Ribhu Gita - Siva Rahasya Purana Amsha 6

ಋಭುಗೀತಾ ೧೦ ॥ ಬ್ರಹ್ಮ-ತರ್ಪಣ ಆತ್ಮ-ಹೋಮಾಖ್ಯ-ಪ್ರಕರಣ-ದ್ವಯ-ವರ್ಣನಮ್ ॥

ಋಭುಃ -

ನಿತ್ಯತರ್ಪಣಮಾಚಕ್ಷ್ಯೇ ನಿದಾಘ ಶೃಣು ಮೇ ವಚಃ ।
ವೇದಶಾಸ್ತ್ರೇಷು ಸರ್ವೇಷು ಅತ್ಯನ್ತಂ ದುರ್ಲಭಂ ನೃಣಾಮ್ ॥ ೧॥
ಸದಾ ಪ್ರಪಞ್ಚಂ ನಾಸ್ತ್ಯೇವ ಇದಮಿತ್ಯಪಿ ನಾಸ್ತಿ ಹಿ ।
ಬ್ರಹ್ಮಮಾತ್ರಂ ಸದಾಪೂರ್ಣಂ ಇತ್ಯೇವಂ ಬ್ರಹ್ಮತರ್ಪಣಮ್ ॥ ೨॥
ಸರೂಪಮಾತ್ರಂ ಬ್ರಹ್ಮೈವ ಸಚ್ಚಿದಾನನ್ದಮಪ್ಯಹಮ್ ।
ಆನನ್ದಘನ ಏವಾಹಂ ಇತ್ಯೇವಂ ಬ್ರಹ್ಮತರ್ಪಣಮ್ ॥ ೩॥
ಸರ್ವದಾ ಸರ್ವಶೂನ್ಯೋಽಹಂ ಸದಾತ್ಮಾನನ್ದವಾನಹಮ್ ।
ನಿತ್ಯಾನಿತ್ಯಸ್ವರೂಪೋಽಹಂ ಇತ್ಯೇವಂ ಬ್ರಹ್ಮತರ್ಪಣಮ್ ॥ ೪॥
ಅಹಮೇವ ಚಿದಾಕಾಶ ಆತ್ಮಾಕಾಶೋಽಸ್ಮಿ ನಿತ್ಯದಾ ।
ಆತ್ಮನಾಽಽತ್ಮನಿ ತೃಪ್ತೋಽಹಂ ಇತ್ಯೇವಂ ಬ್ರಹ್ಮತರ್ಪಣಮ್ ॥ ೫॥
ಏಕತ್ವಸಂಖ್ಯಾಹೀನೋಽಸ್ಮಿ ಅರೂಪೋಽಸ್ಮ್ಯಹಮದ್ವಯಃ ।
ನಿತ್ಯಶುದ್ಧಸ್ವರೂಪೋಽಹಂ ಇತ್ಯೇವಂ ಬ್ರಹ್ಮತರ್ಪಣಮ್ ॥ ೬॥
ಆಕಾಶಾದಪಿ ಸೂಕ್ಷ್ಮೋಽಹಂ ಅತ್ಯನ್ತಾಭಾವಕೋಽಸ್ಮ್ಯಹಮ್ ।
ಸರ್ವಪ್ರಕಾಶರೂಪೋಽಹಂ ಇತ್ಯೇವಂ ಬ್ರಹ್ಮತರ್ಪಣಮ್ ॥ ೭॥
ಪರಬ್ರಹ್ಮಸ್ವರೂಪೋಽಹಂ ಪರಾವರಸುಖೋಽಸ್ಮ್ಯಹಮ್ ।
ಸತ್ರಾಮಾತ್ರಸ್ವರೂಪೋಽಹಂ ದೃಗ್ದೃಶ್ಯಾದಿವಿವರ್ಜಿತಃ ॥ ೮॥
ಯತ್ ಕಿಞ್ಚಿದಪ್ಯಹಂ ನಾಸ್ತಿ ತೂಷ್ಣೀಂ ತೂಷ್ಣೀಮಿಹಾಸ್ಮ್ಯಹಮ್ ।
ಶುದ್ಧಮೋಕ್ಷಸ್ವರೂಪೋಽಹಮ್ ಇತ್ಯೇವಂ ಬ್ರಹ್ಮತರ್ಪಣಮ್ ॥ ೯॥
ಸರ್ವಾನನ್ದಸ್ವರೂಪೋಽಹಂ ಜ್ಞಾನಾನನ್ದಮಹಂ ಸದಾ ।
ವಿಜ್ಞಾನಮಾತ್ರರೂಪೋಽಹಮ್ ಇತ್ಯೇವಂ ಬ್ರಹ್ಮತರ್ಪಣಮ್ ॥ ೧೦॥
ಬ್ರಹ್ಮಮಾತ್ರಮಿದಂ ಸರ್ವಂ ನಾಸ್ತಿ ನಾನ್ಯತ್ರ ತೇ ಶಪೇ ।
ತದೇವಾಹಂ ನ ಸನ್ದೇಹಃ ಇತ್ಯೇವಂ ಬ್ರಹ್ಮತರ್ಪಣಮ್ ॥ ೧೧॥
ತ್ವಮಿತ್ಯೇತತ್ ತದಿತ್ಯೇತನ್ನಾಸ್ತಿ ನಾಸ್ತೀಹ ಕಿಞ್ಚನ ।
ಶುದ್ಧಚೈತನ್ಯಮಾತ್ರೋಽಹಂ ಇತ್ಯೇವಂ ಬ್ರಹ್ಮತರ್ಪಣಮ್ ॥ ೧೨॥
ಅತ್ಯನ್ತಾಭಾವರೂಪೋಽಹಮಹಮೇವ ಪರಾತ್ಪರಃ ।
ಅಹಮೇವ ಸುಖಂ ನಾನ್ಯತ್ ಇತ್ಯೇವಂ ಬ್ರಹ್ಮತರ್ಪಣಮ್ ॥ ೧೩॥
ಇದಂ ಹೇಮಮಯಂ ಕಿಞ್ಚಿನ್ನಾಸ್ತಿ ನಾಸ್ತ್ಯೇವ ತೇ ಶಪೇ ।
ನಿರ್ಗುಣಾನನ್ದರೂಪೋಽಹಂ ಇತ್ಯೇವಂ ಬ್ರಹ್ಮತರ್ಪಣಮ್ ॥ ೧೪॥
ಸಾಕ್ಷಿವಸ್ತುವಿಹೀನತ್ವಾತ್ ಸಾಕ್ಷಿತ್ವಂ ನಾಸ್ತಿ ಮೇ ಸದಾ ।
ಕೇವಲಂ ಬ್ರಹ್ಮಭಾವತ್ವಾತ್ ಇತ್ಯೇವಂ ಬ್ರಹ್ಮತರ್ಪಣಮ್ ॥ ೧೫॥
ಅಹಮೇವಾವಿಶೇಷೋಽಹಮಹಮೇವ ಹಿ ನಾಮಕಮ್ ।
ಅಹಮೇವ ವಿಮೋಹಂ ವೈ ಇತ್ಯೇವಂ ಬ್ರಹ್ಮತರ್ಪಣಮ್ ॥ ೧೬॥
ಇನ್ದ್ರಿಯಾಭಾವರೂಪೋಽಹಂ ಸರ್ವಾಭಾವಸ್ವರೂಪಕಮ್ ।
ಬನ್ಧಮುಕ್ತಿವಿಹೀನೋಽಸ್ಮಿ ಇತ್ಯೇವಂ ಬ್ರಹ್ಮತರ್ಪಣಮ್ ॥ ೧೭॥
ಸರ್ವಾನನ್ದಸ್ವರೂಪೋಽಹಂ ಸರ್ವಾನನ್ದಘನೋಽಸ್ಮ್ಯಹಮ್ ।
ನಿತ್ಯಚೈತನ್ಯಮಾತ್ರೋಽಹಂ ಇತ್ಯೇವಂ ಬ್ರಹ್ಮತರ್ಪಣಮ್ ॥ ೧೮॥
ವಾಚಾಮಗೋಚರಶ್ಚಾಹಂ ವಾಙ್ಮನೋ ನಾಸ್ತಿ ಕಿಞ್ಚನ ।
ಚಿದಾನನ್ದಮಯಶ್ಚಾಹಂ ಇತ್ಯೇವಂ ಬ್ರಹ್ಮತರ್ಪಣಮ್ ॥ ೧೯॥
ಸರ್ವತ್ರ ಪೂರ್ಣರೂಪೋಽಹಂ ಸರ್ವತ್ರ ಸುಖಮಸ್ಮ್ಯಹಮ್ ।
ಸರ್ವತ್ರಾಚಿನ್ತ್ಯರೂಪೋಽಹಮ್ ಇತ್ಯೇವಂ ಬ್ರಹ್ಮತರ್ಪಣಮ್ ॥ ೨೦॥
ಸರ್ವತ್ರ ತೃಪ್ತಿರೂಪೋಽಹಂ ಸರ್ವಾನನ್ದಮಯೋಽಸ್ಮ್ಯಹಮ್ ।
ಸರ್ವಶೂನ್ಯಸ್ವರೂಪೋಽಹಮ್ ಇತ್ಯೇವಂ ಬ್ರಹ್ಮತರ್ಪಣಮ್ ॥ ೨೧॥
ಸರ್ವದಾ ಮತ್ಸ್ವರೂಪೋಽಹಂ ಪರಮಾನನ್ದವಾನಹಮ್ ।
ಏಕ ಏವಾಹಮೇವಾಹಂ ಇತ್ಯೇವಂ ಬ್ರಹ್ಮತರ್ಪಣಮ್ ॥ ೨೨॥
ಮುಕ್ತೋಽಹಂ ಮೋಕ್ಷರೂಪೋಽಹಂ ಸರ್ವಮೌನಪರೋಽಸ್ಮ್ಯಹಮ್ ।
ಸರ್ವನಿರ್ವಾಣರೂಪೋಽಹಂ ಇತ್ಯೇವಂ ಬ್ರಹ್ಮತರ್ಪಣಮ್ ॥ ೨೩॥
ಸರ್ವದಾ ಸತ್ಸ್ವರೂಪೋಽಹಂ ಸರ್ವದಾ ತುರ್ಯವಾನಹಮ್ ।
ತುರ್ಯಾತೀತಸ್ವರೂಪೋಽಹಂ ಇತ್ಯೇವಂ ಬ್ರಹ್ಮತರ್ಪಣಮ್ ॥ ೨೪॥
ಸತ್ಯವಿಜ್ಞಾನಮಾತ್ರೋಽಹಂ ಸನ್ಮಾತ್ರಾನನ್ದವಾನಹಮ್ ।
ನಿರ್ವಿಕಲ್ಪಸ್ವರೂಪೋಽಹಮ್ ಇತ್ಯೇವಂ ಬ್ರಹ್ಮತರ್ಪಣಮ್ ॥ ೨೫॥
ಸರ್ವದಾ ಹ್ಯಜರೂಪೋಽಹಂ ನಿರೀಹೋಽಹಂ ನಿರಞ್ಜನಃ ।
ಬ್ರಹ್ಮವಿಜ್ಞಾನರೂಪೋಽಹಂ ಇತ್ಯೇವಂ ಬ್ರಹ್ಮತರ್ಪಣಮ್ ॥ ೨೬॥
ಬ್ರಹ್ಮತರ್ಪಣಮೇವೋಕ್ತಂ ಏತತ್ಪ್ರಕರಣಂ ಮಯಾ ।
ಯಃ ಶೃಣೋತಿ ಸಕೃದ್ವಾಪಿ ಬ್ರಹ್ಮೈವ ಭವತಿ ಸ್ವಯಮ್ ॥ ೨೭॥
ನಿತ್ಯಹೋಮಂ ಪ್ರವಕ್ಷ್ಯಾಮಿ ಸರ್ವವೇದೇಷು ದುರ್ಲಭಮ್ ।
ಸರ್ವಶಾಸ್ತ್ರಾರ್ಥಮದ್ವೈತಂ ಸಾವಧಾನಮನಾಃ ಶೃಣು ॥ ೨೮॥
ಅಹಂ ಬ್ರಹ್ಮಾಸ್ಮಿ ಶುದ್ಧೋಽಸ್ಮಿ ನಿತ್ಯೋಽಸ್ಮಿ ಪ್ರಭುರಸ್ಮ್ಯಹಮ್ ।
ಓಂಕಾರಾರ್ಥಸ್ವರೂಪೋಽಸ್ಮಿ ಏವಂ ಹೋಮಂ ಸುದುರ್ಲಭಮ್ ॥ ೨೯॥
ಪರಮಾತ್ಮಸ್ವರೂಪೋಽಸ್ಮಿ ಪರಾನನ್ದಪರೋಽಸ್ಮ್ಯಹಮ್ ।
ಚಿದಾನನ್ದಸ್ವರೂಪೋಽಸ್ಮಿ ಏವಂ ಹೋಮಂ ಸುದುರ್ಲಭಮ್ ॥ ೩೦॥
ನಿತ್ಯಾನನ್ದಸ್ವರೂಪೋಽಸ್ಮಿ ನಿಷ್ಕಲಙ್ಕಮಯೋ ಹ್ಯಹಮ್ ।
ಚಿದಾಕಾರಸ್ವರೂಪೋಽಹಂ ಏವಂ ಹೋಮಂ ಸುದುರ್ಲಭಮ್ ॥ ೩೧॥
ನ ಹಿ ಕಿಞ್ಚಿತ್ ಸ್ವರೂಪೋಽಸ್ಮಿ ನಾಹಮಸ್ಮಿ ನ ಸೋಽಸ್ಮ್ಯಹಮ್ ।
ನಿರ್ವ್ಯಾಪಾರಸ್ವರೂಪೋಽಸ್ಮಿ ಏವಂ ಹೋಮಂ ಸುದುರ್ಲಭಮ್ ॥ ೩೨॥
ನಿರಂಶೋಽಸ್ಮಿ ನಿರಾಭಾಸೋ ನ ಮನೋ ನೇನ್ದ್ರಿಯೋಽಸ್ಮ್ಯಹಮ್ ।
ನ ಬುದ್ಧಿರ್ನ ವಿಕಲ್ಪೋಽಹಂ ಏವಂ ಹೋಮಂ ಸುದುರ್ಲಭಮ್ ॥ ೩೩॥
ನ ದೇಹಾದಿಸ್ವಾರೂಪೋಽಸ್ಮಿ ತ್ರಯಾದಿಪರಿವರ್ಜಿತಃ ।
ನ ಜಾಗ್ರತ್ಸ್ವಪ್ನರೂಪೋಽಸ್ಮಿ ಏವಂ ಹೋಮಂ ಸುದುರ್ಲಭಮ್ ॥ ೩೪॥
ಶ್ರವಣಂ ಮನನಂ ನಾಸ್ತಿ ನಿದಿಧ್ಯಾಸನಮೇವ ಹಿ ।
ಸ್ವಗತಂ ಚ ನ ಮೇ ಕಿಞ್ಚಿದ್ ಏವಂ ಹೋಮಂ ಸುದುರ್ಲಭಮ್ ॥ ೩೫॥
ಅಸತ್ಯಂ ಹಿ ಮನಃಸತ್ತಾ ಅಸತ್ಯಂ ಬುದ್ಧಿರೂಪಕಮ್ ।
ಅಹಙ್ಕಾರಮಸದ್ವಿದ್ಧಿ ಕಾಲತ್ರಯಮಸತ್ ಸದಾ ॥ ೩೬॥
ಗುಣತ್ರಯಮಸದ್ವಿದ್ಧಿ ಏವಂ ಹೋಮಂ ಸುದುರ್ಲಭಮ್ ॥ ೩೭॥
ಶ್ರುತಂ ಸರ್ವಮಸದ್ವಿದ್ಧಿ ವೇದಂ ಸರ್ವಮಸತ್ ಸದಾ ।
ಸರ್ವತತ್ತ್ವಮಸದ್ವಿದ್ಧಿ ಏವಂ ಹೋಮಂ ಸುದುರ್ಲಭಮ್ ॥ ೩೮॥
ನಾನಾರೂಪಮಸದ್ವಿದ್ಧಿ ನಾನಾವರ್ಣಮಸತ್ ಸದಾ ।
ನಾನಾಜಾತಿಮಸದ್ವಿದ್ಧಿ ಏವಂ ಹೋಮಂ ಸುದುರ್ಲಭಮ್ ॥ ೩೯॥
ಶಾಸ್ತ್ರಜ್ಞಾನಮಸದ್ವಿದ್ಧಿ ವೇದಜ್ಞಾನಂ ತಪೋಽಪ್ಯಸತ್ ।
ಸರ್ವತೀರ್ಥಮಸದ್ವಿದ್ಧಿ ಏವಂ ಹೋಮಂ ಸುದುರ್ಲಭಮ್ ॥ ೪೦॥
ಗುರುಶಿಷ್ಯಮಸದ್ವಿದ್ಧಿ ಗುರೋರ್ಮನ್ತ್ರಮಸತ್ ತತಃ ।
ಯದ್ ದೃಶ್ಯಂ ತದಸದ್ವಿದ್ಧಿ ಏವಂ ಹೋಮಂ ಸುದುರ್ಲಭಮ್ ॥ ೪೧॥
ಸರ್ವಾನ್ ಭೋಗಾನಸದ್ವಿದ್ಧಿ ಯಚ್ಚಿನ್ತ್ಯಂ ತದಸತ್ ಸದಾ ।
ಯದ್ ದೃಶ್ಯಂ ತದಸದ್ವಿದ್ಧಿ ಏವಂ ಹೋಮಂ ಸುದುರ್ಲಭಮ್ ॥ ೪೨॥
ಸರ್ವೇನ್ದ್ರಿಯಮಸದ್ವಿದ್ಧಿ ಸರ್ವಮನ್ತ್ರಮಸತ್ ತ್ವಿತಿ ।
ಸರ್ವಪ್ರಾಣಾನಸದ್ವಿದ್ಧಿ ಏವಂ ಹೋಮಂ ಸುದುರ್ಲಭಮ್ ॥ ೪೩॥
ಜೀವಂ ದೇಹಮಸದ್ವಿದ್ಧಿ ಪರೇ ಬ್ರಹ್ಮಣಿ ನೈವ ಹಿ ।
ಮಯಿ ಸರ್ವಮಸದ್ವಿದ್ಧಿ ಏವಂ ಹೋಮಂ ಸುದುರ್ಲಭಮ್ ॥ ೪೪॥
ದೃಷ್ಟಂ ಶ್ರುತಮಸದ್ವಿದ್ಧಿ ಓತಂ ಪ್ರೋತಮಸನ್ಮಯಿ ।
ಕಾರ್ಯಾಕಾರ್ಯಮಸದ್ವಿದ್ಧಿ ಏವಂ ಹೋಮಂ ಸುದುರ್ಲಭಮ್ ॥ ೪೫॥
ದೃಷ್ಟಪ್ರಾಪ್ತಿಮಸದ್ವಿದ್ಧಿ ಸನ್ತೋಷಮಸದೇವ ಹಿ ।
ಸರ್ವಕರ್ಮಾಣ್ಯಸದ್ವಿದ್ಧಿ ಏವಂ ಹೋಮಂ ಸುದುರ್ಲಭಮ್ ॥ ೪೬॥
ಸರ್ವಾಸರ್ವಮಸದ್ವಿದ್ಧಿ ಪೂರ್ಣಾಪೂರ್ಣಮಸತ್ ಪರೇ ।
ಸುಖಂ ದುಃಖಮಸದ್ವಿದ್ಧಿ ಏವಂ ಹೋಮಂ ಸುದುರ್ಲಭಮ್ ॥ ೪೭॥
ಯಥಾಧರ್ಮಮಸದ್ವಿದ್ಧಿ ಪುಣ್ಯಾಪುಣ್ಯಮಸತ್ ಸದಾ ।
ಲಾಭಾಲಾಭಮಸದ್ವಿದ್ಧಿ ಸದಾ ದೇಹಮಸತ್ ಸದಾ ॥ ೪೮॥
ಸದಾ ಜಯಮಸದ್ವಿದ್ಧಿ ಸದಾ ಗರ್ವಮಸತ್ ಸದಾ ।
ಮನೋಮಯಮಸದ್ವಿದ್ಧಿ ಸಂಶಯಂ ನಿಶ್ಚಯಂ ತಥಾ ॥ ೪೯॥
ಶಬ್ದಂ ಸರ್ವಮಸದ್ವಿದ್ಧಿ ಸ್ಪರ್ಶಂ ಸರ್ವಮಸತ್ ಸದಾ ।
ರೂಪಂ ಸರ್ವಮಸದ್ವಿದ್ಧಿ ರಸಂ ಸರ್ವಮಸತ್ ಸದಾ ॥ ೫೦॥
ಗನ್ಧಂ ಸರ್ವಮಸದ್ವಿದ್ಧಿ ಜ್ಞಾನಂ ಸರ್ವಮಸತ್ ಸದಾ ।
ಭೂತಂ ಭವ್ಯಮಸದ್ವಿದ್ಧಿ ಅಸತ್ ಪ್ರಕೃತಿರುಚ್ಯತೇ ॥ ೫೧॥
ಅಸದೇವ ಸದಾ ಸರ್ವಮಸದೇವ ಭವೋದ್ಭವಮ್ ।
ಅಸದೇವ ಗುಣಂ ಸರ್ವಂ ಏವಂ ಹೋಮಂ ಸುದುರ್ಲಭಮ್ ॥ ೫೨॥
ಶಶಶೃಙ್ಗವದೇವ ತ್ವಂ ಶಶಶೃಙ್ಗವದಸ್ಮ್ಯಹಮ್ ।
ಶಶಶೃಙ್ಗವದೇವೇದಂ ಶಶಶೃಙ್ಗವದನ್ತರಮ್ ॥ ೫೩॥
ಇತ್ಯೇವಮಾತ್ಮಹೋಮಾಖ್ಯಮುಕ್ತಂ ಪ್ರಕರಣಂ ಮಯಾ ।
ಯಃ ಶೃಣೋತಿ ಸಕೃದ್ವಾಪಿ ಬ್ರಹ್ಮೈವ ಭವತಿ ಸ್ವಯಮ್ ॥ ೫೪॥

ಸ್ಕನ್ದಃ -

ಯಸ್ಮಿನ್ ಸಂಚ ವಿಚೈತಿ ವಿಶ್ವಮಖಿಲಂ ದ್ಯೋತನ್ತಿ ಸೂರ್ಯೇನ್ದವೋ
ವಿದ್ಯುದ್ವಹ್ನಿಮರುದ್ಗಣಾಃ ಸವರುಣಾ ಭೀತಾ ಭಜನ್ತೀಶ್ವರಮ್ ।
ಭೂತಂ ಚಾಪಿ ಭವತ್ಯದೃಶ್ಯಮಖಿಲಂ ಶಮ್ಭೋಃ ಸುಖಾಂಶಂ ಜಗತ್
ಜಾತಂ ಚಾಪಿ ಜನಿಷ್ಯತಿ ಪ್ರತಿಭವಂ ದೇವಾಸುರೈರ್ನಿರ್ಯಪಿ ।
ತನ್ನೇಹಾಸ್ತಿ ನ ಕಿಞ್ಚಿದತ್ರ ಭಗವದ್ಧ್ಯಾನಾನ್ನ ಕಿಞ್ಚಿತ್ ಪ್ರಿಯಮ್ ॥ ೫೫॥
ಯಃ ಪ್ರಾಣಾಪಾನಭೇದೈರ್ಮನನಧಿಯಾ ಧಾರಣಾಪಞ್ಚಕಾದ್ಯೈಃ
ಮಧ್ಯೇ ವಿಶ್ವಜನಸ್ಯ ಸನ್ನಪಿ ಶಿವೋ ನೋ ದೃಶ್ಯತೇ ಸೂಕ್ಷ್ಮಯಾ ।
ಬುದ್ಧಯಾದಧ್ಯಾತಯಾಪಿ ಶ್ರುತಿವಚನಶತೈರ್ದೇಶಿಕೋಕ್ತ್ಯೈಕಸೂಕ್ತ್ಯಾ
ಯೋಗೈರ್ಭಕ್ತಿಸಮನ್ವಿತೈಃ ಶಿವತರೋ ದೃಶ್ಯೋ ನ ಚಾನ್ಯತ್ ತಥಾ ॥ ೫೬॥

॥ ಇತಿ ಶ್ರೀಶಿವರಹಸ್ಯೇ ಶಙ್ಕರಾಖ್ಯೇ ಷಷ್ಠಾಂಶೇ ಋಭುನಿದಾಘಸಂವಾದೇ ಬ್ರಹ್ಮತರ್ಪಣಾತ್ಮಹೋಮಾಖ್ಯ ಪ್ರಕರಣದ್ವಯವರ್ಣನಂ ನಾಮ ದಶಮೋಽಧ್ಯಾಯಃ ॥

Special Thanks

The Sanskrit works, published by Sri Ramanasramam, have been approved to be posted on sanskritdocuments.org by permission of Sri V.S. Ramanan, President, Sri Ramanasramam.

Credits

Encoded by Anil Sharma anilandvijaya at gmail.com
Proofread by Sunder Hattangadi and Anil Sharma

https://sanskritdocuments.org

Send corrections to sanskrit at cheerful.com