Ribhu Gita - Siva Rahasya Purana Amsha 6

ಋಭುಗೀತಾ ೧೧ ॥ ಜೀವನಮುಕ್ತ-ಪ್ರಕರಣಮ್ ॥

ಋಭುಃ -

ಬ್ರಹ್ಮಜ್ಞಾನಂ ಪ್ರವಕ್ಷ್ಯಾಮಿ ಜೀವನ್ಮುಕ್ತಸ್ಯ ಲಕ್ಷಣಮ್ ।
ಆತ್ಮಮಾತ್ರೇಣ ಯಸ್ತಿಷ್ಠೇತ್ ಸ ಜೀವನ್ಮುಕ್ತ ಉಚ್ಯತೇ ॥ ೧॥
ಅಹಂ ಬ್ರಹ್ಮವದೇವೇದಮಹಮಾತ್ಮಾ ನ ಸಂಶಯಃ ।
ಚೈತನ್ಯಾತ್ಮೇತಿ ಯಸ್ತಿಷ್ಠೇತ್ ಸ ಜೀವನ್ಮುಕ್ತ ಉಚ್ಯತೇ ॥ ೨॥
ಚಿದಾತ್ಮಾಹಂ ಪರಾತ್ಮಾಹಂ ನಿರ್ಗುಣೋಽಹಂ ಪರಾತ್ಪರಃ ।
ಇತ್ಯೇವಂ ನಿಶ್ಚಯೋ ಯಸ್ಯ ಸ ಜೀವನ್ಮುಕ್ತ ಉಚ್ಯತೇ ॥ ೩॥
ದೇಹತ್ರಯಾತಿರಿಕ್ತೋಽಹಂ ಬ್ರಹ್ಮ ಚೈತನ್ಯಮಸ್ಮ್ಯಹಮ್ ।
ಬ್ರಹ್ಮಾಹಮಿತಿ ಯಸ್ಯಾನ್ತಃ ಸ ಜೀವನ್ಮುಕ್ತ ಉಚ್ಯತೇ ॥ ೪॥
ಆನನ್ದಘನರೂಪೋಽಸ್ಮಿ ಪರಾನನ್ದಪರೋಽಸ್ಮ್ಯಹಮ್ ।
ಯಶ್ಚಿದೇವಂ ಪರಾನನ್ದಂ ಸ ಜೀವನ್ಮುಕ್ತ ಉಚ್ಯತೇ ॥ ೫॥
ಯಸ್ಯ ದೇಹಾದಿಕಂ ನಾಸ್ತಿ ಯಸ್ಯ ಬ್ರಹ್ಮೇತಿ ನಿಶ್ಚಯಃ ।
ಪರಮಾನನ್ದಪೂರ್ಣೋ ಯಃ ಸ ಜೀವನ್ಮುಕ್ತ ಉಚ್ಯತೇ ॥ ೬॥
ಯಸ್ಯ ಕಿಞ್ಚಿದಹಂ ನಾಸ್ತಿ ಚಿನ್ಮಾತ್ರೇಣಾವತಿಷ್ಠತೇ ।
ಪರಾನನ್ದೋ ಮುದಾನನ್ದಃ ಸ ಜೀವನ್ಮುಕ್ತ ಉಚ್ಯತೇ ॥ ೭॥
ಚೈತನ್ಯಮಾತ್ರಂ ಯಸ್ಯಾನ್ತಶ್ಚಿನ್ಮಾತ್ರೈಕಸ್ವರೂಪವಾನ್ ।
ನ ಸ್ಮರತ್ಯನ್ಯಕಲನಂ ಸ ಜೀವನ್ಮುಕ್ತ ಉಚ್ಯತೇ ॥ ೮॥var was ಕಲಲಂ
ಸರ್ವತ್ರ ಪರಿಪೂರ್ಣಾತ್ಮಾ ಸರ್ವತ್ರ ಕಲನಾತ್ಮಕಃ ।
ಸರ್ವತ್ರ ನಿತ್ಯಪೂರ್ಣಾತ್ಮಾ ಸ ಜೀವನ್ಮುಕ್ತ ಉಚ್ಯತೇ ॥ ೯॥
ಪರಮಾತ್ಮಪರಾ ನಿತ್ಯಂ ಪರಮಾತ್ಮೇತಿ ನಿಶ್ಚಿತಃ ।
ಆನನ್ದಾಕೃತಿರವ್ಯಕ್ತಃ ಸ ಜೀವನ್ಮುಕ್ತ ಉಚ್ಯತೇ ॥ ೧೦॥
ಶುದ್ಧಕೈವಲ್ಯಜೀವಾತ್ಮಾ ಸರ್ವಸಙ್ಗವಿವರ್ಜಿತಃ ।
ನಿತ್ಯಾನನ್ದಪ್ರಸನ್ನಾತ್ಮಾ ಸ ಜೀವನ್ಮುಕ್ತ ಉಚ್ಯತೇ ॥ ೧೧॥
ಏಕರೂಪಃ ಪ್ರಶಾನ್ತಾತ್ಮಾ ಅನ್ಯಚಿನ್ತಾವಿವರ್ಜಿತಃ ।
ಕಿಞ್ಚಿದಸ್ತಿತ್ವಹೀನೋ ಯಃ ಸ ಜೀವನ್ಮುಕ್ತ ಉಚ್ಯತೇ ॥ ೧೨॥
ನ ಮೇ ಚಿತ್ತಂ ನ ಮೇ ಬುದ್ಧಿರ್ನಾಹಙ್ಕಾರೋ ನ ಚೇನ್ದ್ರಿಯಃ ।
ಕೇವಲಂ ಬ್ರಹ್ಮಮಾತ್ರತ್ವಾತ್ ಸ ಜೀವನ್ಮುಕ್ತ ಉಚ್ಯತೇ ॥ ೧೩॥
ನ ಮೇ ದೋಷೋ ನ ಮೇ ದೇಹೋ ನೇ ಮೇ ಪ್ರಾಣೋ ನ ಮೇ ಕ್ವಚಿತ್ ।
ದೃಢನಿಶ್ಚಯವಾನ್ ಯೋಽನ್ತಃ ಸ ಜೀವನ್ಮುಕ್ತ ಉಚ್ಯತೇ ॥ ೧೪॥
ನ ಮೇ ಮಾಯಾ ನ ಮೇ ಕಾಮೋ ನ ಮೇ ಕ್ರೋಧೋಽಪರೋಽಸ್ಮ್ಯಹಮ್ ।
ನ ಮೇ ಕಿಞ್ಚಿದಿದಂ ವಾಽಪಿ ಸ ಜೀವನ್ಮುಕ್ತ ಉಚ್ಯತೇ ॥ ೧೫॥
ನ ಮೇ ದೋಷೋ ನ ಮೇ ಲಿಙ್ಗಂ ನ ಮೇ ಬನ್ಧಃ ಕ್ವಚಿಜ್ಜಗತ್ ।
ಯಸ್ತು ನಿತ್ಯಂ ಸದಾನನ್ದಃ ಸ ಜೀವನ್ಮುಕ್ತ ಉಚ್ಯತೇ ॥ ೧೬॥
ನ ಮೇ ಶ್ರೋತ್ರಂ ನ ಮೇ ನಾಸಾ ನ ಮೇ ಚಕ್ಷುರ್ನ ಮೇ ಮನಃ ।
ನ ಮೇ ಜಿಹ್ವೇತಿ ಯಸ್ಯಾನ್ತಃ ಸ ಜೀವನ್ಮುಕ್ತ ಉಚ್ಯತೇ ॥ ೧೭॥
ನ ಮೇ ದೇಹೋ ನ ಮೇ ಲಿಙ್ಗಂ ನ ಮೇ ಕಾರಣಮೇವ ಚ ।
ನ ಮೇ ತುರ್ಯಮಿತಿ ಸ್ವಸ್ಥಃ ಸ ಜೀವನ್ಮುಕ್ತ ಉಚ್ಯತೇ ॥ ೧೮॥
ಇದಂ ಸರ್ವಂ ನ ಮೇ ಕಿಞ್ಚಿದಯಂ ಸರ್ವಂ ನ ಮೇ ಕ್ವಚಿತ್ ।
ಬ್ರಹ್ಮಮಾತ್ರೇಣ ಯಸ್ತಿಷ್ಠೇತ್ ಸ ಜೀವನ್ಮುಕ್ತ ಉಚ್ಯತೇ ॥ ೧೯॥
ನ ಮೇ ಕಿಞ್ಚಿನ್ನ ಮೇ ಕಶ್ಚಿನ್ನ ಮೇ ಕಶ್ಚಿತ್ ಕ್ವಚಿಜ್ಜಗತ್ ।
ಅಹಮೇವೇತಿ ಯಸ್ತಿಷ್ಠೇತ್ ಸ ಜೀವನ್ಮುಕ್ತ ಉಚ್ಯತೇ ॥ ೨೦॥
ನ ಮೇ ಕಾಲೋ ನ ಮೇ ದೇಶೋ ನ ಮೇ ವಸ್ತು ನ ಮೇ ಸ್ಥಿತಿಃ ।
ನ ಮೇ ಸ್ನಾನಂ ನ ಮೇ ಪ್ರಾಸಃ ಸ ಜೀವನ್ಮುಕ್ತ ಉಚ್ಯತೇ ॥ ೨೧॥
ನ ಮೇ ತೀರ್ಥಂ ನ ಮೇ ಸೇವಾ ನ ಮೇ ದೇವೋ ನ ಮೇ ಸ್ಥಲಮ್ ।
ನ ಕ್ವಚಿದ್ಭೇದಹೀನೋಽಯಂ ಸ ಜೀವನ್ಮುಕ್ತ ಉಚ್ಯತೇ ॥ ೨೨॥
ನ ಮೇ ಬನ್ಧಂ ನ ಮೇ ಜನ್ಮ ನ ಮೇ ಜ್ಞಾನಂ ನ ಮೇ ಪದಮ್ ।
ನ ಮೇ ವಾಕ್ಯಮಿತಿ ಸ್ವಸ್ಥಃ ಸ ಜೀವನ್ಮುಕ್ತ ಉಚ್ಯತೇ ॥ ೨೩॥
ನ ಮೇ ಪುಣ್ಯಂ ನ ಮೇ ಪಾಪಂ ನ ಮೇ ಕಾಯಂ ನ ಮೇ ಶುಭಮ್ ।
ನ ಮೇ ದೃಶ್ಯಮಿತಿ ಜ್ಞಾನೀ ಸ ಜೀವನ್ಮುಕ್ತ ಉಚ್ಯತೇ ॥ ೨೪॥
ನ ಮೇ ಶಬ್ದೋ ನ ಮೇ ಸ್ಪರ್ಶೋ ನ ಮೇ ರೂಪಂ ನ ಮೇ ರಸಃ ।
ನ ಮೇ ಜೀವ ಇತಿ ಜ್ಞಾತ್ವಾ ಸ ಜೀವನ್ಮುಕ್ತ ಉಚ್ಯತೇ ॥ ೨೫॥
ನ ಮೇ ಸರ್ವಂ ನ ಮೇ ಕಿಞ್ಚಿತ್ ನ ಮೇ ಜೀವಂ ನ ಮೇ ಕ್ವಚಿತ್ ।
ನ ಮೇ ಭಾವಂ ನ ಮೇ ವಸ್ತು ಸ ಜೀವನ್ಮುಕ್ತ ಉಚ್ಯತೇ ॥ ೨೬॥
ನ ಮೇ ಮೋಕ್ಷ್ಯೇ ನ ಮೇ ದ್ವೈತಂ ನ ಮೇ ವೇದೋ ನ ಮೇ ವಿಧಿಃ ।
ನ ಮೇ ದೂರಮಿತಿ ಸ್ವಸ್ಥಃ ಸ ಜೀವನ್ಮುಕ್ತ ಉಚ್ಯತೇ ॥ ೨೭॥
ನ ಮೇ ಗುರುರ್ನ ಮೇ ಶಿಷ್ಯೋ ನ ಮೇ ಬೋಧೋ ನ ಮೇ ಪರಃ ।
ನ ಮೇ ಶ್ರೇಷ್ಠಂ ಕ್ವಚಿದ್ವಸ್ತು ಸ ಜೀವನ್ಮುಕ್ತ ಉಚ್ಯತೇ ॥ ೨೮॥
ನ ಮೇ ಬ್ರಹ್ಮಾ ನ ಮೇ ವಿಷ್ಣುರ್ನ ಮೇ ರುದ್ರೋ ನ ಮೇ ರವಿಃ ।
ನ ಮೇ ಕರ್ಮ ಕ್ವಚಿದ್ವಸ್ತು ಸ ಜೀವನ್ಮುಕ್ತ ಉಚ್ಯತೇ ॥ ೨೯॥
ನ ಮೇ ಪೃಥ್ವೀ ನ ಮೇ ತೋಯಂ ನ ಮೇ ತೇಜೋ ನ ಮೇ ವಿಯತ್ ।
ನ ಮೇ ಕಾರ್ಯಮಿತಿ ಸ್ವಸ್ಥಃ ಸ ಜೀವನ್ಮುಕ್ತ ಉಚ್ಯತೇ ॥ ೩೦॥
ನ ಮೇ ವಾರ್ತಾ ನ ಮೇ ವಾಕ್ಯಂ ನ ಮೇ ಗೋತ್ರಂ ನ ಮೇ ಕುಲಮ್ ।
ನ ಮೇ ವಿದ್ಯೇತಿ ಯಃ ಸ್ವಸ್ಥಃ ಸ ಜೀವನ್ಮುಕ್ತ ಉಚ್ಯತೇ ॥ ೩೧॥
ನ ಮೇ ನಾದೋ ನ ಮೇ ಶಬ್ದೋ ನ ಮೇ ಲಕ್ಷ್ಯಂ ನ ಮೇ ಭವಃ ।
ನ ಮೇ ಧ್ಯಾನಮಿತಿ ಸ್ವಸ್ಥಃ ಸ ಜೀವನ್ಮುಕ್ತ ಉಚ್ಯತೇ ॥ ೩೨॥
ನ ಮೇ ಶೀತಂ ನ ಮೇ ಚೋಷ್ಣಂ ನ ಮೇ ಮೋಹೋ ನ ಮೇ ಜಪಃ ।
ನ ಮೇ ಸನ್ಧ್ಯೇತಿ ಯಃ ಸ್ವಸ್ಥಃ ಸ ಜೀವನ್ಮುಕ್ತ ಉಚ್ಯತೇ ॥ ೩೩॥
ನ ಮೇ ಜಪೋ ನ ಮೇ ಮನ್ತ್ರೋ ನ ಮೇ ಹೋಮೋ ನ ಮೇ ನಿಶಾ ।
ನ ಮೇ ಸರ್ವಮಿತಿ ಸ್ವಸ್ಥಃ ಸ ಜೀವನ್ಮುಕ್ತ ಉಚ್ಯತೇ ॥ ೩೪॥
ನ ಮೇ ಭಯಂ ನ ಮೇ ಚಾನ್ನಂ ನ ಮೇ ತೃಷ್ಣಾ ನ ಮೇ ಕ್ಷುಧಾ ।
ನ ಮೇ ಚಾತ್ಮೇತಿ ಯಃ ಸ್ವಸ್ಥಃ ಸ ಜೀವನ್ಮುಕ್ತ ಉಚ್ಯತೇ ॥ ೩೫॥
ನ ಮೇ ಪೂರ್ವಂ ನ ಮೇ ಪಶ್ಚಾತ್ ನ ಮೇ ಚೋರ್ಧ್ವಂ ನ ಮೇ ದಿಶಃ ।
ನ ಚಿತ್ತಮಿತಿ ಸ್ವಸ್ಥಃ ಸ ಜೀವನ್ಮುಕ್ತ ಉಚ್ಯತೇ ॥ ೩೬॥
ನ ಮೇ ವಕ್ತವ್ಯಮಲ್ಪಂ ವಾ ನ ಮೇ ಶ್ರೋತವ್ಯಮಣ್ವಪಿ ।
ನ ಮೇ ಮನ್ತವ್ಯಮೀಷದ್ವಾ ಸ ಜೀವನ್ಮುಕ್ತ ಉಚ್ಯತೇ ॥ ೩೭॥
ನ ಮೇ ಭೋಕ್ತವ್ಯಮೀಷದ್ವಾ ನ ಮೇ ಧ್ಯಾತವ್ಯಮಣ್ವಪಿ ।
ನ ಮೇ ಸ್ಮರ್ತವ್ಯಮೇವಾಯಂ ಸ ಜೀವನ್ಮುಕ್ತ ಉಚ್ಯತೇ ॥ ೩೮॥
ನ ಮೇ ಭೋಗೋ ನ ಮೇ ರೋಗೋ ನ ಮೇ ಯೋಗೋ ನ ಮೇ ಲಯಃ ।
ನ ಮೇ ಸರ್ವಮಿತಿ ಸ್ವಸ್ಥಃ ಸ ಜೀವನ್ಮುಕ್ತ ಉಚ್ಯತೇ ॥ ೩೯॥
ನ ಮೇಽಸ್ತಿತ್ವಂ ನ ಮೇ ಜಾತಂ ನ ಮೇ ವೃದ್ಧಂ ನ ಮೇ ಕ್ಷಯಃ ।
ಅಧ್ಯಾರೋಪೋ ನ ಮೇ ಸ್ವಸ್ಥಃ ಸ ಜೀವನ್ಮುಕ್ತ ಉಚ್ಯತೇ ॥ ೪೦॥
ಅಧ್ಯಾರೋಪ್ಯಂ ನ ಮೇ ಕಿಞ್ಚಿದಪವಾದೋ ನ ಮೇ ಕ್ವಚಿತ್ ।
ನ ಮೇ ಕಿಞ್ಚಿದಹಂ ಯತ್ತು ಸ ಜೀವನ್ಮುಕ್ತ ಉಚ್ಯತೇ ॥ ೪೧॥
ನ ಮೇ ಶುದ್ಧಿರ್ನ ಮೇ ಶುಭ್ರೋ ನ ಮೇ ಚೈಕಂ ನ ಮೇ ಬಹು ।
ನ ಮೇ ಭೂತಂ ನ ಮೇ ಕಾರ್ಯಂ ಸ ಜೀವನ್ಮುಕ್ತ ಉಚ್ಯತೇ ॥ ೪೨॥
ನ ಮೇ ಕೋಽಹಂ ನ ಮೇ ಚೇದಂ ನ ಮೇ ನಾನ್ಯಂ ನ ಮೇ ಸ್ವಯಮ್ ।
ನ ಮೇ ಕಶ್ಚಿನ್ನ ಮೇ ಸ್ವಸ್ಥಃ ಸ ಜೀವನ್ಮುಕ್ತ ಉಚ್ಯತೇ ॥ ೪೩॥
ನ ಮೇ ಮಾಂಸಂ ನ ಮೇ ರಕ್ತಂ ನ ಮೇ ಮೇದೋ ನ ಮೇ ಶಕೃತ್ ।
ನ ಮೇ ಕೃಪಾ ನ ಮೇಽಸ್ತೀತಿ ಸ ಜೀವನ್ಮುಕ್ತ ಉಚ್ಯತೇ ॥ ೪೪॥
ನ ಮೇ ಸರ್ವಂ ನ ಮೇ ಶುಕ್ಲಂ ನ ಮೇ ನೀಲಂ ನ ಮೇ ಪೃಥಕ್ ।
ನ ಮೇ ಸ್ವಸ್ಥಃ ಸ್ವಯಂ ಯೋ ವಾ ಸ ಜೀವನ್ಮುಕ್ತ ಉಚ್ಯತೇ ॥ ೪೫॥
ನ ಮೇ ತಾಪಂ ನ ಮೇ ಲೋಭೋ ನ ಮೇ ಗೌಣ ನ ಮೇ ಯಶಃ ।
ನೇ ಮೇ ತತ್ತ್ವಮಿತಿ ಸ್ವಸ್ಥಃ ಸ ಜೀವನ್ಮುಕ್ತ ಉಚ್ಯತೇ ॥ ೪೬॥
ನ ಮೇ ಭ್ರಾನ್ತಿರ್ನ ಮೇ ಜ್ಞಾನಂ ನ ಮೇ ಗುಹ್ಯಂ ನ ಮೇ ಕುಲಮ್ ।
ನ ಮೇ ಕಿಞ್ಚಿದಿತಿ ಧ್ಯಾಯನ್ ಸ ಜೀವನ್ಮುಕ್ತ ಉಚ್ಯತೇ ॥ ೪೭॥
ನ ಮೇ ತ್ಯಾಜ್ಯಂ ನ ಮೇ ಗ್ರಾಹ್ಯಂ ನ ಮೇ ಹಾಸ್ಯಂ ನ ಮೇ ಲಯಃ ।
ನ ಮೇ ದೈವಮಿತಿ ಸ್ವಸ್ಥಃ ಸ ಜೀವನ್ಮುಕ್ತ ಉಚ್ಯತೇ ॥ ೪೮॥
ನ ಮೇ ವ್ರತಂ ನ ಮೇ ಗ್ಲಾನಿಃ ನ ಮೇ ಶೋಚ್ಯಂ ನ ಮೇ ಸುಖಮ್ ।
ನ ಮೇ ನ್ಯೂನಂ ಕ್ವಚಿದ್ವಸ್ತು ಸ ಜೀವನ್ಮುಕ್ತ ಉಚ್ಯತೇ ॥ ೪೯॥
ನ ಮೇ ಜ್ಞಾತಾ ನ ಮೇ ಜ್ಞಾನಂ ನ ಮೇ ಜ್ಞೇಯಂ ನ ಮೇ ಸ್ವಯಮ್ ।
ನ ಮೇ ಸರ್ವಮಿತಿ ಜ್ಞಾನೀ ಸ ಜೀವನ್ಮುಕ್ತ ಉಚ್ಯತೇ ॥ ೫೦॥
ನ ಮೇ ತುಭ್ಯಂ ನ ಮೇ ಮಹ್ಯಂ ನ ಮೇ ತ್ವತ್ತೋ ನ ಮೇ ತ್ವಹಮ್ ।
ನ ಮೇ ಗುರುರ್ನ ಮೇ ಯಸ್ತು ಸ ಜೀವನ್ಮುಕ್ತ ಉಚ್ಯತೇ ॥ ೫೧॥
ನ ಮೇ ಜಡಂ ನ ಮೇ ಚೈತ್ಯಂ ನ ಮೇ ಗ್ಲಾನಂ ನ ಮೇ ಶುಭಮ್ ।
ನ ಮೇ ನ ಮೇತಿ ಯಸ್ತಿಷ್ಠೇತ್ ಸ ಜೀವನ್ಮುಕ್ತ ಉಚ್ಯತೇ ॥ ೫೨॥
ನ ಮೇ ಗೋತ್ರಂ ನ ಮೇ ಸೂತ್ರಂ ನ ಮೇ ಪಾತ್ರಂ ನ ಮೇ ಕೃಪಾ ।
ನ ಮೇ ಕಿಞ್ಚಿದಿತಿ ಧ್ಯಾಯೀ ಸ ಜೀವನ್ಮುಕ್ತ ಉಚ್ಯತೇ ॥ ೫೩॥
ನ ಮೇ ಚಾತ್ಮಾ ನ ಮೇ ನಾತ್ಮಾ ನ ಮೇ ಸ್ವರ್ಗಂ ನ ಮೇ ಫಲಮ್ ।
ನ ಮೇ ದೂಷ್ಯಂ ಕ್ವಚಿದ್ವಸ್ತು ಸ ಜೀವನ್ಮುಕ್ತ ಉಚ್ಯತೇ ॥ ೫೪॥
ನ ಮೇಽಭ್ಯಾಸೋ ನ ಮೇ ವಿದ್ಯಾ ನ ಮೇ ಶಾನ್ತಿರ್ನ ಮೇ ದಮಃ ।
ನ ಮೇ ಪುರಮಿತಿ ಜ್ಞಾನೀ ಸ ಜೀವನ್ಮುಕ್ತ ಉಚ್ಯತೇ ॥ ೫೫॥
ನ ಮೇ ಶಲ್ಯಂ ನ ಮೇ ಶಙ್ಕಾ ನ ಮೇ ಸುಪ್ತಿರ್ನ ಮೇ ಮನಃ ।
ನ ಮೇ ವಿಕಲ್ಪ ಇತ್ಯಾಪ್ತಃ ಸ ಜೀವನ್ಮುಕ್ತ ಉಚ್ಯತೇ ॥ ೫೬॥
ನ ಮೇ ಜರಾ ನ ಮೇ ಬಾಲ್ಯಂ ನ ಮೇ ಯೌವನಮಣ್ವಪಿ ।
ನ ಮೇ ಮೃತಿರ್ನ ಮೇ ಧ್ವಾನ್ತಂ ಸ ಜೀವನ್ಮುಕ್ತ ಉಚ್ಯತೇ ॥ ೫೭॥
ನ ಮೇ ಲೋಕಂ ನ ಮೇ ಭೋಗಂ ನ ಮೇ ಸರ್ವಮಿತಿ ಸ್ಮೃತಃ ।
ನ ಮೇ ಮೌನಮಿತಿ ಪ್ರಾಪ್ತಂ ಸ ಜೀವನ್ಮುಕ್ತ ಉಚ್ಯತೇ ॥ ೫೮॥
ಅಹಂ ಬ್ರಹ್ಮ ಹ್ಯಹಂ ಬ್ರಹ್ಮ ಹ್ಯಹಂ ಬ್ರಹ್ಮೇತಿ ನಿಶ್ಚಯಃ ।
ಚಿದಹಂ ಚಿದಹಂ ಚೇತಿ ಸ ಜೀವನ್ಮುಕ್ತ ಉಚ್ಯತೇ ॥ ೫೯॥
ಬ್ರಹ್ಮೈವಾಹಂ ಚಿದೇವಾಹಂ ಪರೈವಾಹಂ ನ ಸಂಶಯಃ ।
ಸ್ವಯಮೇವ ಸ್ವಯಂ ಜ್ಯೋತಿಃ ಸ ಜೀವನ್ಮುಕ್ತ ಉಚ್ಯತೇ ॥ ೬೦॥
ಸ್ವಯಮೇವ ಸ್ವಯಂ ಪಶ್ಯೇತ್ ಸ್ವಯಮೇವ ಸ್ವಯಂ ಸ್ಥಿತಃ ।
ಸ್ವಾತ್ಮನ್ಯೇವ ಸ್ವಯಂ ಭೂತಃ ಸ ಜೀವನ್ಮುಕ್ತ ಉಚ್ಯತೇ ॥ ೬೧॥
ಸ್ವಾತ್ಮಾನನ್ದಂ ಸ್ವಯಂ ಭುಂಕ್ಷ್ವೇ ಸ್ವಾತ್ಮರಾಜ್ಯೇ ಸ್ವಯಂ ವಸೇ ।
ಸ್ವಾತ್ಮರಾಜ್ಯೇ ಸ್ವಯಂ ಪಶ್ಯೇ ಸ ಜೀವನ್ಮುಕ್ತ ಉಚ್ಯತೇ ॥ ೬೨॥
ಸ್ವಯಮೇವಾಹಮೇಕಾಗ್ರಃ ಸ್ವಯಮೇವ ಸ್ವಯಂ ಪ್ರಭುಃ ।
ಸ್ವಸ್ವರೂಪಃ ಸ್ವಯಂ ಪಶ್ಯೇ ಸ ಜೀವನ್ಮುಕ್ತ ಉಚ್ಯತೇ ॥ ೬೩॥
ಜೀವನ್ಮುಕ್ತಿಪ್ರಕರಣಂ ಸರ್ವವೇದೇಷು ದುರ್ಲಭಮ್ ।
ಯಃ ಶೃಣೋತಿ ಸಕೃದ್ವಾಪಿ ಬ್ರಹ್ಮೈವ ಭವತಿ ಸ್ವಯಮ್ ॥ ೬೪॥
ಯೇ ವೇದವಾದವಿಧಿಕಲ್ಪಿತಭೇದಬುದ್ಧ್ಯಾ
ಪುಣ್ಯಾಭಿಸನ್ಧಿತಧಿಯಾ ಪರಿಕರ್ಶಯನ್ತಃ ।
ದೇಹಂ ಸ್ವಕೀಯಮತಿದುಃಖಪರಂ ಪರಾಭಿ-
ಸ್ತೇಷಾಂ ಸುಖಾಯ ನ ತು ಜಾತು ತವೇಶ ಪಾದಾತ್ ॥ ೬೫॥
ಕಃ ಸನ್ತರೇತ ಭವಸಾಗರಮೇತದುತ್ಯ-
ತ್ತರಙ್ಗಸದೃಶಂ ಜನಿಮೃತ್ಯುರೂಪಮ್ ।
ಈಶಾರ್ಚನಾವಿಧಿಸುಬೋಧಿತಭೇದಹೀನ-
ಜ್ಞಾನೋಡುಪೇನ ಪ್ರತರೇದ್ಭವಭಾವಯುಕ್ತಃ ॥ ೬೬॥

॥ ಇತಿ ಶ್ರೀಶಿವರಹಸ್ಯೇ ಶಙ್ಕರಾಖ್ಯೇ ಷಷ್ಠಾಂಶೇ ಋಭುನಿದಾಘಸಂವಾದೇ ಜೀವನ್ಮುಕ್ತಪ್ರಕರಣಂ ನಾಮ ಏಕಾದಶೋಽಧ್ಯಾಯಃ ॥

Special Thanks

The Sanskrit works, published by Sri Ramanasramam, have been approved to be posted on sanskritdocuments.org by permission of Sri V.S. Ramanan, President, Sri Ramanasramam.

Credits

Encoded by Anil Sharma anilandvijaya at gmail.com
Proofread by Sunder Hattangadi and Anil Sharma

https://sanskritdocuments.org

Send corrections to sanskrit at cheerful.com