Ribhu Gita - Siva Rahasya Purana Amsha 6

ಋಭುಗೀತಾ ೨೦ ॥ ಆತ್ಮ-ವೈಭವ ಪ್ರಕರಣಮ್ ॥

ಋಭುಃ -

ಶೃಣು ಕೇವಲಮತ್ಯನ್ತಂ ರಹಸ್ಯಂ ಪರಮಾದ್ಭುತಮ್ ।
ಇತಿ ಗುಹ್ಯತರಂ ಸದ್ಯೋ ಮೋಕ್ಷಪ್ರದಮಿದಂ ಸದಾ ॥ ೧॥
ಸುಲಭಂ ಬ್ರಹ್ಮವಿಜ್ಞಾನಂ ಸುಲಭಂ ಶುಭಮುತ್ತಮಮ್ ।
ಸುಲಭಂ ಬ್ರಹ್ಮನಿಷ್ಠಾನಾಂ ಸುಲಭಂ ಸರ್ವಬೋಧಕಮ್ ॥ ೨॥
ಸುಲಭಂ ಕೃತಕೃತ್ಯಾನಾಂ ಸುಲಭಂ ಸ್ವಯಮಾತ್ಮನಃ ।
ಸುಲಭಂ ಕಾರಣಾಭಾವಂ ಸುಲಭಂ ಬ್ರಹ್ಮಣಿ ಸ್ಥಿತಮ್ ॥ ೩॥
ಸುಲಭಂ ಚಿತ್ತಹೀನಾನಾಂ ಸ್ವಯಂ ತಚ್ಚ ಸ್ವಯಂ ಸ್ವಯಮ್ ।
ಸ್ವಯಂ ಸಂಸಾರಹೀನಾನಾಂ ಚಿತ್ತಂ ಸಂಸಾರಮುಚ್ಯತೇ ॥ ೪॥
ಸೃಷ್ಟ್ವೈದಂ ನ ಸಂಸಾರಃ ಬ್ರಹ್ಮೈವೇದಂ ಮನೋ ನ ಚ ।
ಬ್ರಹ್ಮೈವೇದಂ ಭಯಂ ನಾಸ್ತಿ ಬ್ರಹ್ಮೈವೇದಂ ನ ಕಿಞ್ಚನ ॥ ೫॥
ಬ್ರಹ್ಮೈವೇದಮಸತ್ ಸರ್ವಂ ಬ್ರಹ್ಮೈವೇದಂ ಪರಾಯಣಮ್ ।
ಬ್ರಹ್ಮೈವೇದಂ ಶರೀರಾಣಾಂ ಬ್ರಹ್ಮೈವೇದಂ ತೃಣಂ ನ ಚ ॥ ೬॥
ಬ್ರಹ್ಮೈವಾಸ್ಮಿ ನ ಚಾನ್ಯೋಽಸ್ಮಿ ಬ್ರಹ್ಮೈವೇದಂ ಜಗನ್ನ ಚ ।
ಬ್ರಹ್ಮೈವೇದಂ ವಿಯನ್ನಾಸ್ತಿ ಬ್ರಹ್ಮೈವೇದಂ ಕ್ರಿಯಾ ನ ಚ ॥ ೭॥
ಬ್ರಹ್ಮೈವೇದಂ ಮಹಾತ್ಮಾನಂ ಬ್ರಹ್ಮೈವೇದಂ ಪ್ರಿಯಂ ಸದಾ ।
ಬ್ರಹ್ಮೈವೇದಂ ಜಗನ್ನಾನ್ತೋ ಬ್ರಹ್ಮೈವಾಹಂ ಭಯಂ ನ ಹಿ ॥ ೮॥
ಬ್ರಹ್ಮೈವಾಹಂ ಸದಾಚಿತ್ತಂ ಬ್ರಹ್ಮೈವಾಹಮಿದಂ ನ ಹಿ ।
ಬ್ರಹ್ಮೈವಾಹಂ ತು ಯನ್ಮಿಥ್ಯಾ ಬ್ರಹ್ಮೈವಾಹಮಿಯಂ ಭ್ರಮಾ ॥ ೯॥
ಬ್ರಹ್ಮೈವ ಸರ್ವಸಿದ್ಧಾನ್ತೋ ಬ್ರಹ್ಮೈವ ಮನಸಾಸ್ಪದಮ್ ।
ಬ್ರಹ್ಮೈವ ಸರ್ವಭವನಂ ಬ್ರಹ್ಮೈವ ಮುನಿಮಣ್ಡಲಮ್ ॥ ೧೦॥
ಬ್ರಹ್ಮೈವಾಹಂ ತು ನಾಸ್ತ್ಯನ್ಯದ್ ಬ್ರಹ್ಮೈವ ಗುರುಪೂಜನಮ್ ।
ಬ್ರಹ್ಮೈವ ನಾನ್ಯತ್ ಕಿಞ್ಚಿತ್ತು ಬ್ರಹ್ಮೈವ ಸಕಲಂ ಸದಾ ॥ ೧೧॥
ಬ್ರಹ್ಮೈವ ತ್ರಿಗುಣಾಕಾರಂ ಬ್ರಹ್ಮೈವ ಹರಿರೂಪಕಮ್ ।
ಬ್ರಹ್ಮಣೋಽನ್ಯತ್ ಪದಂ ನಾಸ್ತಿ ಬ್ರಹ್ಮಣೋಽನ್ಯತ್ ಕ್ಷಣಂ ನ ಮೇ ॥ ೧೨॥
ಬ್ರಹ್ಮೈವಾಹಂ ನಾನ್ಯವಾರ್ತಾ ಬ್ರಹ್ಮೈವಾಹಂ ನ ಚ ಶ್ರುತಮ್ ।
ಬ್ರಹ್ಮೈವಾಹಂ ಸಮಂ ನಾಸ್ತಿ ಸರ್ವಂ ಬ್ರಹ್ಮೈವ ಕೇವಲಮ್ ॥ ೧೩॥
ಬ್ರಹ್ಮೈವಾಹಂ ನ ಮೇ ಭೋಗೋ ಬ್ರಹ್ಮೈವಾಹಂ ನ ಮೇ ಪೃಥಕ್ ।
ಬ್ರಹ್ಮೈವಾಹಂ ಸತಂ ನಾಸ್ತಿ ಬ್ರಹ್ಮೈವ ಬ್ರಹ್ಮರೂಪಕಃ ॥ ೧೪॥
ಬ್ರಹ್ಮೈವ ಸರ್ವದಾ ಭಾತಿ ಬ್ರಹ್ಮೈವ ಸುಖಮುತ್ತಮಮ್ ।
ಬ್ರಹ್ಮೈವ ನಾನಾಕಾರತ್ವಾತ್ ಬ್ರಹ್ಮೈವಾಹಂ ಪ್ರಿಯಂ ಮಹತ್ ॥ ೧೫॥
ಬ್ರಹ್ಮೈವ ಬ್ರಹ್ಮಣಃ ಪೂಜ್ಯಂ ಬ್ರಹ್ಮೈವ ಬ್ರಹ್ಮಣೋ ಗುರುಃ ।
ಬ್ರಹ್ಮೈವ ಬ್ರಹ್ಮಮಾತಾ ತು ಬ್ರಹ್ಮೈವಾಹಂ ಪಿತಾ ಸುತಃ ॥ ೧೬॥
ಬ್ರಹ್ಮೈವ ಬ್ರಹ್ಮ ದೇವಂ ಚ ಬ್ರಹ್ಮೈವ ಬ್ರಹ್ಮ ತಜ್ಜಯಃ ।
ಬ್ರಹ್ಮೈವ ಧ್ಯಾನರೂಪಾತ್ಮಾ ಬ್ರಹ್ಮೈವ ಬ್ರಹ್ಮಣೋ ಗುಣಃ ॥ ೧೭॥
ಆತ್ಮೈವ ಸರ್ವನಿತ್ಯಾತ್ಮಾ ಆತ್ಮನೋಽನ್ಯನ್ನ ಕಿಞ್ಚನ ।
ಆತ್ಮೈವ ಸತತಂ ಹ್ಯಾತ್ಮಾ ಆತ್ಮೈವ ಗುರುರಾತ್ಮನಃ ॥ ೧೮॥
ಆತ್ಮಜ್ಯೋತಿರಹಂಭೂತಮಾತ್ಮೈವಾಸ್ತಿ ಸದಾ ಸ್ವಯಮ್ ।
ಸ್ವಯಂ ತತ್ತ್ವಮಸಿ ಬ್ರಹ್ಮ ಸ್ವಯಂ ಭಾಮಿ ಪ್ರಕಾಶಕಃ ॥ ೧೯॥
ಸ್ವಯಂ ಜೀವತ್ವಸಂಶಾನ್ತಿಃ ಸ್ವಯಮೀಶ್ವರರೂಪವಾನ್ ।
ಸ್ವಯಂ ಬ್ರಹ್ಮ ಪರಂ ಬ್ರಹ್ಮ ಸ್ವಯಂ ಕೇವಲಮವ್ಯಯಮ್ ॥ ೨೦॥
ಸ್ವಯಂ ನಾಶಂ ಚ ಸಿದ್ಧಾನ್ತಂ ಸ್ವಯಮಾತ್ಮಾ ಪ್ರಕಾಶಕಃ ।
ಸ್ವಯಂ ಪ್ರಕಾಶರೂಪಾತ್ಮಾ ಸ್ವಯಮತ್ಯನ್ತನಿರ್ಮಲಃ ॥ ೨೧॥
ಸ್ವಯಮೇವ ಹಿ ನಿತ್ಯಾತ್ಮಾ ಸ್ವಯಂ ಶುದ್ಧಃ ಪ್ರಿಯಾಪ್ರಿಯಃ ।
ಸ್ವಯಮೇವ ಸ್ವಯಂ ಛನ್ದಃ ಸ್ವಯಂ ದೇಹಾದಿವರ್ಜಿತಃ ॥ ೨೨॥
ಸ್ವಯಂ ದೋಷವಿಹೀನಾತ್ಮಾ ಸ್ವಯಮಾಕಾಶವತ್ ಸ್ಥಿತಃ ।
ಅಯಂ ಚೇದಂ ಚ ನಾಸ್ತ್ಯೇವ ಅಯಂ ಭೇದವಿವರ್ಜಿತಃ ॥ ೨೩॥
ಬ್ರಹ್ಮೈವ ಚಿತ್ತವದ್ಭಾತಿ ಬ್ರಹ್ಮೈವ ಶಿವವತ್ ಸದಾ ।
ಬ್ರಹ್ಮೈವ ಬುದ್ಧಿವದ್ಭಾತಿ ಬ್ರಹ್ಮೈವ ಶಿವವತ್ ಸದಾ ॥ ೨೪॥
ಬ್ರಹ್ಮೈವ ಶಶವದ್ಭಾತಿ ಬ್ರಹ್ಮೈವ ಸ್ಥೂಲವತ್ ಸ್ವಯಮ್ ।
ಬ್ರಹ್ಮೈವ ಸತತಂ ನಾನ್ಯತ್ ಬ್ರಹ್ಮೈವ ಗುರುರಾತ್ಮನಃ ॥ ೨೫॥
ಆತ್ಮಜ್ಯೋತಿರಹಂ ಭೂತಮಹಂ ನಾಸ್ತಿ ಸದಾ ಸ್ವಯಮ್ ।
ಸ್ವಯಮೇವ ಪರಂ ಬ್ರಹ್ಮ ಸ್ವಯಮೇವ ಚಿದವ್ಯಯಃ ॥ ೨೬॥
ಸ್ವಯಮೇವ ಸ್ವಯಂ ಜ್ಯೋತಿಃ ಸ್ವಯಂ ಸರ್ವತ್ರ ಭಾಸತೇ ।
ಸ್ವಯಂ ಬ್ರಹ್ಮ ಸ್ವಯಂ ದೇಹಃ ಸ್ವಯಂ ಪೂರ್ಣಃ ಪರಃ ಪುಮಾನ್ ॥ ೨೭॥
ಸ್ವಯಂ ತತ್ತ್ವಮಸಿ ಬ್ರಹ್ಮ ಸ್ವಯಂ ಭಾತಿ ಪ್ರಕಾಶಕಃ ।
ಸ್ವಯಂ ಜೀವತ್ವಸಂಶಾನ್ತಃ ಸ್ವಯಮೀಶ್ವರರೂಪವಾನ್ ॥ ೨೮॥
ಸ್ವಯಮೇವ ಪರಂ ಬ್ರಹ್ಮ ಸ್ವಯಂ ಕೇವಲಮವ್ಯಯಃ ।
ಸ್ವಯಂ ರಾದ್ಧಾನ್ತಸಿದ್ಧಾನ್ತಃ ಸ್ವಯಮಾತ್ಮಾ ಪ್ರಕಾಶಕಃ ॥ ೨೯॥
ಸ್ವಯಂ ಪ್ರಕಾಶರೂಪಾತ್ಮಾ ಸ್ವಯಮತ್ಯನ್ತನಿರ್ಮಲಃ ।
ಸ್ವಯಮೇವ ಹಿ ನಿತ್ಯಾತ್ಮಾ ಸ್ವಯಂ ಶುದ್ಧಃ ಪ್ರಿಯಾಪ್ರಿಯಃ ॥ ೩೦॥
ಸ್ವಯಮೇವ ಸ್ವಯಂ ಸ್ವಸ್ಥಃ ಸ್ವಯಂ ದೇಹವಿವರ್ಜಿತಃ ।
ಸ್ವಯಂ ದೋಷವಿಹೀನಾತ್ಮಾ ಸ್ವಯಮಾಕಾಶವತ್ ಸ್ಥಿತಃ ॥ ೩೧॥
ಅಖಣ್ಡಃ ಪರಿಪೂರ್ಣೋಽಹಮಖಣ್ಡರಸಪೂರಣಃ ।
ಅಖಣ್ಡಾನನ್ದ ಏವಾಹಮಪರಿಚ್ಛಿನ್ನವಿಗ್ರಹಃ ॥ ೩೨॥
ಇತಿ ನಿಶ್ಚಿತ್ಯ ಪೂರ್ಣಾತ್ಮಾ ಬ್ರಹ್ಮೈವ ನ ಪೃಥಕ್ ಸ್ವಯಮ್ ।
ಅಹಮೇವ ಹಿ ನಿತ್ಯಾತ್ಮಾ ಅಹಮೇವ ಹಿ ಶಾಶ್ವತಃ ॥ ೩೩॥
ಅಹಮೇವ ಹಿ ತದ್ಬ್ರಹ್ಮ ಬ್ರಹ್ಮೈವಾಹಂ ಜಗತ್ಪ್ರಭುಃ ।
ಬ್ರಹ್ಮೈವಾಹಂ ನಿರಾಭಾಸೋ ಬ್ರಹ್ಮೈವಾಹಂ ನಿರಾಮಯಃ ॥ ೩೪॥
ಬ್ರಹ್ಮೈವಾಹಂ ಚಿದಾಕಾಶೋ ಬ್ರಹ್ಮೈವಾಹಂ ನಿರನ್ತರಃ ।
ಬ್ರಹ್ಮೈವಾಹಂ ಮಹಾನನ್ದೋ ಬ್ರಹ್ಮೈವಾಹಂ ಸದಾತ್ಮವಾನ್ ॥ ೩೫॥
ಬ್ರಹ್ಮೈವಾಹಮನನ್ತಾತ್ಮಾ ಬ್ರಹ್ಮೈವಾಹಂ ಸುಖಂ ಪರಮ್ ।
ಬ್ರಹ್ಮೈವಾಹಂ ಮಹಾಮೌನೀ ಸರ್ವವೃತ್ತಾನ್ತವರ್ಜಿತಃ ॥ ೩೬॥
ಬ್ರಹ್ಮೈವಾಹಮಿದಂ ಮಿಥ್ಯಾ ಬ್ರಹ್ಮೈವಾಹಂ ಜಗನ್ನ ಹಿ ।
ಬ್ರಹ್ಮೈವಾಹಂ ನ ದೇಹೋಽಸ್ಮಿ ಬ್ರಹ್ಮೈವಾಹಂ ಮಹಾದ್ವಯಃ ॥ ೩೭॥
ಬ್ರಹ್ಮೈವ ಚಿತ್ತವದ್ಭಾತಿ ಬ್ರಹ್ಮೈವ ಶಿವವತ್ ಸದಾ ।
ಬ್ರಹ್ಮೈವ ಬುದ್ಧಿವದ್ಭಾತಿ ಬ್ರಹ್ಮೈವ ಫಲವತ್ ಸ್ವಯಮ್ ॥ ೩೮॥
ಬ್ರಹ್ಮೈವ ಮೂರ್ತಿವದ್ಭಾತಿ ತದ್ಬ್ರಹ್ಮಾಸಿ ನ ಸಂಶಯಃ ।
ಬ್ರಹ್ಮೈವ ಕಾಲವದ್ಭಾತಿ ಬ್ರಹ್ಮೈವ ಸಕಲಾದಿವತ್ ॥ ೩೯॥
ಬ್ರಹ್ಮೈವ ಭೂತಿವದ್ಭಾತಿ ಬ್ರಹ್ಮೈವ ಜಡವತ್ ಸ್ವಯಮ್ ।
ಬ್ರಹ್ಮೈವೌಂಕಾರವತ್ ಸರ್ವಂ ಬ್ರಹ್ಮೈವೌಂಕಾರರೂಪವತ್ ॥ ೪೦॥
ಬ್ರಹ್ಮೈವ ನಾದವದ್ಬ್ರಹ್ಮ ನಾಸ್ತಿ ಭೇದೋ ನ ಚಾದ್ವಯಮ್ ।
ಸತ್ಯಂ ಸತ್ಯಂ ಪುನಃ ಸತ್ಯಂ ಬ್ರಹ್ಮಣೋಽನ್ಯನ್ನ ಕಿಞ್ಚನ ॥ ೪೧॥
ಬ್ರಹ್ಮೈವ ಸರ್ವಮಾತ್ಮೈವ ಬ್ರಹ್ಮಣೋಽನ್ಯನ್ನ ಕಿಞ್ಚನ ।
ಸರ್ವಂ ಮಿಥ್ಯಾ ಜಗನ್ಮಿಥ್ಯಾ ದೃಶ್ಯತ್ವಾದ್ಘಟವತ್ ಸದಾ ॥ ೪೨॥
ಬ್ರಹ್ಮೈವಾಹಂ ನ ಸನ್ದೇಹಶ್ಚಿನ್ಮಾತ್ರತ್ವಾದಹಂ ಸದಾ ।
ಬ್ರಹ್ಮೈವ ಶುದ್ಧರೂಪತ್ವಾತ್ ದೃಗ್ರೂಪತ್ವಾತ್ ಸ್ವಯಂ ಮಹತ್ ॥ ೪೩॥
ಅಹಮೇವ ಪರಂ ಬ್ರಹ್ಮ ಅಹಮೇವ ಪರಾತ್ ಪರಃ ।
ಅಹಮೇವ ಮನೋತೀತ ಅಹಮೇವ ಜಗತ್ಪರಃ ॥ ೪೪॥
ಅಹಮೇವ ಹಿ ನಿತ್ಯಾತ್ಮಾ ಅಹಂ ಮಿಥ್ಯಾ ಸ್ವಭಾವತಃ ।
ಆನನ್ದೋಽಹಂ ನಿರಾಧಾರೋ ಬ್ರಹ್ಮೈವ ನ ಚ ಕಿಞ್ಚನ ॥ ೪೫॥
ನಾನ್ಯತ್ ಕಿಞ್ಚಿದಹಂ ಬ್ರಹ್ಮ ನಾನ್ಯತ್ ಕಿಞ್ಚಿಚ್ಚಿದವ್ಯಯಃ ।
ಆತ್ಮನೋಽನ್ಯತ್ ಪರಂ ತುಚ್ಛಮಾತ್ಮನೋಽನ್ಯದಹಂ ನಹಿ ॥ ೪೬॥
ಆತ್ಮನೋಽನ್ಯನ್ನ ಮೇ ದೇಹಃ ಆತ್ಮೈವಾಹಂ ನ ಮೇ ಮಲಮ್ ।
ಆತ್ಮನ್ಯೇವಾತ್ಮನಾ ಚಿತ್ತಮಾತ್ಮೈವಾಹಂ ನ ತತ್ ಪೃಥಕ್ ॥ ೪೭॥
ಆತ್ಮೈವಾಹಮಹಂ ಶೂನ್ಯಮಾತ್ಮೈವಾಹಂ ಸದಾ ನ ಮೇ ।
ಆತ್ಮೈವಾಹಂ ಗುಣೋ ನಾಸ್ತಿ ಆತ್ಮೈವ ನ ಪೃಥಕ್ ಕ್ವಚಿತ್ ॥ ೪೮॥
ಅತ್ಯನ್ತಾಭಾವ ಏವ ತ್ವಂ ಅತ್ಯನ್ತಾಭಾವಮೀದೃಶಮ್ ।
ಅತ್ಯನ್ತಾಭಾವ ಏವೇದಮತ್ಯನ್ತಾಭಾವಮಣ್ವಪಿ ॥ ೪೯॥
ಆತ್ಮೈವಾಹಂ ಪರಂ ಬ್ರಹ್ಮ ಸರ್ವಂ ಮಿಥ್ಯಾ ಜಗತ್ತ್ರಯಮ್ ।
ಅಹಮೇವ ಪರಂ ಬ್ರಹ್ಮ ಅಹಮೇವ ಪರೋ ಗುರುಃ ॥ ೫೦॥
ಜೀವಭಾವಂ ಸದಾಸತ್ಯಂ ಶಿವಸದ್ಭಾವಮೀದೃಶಮ್ ।
ವಿಷ್ಣುವದ್ಭಾವನಾಭ್ರಾನ್ತಿಃ ಸರ್ವಂ ಶಶವಿಷಾಣವತ್ ॥ ೫೧॥
ಅಹಮೇವ ಸದಾ ಪೂರ್ಣಂ ಅಹಮೇವ ನಿರನ್ತರಮ್ ।
ನಿತ್ಯತೃಪ್ತೋ ನಿರಾಕಾರೋ ಬ್ರಹ್ಮೈವಾಹಂ ನ ಸಂಶಯಃ ॥ ೫೨॥
ಅಹಮೇವ ಪರಾನನ್ದ ಅಹಮೇವ ಕ್ಷಣಾನ್ತಿಕಃ ।
ಅಹಮೇವ ತ್ವಮೇವಾಹಂ ತ್ವಂ ಚಾಹಂ ನಾಸ್ತಿ ನಾಸ್ತಿ ಹಿ ॥ ೫೩॥
ವಾಚಾಮಗೋಚರೋಽಹಂ ವೈ ವಾಙ್ಮನೋ ನಾಸ್ತಿ ಕಲ್ಪಿತಮ್ ।
ಅಹಂ ಬ್ರಹ್ಮೈವ ಸರ್ವಾತ್ಮಾ ಅಹಂ ಬ್ರಹ್ಮೈವ ನಿರ್ಮಲಃ ॥ ೫೪॥
ಅಹಂ ಬ್ರಹ್ಮೈವ ಚಿನ್ಮಾತ್ರಂ ಅಹಂ ಬ್ರಹ್ಮೈವ ನಿತ್ಯಶಃ ।
ಇದಂ ಚ ಸರ್ವದಾ ನಾಸ್ತಿ ಅಹಮೇವ ಸದಾ ಸ್ಥಿರಃ ॥ ೫೫॥
ಇದಂ ಸುಖಮಹಂ ಬ್ರಹ್ಮ ಇದಂ ಸುಖಮಹಂ ಜಡಮ್ ।
ಇದಂ ಬ್ರಹ್ಮ ನ ಸನ್ದೇಹಃ ಸತ್ಯಂ ಸತ್ಯಂ ಪುನಃ ಪುನಃ ॥ ೫೬॥
ಇತ್ಯಾತ್ಮವೈಭವಂ ಪ್ರೋಕ್ತಂ ಸರ್ವಲೋಕೇಷು ದುರ್ಲಭಮ್ ।
ಸಕೃಚ್ಛ್ರವಣಮಾತ್ರೇಣ ಬ್ರಹ್ಮೈವ ಭವತಿ ಸ್ವಯಮ್ ॥ ೫೭॥
ಶಾನ್ತಿದಾನ್ತಿಪರಮಾ ಭವತಾನ್ತಾಃ
ಸ್ವಾನ್ತಭಾನ್ತಮನಿಶಂ ಶಶಿಕಾನ್ತಮ್ ।
ಅನ್ತಕಾನ್ತಕಮಹೋ ಕಲಯನ್ತಃ
ವೇದಮೌಲಿವಚನೈಃ ಕಿಲ ಶಾನ್ತಾಃ ॥ ೫೮॥

॥ ಇತಿ ಶ್ರೀಶಿವರಹಸ್ಯೇ ಶಙ್ಕರಾಖ್ಯೇ ಷಷ್ಠಾಂಶೇ ಋಭುನಿದಾಘಸಂವಾದೇ ಆತ್ಮವೈಭವಪ್ರಕರಣಂ ನಾಮ ವಿಂಶೋಽಧ್ಯಾಯಃ ॥

Special Thanks

The Sanskrit works, published by Sri Ramanasramam, have been approved to be posted on sanskritdocuments.org by permission of Sri V.S. Ramanan, President, Sri Ramanasramam.

Credits

Encoded by Anil Sharma anilandvijaya at gmail.com
Proofread by Sunder Hattangadi and Anil Sharma

https://sanskritdocuments.org

Send corrections to sanskrit at cheerful.com