Ribhu Gita - Siva Rahasya Purana Amsha 6

ಋಭುಗೀತಾ ೨೯ ॥ ತನ್ಮಯ-ಭಾವೋಪದೇಶ ಪ್ರಕರಣಮ್ ॥

ಋಭುಃ -

ಅತ್ಯನ್ತಂ ತನ್ಮಯಂ ವಕ್ಷ್ಯೇ ದುರ್ಲಭಂ ಯೋಗಿನಾಮಪಿ ।
ವೇದಶಾಸ್ತ್ರೇಷು ದೇವೇಷು ರಹಸ್ಯಮತಿದುರ್ಲಭಮ್ ॥ ೧॥
ಯಃ ಪರಂ ಬ್ರಹ್ಮ ಸರ್ವಾತ್ಮಾ ಸಚ್ಚಿದಾನನ್ದವಿಗ್ರಹಃ ।
ಸರ್ವಾತ್ಮಾ ಪರಮಾತ್ಮಾ ಹಿ ತನ್ಮಯೋ ಭವ ಸರ್ವದಾ ॥ ೨॥
ಆತ್ಮರೂಪಮಿದಂ ಸರ್ವಮಾದ್ಯನ್ತರಹಿತೋಽಜಯಃ ।
ಕಾರ್ಯಾಕಾರ್ಯಮಿದಂ ನಾಸ್ತಿ ತನ್ಮಯೋ ಭವ ಸರ್ವದಾ ॥ ೩॥
ಯತ್ರ ದ್ವೈತಭಯಂ ನಾಸ್ತಿ ಯತ್ರಾದ್ವೈತಪ್ರಬೋಧನಮ್ ।
ಶಾನ್ತಾಶಾನ್ತದ್ವಯಂ ನಾಸ್ತಿ ತನ್ಮಯೋ ಭವ ಸರ್ವದಾ ॥ ೪॥
ಯತ್ರ ಸಙ್ಕಲ್ಪಕಂ ನಾಸ್ತಿ ಯತ್ರ ಭ್ರಾನ್ತಿರ್ನ ವಿದ್ಯತೇ ।
ತದೇವ ಹಿ ಮತಿರ್ನಾಸ್ತಿ ತನ್ಮಯೋ ಭವ ಸರ್ವದಾ ॥ ೫॥
ಯತ್ರ ಬ್ರಹ್ಮಣಿ ನಾಸ್ತ್ಯೇವ ಯತ್ರ ಭಾವಿ ವಿಕಲ್ಪನಮ್ ।
ಯತ್ರ ಸರ್ವಂ ಜಗನ್ನಾಸ್ತಿ ತನ್ಮಯೋ ಭವ ಸರ್ವದಾ ॥ ೬॥
ಯತ್ರ ಭಾವಮಭಾವಂ ವಾ ಮನೋಭ್ರಾನ್ತಿ ವಿಕಲ್ಪನಮ್ ।
ಯತ್ರ ಭ್ರಾನ್ತೇರ್ನ ವಾರ್ತಾ ವಾ ತನ್ಮಯೋ ಭವ ಸರ್ವದಾ ॥ ೭॥
ಯತ್ರ ನಾಸ್ತಿ ಸುಖಂ ನಾಸ್ತಿ ದೇಹೋಽಹಮಿತಿ ರೂಪಕಮ್ ।
ಸರ್ವಸಙ್ಕಲ್ಪನಿರ್ಮುಕ್ತಂ ತನ್ಮಯೋ ಭವ ಸರ್ವದಾ ॥ ೮॥
ಯತ್ರ ಬ್ರಹ್ಮ ವಿನಾ ಭಾವೋ ಯತ್ರ ದೋಷೋ ನ ವಿದ್ಯತೇ ।
ಯತ್ರ ದ್ವನ್ದ್ವಭಯಂ ನಾಸ್ತಿ ತನ್ಮಯೋ ಭವ ಸರ್ವದಾ ॥ ೯॥
ಯತ್ರ ವಾಕ್ಕಾಯಕಾರ್ಯಂ ವಾ ಯತ್ರ ಕಲ್ಪೋ ಲಯಂ ಗತಃ ।
ಯತ್ರ ಪ್ರಪಞ್ಚಂ ನೋತ್ಪನ್ನಂ ತನ್ಮಯೋ ಭವ ಸರ್ವದಾ ॥ ೧೦॥
ಯತ್ರ ಮಾಯಾ ಪ್ರಕಾಶೋ ನ ಮಾಯಾ ಕಾರ್ಯಂ ನ ಕಿಞ್ಚನ ।
ಯತ್ರ ದೃಶ್ಯಮದೃಶ್ಯಂ ವಾ ತನ್ಮಯೋ ಭವ ಸರ್ವದಾ ॥ ೧೧॥
ವಿದ್ವಾನ್ ವಿದ್ಯಾಪಿ ನಾಸ್ತ್ಯೇವ ಯತ್ರ ಪಕ್ಷವಿಪಕ್ಷಕೌ ।
ನ ಯತ್ರ ದೋಷಾದೋಷೌ ವಾ ತನ್ಮಯೋ ಭವ ಸರ್ವದಾ ॥ ೧೨॥
ಯತ್ರ ವಿಷ್ಣುತ್ವಭೇದೋ ನ ಯತ್ರ ಬ್ರಹ್ಮಾ ನ ವಿದ್ಯತೇ ।
ಯತ್ರ ಶಙ್ಕರಭೇದೋ ನ ತನ್ಮಯೋ ಭವ ಸರ್ವದಾ ॥ ೧೩॥
ನ ಯತ್ರ ಸದಸದ್ಭೇದೋ ನ ಯತ್ರ ಕಲನಾಪದಮ್ ।
ನ ಯತ್ರ ಜೀವಕಲನಾ ತನ್ಮಯೋ ಭವ ಸರ್ವದಾ ॥ ೧೪॥
ನ ಯತ್ರ ಶಙ್ಕರಧ್ಯಾನಂ ನ ಯತ್ರ ಪರಮಂ ಪದಮ್ ।
ನ ಯತ್ರ ಕಲನಾಕಾರಂ ತನ್ಮಯೋ ಭವ ಸರ್ವದಾ ॥ ೧೫॥
ನ ಯತ್ರಾಣುರ್ಮಹತ್ತ್ವಂ ಚ ಯತ್ರ ಸನ್ತೋಷಕಲ್ಪನಮ್ ।
ಯತ್ರ ಪ್ರಪಞ್ಚಮಾಭಾಸಂ ತನ್ಮಯೋ ಭವ ಸರ್ವದಾ ॥ ೧೬॥
ನ ಯತ್ರ ದೇಹಕಲನಂ ನ ಯತ್ರ ಹಿ ಕುತೂಹಲಮ್ ।
ನ ಯತ್ರ ಚಿತ್ತಕಲನಂ ತನ್ಮಯೋ ಭವ ಸರ್ವದಾ ॥ ೧೭॥
ನ ಯತ್ರ ಬುದ್ಧಿವಿಜ್ಞಾನಂ ನ ಯತ್ರಾತ್ಮಾ ಮನೋಮಯಃ ।
ನ ಯತ್ರ ಕಾಮಕಲನಂ ತನ್ಮಯೋ ಭವ ಸರ್ವದಾ ॥ ೧೮॥
ನ ಯತ್ರ ಮೋಕ್ಷವಿಶ್ರಾನ್ತಿರ್ಯತ್ರ ಬನ್ಧತ್ವವಿಗ್ರಹಃ ।
ನ ಯತ್ರ ಶಾಶ್ವತಂ ಜ್ಞಾನಂ ತನ್ಮಯೋ ಭವ ಸರ್ವದಾ ॥ ೧೯॥
ನ ಯತ್ರ ಕಾಲಕಲನಂ ಯತ್ರ ದುಃಖತ್ವಭಾವನಮ್ ।
ನ ಯತ್ರ ದೇಹಕಲನಂ ತನ್ಮಯೋ ಭವ ಸರ್ವದಾ ॥ ೨೦॥
ನ ಯತ್ರ ಜೀವವೈರಾಗ್ಯಂ ಯತ್ರ ಶಾಸ್ತ್ರವಿಕಲ್ಪನಮ್ ।
ಯತ್ರಾಹಮಹಮಾತ್ಮತ್ವಂ ತನ್ಮಯೋ ಭವ ಸರ್ವದಾ ॥ ೨೧॥
ನ ಯತ್ರ ಜೀವನ್ಮುಕ್ತಿರ್ವಾ ಯತ್ರ ದೇಹವಿಮೋಚನಮ್ ।
ಯತ್ರ ಸಙ್ಕಲ್ಪಿತಂ ಕಾರ್ಯಂ ತನ್ಮಯೋ ಭವ ಸರ್ವದಾ ॥ ೨೨॥
ನ ಯತ್ರ ಭೂತಕಲನಂ ಯತ್ರಾನ್ಯತ್ವಪ್ರಭಾವನಮ್ ।
ನ ಯತ್ರ ಜೀವಭೇದೋ ವಾ ತನ್ಮಯೋ ಭವ ಸರ್ವದಾ ॥ ೨೩॥
ಯತ್ರಾನನ್ದಪದಂ ಬ್ರಹ್ಮ ಯತ್ರಾನನ್ದಪದಂ ಸುಖಮ್ ।
ಯತ್ರಾನನ್ದಗುಣಂ ನಿತ್ಯಂ ತನ್ಮಯೋ ಭವ ಸರ್ವದಾ ॥ ೨೪॥
ನ ಯತ್ರ ವಸ್ತುಪ್ರಭವಂ ನ ಯತ್ರಾಪಜಯೋಜಯಃ ।
ನ ಯತ್ರ ವಾಕ್ಯಕಥನಂ ತನ್ಮಯೋ ಭವ ಸರ್ವದಾ ॥ ೨೫॥
ನ ಯತ್ರಾತ್ಮವಿಚಾರಾಙ್ಗಂ ನ ಯತ್ರ ಶ್ರವಣಾಕುಲಮ್ ।
ನ ಯತ್ರ ಚ ಮಹಾನನ್ದಂ ತನ್ಮಯೋ ಭವ ಸರ್ವದಾ ॥ ೨೬॥
ನ ಯತ್ರ ಹಿ ಸಜಾತೀಯಂ ವಿಜಾತೀಯಂ ನ ಯತ್ರ ಹಿ ।
ನ ಯತ್ರ ಸ್ವಗತಂ ಭೇದಂ ತನ್ಮಯೋ ಭವ ಸರ್ವದಾ ॥ ೨೭॥
ನ ಯತ್ರ ನರಕೋ ಘೋರೋ ನ ಯತ್ರ ಸ್ವರ್ಗಸಂಪದಃ ।
ನ ಯತ್ರ ಬ್ರಹ್ಮಲೋಕೋ ವಾ ತನ್ಮಯೋ ಭವ ಸರ್ವದಾ ॥ ೨೮॥
ನ ಯತ್ರ ವಿಷ್ಣುಸಾಯುಜ್ಯಂ ಯತ್ರ ಕೈಲಾಸಪರ್ವತಃ ।
ಬ್ರಹ್ಮಾಣ್ಡಮಣ್ಡಲಂ ಯತ್ರ ತನ್ಮಯೋ ಭವ ಸರ್ವದಾ ॥ ೨೯॥
ನ ಯತ್ರ ಭೂಷಣಂ ಯತ್ರ ದೂಷಣಂ ವಾ ನ ವಿದ್ಯತೇ ।
ನ ಯತ್ರ ಸಮತಾ ದೋಷಂ ತನ್ಮಯೋ ಭವ ಸರ್ವದಾ ॥ ೩೦॥
ನ ಯತ್ರ ಮನಸಾ ಭಾವೋ ನ ಯತ್ರ ಸವಿಕಲ್ಪನಮ್ ।
ನ ಯತ್ರಾನುಭವಂ ದುಃಖಂ ತನ್ಮಯೋ ಭವ ಸರ್ವದಾ ॥ ೩೧॥
ಯತ್ರ ಪಾಪಭಯಂ ನಾಸ್ತಿ ಪಞ್ಚಪಾಪಾದಪಿ ಕ್ವಚಿತ್ ।
ನ ಯತ್ರ ಸಙ್ಗದೋಷಂ ವಾ ತನ್ಮಯೋ ಭವ ಸರ್ವದಾ ॥ ೩೨॥
ಯತ್ರ ತಾಪತ್ರಯಂ ನಾಸ್ತಿ ಯತ್ರ ಜೀವತ್ರಯಂ ಕ್ವಚಿತ್ ।
ಯತ್ರ ವಿಶ್ವವಿಕಲ್ಪಾಖ್ಯಂ ತನ್ಮಯೋ ಭವ ಸರ್ವದಾ ॥ ೩೩॥
ನ ಯತ್ರ ಬೋಧಮುತ್ಪನ್ನಂ ನ ಯತ್ರ ಜಗತಾಂ ಭ್ರಮಃ ।
ನ ಯತ್ರ ಕರಣಾಕಾರಂ ತನ್ಮಯೋ ಭವ ಸರ್ವದಾ ॥ ೩೪॥
ನ ಯತ್ರ ಹಿ ಮನೋ ರಾಜ್ಯಂ ಯತ್ರೈವ ಪರಮಂ ಸುಖಮ್ ।
ಯತ್ರ ವೈ ಶಾಶ್ವತಂ ಸ್ಥಾನಂ ತನ್ಮಯೋ ಭವ ಸರ್ವದಾ ॥ ೩೫॥
ಯತ್ರ ವೈ ಕಾರಣಂ ಶಾನ್ತಂ ಯತ್ರೈವ ಸಕಲಂ ಸುಖಮ್ ।
ಯದ್ಗತ್ವಾ ನ ನಿವರ್ತನ್ತೇ ತನ್ಮಯೋ ಭವ ಸರ್ವದಾ ॥ ೩೬॥
ಯದ್ ಜ್ಞಾತ್ವಾ ಮುಚ್ಯತೇ ಸರ್ವಂ ಯದ್ ಜ್ಞಾತ್ವಾಽನ್ಯನ್ನ ವಿದ್ಯತೇ ।
ಯದ್ ಜ್ಞಾತ್ವಾ ನಾನ್ಯವಿಜ್ಞಾನಂ ತನ್ಮಯೋ ಭವ ಸರ್ವದಾ ॥ ೩೭॥
ಯತ್ರೈವ ದೋಷಂ ನೋತ್ಪನ್ನಂ ಯತ್ರೈವ ಸ್ಥಾನನಿಶ್ಚಲಃ ।
ಯತ್ರೈವ ಜೀವಸಙ್ಘಾತಃ ತನ್ಮಯೋ ಭವ ಸರ್ವದಾ ॥ ೩೮॥
ಯತ್ರೈವ ನಿತ್ಯತೃಪ್ತಾತ್ಮಾ ಯತ್ರೈವಾನನ್ದನಿಶ್ಚಲಮ್ ।
ಯತ್ರೈವ ನಿಶ್ಚಲಂ ಶಾನ್ತಂ ತನ್ಮಯೋ ಭವ ಸರ್ವದಾ ॥ ೩೯॥
ಯತ್ರೈವ ಸರ್ವಸೌಖ್ಯಂ ವಾ ಯತ್ರೈವ ಸನ್ನಿರೂಪಣಮ್ ।
ಯತ್ರೈವ ನಿಶ್ಚಯಾಕಾರಂ ತನ್ಮಯೋ ಭವ ಸರ್ವದಾ ॥ ೪೦॥
ನ ಯತ್ರಾಹಂ ನ ಯತ್ರ ತ್ವಂ ನ ಯತ್ರ ತ್ವಂ ಸ್ವಯಂ ಸ್ವಯಮ್ ।
ಯತ್ರೈವ ನಿಶ್ಚಯಂ ಶಾನ್ತಂ ತನ್ಮಯೋ ಭವ ಸರ್ವದಾ ॥ ೪೧॥
ಯತ್ರೈವ ಮೋದತೇ ನಿತ್ಯಂ ಯತ್ರೈವ ಸುಖಮೇಧತೇ ।
ಯತ್ರ ದುಃಖಭಯಂ ನಾಸ್ತಿ ತನ್ಮಯೋ ಭವ ಸರ್ವದಾ ॥ ೪೨॥
ಯತ್ರೈವ ಚಿನ್ಮಯಾಕಾರಂ ಯತ್ರೈವಾನನ್ದಸಾಗರಃ ।
ಯತ್ರೈವ ಪರಮಂ ಸಾಕ್ಷಾತ್ ತನ್ಮಯೋ ಭವ ಸರ್ವದಾ ॥ ೪೩॥
ಯತ್ರೈವ ಸ್ವಯಮೇವಾತ್ರ ಸ್ವಯಮೇವ ತದೇವ ಹಿ ।
ಸ್ವಸ್ವಾತ್ಮನೋಕ್ತಭೇದೋಽಸ್ತಿ ತನ್ಮಯೋ ಭವ ಸರ್ವದಾ ॥ ೪೪॥
ಯತ್ರೈವ ಪರಮಾನನ್ದಂ ಸ್ವಯಮೇವ ಸುಖಂ ಪರಮ್ ।
ಯತ್ರೈವಾಭೇದಕಲನಂ ತನ್ಮಯೋ ಭವ ಸರ್ವದಾ ॥ ೪೫॥
ನ ಯತ್ರ ಚಾಣುಮಾತ್ರಂ ವಾ ನ ಯತ್ರ ಮನಸೋ ಮಲಮ್ ।
ನ ಯತ್ರ ಚ ದದಾಮ್ಯೇವ ತನ್ಮಯೋ ಭವ ಸರ್ವದಾ ॥ ೪೬॥
ಯತ್ರ ಚಿತ್ತಂ ಮೃತಂ ದೇಹಂ ಮನೋ ಮರಣಮಾತ್ಮನಃ ।
ಯತ್ರ ಸ್ಮೃತಿರ್ಲಯಂ ಯಾತಿ ತನ್ಮಯೋ ಭವ ಸರ್ವದಾ ॥ ೪೭॥
ಯತ್ರೈವಾಹಂ ಮೃತೋ ನೂನಂ ಯತ್ರ ಕಾಮೋ ಲಯಂ ಗತಃ ।
ಯತ್ರೈವ ಪರಮಾನನ್ದಂ ತನ್ಮಯೋ ಭವ ಸರ್ವದಾ ॥ ೪೮॥
ಯತ್ರ ದೇವಾಸ್ತ್ರಯೋ ಲೀನಂ ಯತ್ರ ದೇಹಾದಯೋ ಮೃತಾಃ ।
ನ ಯತ್ರ ವ್ಯವಹಾರೋಽಸ್ತಿ ತನ್ಮಯೋ ಭವ ಸರ್ವದಾ ॥ ೪೯॥
ಯತ್ರ ಮಗ್ನೋ ನಿರಾಯಾಸೋ ಯತ್ರ ಮಗ್ನೋ ನ ಪಶ್ಯತಿ ।
ಯತ್ರ ಮಗ್ನೋ ನ ಜನ್ಮಾದಿಸ್ತನ್ಮಯೋ ಭವ ಸರ್ವದಾ ॥ ೫೦॥
ಯತ್ರ ಮಗ್ನೋ ನ ಚಾಭಾತಿ ಯತ್ರ ಜಾಗ್ರನ್ನ ವಿದ್ಯತೇ ।
ಯತ್ರೈವ ಮೋಹಮರಣಂ ತನ್ಮಯೋ ಭವ ಸರ್ವದಾ ॥ ೫೧॥
ಯತ್ರೈವ ಕಾಲಮರಣಂ ಯತ್ರ ಯೋಗೋ ಲಯಂ ಗತಃ ।
ಯತ್ರ ಸತ್ಸಙ್ಗತಿರ್ನಷ್ಟಾ ತನ್ಮಯೋ ಭವ ಸರ್ವದಾ ॥ ೫೨॥
ಯತ್ರೈವ ಬ್ರಹ್ಮಣೋ ರೂಪಂ ಯತ್ರೈವಾನನ್ದಮಾತ್ರಕಮ್ ।
ಯತ್ರೈವ ಪರಮಾನನ್ದಂ ತನ್ಮಯೋ ಭವ ಸರ್ವದಾ ॥ ೫೩॥
ಯತ್ರ ವಿಶ್ವಂ ಕ್ವಚಿನ್ನಾಸ್ತಿ ಯತ್ರ ನಾಸ್ತಿ ತತೋ ಜಗತ್ ।
ಯತ್ರಾನ್ತಃಕರಣಂ ನಾಸ್ತಿ ತನ್ಮಯೋ ಭವ ಸರ್ವದಾ ॥ ೫೪॥
ಯತ್ರೈವ ಸುಖಮಾತ್ರಂ ಚ ಯತ್ರೈವಾನನ್ದಮಾತ್ರಕಮ್ ।
ಯತ್ರೈವ ಪರಮಾನನ್ದಂ ತನ್ಮಯೋ ಭವ ಸರ್ವದಾ ॥ ೫೫॥
ಯತ್ರ ಸನ್ಮಾತ್ರಚೈತನ್ಯಂ ಯತ್ರ ಚಿನ್ಮಾತ್ರಮಾತ್ರಕಮ್ ।
ಯತ್ರಾನನ್ದಮಯಂ ಭಾತಿ ತನ್ಮಯೋ ಭವ ಸರ್ವದಾ ॥ ೫೬॥
ಯತ್ರ ಸಾಕ್ಷಾತ್ ಪರಂ ಬ್ರಹ್ಮ ಯತ್ರ ಸಾಕ್ಷಾತ್ ಸ್ವಯಂ ಪರಮ್ ।
ಯತ್ರ ಶಾನ್ತಂ ಪರಂ ಲಕ್ಷ್ಯಂ ತನ್ಮಯೋ ಭವ ಸರ್ವದಾ ॥ ೫೭॥
ಯತ್ರ ಸಾಕ್ಷಾದಖಣ್ಡಾರ್ಥಂ ಯತ್ರ ಸಾಕ್ಷಾತ್ ಪರಾಯಣಮ್ ।
ಯತ್ರ ನಾಶಾದಿಕಂ ನಾಸ್ತಿ ತನ್ಮಯೋ ಭವ ಸರ್ವದಾ ॥ ೫೮॥
ಯತ್ರ ಸಾಕ್ಷಾತ್ ಸ್ವಯಂ ಮಾತ್ರಂ ಯತ್ರ ಸಾಕ್ಷಾತ್ಸ್ವಯಂ ಜಯಮ್ ।
ಯತ್ರ ಸಾಕ್ಷಾನ್ಮಹಾನಾತ್ಮಾ ತನ್ಮಯೋ ಭವ ಸರ್ವದಾ ॥ ೫೯॥
ಯತ್ರ ಸಾಕ್ಷಾತ್ ಪರಂ ತತ್ತ್ವಂ ಯತ್ರ ಸಾಕ್ಷಾತ್ ಸ್ವಯಂ ಮಹತ್ ।
ಯತ್ರ ಸಾಕ್ಷಾತ್ತು ವಿಜ್ಞಾನಂ ತನ್ಮಯೋ ಭವ ಸರ್ವದಾ ॥ ೬೦॥
ಯತ್ರ ಸಾಕ್ಷಾದ್ಗುಣಾತೀತಂ ಯತ್ರ ಸಾಕ್ಷಾದ್ಧಿ ನಿರ್ಮಲಮ್ ।
ಯತ್ರ ಸಾಕ್ಷಾತ್ ಸದಾಶುದ್ಧಂ ತನ್ಮಯೋ ಭವ ಸರ್ವದಾ ॥ ೬೧॥
ಯತ್ರ ಸಾಕ್ಷಾನ್ಮಹಾನಾತ್ಮಾ ಯತ್ರ ಸಾಕ್ಷಾತ್ ಸುಖಾತ್ ಸುಖಮ್ ।
ಯತ್ರೈವ ಜ್ಞಾನವಿಜ್ಞಾನಂ ತನ್ಮಯೋ ಭವ ಸರ್ವದಾ ॥ ೬೨॥
ಯತ್ರೈವ ಹಿ ಸ್ವಯಂ ಜ್ಯೋತಿರ್ಯತ್ರೈವ ಸ್ವಯಮದ್ವಯಮ್ ।
ಯತ್ರೈವ ಪರಮಾನನ್ದಂ ತನ್ಮಯೋ ಭವ ಸರ್ವದಾ ॥ ೬೩॥
ಏವಂ ತನ್ಮಯಭಾವೋಕ್ತಂ ಏವಂ ನಿತ್ಯಶನಿತ್ಯಶಃ ।
ಬ್ರಹ್ಮಾಹಂ ಸಚ್ಚಿದಾನನ್ದಂ ಅಖಣ್ಡೋಽಹಂ ಸದಾ ಸುಖಮ್ ॥ ೬೪॥
ವಿಜ್ಞಾನಂ ಬ್ರಹ್ಮಮಾತ್ರೋಽಹಂ ಸ ಶಾನ್ತಂ ಪರಮೋಽಸ್ಮ್ಯಹಮ್ ।
ಚಿದಹಂ ಚಿತ್ತಹೀನೋಽಹಂ ನಾಹಂ ಸೋಽಹಂ ಭವಾಮ್ಯಹಮ್ ॥ ೬೫॥
ತದಹಂ ಚಿದಹಂ ಸೋಽಹಂ ನಿರ್ಮಲೋಽಹಮಹಂ ಪರಮ್ ।
ಪರೋಽಹಂ ಪರಮೋಽಹಂ ವೈ ಸರ್ವಂ ತ್ಯಜ್ಯ ಸುಖೀಭವ ॥ ೬೬॥
ಇದಂ ಸರ್ವಂ ಚಿತ್ತಶೇಷಂ ಶುದ್ಧತ್ವಕಮಲೀಕೃತಮ್ ।
ಏವಂ ಸರ್ವಂ ಪರಿತ್ಯಜ್ಯ ವಿಸ್ಮೃತ್ವಾ ಶುದ್ಧಕಾಷ್ಠವತ್ ॥ ೬೭॥
ಪ್ರೇತವದ್ದೇಹಂ ಸಂತ್ಯಜ್ಯ ಕಾಷ್ಠವಲ್ಲೋಷ್ಠವತ್ ಸದಾ ।
ಸ್ಮರಣಂ ಚ ಪರಿತ್ಯಜ್ಯ ಬ್ರಹ್ಮಮಾತ್ರಪರೋ ಭವ ॥ ೬೮॥
ಏತತ್ ಪ್ರಕರಣಂ ಯಸ್ತು ಶೃಣೋತಿ ಸಕೃದಸ್ತಿ ವಾ ।
ಮಹಾಪಾತಕಯುಕ್ತೋಽಪಿ ಸರ್ವಂ ತ್ಯಕ್ತ್ವಾ ಪರಂ ಗತಃ ॥ ೬೯॥
ಅಙ್ಗಾವಬದ್ಧಾಭಿರುಪಾಸನಾಭಿ-
ರ್ವದನ್ತಿ ವೇದಾಃ ಕಿಲ ತ್ವಾಮಸಙ್ಗಮ್ ।
ಸಮಸ್ತಹೃತ್ಕೋಶವಿಶೇಷಸಙ್ಗಂ
ಭೂಮಾನಮಾತ್ಮಾನಮಖಣ್ಡರೂಪಮ್ ॥ ೭೦॥

॥ ಇತಿ ಶ್ರೀಶಿವರಹಸ್ಯೇ ಶಙ್ಕರಾಖ್ಯೇ ಷಷ್ಠಾಂಶೇ ಋಭುನಿದಾಘಸಂವಾದೇ ತನ್ಮಯಭಾವೋಪದೇಶಪ್ರಕರಣಂ ನಾಮ ಏಕೋನತ್ರಿಂಶೋಽಧ್ಯಾಯಃ ॥

Special Thanks

The Sanskrit works, published by Sri Ramanasramam, have been approved to be posted on sanskritdocuments.org by permission of Sri V.S. Ramanan, President, Sri Ramanasramam.

Credits

Encoded by Anil Sharma anilandvijaya at gmail.com
Proofread by Sunder Hattangadi and Anil Sharma

https://sanskritdocuments.org

Send corrections to sanskrit at cheerful.com