.. श्री कृष्णजयन्ती निर्णयः ..

          श्री गुरुभ्यो नमः हरिः ॐ
           श्रीमदानन्दतीर्थ भगवत्पादाचार्य विरचितः
           श्री कृष्णजयन्ती निर्णयः

रोहिण्या मध्यरात्रे तु यदा कृष्णाष्टमी भवेत्  .
जयन्ती नाम सा प्रोक्ता सर्वपापप्रणाशनी(नं).. १..

यस्यां जातो हरिः साक्षान्नि शेते भगवानजः  .
तस्मात्तद्दिनमत्यर्थं पुण्यं पापहरं शुभपरं  .. २..

तस्मात्सर्वैर्रुपोश्या सा जयन्ती नाम सा(वै)सदा  .
द्विजातिभिर्विशेषेण तद्भक्तैश्च विशेषतः  .. ३..

यो भुङ्क्ते तद्दिने मोहा(लोभा)त् पूयशोणितमत्ति सः  .
तस्मादुपवासेन्नित्य(पुण्य)ं तद्दिने(नं)श्रद्धयान्वितः  .. ४..

कृत्वा शौचं यथा न्यायं स्नानं कुर्यादतंद्रितः  .
प्रभात काले कुर्वीत योओगायेत्यादिमन्त्रतः  .. ५..

नित्याह्निकं प्रकुर्वीत भगवन्तमनुस्मरन्  .
मध्याह्न काले च पुमान् सायङ्काले त्वतन्द्रितः  .. ६..

स्नायेत पूर्वमन्त्रेण वासुदेवमनुस्मरन्  .
ततः पूजां प्रकुर्वेत विधिवत्सुसमाहितः  .. ७..

यनायेति च मन्त्रेण श्रद्धाभक्तियुतः पुमान्  .
कृष्णं च बलभद्रं च वसुदेवं च देवकीं  .. ८..

नन्दगोपं यशोदाञ्च सुभद्रां तत्र पूजयेत्  .
(अर्घ्यं दत्वा समभ्यच्यार्भ्युधिते शशिमण्डले).
जातः कंसवधार्ताय भूभारोत्थारणाय च   .. ९..

कौरवानां विनाशाय दैत्यानां निधनाय च  .
पाण्डवानां हितार्थाय धर्मसंस्थापनाय च   .. १०.

गृहाणर्घ्यं मया दत्तं देवक्या सहितो हरिः  .
अर्घ्यं दत्वासमभ्यर्च्याभ्युदिते शशिमण्डले   .. ११..

क्षीरोदार्णवसम्भूत अत्रिनेत्र समुद्भवः  .
गृहाणर्घ्यं मया दत्तं रोहिण्या सहितः शशिम्  .. १२..

दत्वार्घ्यं मनुनानेन उपस्थाय विधुं बुधः  .
शशिने चन्द्रदेवाय सोमदेवाय छेन्दवे  .. १३..

मृगिणे शी(सि)त बिंबाय लोकदीपाय दीपिणे  .
(रोहिणीसक्तचित्ताय कन्यादानप्रदायिने)
शीतदीदितिबिंबाय तारकापतये नमः   .. १४..

उपसम्हृत्य तत्सर्वं ब्रह्मचारी जितेन्द्रियः  .
विश्वायेति च मन्त्रेण ततः स्वापं समाचरेत्  .. १५..

ततो नित्यान्हि कं कृत्वा शक्तितो दीयतां धनं  .
सर्वायेति च मन्त्रेण ततः पारणमाचरेत्  .
धर्मायेति ततः स्वस्थो मुच्यते सर्वकिल्बिषैः  .. १६..

          .. इति श्रीमदानन्दतीर्थ भगवत्पादाचार्य विरचितं ..
          .. जयन्ती निर्णयः संपूर्णम् ..

          भारतीरमणमुख्यप्राणान्तर्गत श्रीकृष्णार्पणमस्तु

 Please send corrections to info@dvaita.org
 Last updated October 20 1998 for HTML version

This page uses Unicode utf-8 encoding for devanagari. Please set the fonts and languages setting in your web browser to display the correct Unicode font. Questions, comments:sanskrit@cheerful.com