ಋಭುಗೀತಾ ೧೪ ॥ ಆತ್ಮಾನನ್ದ ಪ್ರಕರಣ ವರ್ಣನಮ್ ॥

ಋಭುಃ -

• ಶೃಣುಷ್ವ ಸರ್ವಂ ಬ್ರಹ್ಮೈವ ಸತ್ಯಂ ಸತ್ಯಂ ಶಿವಂ ಶಪೇ ।
• ನಿಶ್ಚಯೇನಾತ್ಮಯೋಗೀನ್ದ್ರ ಅನ್ಯತ್ ಕಿಞ್ಚಿನ್ನ ಕಿಞ್ಚನ ॥ ೧॥
• ಅಣುಮಾತ್ರಮಸದ್ರೂಪಂ ಅಣುಮಾತ್ರಮಿದಂ ಧ್ರುವಮ್ ।
• ಅಣುಮಾತ್ರಶರೀರಂ ಚ ಅನ್ಯತ್ ಕಿಞ್ಚಿನ್ನ ಕಿಞ್ಚನ ॥ ೨॥
• ಸರ್ವಮಾತ್ಮೈವ ಶುದ್ಧಾತ್ಮಾ ಸರ್ವಂ ಚಿನ್ಮಾತ್ರಮದ್ವಯಮ್ ।
• ನಿತ್ಯನಿರ್ಮಲಶುದ್ಧಾತ್ಮಾ ಅನ್ಯತ್ ಕಿಞ್ಚಿನ್ನ ಕಿಞ್ಚನ ॥ ೩॥
• ಅಣುಮಾತ್ರೇ ವಿಚಿನ್ತ್ಯಾತ್ಮಾ ಸರ್ವಂ ನ ಹ್ಯಣುಮಾತ್ರಕಮ್ ।
• ಅಣುಮಾತ್ರಮಸಂಕಲ್ಪೋ ಅನ್ಯತ್ ಕಿಞ್ಚಿನ್ನ ಕಿಞ್ಚನ ॥ ೪॥
• ಚೈತನ್ಯಮಾತ್ರಂ ಸಙ್ಕಲ್ಪಂ ಚೈತನ್ಯಂ ಪರಮಂ ಪದಮ್ ।
• ಆನನ್ದಂ ಪರಮಂ ಮಾನಂ ಇದಂ ದೃಶ್ಯಂ ನ ಕಿಞ್ಚನ ॥ ೫॥
• ಚೈತನ್ಯಮಾತ್ರಮೋಂಕಾರಃ ಚೈತನ್ಯಂ ಸಕಲಂ ಸ್ವಯಮ್ ।
• ಆನನ್ದಂ ಪರಮಂ ಮಾನಂ ಇದಂ ದೃಶ್ಯಂ ನ ಕಿಞ್ಚನ ॥ ೬॥
• ಆನನ್ದಶ್ಚಾಹಮೇವಾಸ್ಮಿ ಅಹಮೇವ ಚಿದವ್ಯಯಃ ।
• ಆನನ್ದಂ ಪರಮಂ ಮಾನಂ ಇದಂ ದೃಶ್ಯಂ ನ ಕಿಞ್ಚನ ॥ ೭॥
• ಅಹಮೇವ ಹಿ ಗುಪ್ತಾತ್ಮಾ ಅಹಮೇವ ನಿರನ್ತರಮ್ ।
• ಆನನ್ದಂ ಪರಮಂ ಮಾನಂ ಇದಂ ದೃಶ್ಯಂ ನ ಕಿಞ್ಚನ ॥ ೮॥
• ಅಹಮೇವ ಪರಂ ಬ್ರಹ್ಮ ಅಹಮೇವ ಗುರೋರ್ಗುರುಃ ।
• ಆನನ್ದಂ ಪರಮಂ ಮಾನಂ ಇದಂ ದೃಶ್ಯಂ ನ ಕಿಞ್ಚನ ॥ ೯॥
• ಅಹಮೇವಾಖಿಲಾಧಾರ ಅಹಮೇವ ಸುಖಾತ್ ಸುಖಮ್ ।
• ಆನನ್ದಂ ಪರಮಂ ಮಾನಂ ಇದಂ ದೃಶ್ಯಂ ನ ಕಿಞ್ಚನ ॥ ೧೦॥
• ಅಹಮೇವ ಪರಂ ಜ್ಯೋತಿರಹಮೇವಾಖಿಲಾತ್ಮಕಃ ।
• ಆನನ್ದಂ ಪರಮಂ ಮಾನಂ ಇದಂ ದೃಶ್ಯಂ ನ ಕಿಞ್ಚನ ॥ ೧೧॥
• ಅಹಮೇವ ಹಿ ತೃಪ್ತಾತ್ಮಾ ಅಹಮೇವ ಹಿ ನಿರ್ಗುಣಃ ।
• ಆನನ್ದಂ ಪರಮಂ ಮಾನಂ ಇದಂ ದೃಶ್ಯಂ ನ ಕಿಞ್ಚನ ॥ ೧೨॥
• ಅಹಮೇವ ಹಿ ಪೂರ್ಣಾತ್ಮಾ ಅಹಮೇವ ಪುರಾತನಃ ।
• ಆನನ್ದಂ ಪರಮಂ ಮಾನಂ ಇದಂ ದೃಶ್ಯಂ ನ ಕಿಞ್ಚನ ॥ ೧೩॥
• ಅಹಮೇವ ಹಿ ಶಾನ್ತಾತ್ಮಾ ಅಹಮೇವ ಹಿ ಶಾಶ್ವತಃ ।
• ಆನನ್ದಂ ಪರಮಂ ಮಾನಂ ಇದಂ ದೃಶ್ಯಂ ನ ಕಿಞ್ಚನ ॥ ೧೪॥
• ಅಹಮೇವ ಹಿ ಸರ್ವತ್ರ ಅಹಮೇವ ಹಿ ಸುಸ್ಥಿರಃ ।
• ಆನನ್ದಂ ಪರಮಂ ಮಾನಂ ಇದಂ ದೃಶ್ಯಂ ನ ಕಿಞ್ಚನ ॥ ೧೫॥
• ಅಹಮೇವ ಹಿ ಜೀವಾತ್ಮಾ ಅಹಮೇವ ಪರಾತ್ಪರಃ ।
• ಆನನ್ದಂ ಪರಮಂ ಮಾನಂ ಇದಂ ದೃಶ್ಯಂ ನ ಕಿಞ್ಚನ ॥ ೧೬॥
• ಅಹಮೇವ ಹಿ ವಾಕ್ಯಾರ್ಥೋ ಅಹಮೇವ ಹಿ ಶಙ್ಕರಃ ।
• ಆನನ್ದಂ ಪರಮಂ ಮಾನಂ ಇದಂ ದೃಶ್ಯಂ ನ ಕಿಞ್ಚನ ॥ ೧೭॥
• ಅಹಮೇವ ಹಿ ದುರ್ಲಕ್ಷ್ಯ ಅಹಮೇವ ಪ್ರಕಾಶಕಃ ।
• ಆನನ್ದಂ ಪರಮಂ ಮಾನಂ ಇದಂ ದೃಶ್ಯಂ ನ ಕಿಞ್ಚನ ॥ ೧೮॥
• ಅಹಮೇವಾಹಮೇವಾಹಂ ಅಹಮೇವ ಸ್ವಯಂ ಸ್ವಯಮ್ ।
• ಅಹಮೇವ ಪರಾನನ್ದೋಽಹಮೇವ ಹಿ ಚಿನ್ಮಯಃ ॥ ೧೯॥
• ಅಹಮೇವ ಹಿ ಶುದ್ಧಾತ್ಮಾ ಅಹಮೇವ ಹಿ ಸನ್ಮಯಃ ।
• ಅಹಮೇವ ಹಿ ಶೂನ್ಯಾತ್ಮಾ ಅಹಮೇವ ಹಿ ಸರ್ವಗಃ ॥ ೨೦॥
• ಅಹಮೇವ ಹಿ ವೇದಾನ್ತಃ ಅಹಮೇವ ಹಿ ಚಿತ್ಪರಃ ॥ ೨೧॥
• ಅಹಮೇವ ಹಿ ಚಿನ್ಮಾತ್ರಂ ಅಹಮೇವ ಹಿ ಚಿನ್ಮಯಃ ।
• ಅನ್ಯನ್ನ ಕಿಞ್ಚಿತ್ ಚಿದ್ರೂಪಾದಹಂ ಬಾಹ್ಯವಿವರ್ಜಿತಃ ॥ ೨೨॥
• ಅಹಂ ನ ಕಿಞ್ಚಿದ್ ಬ್ರಹ್ಮಾತ್ಮಾ ಅಹಂ ನಾನ್ಯದಹಂ ಪರಮ್ ।
• ನಿತ್ಯಶುದ್ಧವಿಮುಕ್ತೋಽಹಂ ನಿತ್ಯತೃಪ್ತೋ ನಿರಞ್ಜನಃ ॥ ೨೩॥
• ಆನನ್ದಂ ಪರಮಾನನ್ದಮನ್ಯತ್ ಕಿಞ್ಚಿನ್ನ ಕಿಞ್ಚನ ।
• ನಾಸ್ತಿ ಕಿಞ್ಚಿನ್ನಾಸ್ತಿ ಕಿಞ್ಚಿತ್ ನಾಸ್ತಿ ಕಿಞ್ಚಿತ್ ಪರಾತ್ಪರಾತ್ ॥ ೨೪॥
• ಆತ್ಮೈವೇದಂ ಜಗತ್ ಸರ್ವಮಾತ್ಮೈವೇದಂ ಮನೋಭವಮ್ ।
• ಆತ್ಮೈವೇದಂ ಸುಖಂ ಸರ್ವಂ ಆತ್ಮೈವೇದಮಿದಂ ಜಗತ್ ॥ ೨೫॥
• ಬ್ರಹ್ಮೈವ ಸರ್ವಂ ಚಿನ್ಮಾತ್ರಂ ಅಹಂ ಬ್ರಹ್ಮೈವ ಕೇವಲಮ್ ।
• ಆನನ್ದಂ ಪರಮಂ ಮಾನಂ ಇದಂ ದೃಶ್ಯಂ ನ ಕಿಞ್ಚನ ॥ ೨೬॥
• ದೃಶ್ಯಂ ಸರ್ವಂ ಪರಂ ಬ್ರಹ್ಮ ದೃಶ್ಯಂ ನಾಸ್ತ್ಯೇವ ಸರ್ವದಾ ।
• ಬ್ರಹ್ಮೈವ ಸರ್ವಸಙ್ಕಲ್ಪೋ ಬ್ರಹ್ಮೈವ ನ ಪರಂ ಕ್ವಚಿತ್ ।
• ಆನನ್ದಂ ಪರಮಂ ಮಾನಂ ಇದಂ ದೃಶ್ಯಂ ನ ಕಿಞ್ಚನ ॥ ೨೭॥
• ಬ್ರಹ್ಮೈವ ಬ್ರಹ್ಮ ಚಿದ್ರೂಪಂ ಚಿದೇವಂ ಚಿನ್ಮಯಂ ಜಗತ್ ।
• ಅಸದೇವ ಜಗತ್ಸರ್ವಂ ಅಸದೇವ ಪ್ರಪಞ್ಚಕಮ್ ॥ ೨೮॥
• ಅಸದೇವಾಹಮೇವಾಸ್ಮಿ ಅಸದೇವ ತ್ವಮೇವ ಹಿ ।
• ಅಸದೇವ ಮನೋವೃತ್ತಿರಸದೇವ ಗುಣಾಗುಣೌ ॥ ೨೯॥
• ಅಸದೇವ ಮಹೀ ಸರ್ವಾ ಅಸದೇವ ಜಲಂ ಸದಾ ।
• ಅಸದೇವ ಜಗತ್ಖಾನಿ ಅಸದೇವ ಚ ತೇಜಕಮ್ ॥ ೩೦॥
• ಅಸದೇವ ಸದಾ ವಾಯುರಸದೇವೇದಮಿತ್ಯಪಿ ।
• ಅಹಙ್ಕಾರಮಸದ್ಬುದ್ಧಿರ್ಬ್ರಹ್ಮೈವ ಜಗತಾಂ ಗಣಃ ॥ ೩೧॥
• ಅಸದೇವ ಸದಾ ಚಿತ್ತಮಾತ್ಮೈವೇದಂ ನ ಸಂಶಯಃ ।
• ಅಸದೇವಾಸುರಾಃ ಸರ್ವೇ ಅಸದೇವೇದಶ್ವರಾಕೃತಿಃ ॥ ೩೨॥
• ಅಸದೇವ ಸದಾ ವಿಶ್ವಂ ಅಸದೇವ ಸದಾ ಹರಿಃ ।
• ಅಸದೇವ ಸದಾ ಬ್ರಹ್ಮಾ ತತ್ಸೃಷ್ಟಿರಸದೇವ ಹಿ ॥ ೩೩॥
• ಅಸದೇವ ಮಹಾದೇವಃ ಅಸದೇವ ಗಣೇಶ್ವರಃ ।
• ಅಸದೇವ ಸದಾ ಚೋಮಾ ಅಸತ್ ಸ್ಕನ್ದೋ ಗಣೇಶ್ವರಾಃ ॥ ೩೪॥
• ಅಸದೇವ ಸದಾ ಜೀವ ಅಸದೇವ ಹಿ ದೇಹಕಮ್ ।
• ಅಸದೇವ ಸದಾ ವೇದಾ ಅಸದ್ದೇಹಾನ್ತಮೇವ ಚ ॥ ೩೫॥
• ಧರ್ಮಶಾಸ್ತ್ರಂ ಪುರಾಣಂ ಚ ಅಸತ್ಯೇ ಸತ್ಯವಿಭ್ರಮಃ ।
• ಅಸದೇವ ಹಿ ಸರ್ವಂ ಚ ಅಸದೇವ ಪರಂಪರಾ ॥ ೩೬॥
• ಅಸದೇವೇದಮಾದ್ಯನ್ತಮಸದೇವ ಮುನೀಶ್ವರಾಃ ।
• ಅಸದೇವ ಸದಾ ಲೋಕಾ ಲೋಕ್ಯಾ ಅಪ್ಯಸದೇವ ಹಿ ॥ ೩೭॥
• ಅಸದೇವ ಸುಖಂ ದುಃಖಂ ಅಸದೇವ ಜಯಾಜಯೌ ।
• ಅಸದೇವ ಪರಂ ಬನ್ಧಮಸನ್ಮುಕ್ತಿರಪಿ ಧ್ರುವಮ್ ॥ ೩೮॥
• ಅಸದೇವ ಮೃತಿರ್ಜನ್ಮ ಅಸದೇವ ಜಡಾಜಡಮ್ ।
• ಅಸದೇವ ಜಗತ್ ಸರ್ವಮಸದೇವಾತ್ಮಭಾವನಾ ॥ ೩೯॥
• ಅಸದೇವ ಚ ರೂಪಾಣಿ ಅಸದೇವ ಪದಂ ಶುಭಮ್ ।
• ಅಸದೇವ ಸದಾ ಚಾಹಮಸದೇವ ತ್ವಮೇವ ಹಿ ॥ ೪೦॥
• ಅಸದೇವ ಹಿ ಸರ್ವತ್ರ ಅಸದೇವ ಚಲಾಚಲಮ್ ।
• ಅಸಚ್ಚ ಸಕಲಂ ಭೂತಮಸತ್ಯಂ ಸಕಲಂ ಫಲಮ್ ॥ ೪೧॥
• ಅಸತ್ಯಮಖಿಲಂ ವಿಶ್ವಮಸತ್ಯಮಖಿಲೋ ಗುಣಃ ।
• ಅಸತ್ಯಮಖಿಲಂ ಶೇಷಮಸತ್ಯಮಖಿಲಂ ಜಗತ್ ॥ ೪೨॥
• ಅಸತ್ಯಮಖಿಲಂ ಪಾಪಂ ಅಸತ್ಯಂ ಶ್ರವಣತ್ರಯಮ್ ।
• ಅಸತ್ಯಂ ಚ ಸಜಾತೀಯವಿಜಾತೀಯಮಸತ್ ಸದಾ ॥ ೪೩॥
• ಅಸತ್ಯಮಧಿಕಾರಾಶ್ಚ ಅನಿತ್ಯಾ ವಿಷಯಾಃ ಸದಾ ।
• ಅಸದೇವ ಹಿ ದೇವಾದ್ಯಾ ಅಸದೇವ ಪ್ರಯೋಜನಮ್ ॥ ೪೪॥
• ಅಸದೇವ ಶಮಂ ನಿತ್ಯಂ ಅಸದೇವ ಶಮೋಽನಿಶಮ್ ।
• ಅಸದೇವ ಸಸನ್ದೇಹಂ ಅಸದ್ಯುದ್ಧಂ ಸುರಾಸುರಮ್ ॥ ೪೫॥var was ಅಸದೇವ ಚ ಸನ್ದೇಹಂ
• ಅಸದೇವೇಶಭಾವಂ ಚಾಸದೇವೋಪಾಸ್ಯಮೇವ ಹಿ ।
• ಅಸಚ್ಚ ಕಾಲದೇಶಾದಿ ಅಸತ್ ಕ್ಷೇತ್ರಾದಿಭಾವನಮ್ ॥ ೪೬॥
• ತಜ್ಜನ್ಯಧರ್ಮಾಧರ್ಮೌ ಚ ಅಸದೇವ ವಿನಿರ್ಣಯಃ ।
• ಅಸಚ್ಚ ಸರ್ವಕರ್ಮಾಣಿ ಅಸದಸ್ವಪರಭ್ರಮಃ ॥ ೪೭॥
• ಅಸಚ್ಚ ಚಿತ್ತಸದ್ಭಾವ ಅಸಚ್ಚ ಸ್ಥೂಲದೇಹಕಮ್ ।
• ಅಸಚ್ಚ ಲಿಙ್ಗದೇಹಂ ಚ ಸತ್ಯಂ ಸತ್ಯಂ ಶಿವಂ ಶಪೇ ॥ ೪೮॥
• ಅಸತ್ಯಂ ಸ್ವರ್ಗನರಕಂ ಅಸತ್ಯಂ ತದ್ಭವಂ ಸುಖಮ್ ।
• ಅಸಚ್ಚ ಗ್ರಾಹಕಂ ಸರ್ವಂ ಅಸತ್ಯಂ ಗ್ರಾಹ್ಯರೂಪಕಮ್ ॥ ೪೯॥
• ಅಸತ್ಯಂ ಸತ್ಯವದ್ಭಾವಂ ಅಸತ್ಯಂ ತೇ ಶಿವೇ ಶಪೇ ।var was ಸತ್ಯವದ್ಭಾನಂ
• ಅಸತ್ಯಂ ವರ್ತಮಾನಾಖ್ಯಂ ಅಸತ್ಯಂ ಭೂತರೂಪಕಮ್ ॥ ೫೦॥
• ಅಸತ್ಯಂ ಹಿ ಭವಿಷ್ಯಾಖ್ಯಂ ಸತ್ಯಂ ಸತ್ಯಂ ಶಿವೇ ಶಪೇ ।
• ಅಸತ್ ಪೂರ್ವಮಸನ್ಮಧ್ಯಮಸದನ್ತಮಿದಂ ಜಗತ್ ॥ ೫೧॥
• ಅಸದೇವ ಸದಾ ಪ್ರಾಯಂ ಅಸದೇವ ನ ಸಂಶಯಃ ।
• ಅಸದೇವ ಸದಾ ಜ್ಞಾನಮಜ್ಞಾನಜ್ಞೇಯಮೇವ ಚ ॥ ೫೨॥
• ಅಸತ್ಯಂ ಸರ್ವದಾ ವಿಶ್ವಮಸತ್ಯಂ ಸರ್ವದಾ ಜಡಮ್ ।
• ಅಸತ್ಯಂ ಸರ್ವದಾ ದೃಶ್ಯಂ ಭಾತಿ ತೌ ರಙ್ಗಶೃಙ್ಗವತ್ ॥ ೫೩॥
• ಅಸತ್ಯಂ ಸರ್ವದಾ ಭಾವಃ ಅಸತ್ಯಂ ಕೋಶಸಂಭವಮ್ ।
• ಅಸತ್ಯಂ ಸಕಲಂ ಮನ್ತ್ರಂ ಸತ್ಯಂ ಸತ್ಯಂ ನ ಸಂಶಯಃ ॥ ೫೪॥
• ಆತ್ಮನೋಽನ್ಯಜ್ಜಗನ್ನಾಸ್ತಿ ನಾಸ್ತ್ಯನಾತ್ಮಮಿದಂ ಸದಾ ।
• ಆತ್ಮನೋಽನ್ಯನ್ಮೃಷೈವೇದಂ ಸತ್ಯಂ ಸತ್ಯಂ ನ ಸಂಶಯಃ ॥ ೫೫॥
• ಆತ್ಮನೋಽನ್ಯತ್ಸುಖಂ ನಾಸ್ತಿ ಆತ್ಮನೋಽನ್ಯನ್ನ ಕಿಞ್ಚನ ।
• ಆತ್ಮನೋಽನ್ಯಾ ಗತಿರ್ನಾಸ್ತಿ ಸ್ಥಿತಮಾತ್ಮನಿ ಸರ್ವದಾ ॥ ೫೬॥
• ಆತ್ಮನೋಽನ್ಯನ್ನ ಹಿ ಕ್ವಾಪಿ ಆತ್ಮನೋಽನ್ಯತ್ ತೃಣಂ ನ ಹಿ ।
• ಆತ್ಮನೋಽನ್ಯನ್ನ ಕಿಞ್ಚಿಚ್ಚ ಕ್ವಚಿದಪ್ಯಾತ್ಮನೋ ನ ಹಿ ॥ ೫೭॥
• ಆತ್ಮಾನನ್ದಪ್ರಕರಣಮೇತತ್ತೇಽಭಿಹಿತಂ ಮಯಾ ।
• ಯಃ ಶೃಣೋತಿ ಸಕೃದ್ವಿದ್ವಾನ್ ಬ್ರಹ್ಮೈವ ಭವತಿ ಸ್ವಯಮ್ ॥ ೫೮॥
• ಸಕೃಚ್ಛ್ರವಣಮಾತ್ರೇಣ ಸದ್ಯೋಬನ್ಧವಿಮುಕ್ತಿದಮ್ ।
• ಏತದ್ಗ್ರನ್ಥಾರ್ಥಮಾತ್ರಂ ವೈ ಗೃಣನ್ ಸರ್ವೈರ್ವಿಮುಚ್ಯತೇ ॥ ೫೯॥

ಸೂತಃ -

• ಪೂರ್ಣಂ ಸತ್ಯಂ ಮಹೇಶಂ ಭಜ ನಿಯತಹೃದಾ ಯೋಽನ್ತರಾಯೈರ್ವಿಹೀನಃ
• ಸೋ ನಿತ್ಯೋ ನಿರ್ವಿಕಲ್ಪೋ ಭವತಿ ಭುವಿ ಸದಾ ಬ್ರಹ್ಮಭೂತೋ ಋತಾತ್ಮಾ ।
• ವಿಚ್ಛಿನ್ನಗ್ರನ್ಥಿರೀಶೇ ಶಿವವಿಮಲಪದೇ ವಿದ್ಯತೇ ಭಾಸತೇಽನ್ತಃ
• ಆರಾಮೋಽನ್ತರ್ಭವತಿ ನಿಯತಂ ವಿಶ್ವಭೂತೋ ಮೃತಶ್ಚ ॥ ೬೦॥

• ॥ ಇತಿ ಶ್ರೀಶಿವರಹಸ್ಯೇ ಶಙ್ಕರಾಖ್ಯೇ ಷಷ್ಠಾಂಶೇ ಋಭುನಿದಾಘಸಂವಾದೇ ಆತ್ಮಾನನ್ದಪ್ರಕರಣವರ್ಣನಂ ನಾಮ ಚತುರ್ದಶೋಽಧ್ಯಾಯಃ ॥

Special Thanks

The Sanskrit works, published by Sri Ramanasramam, have been approved to be posted on sanskritdocuments.org by permission of Sri V.S. Ramanan, President, Sri Ramanasramam.

Credits

Encoded by Anil Sharma anilandvijaya at gmail.com
Proofread by Sunder Hattangadi and Anil Sharma

https://sanskritdocuments.org

Send corrections to sanskrit at cheerful.com