.. श्री शङ्करभगवत्पादकृत
         लक्ष्मीनृसिंह करावलम्ब स्तोत्रम् ..
श्रीमत्पयोनिधिनिकेतन चक्रपाणे
       भोगीन्द्रभोगरमणिरञ्जित पुण्यमूर्ते .
योगीश शाश्वत शरण्यभवाब्धिपोत
       लक्ष्मीनृसिंह मम देहि करावलम्बम् .. १..
ब्रह्मेन्द्ररुद्रमरुदर्ककिरीटकोटि
       सङ्घट्टिताङ्घ्रिकमलामलकान्तिकान्त .
लक्ष्मीलसत्कुचसरोरुहराजहंस
       लक्ष्मीनृसिंह मम देहि करावलम्बम् .. २..
संसारघोरगहने चरतो मुरारे
       मारोग्रभीकरमृगप्रवरार्दितस्य .
आर्तस्य मत्सरनिदाघनिपीडितस्य
        लक्ष्मीनृसिंह मम देहि करावलम्बम् .. ३..
संसारकूपमतिघोरमगाधमूलं
        संप्राप्य दुःखशतसर्पसमाकुलस्य .
दीनस्य देव कृपणापदमागतस्य
        लक्ष्मीनृसिंह मम देहि करावलम्बम् .. ४..
संसारसागरविशालकरालकाल- 
       नक्रग्रहग्रसननिग्रहविग्रहस्य .
व्यग्रस्य रागरसनोर्मिनिपीडितस्य
        लक्ष्मीनृसिंह मम देहि करावलम्बम् .. ५..
संसारवृक्षमघबीजमनन्तकर्म- 
       शाखाशतं करणपत्रमनङ्गपुष्पम् .
आरुहा दुःखफलितं पततो दयालो
        लक्ष्मीनृसिंह मम देहि करावलम्बम् .. ६..
संसारसर्पघनवक्त्रभयोग्रतीव्र- 
        दंष्ट्राकरालविषदग्धविनष्टमूर्तेः .
नागारिवाहन सुधाब्धिनिवास शौरे
         लक्ष्मीनृसिंह मम देहि करावलम्बम् .. ७..
संसारदावदहनावदभीकरोरु- 
         ज्वालावलीभिरतिदग्धतनूरुहस्य .
त्वत्पादपद्मसरसीशरणागतस्य
         लक्ष्मीनृसिंह मम देहि करावलम्बम् .. ८..
संसारजालपतितस्य जगन्निवास
         सर्वेन्द्रियार्थबडिशार्थझषोपमस्य .
प्रोत्खण्डितप्रचुरतालुकमस्तकस्य
          लक्ष्मीनृसिंह मम देहि करावलम्बम् .. ९..
संसारभीकरकरीन्द्रकराभिगात- 
       निष्पिष्टमर्मवपुषः सकलार्थिनाश .
प्राणप्रयाणभवभीतिसमाकुलस्य
        लक्ष्मीनृसिंह मम देहि करावलम्बम् .. १०..
अन्धस्य मे हृत्विवेकमहाधनस्य
       चोरैः प्रभो बलिभिरिन्द्रियनामधेयैः .
मोहान्धकूपकुहरे विनिपातितस्य
        लक्ष्मीनृसिंह मम देहि करावलम्बम् .. ११..
बद्ध्वा गले यमभटा बहुतर्जयन्तः
       कर्षन्ति यत्र भवपाशशतैर्युतं माम् .
एकाकिनं परवशं चकितं दयालो
        लक्ष्मीनृसिंह मम देहि करावलम्बम् .. १२..
लक्ष्मीपते कमलनाभ सुरेश विष्णो
       वैकुण्ठ कृष्ण मधुसूदन पुष्कराक्ष .
ब्रह्मण्य केशव जनार्दन वासुदेव
        लक्ष्मीनृसिंह मम देहि करावलम्बम् .. १३..
एकेन चक्रमपरेण करेण शङ्ख- 
       मन्येन सिन्धुतनयामवलम्ब्य तिष्ठन् .
वामे करेण वरदाभयपद्मचिह्नं
        लक्ष्मीनृसिंह मम देहि करावलम्बम् .. १४..
संसारसागरनिमज्जनमुह्यमानं
        दीनं विलोकय विभो करुणानिधे माम् .
प्रह्लादखेदपरिहारपरावतार
        लक्ष्मीनृसिंह मम देहि करावलम्बम् .. १५..
प्रह्लाद- नारद- पराशर- पुण्डरीक- 
       व्यासादि भगवत्पुङ्गव हृन्निवास .
भक्तानुरक्तपरिपालनपारिजात
        लक्ष्मीनृसिंह मम देहि करावलम्बम् .. १६..
लक्ष्मीनृसिंह चरणाब्जमधुव्रतेन
       स्तोत्रं कृतं शुभकरं भुवि शङ्करेण .
ये तत्पठन्ति मनुजा हरिभक्तियुक्ता- 
      स्ते यान्ति तत्पदसरोजमखण्डरूपम् .. १७..
           .. श्री लक्ष्मीनृसिंहार्पणमस्तु ..
इति श्री शङ्करभगवत्पादकृत लक्ष्मीनृसिंह करावलम्ब स्तोत्रं संपूर्णम् ..

Encoded by Sunder Hattangadi (sunderh@hotmail.com)

This page uses Unicode utf-8 encoding for devanagari. Please set the fonts and languages setting in your web browser to display the correct Unicode font. Questions, comments:sanskrit@cheerful.com