Ribhu Gita - Siva Rahasya Purana Amsha 6

ಋಭುಗೀತಾ ೯ ॥ ಅಹಂ-ಬ್ರಹ್ಮಾಸ್ಮಿ ಪ್ರಕರಣ ನಿರೂಪಣಮ್ ॥

ನಿದಾಘಃ -

ಕುತ್ರ ವಾ ಭವತಾ ಸ್ನಾನಂ ಕ್ರಿಯತೇ ನಿತರಾಂ ಗುರೋ ।
ಸ್ನಾನಮನ್ತ್ರಂ ಸ್ನಾನಕಾಲಂ ತರ್ಪಣಂ ಚ ವದಸ್ವ ಮೇ ॥ ೧॥

ಋಭುಃ -

ಆತ್ಮಸ್ನಾನಂ ಮಹಾಸ್ನಾನಂ ನಿತ್ಯಸ್ನಾನಂ ನ ಚಾನ್ಯತಃ ।
ಇದಮೇವ ಮಹಾಸ್ನಾನಂ ಅಹಂ ಬ್ರಹ್ಮಾಸ್ಮಿ ನಿಶ್ಚಯಃ ॥ ೨॥
ಪರಬ್ರಹ್ಮಸ್ವರೂಪೋಽಹಂ ಪರಮಾನನ್ದಮಸ್ಮ್ಯಹಮ್ ।
ಇದಮೇವ ಮಹಾಸ್ನಾನಂ ಅಹಂ ಬ್ರಹ್ಮೇತಿ ನಿಶ್ಚಯಃ ॥ ೩॥
ಕೇವಲಂ ಜ್ಞಾನರೂಪೋಽಹಂ ಕೇವಲಂ ಪರಮೋಽಸ್ಮ್ಯಹಮ್ ।
ಕೇವಲಂ ಶಾನ್ತರೂಪೋಽಹಂ ಕೇವಲಂ ನಿರ್ಮಲೋಽಸ್ಮ್ಯಹಮ್ ॥ ೪॥
ಕೇವಲಂ ನಿತ್ಯರೂಪೋಽಹಂ ಕೇವಲಂ ಶಾಶ್ವತೋಽಸ್ಮ್ಯಹಮ್ ।
ಇದಮೇವ ಪರಂ ಬ್ರಹ್ಮ ಅಹಂ ಬ್ರಹ್ಮಾಸ್ಮಿ ಕೇವಲಮ್ ॥ ೫॥
ಕೇವಲಂ ಸರ್ವರೂಪೋಽಹಂ ಅಹಂತ್ಯಕ್ತೋಽಹಮಸ್ಮ್ಯಹಮ್ ।
ಇದಮೇವ ಪರಂ ಬ್ರಹ್ಮ ಅಹಂ ಬ್ರಹ್ಮಾಸ್ಮಿ ಕೇವಲಮ್ ॥ ೬॥
ಸರ್ವಹೀನಸ್ವರೂಪೋಽಹಂ ಚಿದಾಕಾಶೋಽಹಮಸ್ಮ್ಯಹಮ್ ।
ಇದಮೇವ ಪರಂ ಬ್ರಹ್ಮ ಅಹಂ ಬ್ರಹ್ಮಾಸ್ಮಿ ಕೇವಲಮ್ ॥ ೭॥
ಕೇವಲಂ ತುರ್ಯರೂಪೋಽಸ್ಮಿ ತುರ್ಯಾತೀತೋಽಸ್ಮಿ ಕೇವಲಮ್ ।
ಇದಮೇವ ಪರಂ ಬ್ರಹ್ಮ ಅಹಂ ಬ್ರಹ್ಮಾಸ್ಮಿ ಕೇವಲಮ್ ॥ ೮॥
ಸದಾ ಚೈತನ್ಯರೂಪೋಽಸ್ಮಿ ಸಚ್ಚಿದಾನನ್ದಮಸ್ಮ್ಯಹಮ್ ।
ಇದಮೇವ ಪರಂ ಬ್ರಹ್ಮ ಅಹಂ ಬ್ರಹ್ಮಾಸ್ಮಿ ಕೇವಲಮ್ ॥ ೯॥
ಕೇವಲಾಕಾರರೂಪೋಽಸ್ಮಿ ಶುದ್ಧರೂಪೋಽಸ್ಮ್ಯಹಂ ಸದಾ ।
ಇದಮೇವ ಪರಂ ಬ್ರಹ್ಮ ಅಹಂ ಬ್ರಹ್ಮಾಸ್ಮಿ ಕೇವಲಮ್ ॥ ೧೦॥
ಕೇವಲಂ ಜ್ಞಾನಶುದ್ಧೋಽಸ್ಮಿ ಕೇವಲೋಽಸ್ಮಿ ಪ್ರಿಯೋಽಸ್ಮ್ಯಹಮ್ ।
ಇದಮೇವ ಪರಂ ಬ್ರಹ್ಮ ಅಹಂ ಬ್ರಹ್ಮಾಸ್ಮಿ ಕೇವಲಮ್ ॥ ೧೧॥
ಕೇವಲಂ ನಿರ್ವಿಕಲ್ಪೋಽಸ್ಮಿ ಸ್ವಸ್ವರೂಪೋಽಹಮಸ್ಮಿ ಹ ।
ಇದಮೇವ ಪರಂ ಬ್ರಹ್ಮ ಅಹಂ ಬ್ರಹ್ಮಾಸ್ಮಿ ಕೇವಲಮ್ ॥ ೧೨॥
ಸದಾ ಸತ್ಸಙ್ಗರೂಪೋಽಸ್ಮಿ ಸರ್ವದಾ ಪರಮೋಽಸ್ಮ್ಯಹಮ್ ।
ಇದಮೇವ ಪರಂ ಬ್ರಹ್ಮ ಅಹಂ ಬ್ರಹ್ಮಾಸ್ಮಿ ಕೇವಲಮ್ ॥ ೧೩॥
ಸದಾ ಹ್ಯೇಕಸ್ವರೂಪೋಽಸ್ಮಿ ಸದಾಽನನ್ಯೋಽಸ್ಮ್ಯಹಂ ಸುಖಮ್ ।
ಇದಮೇವ ಪರಂ ಬ್ರಹ್ಮ ಅಹಂ ಬ್ರಹ್ಮಾಸ್ಮಿ ಕೇವಲಮ್ ॥ ೧೪॥
ಅಪರಿಚ್ಛಿನ್ನರೂಪೋಽಹಮ್ ಅನನ್ತಾನನ್ದಮಸ್ಮ್ಯಹಮ್ ।
ಇದಮೇವ ಪರಂ ಬ್ರಹ್ಮ ಅಹಂ ಬ್ರಹ್ಮಾಸ್ಮಿ ಕೇವಲಮ್ ॥ ೧೫॥
ಸತ್ಯಾನನ್ದಸ್ವರೂಪೋಽಹಂ ಚಿತ್ಪರಾನನ್ದಮಸ್ಮ್ಯಹಮ್ ।
ಇದಮೇವ ಪರಂ ಬ್ರಹ್ಮ ಅಹಂ ಬ್ರಹ್ಮಾಸ್ಮಿ ಕೇವಲಮ್ ॥ ೧೬॥
ಅನನ್ತಾನನ್ದರೂಪೋಽಹಮವಾಙ್ಮಾನಸಗೋಚರಃ ।
ಇದಮೇವ ಪರಂ ಬ್ರಹ್ಮ ಅಹಂ ಬ್ರಹ್ಮಾಸ್ಮಿ ಕೇವಲಮ್ ॥ ೧೭॥
ಬ್ರಹ್ಮಾನದಸ್ವರೂಪೋಽಹಂ ಸತ್ಯಾನನ್ದೋಽಸ್ಮ್ಯಹಂ ಸದಾ ।
ಇದಮೇವ ಪರಂ ಬ್ರಹ್ಮ ಅಹಂ ಬ್ರಹ್ಮಾಸ್ಮಿ ಕೇವಲಮ್ ॥ ೧೮॥
ಆತ್ಮಮಾತ್ರಸ್ವರೂಪೋಽಸ್ಮಿ ಆತ್ಮಾನನ್ದಮಯೋಽಸ್ಮ್ಯಹಮ್ ।
ಇದಮೇವ ಪರಂ ಬ್ರಹ್ಮ ಅಹಂ ಬ್ರಹ್ಮಾಸ್ಮಿ ಕೇವಲಮ್ ॥ ೧೯॥
ಆತ್ಮಪ್ರಕಾಶರೂಪೋಽಸ್ಮಿ ಆತ್ಮಜ್ಯೋತಿರಸೋಽಸ್ಮ್ಯಹಮ್ ।
ಇದಮೇವ ಪರಂ ಬ್ರಹ್ಮ ಅಹಂ ಬ್ರಹ್ಮಾಸ್ಮಿ ಕೇವಲಮ್ ॥ ೨೦॥
ಆದಿಮಧ್ಯಾನ್ತಹೀನೋಽಸ್ಮಿ ಆಕಾಶಸದೃಶೋಽಸ್ಮ್ಯಹಮ್ ।
ಇದಮೇವ ಪರಂ ಬ್ರಹ್ಮ ಅಹಂ ಬ್ರಹ್ಮಾಸ್ಮಿ ಕೇವಲಮ್ ॥ ೨೧॥
ನಿತ್ಯಸತ್ತಾಸ್ವರೂಪೋಽಸ್ಮಿ ನಿತ್ಯಮುಕ್ತೋಽಸ್ಮ್ಯಹಂ ಸದಾ ।
ಇದಮೇವ ಪರಂ ಬ್ರಹ್ಮ ಅಹಂ ಬ್ರಹ್ಮಾಸ್ಮಿ ಕೇವಲಮ್ ॥ ೨೨॥
ನಿತ್ಯಸಂಪೂರ್ಣರೂಪೋಽಸ್ಮಿ ನಿತ್ಯಂ ನಿರ್ಮನಸೋಽಸ್ಮ್ಯಹಮ್ ।
ಇದಮೇವ ಪರಂ ಬ್ರಹ್ಮ ಅಹಂ ಬ್ರಹ್ಮಾಸ್ಮಿ ಕೇವಲಮ್ ॥ ೨೩॥
ನಿತ್ಯಸತ್ತಾಸ್ವರೂಪೋಽಸ್ಮಿ ನಿತ್ಯಮುಕ್ತೋಽಸ್ಮ್ಯಹಂ ಸದಾ ।
ಇದಮೇವ ಪರಂ ಬ್ರಹ್ಮ ಅಹಂ ಬ್ರಹ್ಮಾಸ್ಮಿ ಕೇವಲಮ್ ॥ ೨೪॥
ನಿತ್ಯಶಬ್ದಸ್ವರೂಪೋಽಸ್ಮಿ ಸರ್ವಾತೀತೋಽಸ್ಮ್ಯಹಂ ಸದಾ ।
ಇದಮೇವ ಪರಂ ಬ್ರಹ್ಮ ಅಹಂ ಬ್ರಹ್ಮಾಸ್ಮಿ ಕೇವಲಮ್ ॥ ೨೫॥
ರೂಪಾತೀತಸ್ವರೂಪೋಽಸ್ಮಿ ವ್ಯೋಮರೂಪೋಽಸ್ಮ್ಯಹಂ ಸದಾ ।
ಇದಮೇವ ಪರಂ ಬ್ರಹ್ಮ ಅಹಂ ಬ್ರಹ್ಮಾಸ್ಮಿ ಕೇವಲಮ್ ॥ ೨೬॥
ಭೂತಾನನ್ದಸ್ವರೂಪೋಽಸ್ಮಿ ಭಾಷಾನನ್ದೋಽಸ್ಮ್ಯಹಂ ಸದಾ ।
ಇದಮೇವ ಪರಂ ಬ್ರಹ್ಮ ಅಹಂ ಬ್ರಹ್ಮಾಸ್ಮಿ ಕೇವಲಮ್ ॥ ೨೭॥
ಸರ್ವಾಧಿಷ್ಠಾನರೂಪೋಽಸ್ಮಿ ಸರ್ವದಾ ಚಿದ್ಘನೋಽಸ್ಮ್ಯಹಮ್ ।
ಇದಮೇವ ಪರಂ ಬ್ರಹ್ಮ ಅಹಂ ಬ್ರಹ್ಮಾಸ್ಮಿ ಕೇವಲಮ್ ॥ ೨೮॥
ದೇಹಭಾವವಿಹೀನೋಽಹಂ ಚಿತ್ತಹೀನೋಽಹಮೇವ ಹಿ ।
ಇದಮೇವ ಪರಂ ಬ್ರಹ್ಮ ಅಹಂ ಬ್ರಹ್ಮಾಸ್ಮಿ ಕೇವಲಮ್ ॥ ೨೯॥
ದೇಹವೃತ್ತಿವಿಹೀನೋಽಹಂ ಮನ್ತ್ರೈವಾಹಮಹಂ ಸದಾ ।
ಇದಮೇವ ಪರಂ ಬ್ರಹ್ಮ ಅಹಂ ಬ್ರಹ್ಮಾಸ್ಮಿ ಕೇವಲಮ್ ॥ ೩೦॥
ಸರ್ವದೃಶ್ಯವಿಹೀನೋಽಸ್ಮಿ ದೃಶ್ಯರೂಪೋಽಹಮೇವ ಹಿ ।
ಇದಮೇವ ಪರಂ ಬ್ರಹ್ಮ ಅಹಂ ಬ್ರಹ್ಮಾಸ್ಮಿ ಕೇವಲಮ್ ॥ ೩೧॥
ಸರ್ವದಾ ಪೂರ್ಣರೂಪೋಽಸ್ಮಿ ನಿತ್ಯತೃಪ್ತೋಽಸ್ಮ್ಯಹಂ ಸದಾ ।
ಇದಮೇವ ಪರಂ ಬ್ರಹ್ಮ ಅಹಂ ಬ್ರಹ್ಮಾಸ್ಮಿ ಕೇವಲಮ್ ॥ ೩೨॥
ಇದಂ ಬ್ರಹ್ಮೈವ ಸರ್ವಸ್ಯ ಅಹಂ ಚೈತನ್ಯಮೇವ ಹಿ ।
ಇದಮೇವ ಪರಂ ಬ್ರಹ್ಮ ಅಹಂ ಬ್ರಹ್ಮಾಸ್ಮಿ ಕೇವಲಮ್ ॥ ೩೩॥
ಅಹಮೇವಾಹಮೇವಾಸ್ಮಿ ನಾನ್ಯತ್ ಕಿಞ್ಚಿಚ್ಚ ವಿದ್ಯತೇ ।
ಇದಮೇವ ಪರಂ ಬ್ರಹ್ಮ ಅಹಂ ಬ್ರಹ್ಮಾಸ್ಮಿ ಕೇವಲಮ್ ॥ ೩೪॥
ಅಹಮೇವ ಮಹಾನಾತ್ಮಾ ಅಹಮೇವ ಪರಾಯಣಮ್ ।
ಇದಮೇವ ಪರಂ ಬ್ರಹ್ಮ ಅಹಂ ಬ್ರಹ್ಮಾಸ್ಮಿ ಕೇವಲಮ್ ॥ ೩೫॥
ಅಹಮೇವ ಮಹಾಶೂನ್ಯಮಿತ್ಯೇವಂ ಮನ್ತ್ರಮುತ್ತಮಮ್ ।
ಇದಮೇವ ಪರಂ ಬ್ರಹ್ಮ ಅಹಂ ಬ್ರಹ್ಮಾಸ್ಮಿ ಕೇವಲಮ್ ॥ ೩೬॥
ಅಹಮೇವಾನ್ಯವದ್ಭಾಮಿ ಅಹಮೇವ ಶರೀರವತ್ ।
ಇದಮೇವ ಪರಂ ಬ್ರಹ್ಮ ಅಹಂ ಬ್ರಹ್ಮಾಸ್ಮಿ ಕೇವಲಮ್ ॥ ೩೭॥
ಅಹಂ ಚ ಶಿಷ್ಯವದ್ಭಾಮಿ ಅಹಂ ಲೋಕತ್ರಯಾದಿವತ್ ।
ಇದಮೇವ ಪರಂ ಬ್ರಹ್ಮ ಅಹಂ ಬ್ರಹ್ಮಾಸ್ಮಿ ಕೇವಲಮ್ ॥ ೩೮॥
ಅಹಂ ಕಾಲತ್ರಯಾತೀತಃ ಅಹಂ ವೇದೈರುಪಾಸಿತಃ ।
ಇದಮೇವ ಪರಂ ಬ್ರಹ್ಮ ಅಹಂ ಬ್ರಹ್ಮಾಸ್ಮಿ ಕೇವಲಮ್ ॥ ೩೯॥
ಅಹಂ ಶಾಸ್ತ್ರೇಷು ನಿರ್ಣೀತ ಅಹಂ ಚಿತ್ತೇ ವ್ಯವಸ್ಥಿತಃ ।
ಇದಮೇವ ಪರಂ ಬ್ರಹ್ಮ ಅಹಂ ಬ್ರಹ್ಮಾಸ್ಮಿ ಕೇವಲಮ್ ॥ ೪೦॥
ಮತ್ತ್ಯಕ್ತಂ ನಾಸ್ತಿ ಕಿಞ್ಚಿದ್ವಾ ಮತ್ತ್ಯಕ್ತಂ ಪೃಥಿವೀ ಚ ಯಾ ।
ಇದಮೇವ ಪರಂ ಬ್ರಹ್ಮ ಅಹಂ ಬ್ರಹ್ಮಾಸ್ಮಿ ಕೇವಲಮ್ ॥ ೪೧॥
ಮಯಾತಿರಿಕ್ತಂ ತೋಯಂ ವಾ ಇತ್ಯೇವಂ ಮನ್ತ್ರಮುತ್ತಮಮ್ ।
ಇದಮೇವ ಪರಂ ಬ್ರಹ್ಮ ಅಹಂ ಬ್ರಹ್ಮಾಸ್ಮಿ ಕೇವಲಮ್ ॥ ೪೨॥
ಅಹಂ ಬ್ರಹ್ಮಾಸ್ಮಿ ಶುದ್ಧೋಽಸ್ಮಿ ನಿತ್ಯಶುದ್ಧೋಽಸ್ಮ್ಯಹಂ ಸದಾ ।
ನಿರ್ಗುಣೋಽಸ್ಮಿ ನಿರೀಹೋಽಸ್ಮಿ ಇತ್ಯೇವಂ ಮನ್ತ್ರಮುತ್ತಮಮ್ ॥ ೪೩॥
ಹರಿಬ್ರಹ್ಮಾದಿರೂಪೋಽಸ್ಮಿ ಏತದ್ಭೇದೋಽಪಿ ನಾಸ್ಮ್ಯಹಮ್ ।
ಕೇವಲಂ ಬ್ರಹ್ಮಮಾತ್ರೋಽಸ್ಮಿ ಕೇವಲೋಽಸ್ಮ್ಯಜಯೋಽಸ್ಮ್ಯಹಮ್ ॥ ೪೪॥
ಸ್ವಯಮೇವ ಸ್ವಯಂಭಾಸ್ಯಂ ಸ್ವಯಮೇವ ಹಿ ನಾನ್ಯತಃ ।
ಸ್ವಯಮೇವಾತ್ಮನಿ ಸ್ವಸ್ಥಃ ಇತ್ಯೇವಂ ಮನ್ತ್ರಮುತ್ತಮಮ್ ॥ ೪೫॥
ಸ್ವಯಮೇವ ಸ್ವಯಂ ಭುಙ್ಕ್ಷ್ವ ಸ್ವಯಮೇವ ಸ್ವಯಂ ರಮೇ ।
ಸ್ವಯಮೇವ ಸ್ವಯಂಜ್ಯೋತಿಃ ಸ್ವಯಮೇವ ಸ್ವಯಂ ರಮೇ ॥ ೪೬॥
ಸ್ವಸ್ಯಾತ್ಮನಿ ಸ್ವಯಂ ರಂಸ್ಯೇ ಸ್ವಾತ್ಮನ್ಯೇವಾವಲೋಕಯೇ ।
ಸ್ವಾತ್ಮನ್ಯೇವ ಸುಖೇನಾಸಿ ಇತ್ಯೇವಂ ಮನ್ತ್ರಮುತ್ತಮಮ್ ॥ ೪೭॥
ಸ್ವಚೈತನ್ಯೇ ಸ್ವಯಂ ಸ್ಥಾಸ್ಯೇ ಸ್ವಾತ್ಮರಾಜ್ಯೇ ಸುಖಂ ರಮೇ ।
ಸ್ವಾತ್ಮಸಿಂಹಾಸನೇ ತಿಷ್ಠೇ ಇತ್ಯೇವಂ ಮನ್ತ್ರಮುತ್ತಮಮ್ ॥ ೪೮॥
ಸ್ವಾತ್ಮಮನ್ತ್ರಂ ಸದಾ ಪಶ್ಯನ್ ಸ್ವಾತ್ಮಜ್ಞಾನಂ ಸದಾಽಭ್ಯಸನ್ ।
ಅಹಂ ಬ್ರಹ್ಮಾಸ್ಮ್ಯಹಂ ಮನ್ತ್ರಃ ಸ್ವಾತ್ಮಪಾಪಂ ವಿನಾಶಯೇತ್ ॥ ೪೯॥
ಅಹಂ ಬ್ರಹ್ಮಾಸ್ಮ್ಯಹಂ ಮನ್ತ್ರೋ ದ್ವೈತದೋಷಂ ವಿನಾಶಯೇತ್ ।
ಅಹಂ ಬ್ರಹ್ಮಾಸ್ಮ್ಯಹಂ ಮನ್ತ್ರೋ ಭೇದದುಃಖಂ ವಿನಾಶಯೇತ್ ॥ ೫೦॥
ಅಹಂ ಬ್ರಹ್ಮಾಸ್ಮ್ಯಹಂ ಮನ್ತ್ರಶ್ಚಿನ್ತಾರೋಗಂ ವಿನಾಶಯೇತ್ ।
ಅಹಂ ಬ್ರಹ್ಮಾಸ್ಮ್ಯಹಂ ಮನ್ತ್ರೋ ಬುದ್ಧಿವ್ಯಾಧಿಂ ವಿನಾಶಯೇತ್ ॥ ೫೧॥
ಅಹಂ ಬ್ರಹ್ಮಾಸ್ಮ್ಯಹಂ ಮನ್ತ್ರ ಆಧಿವ್ಯಾಧಿಂ ವಿನಾಶಯೇತ್ ।
ಅಹಂ ಬ್ರಹ್ಮಾಸ್ಮ್ಯಹಂ ಮನ್ತ್ರಃ ಸರ್ವಲೋಕಂ ವಿನಾಶಯೇತ್ ॥ ೫೨॥
ಅಹಂ ಬ್ರಹ್ಮಾಸ್ಮ್ಯಹಂ ಮನ್ತ್ರಃ ಕಾಮದೋಷಂ ವಿನಾಶಯೇತ್ ।
ಅಹಂ ಬ್ರಹ್ಮಾಸ್ಮ್ಯಹಂ ಮನ್ತ್ರಃ ಕ್ರೋಧದೋಷಂ ವಿನಾಶಯೇತ್ ॥ ೫೩॥
ಅಹಂ ಬ್ರಹ್ಮಾಸ್ಮ್ಯಹಂ ಮನ್ತ್ರಶ್ಚಿನ್ತಾದೋಷಂ ವಿನಾಶಯೇತ್ ।
ಅಹಂ ಬ್ರಹ್ಮಾಸ್ಮ್ಯಹಂ ಮನ್ತ್ರಃ ಸಙ್ಕಲ್ಪಂ ಚ ವಿನಾಶಯೇತ್ ॥ ೫೪॥
ಅಹಂ ಬ್ರಹ್ಮಾಸ್ಮ್ಯಹಂ ಮನ್ತ್ರಃ ಇದಂ ದುಃಖಂ ವಿನಾಶಯೇತ್ ।
ಅಹಂ ಬ್ರಹ್ಮಾಸ್ಮ್ಯಹಂ ಮನ್ತ್ರಃ ಅವಿವೇಕಮಲಂ ದಹೇತ್ ॥ ೫೫॥
ಅಹಂ ಬ್ರಹ್ಮಾಸ್ಮ್ಯಹಂ ಮನ್ತ್ರಃ ಅಜ್ಞಾನಧ್ವಂಸಮಾಚರೇತ್ ।
ಅಹಂ ಬ್ರಹ್ಮಾಸ್ಮ್ಯಹಂ ಮನ್ತ್ರಃ ಕೋಟಿದೋಷಂ ವಿನಾಶಯೇತ್ ॥ ೫೬॥
ಅಹಂ ಬ್ರಹ್ಮಾಸ್ಮ್ಯಹಂ ಮನ್ತ್ರಃ ಸರ್ವತನ್ತ್ರಂ ವಿನಾಶಯೇತ್ ।
ಅಹಂ ಬ್ರಹ್ಮಾಸ್ಮ್ಯಹಂ ಮನ್ತ್ರೋ ದೇಹದೋಷಂ ವಿನಾಶಯೇತ್ ॥ ೫೭॥
ಅಹಂ ಬ್ರಹ್ಮಾಸ್ಮ್ಯಹಂ ಮನ್ತ್ರಃ ದೃಷ್ಟಾದೃಷ್ಟಂ ವಿನಾಶಯೇತ್ ।
ಅಹಂ ಬ್ರಹ್ಮಾಸ್ಮ್ಯಹಂ ಮನ್ತ್ರ ಆತ್ಮಜ್ಞಾನಪ್ರಕಾಶಕಮ್ ॥ ೫೮॥
ಅಹಂ ಬ್ರಹ್ಮಾಸ್ಮ್ಯಹಂ ಮನ್ತ್ರ ಆತ್ಮಲೋಕಜಯಪ್ರದಮ್ ।
ಅಹಂ ಬ್ರಹ್ಮಾಸ್ಮ್ಯಹಂ ಮನ್ತ್ರ ಅಸತ್ಯಾದಿ ವಿನಾಶಕಮ್ ॥ ೫೯॥
ಅಹಂ ಬ್ರಹ್ಮಾಸ್ಮ್ಯಹಂ ಮನ್ತ್ರಃ ಅನ್ಯತ್ ಸರ್ವಂ ವಿನಾಶಯೇತ್ ।
ಅಹಂ ಬ್ರಹ್ಮಾಸ್ಮ್ಯಹಂ ಮನ್ತ್ರ ಅಪ್ರತರ್ಕ್ಯಸುಖಪ್ರದಮ್ ॥ ೬೦॥
ಅಹಂ ಬ್ರಹ್ಮಾಸ್ಮ್ಯಹಂ ಮನ್ತ್ರಃ ಅನಾತ್ಮಜ್ಞಾನಮಾಹರೇತ್ ।
ಅಹಂ ಬ್ರಹ್ಮಾಸ್ಮ್ಯಹಂ ಮನ್ತ್ರೋ ಜ್ಞಾನಾನನ್ದಂ ಪ್ರಯಚ್ಛತಿ ॥ ೬೧॥
ಸಪ್ತಕೋಟಿ ಮಹಾಮನ್ತ್ರಾ ಜನ್ಮಕೋಟಿಶತಪ್ರದಾಃ ।
ಸರ್ವಮನ್ತ್ರಾನ್ ಸಮುತ್ಸೃಜ್ಯ ಜಪಮೇನಂ ಸಮಭ್ಯಸೇತ್ ॥ ೬೨॥
ಸದ್ಯೋ ಮೋಕ್ಷಮವಾಪ್ನೋತಿ ನಾತ್ರ ಸನ್ದೇಹಮಸ್ತಿ ಮೇ ।
ಮನ್ತ್ರಪ್ರಕರಣೇ ಪ್ರೋಕ್ತಂ ರಹಸ್ಯಂ ವೇದಕೋಟಿಷು ॥ ೬೩॥
ಯಃ ಶೃಣೋತಿ ಸಕೃದ್ವಾಪಿ ಬ್ರಹ್ಮೈವ ಭವತಿ ಸ್ವಯಮ್ ।
ನಿತ್ಯಾನನ್ದಮಯಃ ಸ ಏವ ಪರಮಾನನ್ದೋದಯಃ ಶಾಶ್ವತೋ
ಯಸ್ಮಾನ್ನಾನ್ಯದತೋಽನ್ಯದಾರ್ತಮಖಿಲಂ ತಜ್ಜಂ ಜಗತ್ ಸರ್ವದಃ ।
ಯೋ ವಾಚಾ ಮನಸಾ ತಥೇನ್ದ್ರಿಯಗಣೈರ್ದೇಹೋಽಪಿ ವೇದ್ಯೋ ನ ಚೇ-
ದಚ್ಛೇದ್ಯೋ ಭವವೈದ್ಯ ಈಶ ಇತಿ ಯಾ ಸಾ ಧೀಃ ಪರಂ ಮುಕ್ತಯೇ ॥ ೬೪॥

॥ ಇತಿ ಶ್ರೀಶಿವರಹಸ್ಯೇ ಶಙ್ಕರಾಖ್ಯೇ ಷಷ್ಠಾಂಶೇ ಋಭುನಿದಾಘಸಂವಾದೇ ಅಹಂಬ್ರಹ್ಮಾಸ್ಮಿಪ್ರಕರಣನಿರೂಪಣಂ ನಾಮ ನವಮೋಽಧ್ಯಾಯಃ ॥

Special Thanks

The Sanskrit works, published by Sri Ramanasramam, have been approved to be posted on sanskritdocuments.org by permission of Sri V.S. Ramanan, President, Sri Ramanasramam.

Credits

Encoded by Anil Sharma anilandvijaya at gmail.com
Proofread by Sunder Hattangadi and Anil Sharma

https://sanskritdocuments.org

Send corrections to sanskrit at cheerful.com