ಋಭುಗೀತಾ ೪೬ ॥ ಜ್ಞಾನೋಪಾಯ-ಭೂತ ಶಿವ-ವ್ರತ ನಿರೂಪಣಮ್ ॥

ನಿದಾಘಃ -

• ಏತದ್ಗ್ರನ್ಥಂ ಸದಾ ಶ್ರುತ್ವಾ ಚಿತ್ತಜಾಡ್ಯಮಕುರ್ವತಃ ।
• ಯಾವದ್ದೇಹಂ ಸದಾ ವಿತ್ತೈಃ ಶುಶ್ರೂಷೇತ್ ಪೂಜಯೇದ್ಗುರುಮ್ ॥ ೧॥
• ತತ್ಪೂಜಯೈವ ಸತತಂ ಅಹಂ ಬ್ರಹ್ಮೇತಿ ನಿಶ್ಚಿನು ।
• ನಿತ್ಯಂ ಪೂರ್ಣೋಽಸ್ಮಿ ನಿತ್ಯೋಽಸ್ಮಿ ಸರ್ವದಾ ಶಾನ್ತವಿಗ್ರಹಃ ॥ ೨॥
• ಏತದೇವಾತ್ಮವಿಜ್ಞಾನಂ ಅಹಂ ಬ್ರಹ್ಮೇತಿ ನಿರ್ಣಯಃ ।
• ನಿರಙ್ಕುಶಸ್ವರೂಪೋಽಸ್ಮಿ ಅತಿವರ್ಣಾಶ್ರಮೀ ಭವ ॥ ೩॥
• ಅಗ್ನಿರಿತ್ಯಾದಿಭಿರ್ಮನ್{}ತ್ರೈಃ ಸರ್ವದಾ ಭಸ್ಮಧಾರಣಮ್ ।
• ತ್ರಿಯಾಯುಷೈಸ್ತ್ರ್ಯಂಬಕೈಶ್ಚ ಕುರ್ವನ್ತಿ ಚ ತ್ರಿಪುಣ್ಡ್ರಕಮ್ ॥ ೪॥
• ತ್ರಿಪುಣ್ಡ್ರಧಾರಿಣಾಮೇವ ಸರ್ವದಾ ಭಸ್ಮಧಾರಣಮ್ ।
• ಶಿವಪ್ರಸಾದಸಂಪತ್ತಿರ್ಭವಿಷ್ಯತಿ ನ ಸಂಶಯಃ ॥ ೫॥
• ಶಿವಪ್ರಸಾದಾದೇತದ್ವೈ ಜ್ಞಾನಂ ಸಂಪ್ರಾಪ್ಯತೇ ಧ್ರುವಮ್ ।
• ಶಿರೋವ್ರತಮಿದಂ ಪ್ರೋಕ್ತಂ ಕೇವಲಂ ಭಸ್ಮಧಾರಣಮ್ ॥ ೬॥
• ಭಸ್ಮಧಾರಣಮಾತ್ರೇಣ ಜ್ಞಾನಮೇತದ್ಭವಿಷ್ಯತಿ ।
• ಅಹಂ ವತ್ಸರಪರ್ಯನ್ತಂ ಕೃತ್ವಾ ವೈ ಭಸ್ಮಧಾರಣಮ್ ॥ ೭॥
• ತ್ವತ್ಪಾದಾಬ್ಜಂ ಪ್ರಪನ್ನೋಽಸ್ಮಿ ತ್ವತ್ತೋ ಲಬ್ಧಾತ್ಮ ನಿರ್ವೃತಿಃ ।
• ಸರ್ವಾಧಾರಸ್ವರೂಪೋಽಹಂ ಸಚ್ಚಿದಾನನ್ದಮಾತ್ರಕಮ್ ॥ ೮॥
• ಬ್ರಹ್ಮಾತ್ಮಾಹಂ ಸುಲಕ್ಷಣ್ಯೋ ಬ್ರಹ್ಮಲಕ್ಷಣಪೂರ್ವಕಮ್ ।
• ಆನನ್ದಾನುಭವಂ ಪ್ರಾಪ್ತಃ ಸಚ್ಚಿದಾನನ್ದವಿಗ್ರಹಃ ॥ ೯॥
• ಗುಣರೂಪಾದಿಮುಕ್ತೋಽಸ್ಮಿ ಜೀವನ್ಮುಕ್ತೋ ನ ಸಂಶಯಃ ।
• ಮೈತ್ರ್ಯಾದಿಗುಣಸಂಪನ್ನೋ ಬ್ರಹ್ಮೈವಾಹಂ ಪರೋ ಮಹಾನ್ ॥ ೧೦॥
• ಸಮಾಧಿಮಾನಹಂ ನಿತ್ಯಂ ಜೀವನ್ಮುಕ್ತೇಷು ಸತ್ತಮಃ ।
• ಅಹಂ ಬ್ರಹ್ಮಾಸ್ಮಿ ನಿತ್ಯೋಽಸ್ಮಿ ಸಮಾಧಿರಿತಿ ಕಥ್ಯತೇ ॥ ೧೧॥
• ಪ್ರಾರಬ್ಧಪ್ರತಿಬನ್ಧಶ್ಚ ಜೀವನ್ಮುಕ್ತೇಷು ವಿದ್ಯತೇ ।
• ಪ್ರಾರಬ್ಧವಶತೋ ಯದ್ಯತ್ ಪ್ರಾಪ್ಯಂ ಭುಞ್ಜೇ ಸುಖಂ ವಸ ॥ ೧೨॥
• ದೂಷಣಂ ಭೂಷಣಂ ಚೈವ ಸದಾ ಸರ್ವತ್ರ ಸಂಭವೇತ್ ।
• ಸ್ವಸ್ವನಿಶ್ಚಯತೋ ಬುದ್ಧ್ಯಾ ಮುಕ್ತೋಽಹಮಿತಿ ಮನ್ಯತೇ ॥ ೧೩॥
• ಅಹಮೇವ ಪರಂ ಬ್ರಹ್ಮ ಅಹಮೇವ ಪರಾ ಗತಿಃ ।
• ಏವಂ ನಿಶ್ಚಯವಾನ್ ನಿತ್ಯಂ ಜೀವನ್ಮುಕ್ತೇತಿ ಕಥ್ಯತೇ ॥ ೧೪॥
• ಏತದ್ಭೇದಂ ಚ ಸನ್ತ್ಯಜ್ಯ ಸ್ವರೂಪೇ ತಿಷ್ಠತಿ ಪ್ರಭುಃ ।
• ಇನ್ದ್ರಿಯಾರ್ಥವಿಹೀನೋಽಹಮಿನ್ದ್ರಿಯಾರ್ಥವಿವರ್ಜಿತಃ ॥ ೧೫॥
• ಸರ್ವೇನ್ದ್ರಿಯಗುಣಾತೀತಃ ಸರ್ವೇನ್ದ್ರಿಯವಿವರ್ಜಿತಃ ।
• ಸರ್ವಸ್ಯ ಪ್ರಭುರೇವಾಹಂ ಸರ್ವಂ ಮಯ್ಯೇವ ತಿಷ್ಠತಿ ॥ ೧೬॥
• ಅಹಂ ಚಿನ್ಮಾತ್ರ ಏವಾಸ್ಮಿ ಸಚ್ಚಿದಾನ್ದವಿಗ್ರಹಃ ।
• ಸರ್ವಂ ಭೇದಂ ಸದಾ ತ್ಯಕ್ತ್ವಾ ಬ್ರಹ್ಮಭೇದಮಪಿ ತ್ಯಜೇತ್ ॥ ೧೭॥
• ಅಜಸ್ರಂ ಭಾವಯನ್ ನಿತ್ಯಂ ವಿದೇಹೋ ಮುಕ್ತ ಏವ ಸಃ ।
• ಅಹಂ ಬ್ರಹ್ಮ ಪರಂ ಬ್ರಹ್ಮ ಅಹಂ ಬ್ರಹ್ಮ ಜಗತ್ಪ್ರಭುಃ ॥ ೧೮॥
• ಅಹಮೇವ ಗುಣಾತೀತಃ ಅಹಮೇವ ಮನೋಮಯಃ ।
• ಅಹಂ ಮಯ್ಯೋ ಮನೋಮೇಯಃ ಪ್ರಾಣಮೇಯಃ ಸದಾಮಯಃ ॥ ೧೯॥
• ಸದೃಙ್ಮಯೋ ಬ್ರಹ್ಮಮಯೋಽಮೃತಮಯಃ ಸಭೂತೋಮೃತಮೇವ ಹಿ ।
• ಅಹಂ ಸದಾನನ್ದಧನೋಽವ್ಯಯಃ ಸದಾ ।
• ಸ ವೇದಮಯ್ಯೋ ಪ್ರಣವೋಽಹಮೀಶಃ ॥ ೨೦॥
• ಅಪಾಣಿಪಾದೋ ಜವನೋ ಗೃಹೀತಾ
• ಅಪಶ್ಯಃ ಪಶ್ಯಾಮ್ಯಾತ್ಮವತ್ ಸರ್ವಮೇವ ।
• ಯತ್ತದ್ಭೂತಂ ಯಚ್ಚ ಭವ್ಯೋಽಹಮಾತ್ಮಾ
• ಸರ್ವಾತೀತೋ ವರ್ತಮಾನೋಽಹಮೇವ ॥ ೨೨॥

• ॥ ಇತಿ ಶ್ರೀಶಿವರಹಸ್ಯೇ ಶಙ್ಕರಾಖ್ಯೇ ಷಷ್ಠಾಂಶೇ ಋಭುನಿದಾಘಸಂವಾದೇ ಜ್ಞಾನೋಪಾಯಭೂತಶಿವವ್ರತನಿರೂಪಣಂ ನಾಮ ಷಟ್ಚತ್ವಾರಿಂಶೋಽಧ್ಯಾಯಃ ॥

Special Thanks

The Sanskrit works, published by Sri Ramanasramam, have been approved to be posted on sanskritdocuments.org by permission of Sri V.S. Ramanan, President, Sri Ramanasramam.

Credits

Encoded by Anil Sharma anilandvijaya at gmail.com
Proofread by Sunder Hattangadi and Anil Sharma

https://sanskritdocuments.org

Send corrections to sanskrit at cheerful.com