ಮುಕ್ತ ಏವ ಸಃ ॥ ೨೪॥
• ಇದಂ ಚೈತನ್ಯಮೇವೇತಿ ಅಹಂ ಚೈತನ್ಯಮೇವ ಹಿ ।
• ಇತಿ ನಿಶ್ಚಯಶೂನ್ಯೋ ಯೋ ವಿದೇಹಾನ್ಮುಕ್ತ ಏವ ಸಃ ॥ ೨೫॥
• ಚೈತನ್ಯಮಾತ್ರಃ ಸಂಸಿದ್ಧಃ ಸ್ವಾತ್ಮಾರಾಮಃ ಸುಖಾಸನಃ ।
• ಸುಖಮಾತ್ರಾನ್ತರಙ್ಗೋ ಯೋ ವಿದೇಹಾನ್ಮುಕ್ತ ಏವ ಸಃ ॥ ೨೬॥
• ಅಪರಿಚ್ಛಿನ್ನರೂಪಾತ್ಮಾ ಅಣೋರಣುವಿನಿರ್ಮಲಃ ।
• ತುರ್ಯಾತೀತಃ ಪರಾನನ್ದೋ ವಿದೇಹಾನ್ಮುಕ್ತ ಏವ ಸಃ ॥ ೨೭॥
• ನಾಮಾಪಿ ನಾಸ್ತಿ ಸರ್ವಾತ್ಮಾ ನ ರೂಪೋ ನ ಚ ನಾಸ್ತಿಕಃ ।
• ಪರಬ್ರಹ್ಮಸ್ವರೂಪಾತ್ಮಾ ವಿದೇಹಾನ್ಮುಕ್ತ ಏವ ಸಃ ॥ ೨೮॥
• ತುರ್ಯಾತೀತಃ ಸ್ವತೋಽತೀತಃ ಅತೋಽತೀತಃ ಸ ಸನ್ಮಯಃ ।
• ಅಶುಭಾಶುಭಶಾನ್ತಾತ್ಮಾ ವಿದೇಹಾನ್ಮುಕ್ತ ಏವ ಸಃ ॥ ೨೯॥
• ಬನ್ಧಮುಕ್ತಿಪ್ರಶಾನ್ತಾತ್ಮಾ ಸರ್ವಾತ್ಮಾ ಚಾನ್ತರಾತ್ಮಕಃ ।
• ಪ್ರಪಞ್ಚಾತ್ಮಾ ಪರೋ ಹ್ಯಾತ್ಮಾ ವಿದೇಹಾನ್ಮುಕ್ತ ಏವ ಸಃ ॥ ೩೦॥
• ಸರ್ವತ್ರ ಪರಿಪೂರ್ಣಾತ್ಮಾ ಸರ್ವದಾ ಚ ಪರಾತ್ಪರಃ ।
• ಅನ್ತರಾತ್ಮಾ ಹ್ಯನನ್ತಾತ್ಮಾ ವಿದೇಹಾನ್ಮುಕ್ತ ಏವ ಸಃ ॥ ೩೧॥
• ಅಬೋಧಬೋಧಹೀನಾತ್ಮಾ ಅಜಡೋ ಜಡವರ್ಜಿತಃ ।
• ಅತತ್ತ್ವಾತತ್ತ್ವಸರ್ವಾತ್ಮಾ ವಿದೇಹಾನ್ಮುಕ್ತ ಏವ ಸಃ ॥ ೩೨॥
• ಅಸಮಾಧಿಸಮಾಧ್ಯನ್ತಃ ಅಲಕ್ಷ್ಯಾಲಕ್ಷ್ಯವರ್ಜಿತಃ ।
• ಅಭೂತೋ ಭೂತ ಏವಾತ್ಮಾ ವಿದೇಹಾನ್ಮುಕ್ತ ಏವ ಸಃ ॥ ೩೩॥
• ಚಿನ್ಮಯಾತ್ಮಾ ಚಿದಾಕಾಶಶ್ಚಿದಾನನ್ದಶ್ಚಿದಂಬರಃ ।
• ಚಿನ್ಮಾತ್ರರೂಪ ಏವಾತ್ಮಾ ವಿದೇಹಾನ್ಮುಕ್ತ ಏವ ಸಃ ॥ ೩೪॥
• ಸಚ್ಚಿದಾನನ್ದರೂಪಾತ್ಮಾ ಸಚ್ಚಿದಾನನ್ದವಿಗ್ರಹಃ ।
• ಸಚ್ಚಿದಾನನ್ದಪೂರ್ಣಾತ್ಮಾ ವಿದೇಹಾನ್ಮುಕ್ತ ಏವ ಸಃ ॥ ೩೫॥
• ಸದಾ ಬ್ರಹ್ಮಮಯೋ ನಿತ್ಯಂ ಸದಾ ಸ್ವಾತ್ಮನಿ ನಿಷ್ಠಿತಃ ।
• ಸದಾಽಖಣ್ಡೈಕರೂಪಾತ್ಮಾ ವಿದೇಹಾನ್ಮುಕ್ತ ಏವ ಸಃ ॥ ೩೬॥
• ಪ್ರಜ್ಞಾನಘನ ಏವಾತ್ಮಾ ಪ್ರಜ್ಞಾನಘನವಿಗ್ರಹಃ ।
• ನಿತ್ಯಜ್ಞಾನಪರಾನನ್ದೋ ವಿದೇಹಾನ್ಮುಕ್ತ ಏವ ಸಃ ॥ ೩೭॥
• ಯಸ್ಯ ದೇಹಃ ಕ್ವಚಿನ್ನಾಸ್ತಿ ಯಸ್ಯ ಕಿಞ್ಚಿತ್ ಸ್ಮೃತಿಶ್ಚ ನ ।
• ಸದಾತ್ಮಾ ಹ್ಯಾತ್ಮನಿ ಸ್ವಸ್ಥೋ ವಿದೇಹಾನ್ಮುಕ್ತ ಏವ ಸಃ ॥ ೩೮॥
• ಯಸ್ಯ ನಿರ್ವಾಸನಂ ಚಿತ್ತಂ ಯಸ್ಯ ಬ್ರಹ್ಮಾತ್ಮನಾ ಸ್ಥಿತಿಃ ।
• ಯೋಗಾತ್ಮಾ ಯೋಗಯುಕ್ತಾತ್ಮಾ ವಿದೇಹಾನ್ಮುಕ್ತ ಏವ ಸಃ ॥ ೩೯॥
• ಚೈತನ್ಯಮಾತ್ರ ಏವೇತಿ ತ್ಯಕ್ತಂ ಸರ್ವಮತಿರ್ನ ಹಿ ।
• ಗುಣಾಗುಣವಿಕಾರಾನ್ತೋ ವಿದೇಹಾನ್ಮುಕ್ತ ಏವ ಸಃ ॥ ೪೦॥
• ಕಾಲದೇಶಾದಿ ನಾಸ್ತ್ಯನ್ತೋ ನ ಗ್ರಾಹ್ಯೋ ನಾಸ್ಮೃತಿಃ ಪರಃ ।
• ನಿಶ್ಚಯಂ ಚ ಪರಿತ್ಯಕ್ತೋ ವಿದೇಹಾನ್ಮುಕ್ತ ಏವ ಸಃ ॥ ೪೧॥
• ಭೂಮಾನನ್ದಾಪರಾನನ್ದೋ ಭೋಗಾನನ್ದವಿವರ್ಜಿತಃ ।
• ಸಾಕ್ಷೀ ಚ ಸಾಕ್ಷಿಹೀನಶ್ಚ ವಿದೇಹಾನ್ಮುಕ್ತ ಏವ ಸಃ ॥ ೪೨॥
• ಸೋಽಪಿ ಕೋಽಪಿ ನ ಸೋ ಕೋಽಪಿ ಕಿಞ್ಚಿತ್ ಕಿಞ್ಚಿನ್ನ ಕಿಞ್ಚನ ।
• ಆತ್ಮಾನಾತ್ಮಾ ಚಿದಾತ್ಮಾ ಚ ಚಿದಚಿಚ್ಚಾಹಮೇವ ಚ ॥ ೪೩॥
• ಯಸ್ಯ ಪ್ರಪಞ್ಚಶ್ಚಾನಾತ್ಮಾ ಬ್ರಹ್ಮಾಕಾರಮಪೀಹ ನ ।
• ಸ್ವಸ್ವರೂಪಃ ಸ್ವಯಂಜ್ಯೋತಿರ್ವಿದೇಹಾನ್ಮುಕ್ತ ಏವ ಸಃ ॥ ೪೪॥
• ವಾಚಾಮಗೋಚರಾನನ್ದಃ ಸರ್ವೇನ್ದ್ರಿಯವಿವರ್ಜಿತಃ ।
• ಅತೀತಾತೀತಭಾವೋ ಯೋ ವಿದೇಹಾನ್ಮುಕ್ತ ಏವ ಸಃ ॥ ೪೫॥
• ಚಿತ್ತವೃತ್ತೇರತೀತೋ ಯಶ್ಚಿತ್ತವೃತ್ತಿರ್ನ ಭಾಸಕಃ ।
• ಸರ್ವವೃತ್ತಿವಿಹೀನೋ ಯೋ ವಿದೇಹಾನ್ಮುಕ್ತ ಏವ ಸಃ ॥ ೪೬॥
• ತಸ್ಮಿನ್ ಕಾಲೇ ವಿದೇಹೋ ಯೋ ದೇಹಸ್ಮರಣವರ್ಜಿತಃ ।
• ನ ಸ್ಥೂಲೋ ನ ಕೃಶೋ ವಾಪಿ ವಿದೇಹಾನ್ಮುಕ್ತ ಏವ ಸಃ ॥ ೪೭॥
• ಈಷಣ್ಮಾತ್ರಸ್ಥಿತೋ ಯೋ ವೈ ಸದಾ ಸರ್ವವಿವರ್ಜಿತಃ ।
• ಬ್ರಹ್ಮಮಾತ್ರೇಣ ಯಸ್ತಿಷ್ಠೇತ್ ವಿದೇಹಾನ್ಮುಕ್ತ ಏವ ಸಃ ॥ ೪೮॥
• ಪರಂ ಬ್ರಹ್ಮ ಪರಾನನ್ದಃ ಪರಮಾತ್ಮಾ ಪರಾತ್ಪರಃ ।
• ಪರೈರದೃಷ್ಟಬಾಹ್ಯಾನ್ತೋ ವಿದೇಹಾನ್ಮುಕ್ತ ಏವ ಸಃ ॥ ೪೯॥
• ಶುದ್ಧವೇದಾನ್ತಸಾರೋಽಯಂ ಶುದ್ಧಸತ್ತ್ವಾತ್ಮನಿ ಸ್ಥಿತಃ ।
• ತದ್ಭೇದಮಪಿ ಯಸ್ತ್ಯಕ್ತೋ ವಿದೇಹಾನ್ಮುಕ್ತ ಏವ ಸಃ ॥ ೫೦॥
• ಬ್ರಹ್ಮಾಮೃತರಸಾಸ್ವಾದೋ ಬ್ರಹ್ಮಾಮೃತರಸಾಯನಮ್ ।
• ಬ್ರಹ್ಮಾಮೃತರಸೇ ಮಗ್ನೋ ವಿದೇಹಾನ್ಮುಕ್ತ ಏವ ಸಃ ॥ ೫೧॥
• ಬ್ರಹ್ಮಾಮೃತರಸಾಧಾರೋ ಬ್ರಹ್ಮಾಮೃತರಸಃ ಸ್ವಯಮ್ ।
• ಬ್ರಹ್ಮಾಮೃತರಸೇ ತೃಪ್ತೋ ವಿದೇಹಾನ್ಮುಕ್ತ ಏವ ಸಃ ॥ ೫೨॥
• ಬ್ರಹ್ಮಾನನ್ದಪರಾನನ್ದೋ ಬ್ರಹ್ಮಾನನ್ದರಸಪ್ರಭಃ ।
• ಬ್ರಹ್ಮಾನನ್ದಪರಂಜ್ಯೋತಿರ್ವಿದೇಹಾನ್ಮುಕ್ತ ಏವ ಸಃ ॥ ೫೩॥
• ಬ್ರಹ್ಮಾನನ್ದರಸಾನನ್ದೋ ಬ್ರಹ್ಮಾಮೃತನಿರನ್ತರಮ್ ।
• ಬ್ರಹ್ಮಾನನ್ದಃ ಸದಾನನ್ದೋ ವಿದೇಹಾನ್ಮುಕ್ತ ಏವ ಸಃ ॥ ೫೪॥
• ಬ್ರಹ್ಮಾನನ್ದಾನುಭಾವೋ ಯೋ ಬ್ರಹ್ಮಾಮೃತಶಿವಾರ್ಚನಮ್ ।
• ಬ್ರಹ್ಮಾನನ್ದರಸಪ್ರೀತೋ ವಿದೇಹಾನ್ಮುಕ್ತ ಏವ ಸಃ ॥ ೫೫॥
• ಬ್ರಹ್ಮಾನನ್ದರಸೋದ್ವಾಹೋ ಬ್ರಹ್ಮಾಮೃತಕುಟುಮ್ಬಕಃ ।
• ಬ್ರಹ್ಮಾನನ್ದಜನೈರ್ಯುಕ್ತೋ ವಿದೇಹಾನ್ಮುಕ್ತ ಏವ ಸಃ ॥ ೫೬॥
• ಬ್ರಹ್ಮಾಮೃತವರೇ ವಾಸೋ ಬ್ರಹ್ಮಾನನ್ದಾಲಯೇ ಸ್ಥಿತಃ ।
• ಬ್ರಹ್ಮಾಮೃತಜಪೋ ಯಸ್ಯ ವಿದೇಹಾನ್ಮುಕ್ತ ಏವ ಸಃ ॥ ೫೭॥
• ಬ್ರಹ್ಮಾನನ್ದಶರೀರಾನ್ತೋ ಬ್ರಹ್ಮಾನನ್ದೇನ್ದ್ರಿಯಃ ಕ್ವಚಿತ್ ।
• ಬ್ರಹ್ಮಾಮೃತಮಯೀ ವಿದ್ಯಾ ವಿದೇಹಾನ್ಮುಕ್ತ ಏವ ಸಃ ॥ ೫೮॥
• ಬ್ರಹ್ಮಾನದಮದೋನ್ಮತ್ತೋ ಬ್ರಹ್ಮಾಮೃತರಸಂಭರಃ ।
• ಬ್ರಹ್ಮಾತ್ಮನಿ ಸದಾ ಸ್ವಸ್ಥೋ ವಿದೇಹಾನ್ಮುಕ್ತ ಏವ ಸಃ ॥ ೫೯॥
• ದೇಹಮುಕ್ತಿಪ್ರಕರಣಂ ಸರ್ವವೇದೇಷು ದುರ್ಲಭಮ್ ।
• ಮಯೋಕ್ತಂ ತೇ ಮಹಾಯೋಗಿನ್ ವಿದೇಹಃ ಶ್ರವಣಾದ್ಭವೇತ್ ॥ ೬೦॥

ಸ್ಕನ್ದಃ -

• ಅನಾಥ ನಾಥ ತೇ ಪದಂ ಭಜಾಮ್ಯುಮಾಸನಾಥ ಸ-
• ನ್ನಿಶೀಥನಾಥಮೌಲಿಸಂಸ್ಫುಟಲ್ಲಲಾಟಸಙ್ಗಜ-
• ಸ್ಫುಲಿಙ್ಗದಗ್ಧಮನ್ಮಥಂ ಪ್ರಮಾಥನಾಥ ಪಾಹಿ ಮಾಮ್ ॥ ೬೧॥
• ವಿಭೂತಿಭೂಷಗಾತ್ರ ತೇ ತ್ರಿನೇತ್ರಮಿತ್ರತಾಮಿಯಾತ್
• ಮನಃಸರೋರುಹಂ ಕ್ಷಣಂ ತಥೇಕ್ಷಣೇನ ಮೇ ಸದಾ ।
• ಪ್ರಬನ್ಧಸಂಸೃತಿಭ್ರಮದ್ಭ್ರಮಜ್ಜನೌಘಸನ್ತತೌ
• ನ ವೇದ ವೇದಮೌಲಿರಪ್ಯಪಾಸ್ತದುಃಖಸನ್ತತಿಮ್ ॥ ೬೨॥

• ॥ಇತಿ ಶ್ರೀಶಿವರಹಸ್ಯೇ ಶಙ್ಕರಾಖ್ಯೇ ಷಷ್ಠಾಂಶೇ ಋಭುನಿದಾಘಸಂವಾದೇ ದೇಹಮುಕ್ತಿಪ್ರಕರಣವರ್ಣನಂ ನಾಮ ದ್ವಾದಶೋಽಧ್ಯಾಯಃ ॥

Special Thanks

The Sanskrit works, published by Sri Ramanasramam, have been approved to be posted on sanskritdocuments.org by permission of Sri V.S. Ramanan, President, Sri Ramanasramam.

Credits

Encoded by Anil Sharma anilandvijaya at gmail.com
Proofread by Sunder Hattangadi and Anil Sharma

Complete text of the Ribhugita with options to [Change script] (right top) is available here in Gita collection https://sanskritdocuments.org/doc_giitaa/RGall.html