ಋಭುಗೀತಾ ೬ ॥ ಪ್ರಪಞ್ಚಸ್ಯ ಸಚ್ಚಿನ್ಮಯತ್ವ ಕಥನಮ್ ॥

ಈಶ್ವರಃ -

• ವ್ರತಾನಿ ಮಿಥ್ಯಾ ಭುವನಾನಿ ಮಿಥ್ಯಾ
• ಭಾವಾದಿ ಮಿಥ್ಯಾ ಭವನಾನಿ ಮಿಥ್ಯಾ ।
• ಭಯಂ ಚ ಮಿಥ್ಯಾ ಭರಣಾದಿ ಮಿಥ್ಯಾ
• ಭುಕ್ತಂ ಚ ಮಿಥ್ಯಾ ಬಹುಬನ್ಧಮಿಥ್ಯಾ ॥ ೧॥
• ವೇದಾಶ್ಚ ಮಿಥ್ಯಾ ವಚನಾನಿ ಮಿಥ್ಯಾ
• ವಾಕ್ಯಾನಿ ಮಿಥ್ಯಾ ವಿವಿಧಾನಿ ಮಿಥ್ಯಾ ।
• ವಿತ್ತಾನಿ ಮಿಥ್ಯಾ ವಿಯದಾದಿ ಮಿಥ್ಯಾ
• ವಿಧುಶ್ಚ ಮಿಥ್ಯಾ ವಿಷಯಾದಿ ಮಿಥ್ಯಾ ॥ ೨॥
• ಗುರುಶ್ಚ ಮಿಥ್ಯಾ ಗುಣದೋಷಮಿಥ್ಯಾ
• ಗುಹ್ಯಂ ಚ ಮಿಥ್ಯಾ ಗಣನಾ ಚ ಮಿಥ್ಯಾ ।
• ಗತಿಶ್ಚ ಮಿಥ್ಯಾ ಗಮನಂ ಚ ಮಿಥ್ಯಾ
• ಸರ್ವಂ ಚ ಮಿಥ್ಯಾ ಗದಿತಂ ಚ ಮಿಥ್ಯಾ ॥ ೩॥
• ವೇದಶಾಸ್ತ್ರಪುರಾಣಂ ಚ ಕಾರ್ಯಂ ಕಾರಣಮೀಶ್ವರಃ ।
• ಲೋಕೋ ಭೂತಂ ಜನಂ ಚೈವ ಸರ್ವಂ ಮಿಥ್ಯಾ ನ ಸಂಶಯಃ ॥ ೪॥
• ಬನ್ಧೋ ಮೋಕ್ಷಃ ಸುಖಂ ದುಃಖಂ ಧ್ಯಾನಂ ಚಿತ್ತಂ ಸುರಾಸುರಾಃ ।
• ಗೌಣಂ ಮುಖ್ಯಂ ಪರಂ ಚಾನ್ಯತ್ ಸರ್ವಂ ಮಿಥ್ಯಾ ನ ಸಂಶಯಃ ॥ ೫॥
• ವಾಚಾ ವದತಿ ಯತ್ಕಿಞ್ಚಿತ್ ಸರ್ವಂ ಮಿಥ್ಯಾ ನ ಸಂಶಯಃ ।
• ಸಙ್ಕಲ್ಪಾತ್ ಕಲ್ಪ್ಯತೇ ಯದ್ಯತ್ ಮನಸಾ ಚಿನ್ತ್ಯತೇ ಚ ಯತ್ ॥ ೬॥
• ಬುದ್ಧ್ಯಾ ನಿಶ್ಚೀಯತೇ ಕಿಞ್ಚಿತ್ ಚಿತ್ತೇನ ನೀಯತೇ ಕ್ವಚಿತ್ ।
• ಪ್ರಪಞ್ಚೇ ಪಞ್ಚತೇ ಯದ್ಯತ್ ಸರ್ವಂ ಮಿಥ್ಯೇತಿ ನಿಶ್ಚಯಃ ॥ ೭॥
• ಶ್ರೋತ್ರೇಣ ಶ್ರೂಯತೇ ಯದ್ಯನ್ನೇತ್ರೇಣ ಚ ನಿರೀಕ್ಷ್ಯತೇ ।
• ನೇತ್ರಂ ಶ್ರೋತ್ರಂ ಗಾತ್ರಮೇವ ಸರ್ವಂ ಮಿಥ್ಯಾ ನ ಸಂಶಯಃ ॥ ೮॥
• ಇದಮಿತ್ಯೇವ ನಿರ್ದಿಷ್ಟಮಿದಮಿತ್ಯೇವ ಕಲ್ಪಿತಮ್ ।
• ಯದ್ಯದ್ವಸ್ತು ಪರಿಜ್ಞಾತಂ ಸರ್ವಂ ಮಿಥ್ಯಾ ನ ಸಂಶಯಃ ॥ ೯॥
• ಕೋಽಹಂ ಕಿನ್ತದಿದಂ ಸೋಽಹಂ ಅನ್ಯೋ ವಾಚಯತೇ ನಹಿ ।
• ಯದ್ಯತ್ ಸಂಭಾವ್ಯತೇ ಲೋಕೇ ಸರ್ವಂ ಮಿಥ್ಯೇತಿ ನಿಶ್ಚಯಃ ॥ ೧೦॥
• ಸರ್ವಾಭ್ಯಾಸ್ಯಂ ಸರ್ವಗೋಪ್ಯಂ ಸರ್ವಕಾರಣವಿಭ್ರಮಃ ।
• ಸರ್ವಭೂತೇತಿ ವಾರ್ತಾ ಚ ಮಿಥ್ಯೇತಿ ಚ ವಿನಿಶ್ಚಯಃ ॥ ೧೧॥
• ಸರ್ವಭೇದಪ್ರಭೇದೋ ವಾ ಸರ್ವಸಂಕಲ್ಪವಿಭ್ರಮಃ ।
• ಸರ್ವದೋಷಪ್ರಭೇದಶ್ಚ ಸರ್ವಂ ಮಿಥ್ಯಾ ನ ಸಂಶಯಃ ॥ ೧೨॥
• ರಕ್ಷಕೋ ವಿಷ್ಣುರಿತ್ಯಾದಿ ಬ್ರಹ್ಮಸೃಷ್ಟೇಸ್ತು ಕಾರಣಮ್ ।
• ಸಂಹಾರೇ ಶಿವ ಇತ್ಯೇವಂ ಸರ್ವಂ ಮಿಥ್ಯಾ ನ ಸಂಶಯಃ ॥ ೧೩॥
• ಸ್ನಾನಂ ಜಪಸ್ತಪೋ ಹೋಮಃ ಸ್ವಾಧ್ಯಾಯೋ ದೇವಪೂಜನಮ್ ।
• ಮನ್ತ್ರೋ ಗೋತ್ರಂ ಚ ಸತ್ಸಙ್ಗಃ ಸರ್ವಂ ಮಿಥ್ಯಾ ನ ಸಂಶಯಃ ॥ ೧೪॥
• ಸರ್ವಂ ಮಿಥ್ಯಾ ಜಗನ್ಮಿಥ್ಯಾ ಭೂತಂ ಭವ್ಯಂ ಭವತ್ತಥಾ ।
• ನಾಸ್ತಿ ನಾಸ್ತಿ ವಿಭಾವೇನ ಸರ್ವಂ ಮಿಥ್ಯಾ ನ ಸಂಶಯಃ ॥ ೧೫॥
• ಚಿತ್ತಭೇದೋ ಜಗದ್ಭೇದಃ ಅವಿದ್ಯಾಯಾಶ್ಚ ಸಂಭವಃ ।
• ಅನೇಕಕೋಟಿಬ್ರಹ್ಮಾಣ್ಡಾಃ ಸರ್ವಂ ಬ್ರಹ್ಮೇತಿ ನಿಶ್ಚಿನು ॥ ೧೬॥
• ಲೋಕತ್ರಯೇಷು ಸದ್ಭಾವೋ ಗುಣದೋಷಾದಿಜೃಂಭಣಮ್ ।
• ಸರ್ವದೇಶಿಕವಾರ್ತೋಕ್ತಿಃ ಸರ್ವಂ ಬ್ರಹ್ಮೇತಿ ನಿಶ್ಚಿನು ॥ ೧೭॥
• ಉತ್ಕೃಷ್ಟಂ ಚ ನಿಕೃಷ್ಟಂ ಚ ಉತ್ತಮಂ ಮಧ್ಯಮಂ ಚ ತತ್ ।
• ಓಂಕಾರಂ ಚಾಪ್ಯಕಾರಂ ಚ ಸರ್ವಂ ಬ್ರಹ್ಮೇತಿ ನಿಶ್ಚಿನು ॥ ೧೮॥
• ಯದ್ಯಜ್ಜಗತಿ ದೃಶ್ಯೇತ ಯದ್ಯಜ್ಜಗತಿ ವೀಕ್ಷ್ಯತೇ ।
• ಯದ್ಯಜ್ಜಗತಿ ವರ್ತೇತ ಸರ್ವಂ ಬ್ರಹ್ಮೇತಿ ನಿಶ್ಚಿನು ॥ ೧೯॥
• ಯೇನ ಕೇನಾಕ್ಷರೇಣೋಕ್ತಂ ಯೇನ ಕೇನಾಪಿ ಸಙ್ಗತಮ್ ।
• ಯೇನ ಕೇನಾಪಿ ನೀತಂ ತತ್ ಸರ್ವಂ ಬ್ರಹ್ಮೇತಿ ನಿಶ್ಚಿನು ॥ ೨೦॥
• ಯೇನ ಕೇನಾಪಿ ಗದಿತಂ ಯೇನ ಕೇನಾಪಿ ಮೋದಿತಮ್ ।
• ಯೇನ ಕೇನಾಪಿ ಚ ಪ್ರೋಕ್ತಂ ಸರ್ವಂ ಬ್ರಹ್ಮೇತಿ ನಿಶ್ಚಿನು ॥ ೨೧॥
• ಯೇನ ಕೇನಾಪಿ ಯದ್ದತ್ತಂ ಯೇನ ಕೇನಾಪಿ ಯತ್ ಕೃತಮ್ ।
• ಯತ್ರ ಕುತ್ರ ಜಲಸ್ನಾನಂ ಸರ್ವಂ ಬ್ರಹ್ಮೇತಿ ನಿಶ್ಚಿನು ॥ ೨೨॥
• ಯತ್ರ ಯತ್ರ ಶುಭಂ ಕರ್ಮ ಯತ್ರ ಯತ್ರ ಚ ದುಷ್ಕೃತಮ್ ।
• ಯದ್ಯತ್ ಕರೋಷಿ ಸತ್ಯೇನ ಸರ್ವಂ ಮಿಥ್ಯೇತಿ ನಿಶ್ಚಿನು ॥ ೨೩॥
• ಇದಂ ಸರ್ವಮಹಂ ಸರ್ವಂ ಸರ್ವಂ ಬ್ರಹ್ಮೇತಿ ನಿಶ್ಚಿನು ।
• ಯತ್ ಕಿಞ್ಚಿತ್ ಪ್ರತಿಭಾತಂ ಚ ಸರ್ವಂ ಮಿಥ್ಯೇತಿ ನಿಶ್ಚಿನು ॥ ೨೪॥

ಋಭುಃ -

• ಪುನರ್ವಕ್ಷ್ಯೇ ರಹಸ್ಯಾನಾಂ ರಹಸ್ಯಂ ಪರಮಾದ್ಭುತಮ್ ।
• ಶಙ್ಕರೇಣ ಕುಮಾರಾಯ ಪ್ರೋಕ್ತಂ ಕೈಲಾಸ ಪರ್ವತೇ ॥ ೨೫॥
• ತನ್ಮಾತ್ರಂ ಸರ್ವಚಿನ್ಮಾತ್ರಮಖಣ್ಡೈಕರಸಂ ಸದಾ ।
• ಏಕವರ್ಜಿತಚಿನ್ಮಾತ್ರಂ ಸರ್ವಂ ಚಿನ್ಮಯಮೇವ ಹಿ ॥ ೨೬॥
• ಇದಂ ಚ ಸರ್ವಂ ಚಿನ್ಮಾತ್ರಂ ಸರ್ವಂ ಚಿನ್ಮಯಮೇವ ಹಿ ।
• ಆತ್ಮಾಭಾಸಂ ಚ ಚಿನ್ಮಾತ್ರಂ ಸರ್ವಂ ಚಿನ್ಮಯಮೇವ ಹಿ ॥ ೨೭॥
• ಸರ್ವಲೋಕಂ ಚ ಚಿನ್ಮಾತ್ರಂ ಸರ್ವಂ ಚಿನ್ಮಯಮೇವ ಹಿ ।
• ತ್ವತ್ತಾ ಮತ್ತಾ ಚ ಚಿನ್ಮಾತ್ರಂ ಚಿನ್ಮಾತ್ರಾನ್ನಾಸ್ತಿ ಕಿಞ್ಚನ ॥ ೨೮॥
• ಆಕಾಶೋ ಭೂರ್ಜಲಂ ವಾಯುರಗ್ನಿರ್ಬ್ರಹ್ಮಾ ಹರಿಃ ಶಿವಃ ।
• ಯತ್ಕಿಞ್ಚಿದನ್ಯತ್ ಕಿಞ್ಚಿಚ್ಚ ಸರ್ವಂ ಚಿನ್ಮಯಮೇವ ಹಿ ॥ ೨೯॥
• ಅಖಣ್ಡೈಕರಸಂ ಸರ್ವಂ ಯದ್ಯಚ್ಚಿನ್ಮಾತ್ರಮೇವ ಹಿ ।
• ಭೂತಂ ಭವ್ಯಂ ಚ ಚಿನ್ಮಾತ್ರಂ ಸರ್ವಂ ಚಿನ್ಮಯಮೇವ ಹಿ ॥ ೩೦॥
• ದ್ರವ್ಯಂ ಕಾಲಶ್ಚ ಚಿನ್ಮಾತ್ರಂ ಜ್ಞಾನಂ ಚಿನ್ಮಯಮೇವ ಚ ।
• ಜ್ಞೇಯಂ ಜ್ಞಾನಂ ಚ ಚಿನ್ಮಾತ್ರಂ ಸರ್ವಂ ಚಿನ್ಮಯಮೇವ ಹಿ ॥ ೩೧॥
• ಸಂಭಾಷಣಂ ಚ ಚಿನ್ಮಾತ್ರಂ ವಾಕ್ ಚ ಚಿನ್ಮಾತ್ರಮೇವ ಹಿ ।
• ಅಸಚ್ಚ ಸಚ್ಚ ಚಿನ್ಮಾತ್ರಂ ಸರ್ವಂ ಚಿನ್ಮಯಮೇವ ಹಿ ॥ ೩೨॥
• ಆದಿರನ್ತಂ ಚ ಚಿನ್ಮಾತ್ರಂ ಅಸ್ತಿ ಚೇಚ್ಚಿನ್ಮಯಂ ಸದಾ ।
• ಬ್ರಹ್ಮಾ ಯದ್ಯಪಿ ಚಿನ್ಮಾತ್ರಂ ವಿಷ್ಣುಶ್ಚಿನ್ಮಾತ್ರಮೇವ ಹಿ ॥ ೩೩॥
• ರುದ್ರೋಽಪಿ ದೇವಾಶ್ಚಿನ್ಮಾತ್ರಂ ಅಸ್ತಿ ನರತಿರ್ಯಕ್ಸುರಾಸುರಮ್ ।
• ಗುರುಶಿಷ್ಯಾದಿ ಸನ್ಮಾತ್ರಂ ಜ್ಞಾನಂ ಚಿನ್ಮಾತ್ರಮೇವ ಹಿ ॥ ೩೪॥
• ದೃಗ್ದೃಶ್ಯಂ ಚಾಪಿ ಚಿನ್ಮಾತ್ರಂ ಜ್ಞಾತಾ ಜ್ಞೇಯಂ ಧ್ರುವಾಧ್ರುವಮ್ ।
• ಸರ್ವಾಶ್ಚರ್ಯಂ ಚ ಚಿನ್ಮಾತ್ರಂ ದೇಹಂ ಚಿನ್ಮಾತ್ರಮೇವ ಹಿ ॥ ೩೫॥
• ಲಿಙ್ಗಂ ಚಾಪಿ ಚ ಚಿನ್ಮಾತ್ರಂ ಕಾರಣಂ ಕಾರ್ಯಮೇವ ಚ ।
• ಮೂರ್ತಾಮೂರ್ತಂ ಚ ಚಿನ್ಮಾತ್ರಂ ಪಾಪಪುಣ್ಯಮಥಾಪಿ ಚ ॥ ೩೬॥
• ದ್ವೈತಾದ್ವೈತಂ ಚ ಚಿನ್ಮಾತ್ರಂ ವೇದವೇದಾನ್ತಮೇವ ಚ ।
• ದಿಶೋಽಪಿ ವಿದಿಶಶ್ಚೈವ ಚಿನ್ಮಾತ್ರಂ ತಸ್ಯ ಪಾಲಕಾಃ ॥ ೩೭॥
• ಚಿನ್ಮಾತ್ರಂ ವ್ಯವಹಾರಾದಿ ಭೂತಂ ಭವ್ಯಂ ಭವತ್ತಥಾ ।
• ಚಿನ್ಮಾತ್ರಂ ನಾಮರೂಪಂ ಚ ಭೂತಾನಿ ಭುವನಾನಿ ಚ ॥ ೩೮॥
• ಚಿನ್ಮಾತ್ರಂ ಪ್ರಾಣ ಏವೇಹ ಚಿನ್ಮಾತ್ರಂ ಸರ್ವಮಿನ್ದ್ರಿಯಮ್ ।
• ಚಿನ್ಮಾತ್ರಂ ಪಞ್ಚಕೋಶಾದಿ ಚಿನ್ಮಾತ್ರಾನನ್ದಮುಚ್ಯತೇ ॥ ೩೯॥
• ನಿತ್ಯಾನಿತ್ಯಂ ಚ ಚಿನ್ಮಾತ್ರಂ ಸರ್ವಂ ಚಿನ್ಮಾತ್ರಮೇವ ಹಿ ।
• ಚಿನ್ಮಾತ್ರಂ ನಾಸ್ತಿ ನಿತ್ಯಂ ಚ ಚಿನ್ಮಾತ್ರಂ ನಾಸ್ತಿ ಸತ್ಯಕಮ್ ॥ ೪೦॥
• ಚಿನ್ಮಾತ್ರಮಪಿ ವೈರಾಗ್ಯಂ ಚಿನ್ಮಾತ್ರಕಮಿದಂ ಕಿಲ ।
• ಆಧಾರಾದಿ ಹಿ ಚಿನ್ಮಾತ್ರಂ ಆಧೇಯಂ ಚ ಮುನೀಶ್ವರ ॥ ೪೧॥
• ಯಚ್ಚ ಯಾವಚ್ಚ ಚಿನ್ಮಾತ್ರಂ ಯಚ್ಚ ಯಾವಚ್ಚ ದೃಶ್ಯತೇ ।
• ಯಚ್ಚ ಯಾವಚ್ಚ ದೂರಸ್ಥಂ ಸರ್ವಂ ಚಿನ್ಮಾತ್ರಮೇವ ಹಿ ॥ ೪೨॥
• ಯಚ್ಚ ಯಾವಚ್ಚ ಭೂತಾನಿ ಯಚ್ಚ ಯಾವಚ್ಚ ವಕ್ಷ್ಯತೇ ।
• ಯಚ್ಚ ಯಾವಚ್ಚ ವೇದೋಕ್ತಂ ಸರ್ವಂ ಚಿನ್ಮಾತ್ರಮೇವ ಹಿ ॥ ೪೩॥
• ಚಿನ್ಮಾತ್ರಂ ನಾಸ್ತಿ ಬನ್ಧಂ ಚ ಚಿನ್ಮಾತ್ರಂ ನಾಸ್ತಿ ಮೋಕ್ಷಕಮ್ ।
• ಚಿನ್ಮಾತ್ರಮೇವ ಸನ್ಮಾತ್ರಂ ಸತ್ಯಂ ಸತ್ಯಂ ಶಿವಂ ಸ್ಪೃಶೇ ॥ ೪೪॥
• ಸರ್ವಂ ವೇದತ್ರಯಪ್ರೋಕ್ತಂ ಸರ್ವಂ ಚಿನ್ಮಾತ್ರಮೇವ ಹಿ ।
• ಶಿವಪ್ರೋಕ್ತಂ ಕುಮಾರಾಯ ತದೇತತ್ ಕಥಿತಂ ತ್ವಯಿ ।
• ಯಃ ಶೃಣೋತಿ ಸಕೃದ್ವಾಪಿ ಬ್ರಹ್ಮೈವ ಭವತಿ ಸ್ವಯಮ್ ॥ ೪೫॥

ಸೂತಃ -

• ಈಶಾವಾಸ್ಯಾದಿಮನ್ತ್ರೈರ್ವರಗಗನತನೋಃ ಕ್ಷೇತ್ರವಾಸಾರ್ಥವಾದೈಃ
• ತಲ್ಲಿಙ್ಗಾಗಾರಮಧ್ಯಸ್ಥಿತಸುಮಹದೀಶಾನ ಲಿಙ್ಗೇಷು ಪೂಜಾ ।
• ಅಕ್ಲೇದ್ಯೇ ಚಾಭಿಷೇಕೋ ... ... ... ದಿಗ್ವಾಸಸೇ ವಾಸದಾನಂ
• ನೋ ಗನ್ಧಘ್ರಾಣಹೀನೇ ರೂಪದೃಶ್ಯಾದ್ವಿಹೀನೇ ಗನ್ಧಪುಷ್ಪಾರ್ಪಣಾನಿ ॥ ೪೬॥
• ಸ್ವಭಾಸೇ ದೀಪದಾನಂ ... ಸರ್ವಭಕ್ಷೇ ಮಹೇಶೇ
• ನೈವೇದ್ಯಂ ನಿತ್ಯತೃಪ್ತೇ ಸಕಲಭುವನಗೇ ಪ್ರಕ್ರಮೋ ವಾ ನಮಸ್ಯಾ ।
• ಕುರ್ಯಾಂ ಕೇನಾಪಿ ಭಾವೈರ್ಮಮ ನಿಗಮಶಿರೋಭಾವ ಏವ ಪ್ರಮಾಣಮ್ ॥ ೪೭॥
• ಅವಿಚ್ಛಿನ್ನೈಶ್ಛಿನ್ನೈಃ ಪರಿಕರವರೈಃ ಪೂಜನಧಿಯಾ
• ಭಜನ್ತ್ಯಜ್ಞಾಸ್ತದ್ಜ್ಞಾಃ ವಿಧಿವಿಹಿತಬುದ್ಧ್ಯಾಗತಧಿಯಃ ।var was ತದಜ್ಞಾಃ
• ತಥಾಪೀಶಂ ಭಾವೈರ್ಭಜತಿ ಭಜತಾಮಾತ್ಮಪದವೀಂ
• ದದಾತೀಶೋ ವಿಶ್ವಂ ಭ್ರಮಯತಿ ಗತಜ್ಞಾಂಶ್ಚ ಕುರುತೇ ॥ ೪೮॥

• ॥ ಇತಿ ಶ್ರೀಶಿವರಹಸ್ಯೇ ಶಙ್ಕರಾಖ್ಯೇ ಷಷ್ಠಾಂಶೇ ಋಭುನಿದಾಘಸಂವಾದೇ ಪ್ರಪಞ್ಚಸ್ಯ ಸಚ್ಚಿನ್ಮಯತ್ವಕಥನಂ ನಾಮ ಷಷ್ಠೋಽಧ್ಯಾಯಃ ॥

Special Thanks

The Sanskrit works, published by Sri Ramanasramam, have been approved to be posted on sanskritdocuments.org by permission of Sri V.S. Ramanan, President, Sri Ramanasramam.

Credits

Encoded by Anil Sharma anilandvijaya at gmail.com
Proofread by Sunder Hattangadi and Anil Sharma

https://sanskritdocuments.org

Send corrections to sanskrit at cheerful.com