ಋಭುಗೀತಾ ೧೭ ॥ ಸರ್ವ ಸಿದ್ಧಾನ್ತ ಸಂಗ್ರಹ ಪ್ರಕರಣಮ್ ॥
ಋಭುಃ -
- ನಿದಾಘ ಶೃಣು ಗುಹ್ಯಂ ಮೇ ಸರ್ವಸಿದ್ಧಾನ್ತಸಙ್ಗ್ರಹಮ್ ।
- ದ್ವೈತಾದ್ವೈತಮಿದಂ ಶೂನ್ಯಂ ಶಾನ್ತಂ ಬ್ರಹ್ಮೈವ ಸರ್ವದಾ ॥ ೧॥
- ಅಹಮೇವ ಪರಂ ಬ್ರಹ್ಮ ಅಹಮೇವ ಪರಾತ್ ಪರಮ್ ।
- ದ್ವೈತಾದ್ವೈತಮಿದಂ ಶೂನ್ಯಂ ಶಾನ್ತಂ ಬ್ರಹ್ಮೈವ ಕೇವಲಮ್ ॥ ೨॥
- ಅಹಮೇವ ಹಿ ಶಾನ್ತಾತ್ಮಾ ಅಹಮೇವ ಹಿ ಸರ್ವಗಃ ।
- ಅಹಮೇವ ಹಿ ಶುದ್ಧಾತ್ಮಾ ಅಹಮೇವ ಹಿ ನಿತ್ಯಶಃ ॥ ೩॥
- ಅಹಮೇವ ಹಿ ನಾನಾತ್ಮಾ ಅಹಮೇವ ಹಿ ನಿರ್ಗುಣಃ ।
- ಅಹಮೇವ ಹಿ ನಿತ್ಯಾತ್ಮಾ ಅಹಮೇವ ಹಿ ಕಾರಣಮ್ ॥ ೪॥
- ಅಹಮೇವ ಹಿ ಜಗತ್ ಸರ್ವಂ ಇದಂ ಚೈವಾಹಮೇವ ಹಿ ।
- ಅಹಮೇವ ಹಿ ಮೋದಾತ್ಮಾ ಅಹಮೇವ ಹಿ ಮುಕ್ತಿದಃ ॥ ೫॥
- ಅಹಮೇವ ಹಿ ಚೈತನ್ಯಂ ಅಹಮೇವ ಹಿ ಚಿನ್ಮಯಃ ।
- ಅಹಮೇವ ಹಿ ಚೈತನ್ಯಮಹಂ ಸರ್ವಾನ್ತರಃ ಸದಾ ॥ ೬॥
- ಅಹಮೇವ ಹಿ ಭೂತಾತ್ಮಾ ಭೌತಿಕಂ ತ್ವಹಮೇವ ಹಿ ।
- ಅಹಮೇವ ತ್ವಮೇವಾಹಮಹಮೇವಾಹಮೇವ ಹಿ ॥ ೭॥
- ಜೀವಾತ್ಮಾ ತ್ವಹಮೇವಾಹಮಹಮೇವ ಪರೇಶ್ವರಃ ।
- ಅಹಮೇವ ವಿಭುರ್ನಿತ್ಯಮಹಮೇವ ಸ್ವಯಂ ಸದಾ ॥ ೮॥
- ಅಹಮೇವಾಕ್ಷರಂ ಸಾಕ್ಷಾತ್ ಅಹಮೇವ ಹಿ ಮೇ ಪ್ರಿಯಮ್ ।
- ಅಹಮೇವ ಸದಾ ಬ್ರಹ್ಮ ಅಹಮೇವ ಸದಾಽವ್ಯಯಃ ॥ ೯॥
- ಅಹಮೇವಾಹಮೇವಾಗ್ರೇ ಅಹಮೇವಾನ್ತರಾನ್ತರಃ ।
- ಅಹಮೇವ ಚಿದಾಕಾಶಮಹಮೇವಾವಭಾಸಕಃ ॥ ೧೦॥
- ಅಹಮೇವ ಸದಾ ಸ್ರಷ್ಟಾ ಅಹಮೇವ ಹಿ ರಕ್ಷಕಃ ।
- ಅಹಮೇವ ಹಿ ಲೀಲಾತ್ಮಾ ಅಹಮೇವ ಹಿ ನಿಶ್ಚಯಃ ॥ ೧೧॥
- ಅಹಮೇವ ಸದಾ ಸಾಕ್ಷೀ ತ್ವಮೇವ ತ್ವಂ ಪುರಾತನಃ ।
- ತ್ವಮೇವ ಹಿ ಪರಂ ಬ್ರಹ್ಮ ತ್ವಮೇವ ಹಿ ನಿರನ್ತರಮ್ ॥ ೧೨॥
- ಅಹಮೇವಾಹಮೇವಾಹಮಹಮೇವ ತ್ವಮೇವ ಹಿ ।
- ಅಹಮೇವಾದ್ವಯಾಕಾರಃ ಅಹಮೇವ ವಿದೇಹಕಃ ॥ ೧೩॥
- ಅಹಮೇವ ಮಮಾಧಾರಃ ಅಹಮೇವ ಸದಾತ್ಮಕಃ ।
- ಅಹಮೇವೋಪಶಾನ್ತಾತ್ಮಾ ಅಹಮೇವ ತಿತಿಕ್ಷಕಃ ॥ ೧೪॥
- ಅಹಮೇವ ಸಮಾಧಾನಂ ಶ್ರದ್ಧಾ ಚಾಪ್ಯಹಮೇವ ಹಿ ।
- ಅಹಮೇವ ಮಹಾವ್ಯೋಮ ಅಹಮೇವ ಕಲಾತ್ಮಕಃ ॥ ೧೫॥
- ಅಹಮೇವ ಹಿ ಕಾಮಾನ್ತಃ ಅಹಮೇವ ಸದಾನ್ತರಃ ।
- ಅಹಮೇವ ಪುರಸ್ತಾಚ್ಚ ಅಹಂ ಪಶ್ಚಾದಹಂ ಸದಾ ॥ ೧೬॥
- ಅಹಮೇವ ಹಿ ವಿಶ್ವಾತ್ಮಾ ಅಹಮೇವ ಹಿ ಕೇವಲಮ್ ।
- ಅಹಮೇವ ಪರಂ ಬ್ರಹ್ಮ ಅಹಮೇವ ಪರಾತ್ಪರಃ ॥ ೧೭॥
- ಅಹಮೇವ ಚಿದಾನನ್ದಃ ಅಹಮೇವ ಸುಖಾಸುಖಮ್ ।
- ಅಹಮೇವ ಗುರುತ್ವಂ ಚ ಅಹಮೇವಾಚ್ಯುತಃ ಸದಾ ॥ ೧೮॥
- ಅಹಮೇವ ಹಿ ವೇದಾನ್ತಃ ಅಹಮೇವ ಹಿ ಚಿನ್ತನಃ ।
- ದೇಹೋಽಹಂ ಶುದ್ಧಚೈತನ್ಯಃ ಅಹಂ ಸಂಶಯವರ್ಜಿತಃ ॥ ೧೯॥
- ಅಹಮೇವ ಪರಂ ಜ್ಯೋತಿರಹಮೇವ ಪರಂ ಪದಮ್ ।
- ಅಹಮೇವಾವಿನಾಶ್ಯಾತ್ಮಾ ಅಹಮೇವ ಪುರಾತನಃ ॥ ೨೦॥
- ಅಹಂ ಬ್ರಹ್ಮ ನ ಸನ್ದೇಹಃ ಅಹಮೇವ ಹಿ ನಿಷ್ಕಲಃ ।
- ಅಹಂ ತುರ್ಯೋ ನ ಸನ್ದೇಹಃ ಅಹಮಾತ್ಮಾ ನ ಸಂಶಯಃ ॥ ೨೧॥
- ಅಹಮಿತ್ಯಪಿ ಹೀನೋಽಹಮಹಂ ಭಾವನವರ್ಜಿತಃ ।
- ಅಹಮೇವ ಹಿ ಭಾವಾನ್ತಾ ಅಹಮೇವ ಹಿ ಶೋಭನಮ್ ॥ ೨೨॥
- ಅಹಮೇವ ಕ್ಷಣಾತೀತಃ ಅಹಮೇವ ಹಿ ಮಙ್ಗಲಮ್ ।
- ಅಹಮೇವಾಚ್ಯುತಾನನ್ದಃ ಅಹಮೇವ ನಿರನ್ತರಮ್ ॥ ೨೩॥
- ಅಹಮೇವಾಪ್ರಮೇಯಾತ್ಮಾ ಅಹಂ ಸಂಕಲ್ಪವರ್ಜಿತಃ ।
- ಅಹಂ ಬುದ್ಧಃ ಪರಂಧಾಮ ಅಹಂ ಬುದ್ಧಿವಿವರ್ಜಿತಃ ॥ ೨೪॥
- ಅಹಮೇವ ಸದಾ ಸತ್ಯಂ ಅಹಮೇವ ಸದಾಸುಖಮ್ ।
- ಅಹಮೇವ ಸದಾ ಲಭ್ಯಂ ಅಹಂ ಸುಲಭಕಾರಣಮ್ ॥ ೨೫॥
- ಅಹಂ ಸುಲಭವಿಜ್ಞಾನಂ ದುರ್ಲಭೋ ಜ್ಞಾನಿನಾಂ ಸದಾ ।
- ಅಹಂ ಚಿನ್ಮಾತ್ರ ಏವಾತ್ಮಾ ಅಹಮೇವ ಹಿ ಚಿದ್ಘನಃ ॥ ೨೬॥
- ಅಹಮೇವ ತ್ವಮೇವಾಹಂ ಬ್ರಹ್ಮೈವಾಹಂ ನ ಸಂಶಯಃ ।
- ಅಹಮಾತ್ಮಾ ನ ಸನ್ದೇಹಃ ಸರ್ವವ್ಯಾಪೀ ನ ಸಂಶಯಃ ॥ ೨೭॥
- ಅಹಮಾತ್ಮಾ ಪ್ರಿಯಂ ಸತ್ಯಂ ಸತ್ಯಂ ಸತ್ಯಂ ಪುನಃ ಪುನಃ ।
- ಅಹಮಾತ್ಮಾಽಜರೋ ವ್ಯಾಪೀ ಅಹಮೇವಾತ್ಮನೋ ಗುರುಃ ॥ ೨೮॥
- ಅಹಮೇವಾಮೃತೋ ಮೋಕ್ಷೋ ಅಹಮೇವ ಹಿ ನಿಶ್ಚಲಃ ।
- ಅಹಮೇವ ಹಿ ನಿತ್ಯಾತ್ಮಾ ಅಹಂ ಮುಕ್ತೋ ನ ಸಂಶಯಃ ॥ ೨೯॥
- ಅಹಮೇವ ಸದಾ ಶುದ್ಧಃ ಅಹಮೇವ ಹಿ ನಿರ್ಗುಣಃ ।
- ಅಹಂ ಪ್ರಪಞ್ಚಹೀನೋಽಹಂ ಅಹಂ ದೇಹವಿವರ್ಜಿತಃ ॥ ೩೦॥
- ಅಹಂ ಕಾಮವಿಹೀನಾತ್ಮಾ ಅಹಂ ಮಾಯಾವಿವರ್ಜಿತಃ ।
- ಅಹಂ ದೋಷಪ್ರವೃತ್ತಾತ್ಮಾ ಅಹಂ ಸಂಸಾರವರ್ಜಿತಃ ॥ ೩೧॥
- ಅಹಂ ಸಙ್ಕಲ್ಪರಹಿತೋ ವಿಕಲ್ಪರಹಿತಃ ಶಿವಃ ।
- ಅಹಮೇವ ಹಿ ತುರ್ಯಾತ್ಮಾ ಅಹಮೇವ ಹಿ ನಿರ್ಮಲಃ ॥ ೩೨॥
- ಅಹಮೇವ ಸದಾ ಜ್ಯೋತಿರಹಮೇವ ಸದಾ ಪ್ರಭುಃ ।
- ಅಹಮೇವ ಸದಾ ಬ್ರಹ್ಮ ಅಹಮೇವ ಸದಾ ಪರಃ ॥ ೩೩॥
- ಅಹಮೇವ ಸದಾ ಜ್ಞಾನಮಹಮೇವ ಸದಾ ಮೃದುಃ ।
- ಅಹಮೇವ ಹಿ ಚಿತ್ತಂ ಚ ಅಹಂ ಮಾನವಿವರ್ಜಿತಃ ॥ ೩೪॥
- ಅಹಂಕಾರಶ್ಚ ಸಂಸಾರಮಹಙ್ಕಾರಮಸತ್ಸದಾ ।
- ಅಹಮೇವ ಹಿ ಚಿನ್ಮಾತ್ರಂ ಮತ್ತೋಽನ್ಯನ್ನಾಸ್ತಿ ನಾಸ್ತಿ ಹಿ ॥ ೩೫॥
- ಅಹಮೇವ ಹಿ ಮೇ ಸತ್ಯಂ ಮತ್ತೋಽನ್ಯನ್ನಾಸ್ತಿ ಕಿಞ್ಚನ ।
- ಮತ್ತೋಽನ್ಯತ್ತತ್ಪದಂ ನಾಸ್ತಿ ಮತ್ತೋಽನ್ಯತ್ ತ್ವತ್ಪದಂ ನಹಿ ॥ ೩೬॥
- ಪುಣ್ಯಮಿತ್ಯಪಿ ನ ಕ್ವಾಪಿ ಪಾಪಮಿತ್ಯಪಿ ನಾಸ್ತಿ ಹಿ ।
- ಇದಂ ಭೇದಮಯಂ ಭೇದಂ ಸದಸದ್ಭೇದಮಿತ್ಯಪಿ ॥ ೩೭॥
- ನಾಸ್ತಿ ನಾಸ್ತಿ ತ್ವಯಾ ಸತ್ಯಂ ಸತ್ಯಂ ಸತ್ಯಂ ಪುನಃ ಪುನಃ ।
- ನಾಸ್ತಿ ನಾಸ್ತಿ ಸದಾ ನಾಸ್ತಿ ಸರ್ವಂ ನಾಸ್ತೀತಿ ನಿಶ್ಚಯಃ ॥ ೩೮॥
- ಇದಮೇವ ಪರಂ ಬ್ರಹ್ಮ ಅಹಂ ಬ್ರಹ್ಮ ತ್ವಮೇವ ಹಿ ।
- ಕಾಲೋ ಬ್ರಹ್ಮ ಕಲಾ ಬ್ರಹ್ಮ ಕಾರ್ಯಂ ಬ್ರಹ್ಮ ಕ್ಷಣಂ ತದಾ ॥ ೩೯॥
- ಸರ್ವಂ ಬ್ರಹ್ಮಾಪ್ಯಹಂ ಬ್ರಹ್ಮ ಬ್ರಹ್ಮಾಸ್ಮೀತಿ ನ ಸಂಶಯಃ ।
- ಚಿತ್ತಂ ಬ್ರಹ್ಮ ಮನೋ ಬ್ರಹ್ಮ ಸತ್ಯಂ ಬ್ರಹ್ಮ ಸದಾಽಸ್ಮ್ಯಹಮ್ ॥ ೪೦॥
- ನಿರ್ಗುಣಂ ಬ್ರಹ್ಮ ನಿತ್ಯಂ ಚ ನಿರನ್ತರಮಹಂ ಪರಃ ।
- ಆದ್ಯನ್ತಂ ಬ್ರಹ್ಮ ಏವಾಹಂ ಆದ್ಯನ್ತಂ ಚ ನಹಿ ಕ್ವಚಿತ್ ॥ ೪೧॥
- ಅಹಮಿತ್ಯಪಿ ವಾರ್ತಾಽಪಿ ಸ್ಮರಣಂ ಭಾಷಣಂ ನ ಚ ।
- ಸರ್ವಂ ಬ್ರಹ್ಮೈವ ಸನ್ದೇಹಸ್ತ್ವಮಿತ್ಯಪಿ ನ ಹಿ ಕ್ವಚಿತ್ ॥ ೪೨॥
- ವಕ್ತಾ ನಾಸ್ತಿ ನ ಸನ್ದೇಹಃ ಏಷಾ ಗೀತಾ ಸುದುರ್ಲಭಃ ।
- ಸದ್ಯೋ ಮೋಕ್ಷಪ್ರದಂ ಹ್ಯೇತತ್ ಸದ್ಯೋ ಮುಕ್ತಿಂ ಪ್ರಯಚ್ಛತಿ ॥ ೪೩॥
- ಸದ್ಯ ಏವ ಪರಂ ಬ್ರಹ್ಮ ಪದಂ ಪ್ರಾಪ್ನೋತಿ ನಿಶ್ಚಯಃ ।
- ಸಕೃಚ್ಛ್ರವಣಮಾತ್ರೇಣ ಸದ್ಯೋ ಮುಕ್ತಿಂ ಪ್ರಯಚ್ಛತಿ ॥ ೪೪॥
- ಏತತ್ತು ದುರ್ಲಭಂ ಲೋಕೇ ತ್ರೈಲೋಕ್ಯೇಽಪಿ ಚ ದುರ್ಲಭಮ್ ।
- ಅಹಂ ಬ್ರಹ್ಮ ನ ಸನ್ದೇಹ ಇತ್ಯೇವಂ ಭಾವಯೇತ್ ದೃಢಮ್ ।
- ತತಃ ಸರ್ವಂ ಪರಿತ್ಯಜ್ಯ ತೂಷ್ಣೀಂ ತಿಷ್ಠ ಯಥಾ ಸುಖಮ್ ॥ ೪೫॥
ಸೂತಃ -
- ಭುವನಗಗನಮಧ್ಯಧ್ಯಾನಯೋಗಾಙ್ಗಸಙ್ಗೇ
- ಯಮನಿಯಮವಿಶೇಷೈರ್ಭಸ್ಮರಾಗಾಙ್ಗಸಙ್ಗೈಃ ।
- ಸುಖಮುಖಭರಿತಾಶಾಃ ಕೋಶಪಾಶಾದ್ವಿಹೀನಾ
- ಹೃದಿ ಮುದಿತಪರಾಶಾಃ ಶಾಂಭವಾಃ ಶಂಭುವಚ್ಚ ॥ ೪೬॥
- ॥ ಇತಿ ಶ್ರೀಶಿವರಹಸ್ಯೇ ಶಙ್ಕರಾಖ್ಯೇ ಷಷ್ಠಾಂಶೇ ಋಭುನಿದಾಘಸಂವಾದೇ ಸರ್ವಸಿದ್ಧಾನ್ತಸಂಗ್ರಹಪ್ರಕರಣಂ ನಾಮ ಸಪ್ತದಶೋಽಧ್ಯಾಯಃ ॥
Special Thanks
The Sanskrit works, published by Sri Ramanasramam, have been approved to be posted on sanskritdocuments.org by permission of Sri V.S. Ramanan, President, Sri Ramanasramam.
Credits
Encoded by Anil Sharma anilandvijaya at gmail.com
Proofread by Sunder Hattangadi and Anil Sharma
https://sanskritdocuments.org
Send corrections to sanskrit at cheerful.com